Marko 15
15
1Ngyerɛmɔ tutuutu ne, sɔfo mbanyi, kuro nanu mbanyi, atwerɛfoɛ ne Sanhendrin namukoraati yiale nu fale adwene, na bɛkyekyele Yesu sa, yeɛ bɛfale ye bɛɛmane Pilato ɔ. 2Yeɛ Pilato bisale ye kyɛ: “Wɔ yeɛ ele Yudafoɛ hene ne?” Yesu hane kyɛ: “Ye ala yeɛ aha ne.” 3Nakoso sɔfo mbanyi nemɔ bɔle ye kwaadu pee. 4Yeɛ Pilato sa bisale ye bieku kyɛ: “Ɛngɔ dwudwo? Nea edwirɛ nwora bɔ bɛka bɛgua wɔ so ɔ!” 5Na bɔ ɔyɛle Pilato nwanwa ne, Yesu ammukye ye noa.
6Bɛdi afahyɛ biala a, né Pilato yakyi bɛ bɔ bɛla prizin nanu kõ, ebiala bɔ mmenia ne kuro ne. 7Sɔ mmerɛ ne, né Barabas ne mmenia biemɔ bɔ bɛpena kyɛ bɛtu awaen ne la prizin, né sɔ mmenia hemɔ ali bɔne paa. 8Yeti mmeni lɔen ne fo wale berɛ, na bɛsrɛle Pilato kyɛ, bɔ ɔtaa yɛ ne, ɔyɛ bieku ma bɛ. 9Yeti Pilato bisale bɛ kyɛ: “Nyakyi Yudafoɛ hene ne mma ɛmɔ anaa?” 10Ofikyɛ né ɔse kyɛ ahoɔyaa ti yeɛ sɔfo mbanyi nemɔ afa Yesu abrɛ ye ne. 11Nakoso, sɔfo mbanyi nemɔ tutu guale mmenia ne soanu kyɛ, bɛha kyɛ bɛkuro Barabas. 12Yeɛ Pilato bisale bɛ kyɛ: “Ye de, Bɔ ɛmɔfrɛ ye Yudafoɛ hene ne, nzu yeɛ mva nyɛ ye ɔ?” 13Na bɛteane nu kyɛ: “Bɔ ye asɛnnua nu!” 14Yeɛ Pilato bisale bɛ kyɛ: “Nzu ɔ? Bɔne beni yeɛ wayɛ ɔ?” Nakoso bɛteɛteane nu serɛ-serɛ kyɛ: “Bɔ ye asɛnnua nu!” 15Na ɔnate kyɛ né Pilato pena kyɛ ɔyɛ bɔ mmenia ne kuro ma bɛ nati, ɔyakyile Barabas mane bɛ. Na ɔmaa bɛgwale Yesu, bɛyiele ne, ɔfale ye mane bɛ kyɛ bɛɛbɔ ye asɛnnua nu.
16Ná sogyafoɛ nemɔ fale ye fili berɛ hɔle amrado n'awuro, na bɛfrɛle sogyafoɛ namukoraati bɛwale berɛ. 17Bɛfale atadeɛ valent #15:17 Brɔfo “Purple” bɛwurale ye, na bɛfale mmowie bɛyɛle kyerɛ bɛwurale ye ti. 18Na bɛhyɛle yebo bɛ momane ye kyɛ: “Yudafoɛ hene, wɔ ngoa so oo.” 19Afei, bɛfale elemmire bɛfifini ye ti anu, na bɛtetele ngɔserɛ bɛguale ye nyunu. Bɛyiele ne, bɛkotole ye. 20Bɛgorole ye nwo bɛyiele ne, bɛyele atadeɛ valent ne, na bɛfale ye bɔbɔ ye atadeɛ bɛwurale ye. Yeɛ bɛfale ye bɛhɔle kyɛ bɛkwaabɔ ye asɛnnua nu.
21Né Alɛzanda ne Rufu baba Simon bɔ ofi Kiren né nate atee naso ɔba kuro nanu, sogyafoɛ nemɔ nwuni ye ne, bɛhyɛle ye maa ɔsoale Yesu asɛnnua ne. 22Bɛfale Yesu bɛwale nekaa bie, bɛfrɛ berɛ Golgota, yebo kyire “Tire Kokuroka.” 23Ɛwa yeɛ bɛfale nzãa bɔ bafa kurobo bafra bɛmane ye ne, nakoso wanno. 24Afei bɛbɔle ye asɛnnua nu. Na bɛhyɛle ye atadeɛ nanu, na bɛtɔɔsole#15:24 Anaa “Bɛbɔle ndondo.” bɛneane bɔ odikyɛ ebiala fa ɔ. 25Mmerɛ bɔ bɛbɔle ye asɛnnua nu ne, né ɔte kɔyɛ ngyerɛmɔ 9:00.#15:25 9:00 ne te dɔnhwere bɔ ɔtɔ so nza 26Na bɛhworɔle ye kwaadu ne bɛbɔle ye ti afia kyɛ:
“YUDAFOƐ HENE NE.”
