Mateo 5
5
1Yesu nwuni ɛlɔen ne, ɔhɔle bokaa naso; na ɔtenane ase ne, ye asuafoɛ ne wale ye nwo berɛ. 2Na ɔhyɛle yebo hyirehyirele bɛ kyɛ:
3“Anigye#5:3 Anaa “Nhyira.” yeɛ ole bɛ bɔ bɛnwu ye kyɛ behia Nyameɛ akwankyerɛ ne,
ofikyɛ bɛ yeɛ anwuro Ahennie ne te bɛ deɛ ɔ.
4Anigye yeɛ ole bɛ bɔ bɛ wora abɔ ne,
ofikyɛ bɛkɔkyekye bɛ wora.
5Anigye yeɛ ole anwobraseɛfoɛ,
ofikyɛ bɛ yeɛ bekonya aseɛ ne ɔ.
6Anigye yeɛ ole bɛ bɔ tenenee nwo hɔen ne nzuhɔen ku bɛ ne,
ofikyɛ bɛ ko koyi.
7Anigye yeɛ ole bɛ bɔ bɛnwu mmenia anwunvoin ne,
ofikyɛ bɛ koso, bɛkonwu bɛ anwunvo.
8Anigye yeɛ ole bɛ bɔ b'ahone nu te ne,
ofikyɛ bɛkonwu Nyameɛ.
9Anigye yeɛ ole bɛ bɔ bɛboka maa asomdwie ba ne
ofikyɛ bɛkɔfrɛ bɛ Nyameɛ mmaa.
10Anigye yeɛ ole bɛ bɔ tenenee ti, bɛnwu amaneɛ ne,
ofikyɛ anwuro Ahennie ne te bɛ deɛ.”
11“Anigye yeɛ ole ɛmɔ bɔ me ti, mmenia bɔ ɛmɔ alapaa, bɛtane ɛmɔ nye, na bɛpɛ ngondombo bɛka edwirɛ tɛɛ bɛfa ɛmɔ nwo ne. 12Ɛmɔma ɛmɔ nye gye na ɛmɔli ahurusi, ofikyɛ ɛmɔ akatua bɔ ɔwɔ anwuro ne te piri; sɔ ala yeɛ ne bɛtane adiifoɛ bɔ beli ɛmɔ nyunu ne nye ɔ.
13“Ɛmɔte aseɛ he aso ngyee, nakoso, sɛ ngyee fɛɛ fi nu a, ɔkɔyɛ sɛɛ ne wasa wanya ye bieku? Ɔba sɔ a, mvasoɛ biala nne so kõ, sana begyi bɛgua maa mmenia tietia so.
14“Ɛmɔte wiase ne kanea. Kuro bɔ ɔla bokaa so ne, ɔngora fea. 15Sɔ ala yeɛ sɛ bɛsɔ kanea a, bɛmva benwura kɛndɛn bo, mmom bɛfa besie kanea bakaa so, ná wata maa ebiala anwu awuro berɛ. 16Sɔ ala yeɛ ɛmɔ koso, ɛmɔma ɛmɔ kanea ta wɔ mmenia nyunu, ná banwu ɛmɔ nneyɛɛ pa ne, na bahyɛ ɛmɔ Baba bɔ ɔwɔ anwuro ne anuonyam.
17“Nnɛmɔ nya adwene kyɛ, mmale kyɛ me baasɛkye Mmeraa anaa Adiifoɛ ne. Mamma kyɛ me baasɛkye ye, mmom, mema ɔba nu. 18Nahorɛ dwirɛ yeɛ ole kyɛ, kodwu kyɛ anwuro ne aseɛ kɔpɛ nu ne, Mmeraa nanu ndworɔyɛ kamba kõ, anaa nikye bɔ osa ndworɔyɛ nanwo ne komapɛ po nne berɛ bɔ ɔkɔpɛ nu, bɔ ɔngɔwa nu ɔ. 19Yeti, ebiala bɔ okobu mmeraa nanu ahyɛdeɛ ne komapɛ po so, na ɔkɔha kohyire mmenia kyɛ bɛyɛ sɔ ne, bɛkɔfrɛ ye kamba wɔ anwuro Ahennie nanu. Nakoso ebiala bɔ odi so, na okyirekyire mmenia kyɛ bɛyɛ sɔ ne, bɛkɔfrɛ ye sona titire wɔ anwuro Ahennie nanu. 20Na meka mekyire ɛmɔ kyɛ, sɛ ɛmɔ tenenee ammo atwerɛfoɛ ne Farisifoɛ nemɔ deɛ naso a, ɛmɔ ngɔhora bɛngɔ wura anwuro Ahennie nanu.
