Marko 14
14
1Né waha ɛlɛnyɔ maa bɛdi Pɛnu ne Paanoo Bɔ Yiste Nne Nu Afahyɛ ne. Né sɔfo mbanyi ne atwerɛfoɛ nemɔ pena atee bɔ bɛkɔfa so bɛkɔhye Yesu kodɛɛ, ná bahu ye. 2Na bɛhane kyɛ: “Yɛngɔyɛ ye wɔ afahyɛ nabo, wanyɛ sɔ a, mmenia ne kɔyɛ basabasa.”
3Yesu didi wɔ kwataniɛ Simon awuro wɔ Betania ne, maame bie wale berɛ, né otira alabasta towaa bɔ ngoo#14:3 Okyire “Lafenta”—Ɔte nikye bɔ bɛfa bɛgua bɛ nwo maa bɛ nwo bo fona. wɔ nu, nardo ngoo fona-fona bɔ ye nyɔboɛ yɛ se. Otuli so, na ohwie guale Yesu ti anu. 4Bɔ ɔyɛ ne, né ɔyɛ bɛ bɔ bɛwɔ berɛ ne bie ahi, yeti bɛha bɛhyirele ye kyɛ: “Nzuati yeɛ ɛsɛkye ngoo ne? 5Ahaa ɛkɔhora kɔtɔne sɔ ngoo fona-fona he konya dɛnare 300, na afa ama ahiafoɛ.” Bɛfɛle ye so yaa paa.#14:5 Anaa “Bɛ dwudwole ye paa.” 6Nakoso Yesu ha hyirele bɛ kyɛ: “Ɛmɔyakyi ye, nzuati yeɛ ɛmɔha ye ne? Bɔ wayɛ wama me ne, ɔte piri paa. 7Ahiafoɛ de, daa bɛne ɛmɔ yeɛ ɛwɔ wa ɔ, ná ɛmɔ kɔhora bɛkɔyɛ bɛ pa, nakoso me de, ɛmɔngonya me daa. 8Wayɛ bɔ ɔkɔhora ɔ, wafa ngoo fona-fona he wagua me nwo wafa wasiesie me nipadua ne wama kyẽa bɔ bɛkosie me ne. 9Na meka kyire ɛmɔ kyɛ, nekaa biala bɔ bɛkɔha nzɛmba ne wɔ wiase amukoraati ne, bɔ braa he ayɛ ne, bɛkɔha bɛkɔkaye ye.”
10Na Yuda Iskariot, bɔ ɔte buru-ne-nyɔ nanu kõ ne hɔle sɔfo mbanyi nemɔ berɛ kyɛ ɔkwaaye Yesu ma bɛ. 11Mmerɛ bɔ bɛtele ɛhe ne, bɛ nye gyele, na bɛhyɛle ye bɔ kyɛ bɛkɔma ye sikaa. Yeti, ɔhyɛle yebo penane atee bɔ ɔkɔfa so kɔye ye kɔma ɔ.
12Afei, kyẽa bɔ oli moa bɔ bɛdi Paanoo Bɔ Yiste Nne Nu ne, kyẽa bɔ bɛfa Pɛnu boan ne bɛbɔ afɔleɛ ne, ye asuafoɛ ne bisale ye kyɛ: “Nisua yeɛ ɛpena kyɛ yɛsiesie maa ɛdi Pɛnu ne?” 13Yeti ɔsomane asuafoɛ nanu nyɔ, na ɔha hyirele bɛ kyɛ: “Ɛmɔhɔ kuro nanu, biaa bie bɔ ɔsõ bua koyia ɛmɔ, ɛmɔli ye si. 14Awuro biala bɔ okowura nu ne, ɛmɔha behyire efiewura ne kyɛ, ‘Kyerɛkyerɛniɛ ne nwa yɛbisa wɔ kyɛ: “Ɛwɔfoɛ sua bɔ mene m'asuafoɛ nemɔ koli Pɛnu ne wɔ nu ne, ɔwɔ nisua?” ’ 15Na okohyire ɛmɔ aborosaen sua kandinga bie bɔ basiesie nu kama, ɛmɔsiesie Pɛnu ne wɔ berɛ ma yɛɛli.” 16Yeti, asuafoɛ nemɔ fili berɛ hɔle kuro nanu, na kyɛbɔ ɔhane ne, sɛ pɛpɛɛpɛ yeɛ bɛnwuni ye ɔ, na bɛsiesiele Pɛnu ne.
