Marko 13
13
1Ofí asɔre awuro berɛ kɔ ne, asuafoɛ nanu kõ wale ye berɛ, yeɛ ɔha hyirele ye kyɛ: “Kyerɛkyerɛniɛ, nea nyɔboɛ ne sua hemɔ, ye nyemene!” 2Nakoso Yesu ha hyirele ye kyɛ: “Nnaa ɛmɔ anwu sɔ sua mbiri-mbiri hemɔ? Ɔtte nikye bɛ bɛkɔyakyi nyɔboɛ wɔ nyɔboɛ so wɔ wa ɔ. Bɛkɔdwiri ye mukoraati bɛkogua.”
3Mmerɛ bɔ Yesu te Olive bokaa naso ne, né ye nye tua asɔre awuro ne, na Petro, Yakobo, Yohane, ne Andrea wale ye berɛ kokoanu, yeɛ bɛbisale ye kyɛ: 4“Ka kyire yɛ, kyinzu yeɛ ɛhemɔ kosi ɔ? Na nzu yeɛ ɔkɔmaa yɛkonwu kyɛ sɔ nningyein hemɔ baasisi ɔ?” 5Yeti, Yesu hyɛle yebo ha hyirele bɛ kyɛ: “Ɛmɔnea yé na ebiala anlaka-laka ɛmɔ. 6Mmeni pee kɔfa me dumaa kɔwa kɔɔha kyɛ, ‘Me yeɛ nne ye,’ na bɛkɔlaka-laka mmeni pee. 7Afei koso, sɛ ɛmɔte koɛ ne koɛ nwo dwirɛ a, nnɛmɔ maa ɛmɔ kunu tete ɛmɔ; odikyɛ sɔ nningyein hemɔ sisi, nakoso né awieɛ ne nnya walle. 8Na maen kɔdwɔso kotia maen, ná ahennie adwɔso atia ahennie, aseɛ wosolɛ kosi nekaa ahoroɛ, na ɛhɔen kɔwa. Ɛhemɔ te aworɛ nu yealɛ né ahyɛaseɛ.
9“Ɛmɔ de, ɛmɔnea ɛmɔ nwo yé, ofikyɛ mmenia kɔfa ɛmɔ kɔhɔ kɔɔto, na me ti, bɛkogwa ɛmɔ wɔ sua bɔ beyia nu nanu, na bɛkɔfa ɛmɔ bɛkɔhɔ amrado ne ahemvo nyunu, ná wayɛ adanzeɛ wama bɛ. 10Na odikyɛ bɛdi moa bɛka nzɛmba ne bɛkyire maen-maen namukoraati. 11Na sɛ bɛkye ɛmɔ, na bɛkwaaye ɛmɔ bɛma a, nnɛmɔ dwene bɔ ɛmɔkɔha nwo, mmom bɔ bɛkɔfa bɛkɔma ɛmɔ sɔ mmerɛ ne, ɛhene yeɛ ɛmɔha ɔ. Ofikyɛ nná ɛmɔ yeɛ ɛmɔ kodwudwo ɔ, mmom honhom krongron ne. 12Aliemaa kɔye oliema kɔma maa bɛkɔhu ye, baba kɔye ɔwa kɔma, na ngwalaa kɔdwɔso kotia b'awofo, na bɛkɔmaa bɛkɔhu bɛ. 13Na me dumaa ti, ebiala kɔtane ɛmɔ, nakoso, bɔ okomia ye nye kogyina nu koodwu awieɛ ne, ye yeɛ okonya ngoa ɔ.