21“Ɛmɔ tele kyɛ, bɛha bɛhyirele tetefoɛ nemɔ kyɛ: ‘Nnɛdi awue, na ebiala bɔ okoli awue ne, okoli fɔ wɔ kɔɔto.’ 22Nakoso meka mekyire ɛmɔ kyɛ, ebiala bɔ ɔtaa fɛ oliema so yaa ne, okoli fɔ wɔ kɔɔto; na ebiala bɔ ɔka edwirɛ bɔ ɔyɛ yea tia oliema ne koli fɔ wɔ kɔɔto kandinga nanu; yeɛ ebiala bɔ ɔka kyɛ, ‘Ɛte kwasea-mbane!’ ne, bɛkɔfa ye bɛkɔto Gehenna see bɔ ɔsɔ buru-buru nanu.
23“Sɛ́ ɛfa w'akyɛdeɛ ba afɔleɛ bokyea ne nyunu, na ɛberɛ ala ɛkaye kyɛ eliema bie ne wɔ le edwirɛ a, 24yakyi w'akyɛdeɛ ne wɔ afɔleɛ bokyea ne nyunu, na kɔ. Di moa ne eliema ne siesie ɛmɔ afia, kora ne aabɔ w'afɔleɛ ne.
25“Sɛ ebie sama wɔ a, mmerɛ bɔ ɛmɔ nate atee so bɛkɔ ne, ɛne ye siesie ɛmɔ afia. Wanyɛ sɔ a, ɔkɔfa wɔ kɔma temmufoɛ ne, na ye koso ɔkɔfa wɔ kɔma somvoɛ ne maa ɔkɔfa wɔ kɔto prizin. 26Nahorɛ nu, meka mekyire wɔ kyɛ, sɛ andua kerɛ namukoraati a, bɛngɔ ye wɔ ma ɛngɔhɔ.
27“Ɛmɔ tele kyɛ bɛha behyirele bɛ kyɛ: ‘Nnɛsɛkye agyaa.’ 28Nakoso, meka mekyire ɛmɔ kyɛ, ebiala bɔ ɔkɔnea brasua tonn konya akɔnnɔ kɔma ye ne, ɔne ye asɛkye agyaa wɔ y'ahone nu. 29Sɛ wɔ nye famaa to wɔ sintidua a, tu, na gyi to. Ofikyɛ ɔte pa kyɛ ɛkɔhwere w'akwaa bie, tra kyɛ ɛkɔto wɔ nipadua mukoraati kɔto Gehenna. 30Na sɛ wɔ sa famaa to wɔ sintidua a, pɛ, na gyi to. Ofikyɛ ɔte pa kyɛ ɛkɔhwere w'akwaa bie, tra kyɛ ɛkɔto wɔ nipadua namukoraati kɔto Gehenna.
31“Afei, bɛhane kyɛ: ‘Ebiala bɔ okoyira ɔye ne, ɔma ye krataa bɔ okyire kyɛ wayira ye ɔ.’ 32Nakoso, meka mekyire ɛmɔ kyɛ, sɛ ɛye bɔlle adwaman, na eyira ye a, ɔkɔhora kɔmaa ɔkɔsɛkye agyaa. Na ebiala bɔ okogya brasua bɔ bayira ye ne, wasɛkye agyaa.