17Odwuli nnɔsoa ne, Yesu ne buru-ne-nyɔ ne wale. 18Na bɛte tɛbulu nanwo bɛdidi ne, Yesu ha hyirele bɛ kyɛ: “Nahorɛ dwirɛ yeɛ ole kyɛ,#14:18 Anaa “Nahorɛ, meka mekyire ɛmɔ kyɛ.” ɛmɔ bɔ ɛmɔ ne me didi ne, ɛmɔ nu kõ kɔye me kɔma.” 19Edwirɛ ne yɛle bɛ yea, na bɛbisale ye ngoko-ngoko kyɛ: “Me anaa?” 20Ɔha hyirele bɛ kyɛ: “Ɔte buru-ne-nyɔ nanu kõ, bɔ ɔne me to asaa didi wɔ kyɛnzee kõ anu ne. 21Sona Awa ne kɔ kyɛbɔ bahworɔ bafa ye nwo ne, nakoso, bɔ ɔkɔye Sona Awa ne kɔma ne, ye yaakɔ! Sɛ banwo ye po a, ahaa ɔte pa.”
22Na mmerɛ bɔ bɛguso bɛdidi ne, Yesu fale paanoo, na ohyirale so yiele ne, obuli nu fa mane ye asuafoɛ nemɔ hane kyɛ: “Ɛmɔle, ɛhe gyi berɛ ma me nipadua ne.” 23Afei ɔfale kwangoa, na ɔlale ase yiele ne, ɔfa mane bɛ, na bɛ mukoraati bɛnone ye noa. 24Yeɛ ɔha hyirele bɛ kyɛ: “Ɛhe gyi berɛ ma me ‘mogya bɔ bɛfa bɛyɛ apam ne,’ me mogya bɔ bɛkɔhwie bɛkogua bɛkɔma mmeni pee ne. 25Nahorɛ, meka mekyire ɛmɔ kyɛ, mengɔno bobe nzãa kõ, kodwu kyẽa bɔ ngɔno ye foforɛ wɔ Nyameɛ Ahennie nu ne.”
26Na bɛtole ayɛyie dwein bɛyiele ne, bɛhɔle Olive Bokaa naso. 27Yeɛ Yesu ha hyirele bɛ kyɛ: “Bɔ ɔkɔto me nnɔsoa he ne, ɔkɔto ɛmɔ mukoraati sintidua, ofikyɛ bahworɔ kyɛ:
‘Ngopira bɔ ɔnea mmoan ne,
na mmoan namukoraati kɔbɔ kɔsande.
28Nakoso bɛtingye me a, ngoli ɛmɔ nyunu ngɔhɔ Galilea.’” 29Petro hane kyɛ: “Sɛ ɔkɔto bɛ mukoraati sintidua po a, me de, ongosi lle.” 30Yesu ha hyirele ye kyɛ: “Nahorɛ, meka mekyire wɔ kyɛ, kɔngɔen he, kyɛ dee bɔ akɔ bɔ pɛn-nyɔ ne, né aha ye pɛn-nza kyɛ ɛnze me.” 31Nakoso Petro sa hane ye bieku kyɛ: “Sɛ odikyɛ mene wɔ wu po a, mengɔha ye lle kyɛ menze wɔ.” Na bɛ mukoraati bɛhane sɔ ala.