27Bɛbɔle awiefoɛ nyɔ asɛnnua nu bɛbokale ye so, né kõ wɔ ye famaa, yeɛ né kõ wɔ ye bɛen. 28#15:28 Sɛ ɛnea Bible biemɔ nu a, edwirɛ bie wura ɛwa kyɛ: Na ɛhe maa tworɔnzɛm ne wale nu kyɛ, “Bɛhale ye bɛfrale mmeratofoɛ.” Nakoso sɛ ɛnea tete asaanoa ndworɔyɛ bɔ wahyɛ paa, ɔne bɔ odi mu paa nemɔ nu a, sɔ dwirɛ ne nne nu.— 29Na bɛ bɔ bɛpɛ nu ne wosole bɛ ti, na bɛdwudwo betiale ye kyɛ: “Nea, wɔ yeɛ ɛnwa ɛkodwiri asɔre awuro ne kogua, na afa ɛlɛsa asi ne? 30Dɛ́ wɔ nwo fi asɛnnua naso, na dwu ase.” 31Sɔ ala yeɛ sɔfo mbanyi nemɔ ne atwerɛfoɛ nemɔ gorole ye nwo kyɛ: “Odɛ́ amanvoɛ, nakoso ɔngora nne ye nwo. 32Ɛmɔma Kristo ne, Israelfoɛ hene ne dwu fi asɛnnua naso ma yɛnwu ye, na yɛkole ye yɛkoli.” Na bɛ bɔ babɔ bɛ asɛnnua nu baboka ye so ne po dwudwo tiale ye.
33Na ofi eyia 12:00#15:33 12:00 ne te dɔnhwere bɔ ɔto so nzia. bɔ ɔkwadwu eyia 3:00#15:33 3:00 ne te dɔnhwere bɔ ɔtɔ so ngona. ne, aseɛ naso mukoraati yɛle tumm. 34Ná ɔbɔle 3:00 ne, Yesu teane nu kyɛ: “Eli, Eli, lama sabaktani?” Yebo kyire kyɛ: “Me Nyameɛ, me Nyameɛ, nzuati yeɛ aye wɔ nye ama me ne?” 35Mmerɛ bɔ bɛ bɔ bɛgyigyi berɛ ne tele sɔ dwirɛ ne, bɛhane kyɛ: “Ɛmɔtie, ɔfrɛ Elia.” 36Na ebie tuli mirika fale eminaen bɔle nza bɔ enu ka nu, ná ɔfa tuale elemmire noa fa mane ye kyɛ ɔno, na ɔhane kyɛ, “Ɛmɔyakyi ye. Ɛmɔma yɛnea sɛ Elia kɔɔye ye kofi asɛnnua naso a.” 37Na Yesu teane nu, yeɛ olɛle nwomeɛ bɔ ɔpɛ ye bo. 38Na kɛtens bɔ ɔwɔ nekaa krongron berɛ nanu tele nyɔ fili anwuro oosili ase. 39Mmerɛ bɔ sogyaniɛ panyi bɔ ogyi Yesu nyunu berɛ ne nwuni nningyein bɔ osisi, ɔne kyɛbɔ olɛle nwomeɛ bɔ ɔpɛ yebo ne, ɔhane kyɛ: “Amba, sɔ biaa he te Nyameɛ awa.”
40Né mmrasua biemɔ gyi nekaa bie bɛnea bɔ ɔkɔ so ne. Bɛ nu biemɔ yeɛ ole Mary Magdalene, Yakobo kamba ne Yose maame Mary, yeɛ Salome. 41Né sɔ mmrasua nemɔ taa di Yesu si wɔ Galilea, na né bɛsõ ye; né mmrasua pee boka bɛ so, bɛne Yesu yeɛ bɛhɔle Yerusalem ɔ.
42Né aleɛ pena sã, na ɔnate kyɛ né ɔte Anwoboaboa Kyẽa (kyire kyɛ, kyẽa bɔ oli Homeda ne nyunu) nati, 43Yosef bɔ ofi Arimatea ne nyane akukuduro hɔle Pilato berɛ, na ɔsrɛle ye kyɛ ɔfa Yesu fuin ne ma ye; né Yosef te Sanhendrin badwa nanuniɛ bɔ mmenia bu ye paa, na ne ɔnwondɛ Nyameɛ Ahennie ne koso. 44Mmerɛ bɔ Pilato tele kyɛ Yesu awu ne, ɔyɛle ye nwanwa, yeti ɔfrɛle sogyaniɛ panyi ne bisale kyɛ Yesu awu amba a. 45Mmerɛ bɔ sogyaniɛ ne hane kyɛ wawu ne, ɔfale fuin ne mane Yosef. 46Yeti Yosef tɔle nwera pa, na ɔyele Yesu fuin ne fili asɛnnua naso, yeɛ ɔfale nwera ne kyekyele ye nwo. Na ɔfale ye tole asieleɛ bɔ bapɛ ye wɔ nyɔboɛ bie nu, na omununi nyɔboɛ tole ye noa. 47Nakoso, Mary Magdalene ne Yose maame Mary nwuni nekaa bɔ bɛfale ye bɛtole ne.
Currently Selected:
Marko 15: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
