1VAKOLINDO 2
2
Wujumbe wa Chilisito kuvambwa mu musalaba
1Vang'olotsangu hala ho ntsavaga kutsa kwenyu, ntsavavikulye wujumbe wa wukweli wa Mulungu. Sintsavavikulye kwa wusugu ili kuvalajila kuta heni ntsina ntselo tsa chiwunu. 2Kwakuva hontsavaga hamwe na henye ntsalamwe kusemwa chila chinu hagati henyu, ila ntsimutsele Yesu Chilisito yo afwilye kwa kuvambwa mu musalaba. 3Hontsavaga kutsa kwenyu, ntsiwonaga kuta singuvetsa kudita hili fyo aganaga Chilisito, ihyo ngavaje muloto na kukakama ndalahela, 4madahitso na wujumbe wangu sifyavaga fya kuvagongoletsa vanu na kwa ntselo tsa chiwunu hela, ila ntsaditaga ihyo kwa wuvetso wa Muhe va Mulungu. 5Ntsadisile ihyo ili litumbilo lyenyu live lya kihuvila wuvetso wa Mulungu na siyo kwa ntselo tsa vanu hela.
Ntselo ya Mulungu
6Lechelelo twalongaga kwa ntselo hagati ha vanu wo vakanje mu litumbilo, siyo kwa ntselo tsa mu inyi yino awu ya vatavala va inyi yino wo vali mwikuga lya kuyaga. 7Ntselo yo tunayo yo ntselo ya wukweli ya Mulungu yo sinambeyitselaniche kwa vanu, lechelelo avaga atuvichye hetwe luhuma hala inyi hoyavaga ying'acha kuwumbwa. 8Kuduhu nambe mutavala yumwe va inyi yo alutselye lulongwa luno. Kwakuva vaka vave valutselye, sivakakuva vamuvambite ndaya mu musalaba Mutwa va wumelemo. 9Lechelelo kota fyo yandikwe mu Mandiko ga Mulungu,
“Ndongwa tsila tso munu yo avaga ang'ali kutsiwona, nambe kuhulika na lipilichilo, na nambe kwinjila mu numbula, nambe munu yoyuve kutsihotsa,
ndongwa itso Mulungu avaviche vala wo anguvagana.”
10Lechelelo Mulungu atugubulye ndongwa tsino kwa Muhe vake. Kwakuva Muhe va Mulungu ahimaga chila chinu, nambe ndongwa tsila tsa mugati ndalahela mwa Mulungu. 11Mbe, nani yo afuluche atsitsele ndongwa tsotsili mugati mwa munu, kulutila numbula ya munu uyo? Ho hihyo, kuduhu munu yo atselaga ndongwa tsa Mulungu ila Muhe va Mulungu ng'ani. 12Lelo hetwe, situkanuche muhe va mu inyi yino, ila tukanuche Muhe va Mulungu, ili tuvetse kutsela fila fyo tumpelwa bule kuhuma kwa Mulungu. 13Ihyo lelo, hetwe si tunlonga kwa ntselo ya chiwunu ndaya, ila tunlonga kwa kudahitswa na Muhe, na kudahitsa ndongwa tsa chimuhe kwa vanu vala wo vana Muhe va Mulungu. 14Duve munu yo sinambeitumbe, siafuluche anuchile ndongwa tsa Muhe va Mulungu, kwakuva an'wona kota wupuva hela, ihyo siafuluche atselewe kwasawuli ndongwa itso tselewekaga kukolela kwa Muhe va Mulungu. 15Munu yo anlongotswa na Muhe va Mulungu ahimaga na kulamula hila fyo yin'ganika, lechelelo mwene si afuluche ahigwe na munu yoyuve. 16Mandiko ga Mulungu ganlonga,
“Nani yo afuluche agatsele mahotso ga Mutwa?
Nani yo afuluche amudahitse chinu cha kudita?”
Lechelelo hetwe tunago mahotso ga Chilisito.
Currently Selected:
1VAKOLINDO 2: SBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.