32Afei, bɛwale nekaa bɔ bɛfrɛ berɛ Getsemane, na Yesu ha hyirele ye asuafoɛ ne kyɛ: “Ɛmɔtena wa ma ngɔmmɔ mbaeɛ mmera.” 33Na ɔfale Petro, Yakobo ne Yohane, na ye wora hyɛle yebo bɔle, na ɔyɛle basaa. 34Yeɛ ɔha hyirele bɛ kyɛ: “Me wora abɔ pa-pa, ɔfa me kɔ ewue nu po. Ɛmɔtena ɛwa, na ɛmɔ ne me nwondɛ.” #14:34 Anaa “Ɛmɔ ne me si pɛ.” 35Ɔhɔle anyunu kaa ne, obutuli berɛ bɔle mbaeɛ kyɛ sɛ ɔkɔyɛ yé a, ahaa sɔ mmerɛ ne sã ye nwo. 36Na ɔhane kyɛ: “Abba,#14:36 Abba kyire “O Baba.” Baba, ɛkora yɛ nikye biala. Ye kwangoa he fi me so, nakoso nná bɔ mekuro yeɛ ɔyɛ berɛ ɔ, mmom bɔ ekuro yeɛ ɔyɛ berɛ ɔ.” 37Mmerɛ bɔ ɔwale ne, né bɛ mukoraati badeda, yeɛ obisale Petro kyɛ: “Simon, ɛmɔda? Ɛmɔ angora ne me anzi pɛ dɔnhwere komapɛ po? 38Ɛmɔma ɛmɔ nye la berɛ, na ɛmɔhɔ so bɛbɔ mbaeɛ, ná ɛmɔ angɔ nzɔhwɛ nu. Honhom ne de, okuro, nakoso anwoɔnaen ne yɛ mmerɛ.” 39Osa ɔɔbɔle mbaeɛ hane edwirɛ komapɛ nala. 40Osa wale ne, né bala, ofikyɛ ne bɛ nye kõ. Na né bɛnnwu edwirɛ bɔ bɛha bɛ hyire ye po. 41Yesu hɔle ye pɛn-nza so wale ne, ɔha hyirele bɛ kyɛ: “Sɔ mmerɛ he yeɛ ɛmɔda bedɛ ɛmɔ nwomeɛ ɔ? Wayɛ yé! Mmerɛ naso! Ɛmɔnea, bɛye Sona Awa ne bɛwura abɔnefoɛ sa. 42Ɛmɔ dwɔso, ɛmɔma yɛhɔ. Bɔ ɔkɔye me kɔma ne awa.”
43Na ogu so odwudwo ne, Yuda bɔ ɔboka buru-ne-nyɔ naso ne wale, né mmeni pee li ye si bɔ bɛtire-tira dadeɛ ne mmo-kuro-mma. Sɔfo mbanyi, atwerɛfoɛ, ne mbanyi nemɔ yeɛ bɛsomane bɛ ɔ. 44Né bɔ ɔbaaye ye ma ne ama bɛ nzɛngyerɛneɛ bie kyɛ: “Sona bɔ ngɔfe ye noa ne, ye ane; ɛmɔhye ye, na ɛmɔsɔ yenu yé bɛfa ye bɛhɔ.” 45Yeti ɔhɔle Yesu nwo berɛ tee, yeɛ ɔha hyirele ye kyɛ: “Rabi,” na ɔfele ye noa. 46Na bɛɛsɔle ye nu bɛhyele ye. 47Na bɛ bɔ bɛgyi berɛ nanu kõ yele ye dadeɛ, ná ɔfa pɛle sɔfo ne akoaa ne so. 48Yesu bisale mmenia ne kyɛ: “Dadeɛ ne mmo-kuro-mma yeɛ ɛmɔ afa bawa me so, kyɛ ɛmɔ baahye awieniɛ bie ne? 49Daa biala, né metena asɔre awuro berɛ mekyirekyire, nakoso ɛmɔ angye me. Mmom bɔ wasi ne amaa tworɔnzɛm ne awa nu.” 50Na asuafoɛ namukoraati nwati yakyile ye.
51Né abrandeɛ bie li Yesu si, ná nwera ngome yeɛ ne wafa wakata ye nwo ɔ. Ahaa bɛkye ye, 52nakoso oyakyile nwera ne mane bɛ fale ye nwo tole so hɔle.
