16
1Homeda ne si ne, Mary Magdalene, Yakobo maame Mary, ne Salome tɔle ayire kyɛ bɛfa bɛkɔpopa Yesu fuin ne. 2Na dapɛn né kyẽa bɔ oli moa ne, bɛhɔle asieleɛ naso ngyerɛmɔ tutuutu, bekye bɔ né eyia ne afite ɔ. 3Na ne bɛ bisa bɛ nwo kyɛ: “Nwa yeɛ ɔkɔmunu nyɔboɛ ne kofi asieleɛ ne noa kɔma yɛ ɔ?” 4Nakoso, bɛtole bɛ nye ne, bɛnwuni kyɛ baye nyɔboɛ ne bafi berɛ, ɔwɔ nu, né ɔte piri paa. 5Bɛwurale asieleɛ nanu ne, bɛnwuni kyɛ abrandeɛ bie wura atadeɛ fufue hyɛnn te asieleɛ ne famaa so. Ná bɛ kunu tele bɛ.
6Yeɛ ɔha hyirele bɛ kyɛ: “Nnɛmɔ maa ɛmɔ kunu tete ɛmɔ. Nnaa ɛmɔpena Nazerɛtniɛ Yesu bɔ bɛbɔle ye asɛnnua nu ne. Ɔnne wa, watingye. Ɛmɔnea, ɛwa yeɛ bɛfale ye bɛtole ne. 7Ɛmɔhɔ, na ɛmɔha behyire ye asuafoɛ nemɔ ne Petro kyɛ, ‘Odi ɛmɔ nyunu moa kɔ Galilea.’ Na kyɛbɔ maha mahyire ɛmɔ ne, ɛberɛ yeɛ ɛmɔ konwu ye ɔ.”
8Yeti, mmerɛ bɔ mmrasua nemɔ fili asieleɛ naso ne, né bɛ nwo woso-woso bɛ, na né esuronyi aha bɛ. Ná bannga hwee bangyire ebiala, ofikyɛ né bɛsuro paa.
Sɛ ɛnea tete asaanoa ndworɔyɛ bɔ wahyɛ paa ɔne bɔ odi mu paa nemɔ nu a, Marko yeti 16 ne si ngyekyɛmue 8 pɛ. Nakoso asaanoa ndworɔyɛ ne biemɔ wɔ berɛ a, bafa AWIEƐ DWIRƐ SII batoa ngyekyɛmue 8 naso, yeɛ ebiemɔ koso afa AWIEƐ DWIRƐ TENDEE batoa so fi ngyekyɛmue 9 kosi 20.
AWIEƐ DWIRƐ SII
Edwirɛ bɔ bɛha bɛhyirele bɛ ne, bɛbɔle ye mua bɛhyirele Petro ne bɛ bɔ ɔne bɛ wɔ berɛ ne. Ɛhene si ne, Yesu Kristo bɔbɔ somane bɛ kyɛ, bɛɛha daa ngoa nwo dwirɛ krongron bɔ ɔmborɔ ne bɛfi afiteleɛ beedwu atɔleɛ.
AWIEƐ DWIRƐ TENDEE
9 Mmerɛ bɔ Yesu tingyele, wɔ dapɛn ne kyẽa bɔ oli moa ne, ɔyele ye nwo ali ndɛ hyirele Mary Magdalene, ye yeɛ otuli sunzummɔne nzoo fili ye nu ne. 10Na bɛ bɔ né ɔne bɛ wɔ berɛ, bɔ né bɛsu bɛpɛ awuye ne, ɔɔbɔle bɛ amaneɛ. 11Nakoso, bɛtele kyɛ Yesu atingye, ná wanwu ye ne, banne banni.
12 Ɛhene si ne, mmerɛ bɔ bɛ nu nyɔ nate atee so bɛkɔ nnamue bie nu ne, Yesu yele ye nwo ali wɔ tebea foforɛ nu hyirele bɛ. 13Na bɛsale bɛ si bɛɛbɔle bɛ ngaa ne amaneɛ, na bɛ koso, banne bɛ banni.
14 Yesi ne, mmerɛ bɔ buru-ne-kõ ne te tɛbulu nwo bɛdidi ne, Yesu yele ye nwo ali hyirele bɛ, na gyidie bɔ bannya ye, ɔne b'ahone bɔ ɔyɛ se nati, ohwili bɛ nyunu, ofikyɛ bɛ bɔ bɛnwuni kyɛ watingye ne, banne bɛ banni.
15 Na ɔha hyirele bɛ kyɛ: “Ɛmɔhɔ wiase mukoraati, na ɛmɔha nzɛmba ne behyire abɔdeɛ mukoraati. 16Ebiala bɔ okole koli maa bɛkɔbɔ ye asu ne, okonya ngoa, na ebiala bɔ wanne wanni ne, bɛkobu ye fɔ. 17Na bɛ bɔ bɛkole bɛkoli ne, nzɛngyerɛneɛ hemɔ koli bɛ si: bɛkɔfa me dumaa bɛkɔtu sunzummɔne, bɛkɔha dwudwolɛ ahoroɛ, 18bɛkɔfa bɛ sa bɛkɔma ɛwoo so, na sɛ bɛno pɔizen po a, ɔngɔyɛ bɛ hwee. Bɛkɔfa bɛ sa bɛkogua bɛ bɔ bafokyɛ so maa bɛ nwo kɔtɔ bɛ.”
19 Na Awurade Yesu dwudwo hyirele bɛ yiele ne, bɛfale ye bɛhɔle anwuro, na ɔɔtenane Nyameɛ sa famaa so. 20Na bɛ de, bɛɛhane nzɛmba ne wɔ nekaa biala, na mmerɛ bɔ Awurade ne bɛ yɛ adwuma ne, ɔmaa bɛyɛle nzɛngyerɛneɛ bɛfa bɛfoale edwirɛ naso.