33“Afei koso, ɛmɔtele kyɛ bɛha behyirele tetefoɛ ne kyɛ: ‘Nnɛta ndaen bɔ ɛngɔhora so di, mmom sɛ ɛhyɛ Awurade bɔ a, di so.’ 34Nakoso, meka mekyire ɛmɔ kyɛ: Nnɛmɔ ta ndaen koraa, nnɛta anwuro ndaen, ofikyɛ ɔte Nyameɛ bia;#5:34 Okyire bia bɔ ɔhene tena so ne 35nnɛta aseɛ koso ndaen, ofikyɛ ɛwa yeɛ ye gya gyi ɔ; afei nnɛta Yerusalem ndaen, ofikyɛ ɔte Ɔhene kandinga ne kuro. 36Nnɛta wɔ ti nwiaa ndaen, ofikyɛ ɛngɔhora ngɔmaa wɔ ti nwiaa komapɛ po ngɔyɛ fufue anaa bire. 37Ɛmɔ de, sɛ ɛmɔka ‘Yoo’ a, ɛmɔma ɔyɛ yoo, na sɛ ‘Daabi’ koso a, ɔyɛ daabi, ɛhe si ne, bɔ ɛmɔkɔha biala fi ɔbɔnefoɛ ne berɛ.
38“Ɛmɔtele kyɛ bɛha bɛhyirele bɛ kyɛ, ‘Anyeɛ si anyeɛ gya nu, na agyee si agyee gya nu.’ 39Nakoso, meka mekyire ɛmɔ kyɛ: Nnɛmɔ ne ɔbɔnefoɛ pere, sɛ ebie bɔ wɔ so famaa nu a, kakyi bɛen ne ma ye. 40Sɛ ebie fa wɔ kɔ kɔɔto, kyɛ ɔpena kyɛ odɛ w'atadeɛ bɔ ɔwɔ yebo ne a, fa bɔ ogua so ne koso ma ye; 41na sɛ ebie bɔ ole tumi hyɛ wɔ kyɛ ɛmɔpɛ kwanzii kõ a, ɛne ye pɛ kwanzii nyɔ. 42Sɛ ebie serɛ wɔ nikye a, fa ma ye, na sɛ ebie pena kyɛ ɛbɔ ye bosea a, nnɛbɔ ye atienuserɛ.
43“Ɛmɔtele kyɛ, bɛhane kyɛ, ‘Dɔ wɔ mmango, ne kyi wɔ tamfo.’ 44Nakoso, meka mekyire ɛmɔ kyɛ: Ɛmɔhɔ so bɛlɔ ɛmɔ atamfo, na ɛmɔbɔ mbaeɛ bɛma bɛ bɔ bɛtane ɛmɔ nye ne, 45ɛhe yeɛ okyire kyɛ ɛmɔte ɛmɔ Baba bɔ ɔwɔ anwuro ne mmaa mɔ ɔ. Ye yeɛ ɔmaa eyia fite mmeni pa, ne mmeni tɛɛ mukoraati so, na ɔmaa nzue tɔ gua ateneneefoɛ ne abɔnefoɛ mukoraati so ne. 46Sɛ ɛmɔdɔ bɛ bɔ bɛdɔ ɛmɔ ne ngome a, mvasoɛ beni yeɛ ɛmɔ konya ye ɔ? Bɛ bɔ bɛdide toɔ ne po, nná sɔ yeɛ bɛyɛ ɔ? 47Na sɛ ɛmɔ aliema mɔ ngome yeɛ ɛmɔ kyẽa bɛ a, nzu yeɛ ne ɛmɔ ayɛ maa wabo so ɔ? Nná sɔ ala yeɛ wiasefoɛ ne koso yɛ ɔ? 48Na kyɛbɔ ɛmɔ Baba bɔ ɔwɔ anwuro ne yɛ ye nikye biala pɛpɛɛpɛ ne, ɛmɔ koso ɛmɔyɛ sɔ ala.”
Currently Selected:
Mateo 5: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