14“Na sɛ ɛmɔnwu akyiwadeɛ bɔ ɔbɔ maen ne kyɛ ogyi nekaa bɔ ɔnzɛ kyɛ ogyina ne a (odikyɛ bɔ ɔkenga ne te yebo), ye de ɛmɔma bɛ bɔ bɛwɔ Yudea ne nwati hɔ mmokaa so. 15Nnɛmaa bɔ ɔte sua tiafia ne dwu ase kyɛ ɔbaafa nikye fi ye awuro. 16Na bɔ wahɔ fiɛso ne, nnɛmaa ɔba awuro kyɛ ɔbaafa ye atadeɛ. 17Bɛ bɔ bɛnwonzɛ, ne bɛ bɔ bɛma ngwalaa nyɔfone ne de, bɛ yaakɔ! 18Ɛmɔbɔ mbaeɛ, na ɛhe anzi ayirɛ mmerɛ. 19Ofikyɛ ahohiehia bɔ ɔkɔwa sɔ mmerɛ ne, ofi mmerɛ bɔ Nyameɛ bɔle wiase bɔ ɔbaadwu ɛnɛ#13:19 Anaa “Sɔ mmerɛ ne,” kyire kyɛ mmerɛ bɔ ahohiehia ne kɔwa ne. ne, ebie wale lle, na ye si ne, kõ nngɔwa. 20Sɛ Awurade ambɛ ngyẽa naso a, ebiala nne berɛ bɔ okonya ngoa ɔ, nakoso, bɛ bɔ waye bɛ nati, ɔkɔpɛ ngyẽa naso. 21Sɔ mmerɛ ne, sɛ ebie ka kyire ɛmɔ kyɛ, ‘Ɛmɔnea, Kristo ne wɔ wa,’ anaa ‘Nea, ye yeɛ ɔwɔ dɔ ne’ a, nnɛmɔ dɛ́ bɛdi. 22Ofikyɛ ngondombo Kristo ne ngondombo adiifoɛ pee kɔwa, bɛkɔyɛ nzɛngyerɛneɛ ne anwanwadeɛ pee, na sɛ ɔkɔyɛ yé a, bɛkɔlaka-laka bɛ bɔ baye bɛ ne po. 23Ɛmɔ de, ɛmɔma ɛmɔ nye la berɛ. Mali moa maha ɛhe mahyire ɛmɔ. 24Na sɔ ngyẽa nanu ne, ahohiehia ne si ne,
‘eyia ne kɔkakyi awosii,
ɛsraen ne ngɔta.
25Na nzramaa kofi anwuro kɔtete kogua ase,
na bɛkɔwoso anwuro anwoserɛ.’
26“Afei, bɛkonwu kyɛ Sona Awa ne ba, na ɔnate munungum nu bɔ ole tumi paa ne anuonyam. 27Na ɔkɔsoma ye abɔfo maa bɛkɔboɔboa bɛ bɔ baye bɛ ne noa bɛkofi mvrama nna nanu, fi anwuro noa koodwu anwuro noa.
28“Afei, ɛmɔsua ɛhe bɛfi borɔdoma bakaa ne berɛ: Sɛ onya fa nyaa a, ɛmɔse kyɛ, ɔngɔhyɛ ne ahuhuro awa. 29Sɔ ala yeɛ ɛmɔ koso, sɛ ɛmɔnwu kyɛ nningyein hemɔ sisi a, ɛmɔnwu ye kyɛ wadwu anoa ne si pɛɛ. 30Nahorɛ, meka mekyire ɛmɔ kyɛ, sɔ aworɛ ndoɔtoasoɛ ne#13:30 Anaa “Sɔ mmenia ne.” nngɔpɛ nu, sana nningyein he amukoraati awa nu kora. 31Anwuro ne aseɛ kɔpɛ nu, nakoso me dwirɛ ne de, ɔngɔpɛ nu lle.
32“Na kyẽa ne né dɔnhwere ne de, ebiala nze, abɔfo bɔ bɛwɔ anwuro ne Baa ne po nze, Baba ne ngome yeɛ ɔse ɔ. 33Ɛmɔla ɛmɔ nwo so, na ɛmɔma ɛmɔ nye la berɛ, ofikyɛ ɛmɔnze mmerɛ bɔ bahyɛ ne. 34Ɔte kyɛ biaa bie bɔ otu atee, na ɔfale ye awuro wurale ye ngoaa sa, ɔfale ebiala adwuma mane ye, yeɛ ɔha hyirele bɔ ɔte anoa nanwo ne kyɛ, ɔmaa ye nye la berɛ. 35Yeti, ɛmɔma ɛmɔ nye la berɛ, ofikyɛ ɛmɔnze mmerɛ bɔ ɛmɔ wura ne kɔwa ɔ; kyɛ ɔkɔwa nnɔsoa anaa kɔngɔen, alobahene anaa ngyerɛmɔ tutuutu, 36ná wamma amvu ɛmɔ nu, wannwu kyɛ ɛmɔ ala. 37Na bɔ meka mekyire ɛmɔ ne, meka mekyire ebiala: Ɛmɔma ɛmɔ nye la berɛ.”
Currently Selected:
Marko 13: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
