2
1Yeti, sɛ ɛte nzu sona po na ebu ebie atɛn a, ɛlle nyeanoɛ biala. Na mmerɛ bɔ ebu ebie atɛn ne, né ebu wɔ nwo fɔ, ofikyɛ wɔ bɔ ebu atɛn ne, nningyein komapɛ nala bie yeɛ ɛyɛ ɔ. 2Yɛse kyɛ Nyameɛ atemmuo te nahorɛ, na ɔla berɛ ma bɛ bɔ bɛyɛ sɔ nningyein nemɔ ne. 3Na wɔ, mmerɛ bɔ ɛbu bɛ bɔ bɛyɛ sɔ nningyein né atɛn na wɔ bɔbɔ ɛyɛ bie ne, w'adwene yɛ wɔ kyɛ ɛkɔnwati Nyameɛ atemmuo anaa? 4Anaa ɛnze kyɛ Nyameɛ ayamye ti, ɔpena kyɛ ɔboka wɔ maa enya adwene-sakra? Bɔ yeti ɛbu ye ayamye, ye ndoboaseɛ, ne ye aboterɛ pembe né animtia ne? 5Nakoso ɔnate kyɛ ɛte dwɛɛ, ná ɛyɛlle w'adwene kyɛ ɛsakra nati, ɛboɔboa ɛyaa noa ma wɔ nwo wɔ kyẽa bɔ Nyameɛ kɔfa yaa paa na ɔkɔye ye atɛn tenenee ne ali ne. 6Na “okotua ebiala kerɛ kyɛbɔ ye adwuma te ɔ.” 7Bɛ bɔ bɛfa animia bɛyɛ nningyein pa, ná bɛfa bɛpena anuonyam, nidie, ne nikye bɔ ɔmborɔ ne, ɔkɔma bɛ daa ngoa. 8Nakoso, bɛ bɔ bɛkuro ngondii, bɛndie nahorɛ ne, na bɛyɛ bɔne ne, asotwe ne ɛyaa yeɛ ɔkɔwa bɛ so ɔ. 9Sona biala bɔ ɔyɛ bɔne ne, amanehunu ne ɔhaw yeɛ ɔkɔwa ye so ɔ; okoli moa kɔwa Yudaniɛ so, kora ne wawa Greekniɛ so. 10Nakoso ebiala bɔ ɔyɛ nikye pa ne de, okonya anuonyam, nidie ne asomdwie; Yudaniɛ yeɛ oli moa, kora ne Greekniɛ. 11Ofikyɛ Nyameɛ de, ɔnyeye mmenia nu.
12Bɛ bɔ bɛyɛle bɔne, bɔ né bɛnze mmeraa nanwo hwee namukoraati, nná mmeraa ne yeɛ begyina so bɛsɛkye bɛ ɔ; nakoso bɛ bɔ bɛwura mmeraa nabo namukoraati de, sɛ bɛyɛ bɔne a, mmeraa naso yeɛ bɛkogyina bɛkobu bɛ atɛn ɔ. 13Ofikyɛ nná bɛ bɔ betie mmeraa ne yeɛ bɛte teneneefoɛ wɔ Nyameɛ nyunu ɔ, mmom bɛ bɔ bɛfa mmeraa ne bɛyɛ adwuma ne yeɛ bɛkobu bɛ teneneefoɛ ɔ. 14Bɔ ɔte yeɛ ole kyɛ, maen-maen nanufoɛ ne de, bɛlle mmeraa, nakoso sɛ bɛfi aworɛ nu bɛyɛ nningyein bɔ ɔwɔ mmeraa nanu ne a, ɔwɔ nu kyɛ bɛlle mmeraa de, nakoso bɔ bɛyɛ ne te mmeraa ma bɛ bɔbɔ. 15Bɔ bɛyɛ ne kyire kyɛ bahworɔ mmeraa ne bagua b'ahone nu, na b'ahonim koso di ye nwo adanzeɛ. Na b'adwene kora bu bɛ fɔ anaa bem. 16Na kyɛbɔ nzɛmba bɔ meka né kyire ne, ɛhe kɔhɔ so kyẽa bɔ Nyameɛ nate Yesu Kristo so kobu nningyein bɔ sona biala afa afea nanwo atɛn ne.
17Na wɔ koso, sɛ bɛfrɛ wɔ Yudaniɛ, na ɛfa wɔ nwo to mmeraa naso, ɛfa Nyameɛ hoɔhoa wɔ nwo, 18ɛse Nyameɛ apɛdeɛ, ná bafa mmeraa ne bahyirehyire wɔ nati, edɛ bɔ ye nwo hia paa ne to nu, 19ná edɛ di kyɛ wɔ yeɛ ɛkyire anyesiniwaafoɛ atee, ɛte kanea ma bɛ bɔ bɛte awosii nu, 20ɛtete bɛ bɔ bɛnze nworɛ, ɛkyire ngwalaa nikye, ɛse nningyein titire bɔ ɔwɔ Mmeraa nanu ne, ɔne nahorɛ bɔ ɔwɔ Mmeraa nanu ne a, 21ye de, wɔ bɔ ekyirekyire ebie ne, ekyirekyire wɔ nwo? Wɔ bɔ ɛka kyire ebie kyɛ “Nnɛwia” ne, aso ewia? 22Wɔ bɔ ɛka kyire ebie kyɛ, “Nnɛsɛkye agyaa” ne, aso ɛsɛkye agyaa? Wɔ bɔ ekyi bosoen ne, ewia nningyein wɔ bosoen sua nu anaa? 23Na wɔ bɔ ɛfa mmeraa ne hoɔhoa wɔ nwo ne, aso ebu mmeraa naso fa gua Nyameɛ nyunu ase? 24Ofikyɛ bahworɔ kyɛ: “Ɛmɔ ti, bɛka mmusue dwirɛ bɛfa Nyameɛ dumaa nanwo wɔ maen-maen nanu.”
25Sɛ edi mmeraa naso a, ye de mvasoɛ wɔ wɔ toa bɔ apɛ naso, nakoso, sɛ ebu mmeraa naso a, ye de, wɔ toa bɔ bapɛ ne, ɔte kyɛ bɛpɛlle wɔ toa nala. 26Na sɛ ebie bɔ ɔte ɛtó di nningyein bɔ ɔwɔ Mmeraa nanu naso a, bɛngɔbu ye kyɛ ebie bɔ bapɛ ye toa anaa? 27Sɛ ebie bɔ ɔte ɛtó di mmeraa naso a, ɔkɔbu wɔ bɔ ɛbu mmeraa naso ne fɔ, ɔmva ye nwo kyɛ ɛse mmeraa nanu dwirɛ, ná bapɛ wɔ toa ne. 28Sɛ bɛka kyɛ ebie te Yudaniɛ a, nná yeɛ ole bɔ anyeɛ nwu ye ne, yeɛ toa pɛlɛ koso, ɔtte anyeɛ so ne anwoɔnaen nu nikye. 29Na mmom Yudaniɛ paa yeɛ ole sona bɔ ɔte Yudaniɛ wɔ ye ahone nu, na ye toa pɛlɛ ne koso te ahone nu deɛ, bɔ ɔnate honhom so, ná ɔtte mmeraa bɔ bahworɔ naso. Sɔ sona ne, Nyameɛ yeɛ ɔye ye ayɛ ɔ, na ɔtte kuro sona.