53Afei bɛfale Yesu bɛɛmane sɔfo panyi ne; na sɔfo mbanyi, kuro nanu mbanyi, ne atwerɛfoɛ namukoraati yiale nu. 54Nakoso Petro lili ye si ngaka-ngaka hɔle sɔfo panyi ne awuro berɛ, na ɔɔtenane asomvoɛ nemɔ nwo berɛ kyɛ ɔto see. 55Afei, né sɔfo mbanyi ne Sanhendrin namukoraati pena adanzeɛ bɔ bɛkogyina so bɛkɔhu Yesu ɔ, nakoso, bannya bie. 56Ɔwɔ nu, mmeni pee lili adanzeɛ tiale ye, nakoso né bɛ adanzeɛ ne nyia. 57Na ebiemɔ dwɔso lili adanzeɛ bɔ ɔtte nahorɛ tiale ye kyɛ: 58“Yɛtele kyɛ ɔka kyɛ, ‘Ngɔdwiri asɔre awuro bɔ bɛfale bɛ sa bɛsili ne ngogua, na ngɔfa ɛlɛsa ngosi foforɛ, ɛhene de nná asaa yeɛ bɛfa bɛsili ɔ.’ ” 59Nakoso ɛhe anu po ne, bɛ adanzeɛ ne anyia. 60Yeti, sɔfo panyi ne dwɔso gyinane bɛ afia, na obisale Yesu kyɛ: “Yeti, ɛngɔ dwudwo? Edwirɛ nwora bɔ bɛka bɛgua wɔ so ne, ɛtelle?” 61Nakoso Yesu yɛle dinn, wammukye ye noa. Sɔfo Panyi ne sa bisale ye kyɛ: “Wɔ yeɛ ɛle Kristo ne, Bɔ Bahyira Ye né awa ne anaa?” 62Yesu hane kyɛ: “Yoo, me ane. Na ɛmɔ konwu kyɛ Sona Awa ne te Otumvoɛ#14:62 Anaa “Bɔ ole Tumi ne.” ne sa famaa so, na ɔnate munungum nu wɔ anwuro ɔba.” 63Sɔfo panyi ne tele sɔ dwirɛ ne, osunzuale ye atadeɛ nu, na ɔhane kyɛ: “Adanzeɛ beni bieku yeɛ yɛhia ɔ? 64Nnaa ɛmɔ ate mmusue dwirɛ bɔ waha ne. Nzu yeɛ ɛmɔka bɛfa ye nwo ɔ?” Na bɛ mukoraati bɛbule ye fɔ kyɛ, odikyɛ owu. 65Na ebiemɔ hyɛle yebo tetele ngɔserɛ guale ye nyunu, na bɛfale nikye bɛkatale ye ti, yeɛ bɛbobɔle ye kunu. Na bɛha bɛhyirele ye kyɛ: “Hyɛ ngɔm!” Na asomvoɛ nemɔ bobɔle ye nye so, na bɛfale ye bɛhɔle.
66Né Petro wɔ aseɛ nwo dɔ, wɔ sɔfo panyi ne aluo berɛ, na sɔfo panyi né afaneɛ kõ wale berɛ, 67onwuni kyɛ Petro to see ne, ɔneane ye haa yeɛ ɔhane kyɛ: “Wɔ koso, né ɛboka Nazerɛtniɛ Yesu so.” 68Nakoso, ɔsale ye wɔ bɛ mukoraati nyunu kyɛ: “Sona bɔ ɛka ye dwirɛ ne, menze ye, na mende bɔ ɛka ne bo po.” Na ofili berɛ hɔle anoa ne nyunu dɔ.#14:68 Sɛ ɛnea tete asaanoa ndworɔyɛ ne biemɔ nu a, bafa edwirɛ bie batoa so wa kyɛ: “Na akɔ bɔle.” 69Afaneɛ ne sa nwuni ye wɔ berɛ, na ɔha hyirele bɛ bɔ bɛgyigyi berɛ ne kyɛ: “Sɔ bia he boka bɛ so.” 70Nakoso, ɔsale bieku. Ɔyɛle kaa ne, bɛ bɔ bɛgyigyi berɛ ne bie sa ha hyire Petro kyɛ: “Ɔte nahorɛ, ɛboka bɛ so, na ɛte Galileaniɛ.” 71Na ɔhyɛle yebo lili amoen hane ndaen kyɛ: “Sona bɔ ɛmɔka ye nwo dwirɛ ne, menze ye!” 72Na ɛberɛ ala, akɔ sa bɔle. Na Petro kayele edwirɛ bɔ Yesu ha hyirele ye ne, ɔhane kyɛ: “Kyɛ dee bɔ akɔ bɔ pɛn-nyɔ ne, né aha ye pɛn-nza kyɛ ɛnze me.” Na otikyele esuɛ nu.
Currently Selected:
Marko 14: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
