1VAKOLINDO 1
1
1Heni Pawulo, yo ntsachemilwe kwa wugano wa Mulungu ntsive mutumi va Chilisito Yesu, ntsili hano hamwe na mung'olotsetu Sositene.
2Ntsinguvandichila henye wo mumutumbye Mulungu wo mungikala ku Kolindo, henye wo mudisilwe muve vanu va Mulungu kwa kihantsa na Chilisito Yesu, wo mwachemilwe muve vahagulwa vake kota fyovali vanu veka wo vangumufugamila Mutwa vetu Yesu Chilisito, yo Mutwa vawo na vahetwe.
3Ntsinguvasuchila kwa Mulungu Dada vetu, na kwa Mutwa vetu Yesu Chilisito avapele wuwuya na wusichimafu.
Pawulo angumulumba Mulungu
4Ntsingumulumba Mulungu siku tseka kwajili yenyu kwasawuli avapelye henye wuwuya wake kukolela kwa Chilisito Yesu. 5Kwakuva kwa kula kihantsa kwenyu na Chilisito simwalagaya chinu chochive, nayo avagavye nyala tseka na wuvetso weka wa kuvikula ndongwa tsa Mulungu. 6Mbikulo tsila tso tunvikula kwajili ya Chilisito tsa wukweli. 7Ihyo simwagayile chinu chochive, hala ho munkuva mu n'tsindila kutsa kwake Mutwa vetu Yesu Chilisito. 8Mwene yo akuvakangatsa henye mbaka hawudugo, ili muleche kuva na wubi wowuve mbaka siku yila ya kutsa kwa Mutwa vetu Yesu Chilisito. 9Mulungu yo vakihuvilwa, mwene yo avachemile henye muve na wumwe na Mwanage, Yesu Chilisito, Mutwa vetu.
Kugavika kwa vanu vanya litumbilo
10Vang'olotsangu ntsinguvagongola kwa wuvetso wa Mutwa vetu Yesu Chilisito, kuta mupatanaje henye nyeka kwa chila chinu cho munlonga, mulekaje kutelana henye kwa henye. Mwelewanaje kwa chila chinu cho mun'gana kuchidita. 11Vang'olotsangu ndongwa tso nyuliche kuhuma kwa vanu vatunga va mukaye ya Kulove, tsin'lajila kuta hagati henyu hana vanu vampungana. 12Ntsin'gana ndonje kuta, chila munu hagati henyu anlonga lulongwa lwake. Yumwe anlonga kuta, “Heni tsingumudichila Pawulo,” na yunji anlonga, “Heni tsingumudichila Apolo,” na yunji anlonga, “Heni tsingumudichila Chefwa,” na yunji anlonga, “Heni tsingumudichila Chilisito.” 13Mbe, Chilisito agaviche mu fikundi fikundi? Mbe Pawulo yo avambitwe mu musalaba kwasawuli yenyu? Awu mbe, mwabatitswe ili muve vadahitswa va Pawulo? 14Ntsingumulumba Mulungu kuta sitsamubatitse munu yoyuve hagati henyu, ila ntsavabatitse Chilisipo na Gayo ng'ani. 15Ihyo lelo kuduhu munu yoyuve yo afuluche alonje kuta abatitswe ili ave mudahitswa vangu. 16Eena! Ntsiwuche kuta vanu vanji wo ntsavabatitse wo vala va mukaye ya Sitefwana. Lechelelo kulutila iwo sinambentsiwuche kuta ntsamubatitse munu yunji yoyuve. 17Chilisito sianumile kubatitsa, ila anumile kuvikula Ndongwa Nofu, ila sintsavikwe kwa kihuvila nyala tsa vanu, ndisile ihyo ili wuvetso wa chifo cha Chilisito mu musalaba wuleche kubedalwa.
Chilisito yo wuvetso na ntselo ya Mulungu
18Kwakuva wujumbe wa chifo cha Chilisito mu musalaba, kwa vala wo van'yaga van'wona kota lulongwa lwa wupufi hela. Lechelelo kwa hetwe wo tunkuluswa tun'wona kuta wo wuvetso wa Mulungu wa kutukulusa hetwe. 19Mandiko ga Mulungu ganlonga,
“Ngwananga ntselo tsawo vanya ntselo
na kutsidita nyala tsa vala vanya nyala kuva siyo chinu.”
20Ihyo alikwiya munya ntselo? Alikwiya munu yo agatsele malajitso ga Musa? Kaha alikwiya mulontsi munofu va ndongwa tsa mu inyi va siku tsino? Mbe, Mulungu si akadisile ntselo tsa mu inyi yino kuva wupufi?
21Mulungu yo munya ntselo, na vanu sivafuluche vamutsele Mulungu kwa ntselo yawo vene. Ihyo Mulungu aganile mwene kuvakulusa vala wo vamutumbye kwa wujumbe wa Yesu Chilisito wo vanguwuchema vanji kuta “Wupufi,” lechelelo vala wo vangutsitumba itso Ndongwa Nofu tso tungutsivikula, vankuluswa. 22Vayawudi ili vatumbe van'gana ndajilo na miwujitsa, nawo Vajilichi ili vatumbe van'gana ntselo. 23Lechelelo hetwe tunvikula Ndongwa tsa Chilisito yo avambitwe mu musalaba, ndongwa itso kwa Vayawudi tsinguvavifya na kwa Vajilichi nawo vangutsiwona kota wupufi hela, 24lechelelo kwa vala wovachemilwe na Mulungu vave Vayawudi awu Vajilichi, kwawo Chilisito wo wuvetso wa Mulungu. 25Lechelelo chila cho chin'woneka kuta wo wupufi wa Mulungu, icho chochina mana kulutila ntselo tsa chiwunu, na kaha chila chochin'woneka kuta wutenyanjifu wa Mulungu china wuvetso kulutila wuvetso wa vanu.
26Vang'olotsangu, mwiwukaje hala Mulungu ho avachemaga, kwa mahotso ga vanu simwawonekaga kuta muna ntselo na malifwa nambe ga chiwunu hela, na vamwinga simwavaga vanu vatambulwa na kaha simwahumye mu kaye nambulwa. 27Lechelelo Mulungu avahagwe vanu wo van'woneka kuva vapufi muinyi ili avahonjele nyoni vanu vanya ntselo, na kaha avahagwe vanu vala vatenyanjifu ili avahonjele nyoni vala vanu vanya wuvetso. 28Kaha Mulungu avahagwe vanu vala wo vam'bedalwa na vanu wo vanhotswa kuta valikuduhu, ili avananje vala vatambulwa. 29Duve, Mulungu adisile ihyo ili munu yoyuve aleche kidutsa kuta munya ntselo, awu kuta mwene yo mutambulwa kulutila munu yunji. 30Lechelelo Mulungu mwene yo atuhantsitse na Chilisito Yesu. Nayo amudisile Chilisito ave ntselo yetu na kukolela kwa Chilisito tuve vawuya na vahagulwa va Mulungu, tugombulwe kuhuma mu ndongwa ntsibi. 31Kota Mandiko fyo ganlonga kuta, “Munya kugana kidutsa, idutsaje kwasawuli ya katsi tsa Mutwa tso yo adisile kwake.”
Currently Selected:
1VAKOLINDO 1: SBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.