Ng’olwa 24
24
Vayawudi vangumuhiga Pawulo
1Hotsavaga kulutila siku tsihanu, muvina va vatawula nambiko yo achemwaga Hananiya akafikaje ku Kayisaliya hamwe na vavina vatunga na munu yumwe munya kugatsela malajitso ga Musa yo achemwaga Tetulo. Nawo vakalongaje halutalo ha Felichi chila cho vamuhijila Pawulo. 2Pawulo akachemwaje injile mugati, nayo Tetulo akantsaje kweletsela kwa kulonga, Muvina Felichi kwa luvala lutali tuveye na wusichimafu wukomi mu wulongotsi wako, na ndongwa ntsolofu nofu uvaditye vanu va inyi yino kwasawuli ya ntselo tsako. 3Muvina Felichi, tungutsanuchila ndongwa tsino kwa wusangalo chila luvala na chila hono na kukulumba ndalahela. 4Lechelelo bila kukufulugatsa ndalahela, ntsingukusuka kwa lusungu lwako utuhulikitse ndongwa tsetu kwa luvala lutunga hela. 5Tutselye kuta munu yuno angutuyufya ndalahela, nayo yo alongotsaga chitika hagati ha Vayawudi ku inyi tseka na mwene yo chilongotsi va chikundi cha Vanatsolayo. 6Kahi ajelaga kudita ndongwa tso sinambe tsiganiche kuditwa mu Nyumba ya Mulungu, lechelelo hetwe tukamubataje na kugana kumuhiga kwa kufwata malajitso ga Musa. 7Lechelelo Lisiya yo muvina va vimilitsi akatsaje na kumuhetsa kwa ludali mu mawoko getu. 8Kahi akalajitsaje vanu wo vamuhijite vatse kwa heve, manyi heve mwene umuputse munu yuno, ufuluche uwutsele wukweli weka wa ndongwa tsino fyo tsili. 9Vayawudi veka wo vavaga hala vakatyaje, ndongwa tseka tso alontsile uyo muyetu ho hihyo fyotsili.
Pawulo angipamana halutalo ha Felichi
10Muvina Felichi akamusonelaje Pawulo ili alonje lulongwa, nayo Pawulo akalongaje, Ntsin'tsela kuta heve uveye muhigaji mu inyi yino kwa myaka myolofu, ihyo ntsin'gana kulonga hila ndongwa fyotsili, kuno ntsina wusangalo wukomi mu numbula yangu. 11Ufuluche uputsanitse na kutsela kuta tsilutye siku kumi na tsivili hela kuhuma mbite ku Yelusalemu kumufugamila Mulungu. 12Vayawudi vano sivakafisile heni mu Nyumba ya Mulungu ntsinlongana na munu yoyuve, awu kudita chitika ha mukong'ano, awu kusumwana na munu yoyuve mu nyumba ya kitang'anila Vayawudi, awu hono hanji hohave ha muji. 13Sivafuluche vakulonjele wukweli kukulajila ndongwa tsila tso vanyije heni. 14Lulongwa lo fuluche ntsihale kwa heve lumwe duve. Heni ntsingumufugamila Mulungu va vadada vetu na kufwata kota fyo vandiche valoli va Mulungu, na kaha ntsinguyifwata Ng'asi yila yo vene vanguyichema kuta yawudesi. 15Heni ntsina lihuvilo lilyo kwa Mulungu kota vanu vano fyo vanalyo, kuta kukuva na wutsilipuko kwa wo van'dita na vala wo sinambe vadite kota fyo an'gana Mulungu. 16Ihyo ntsingitsovetsa chila luvala ili ntsive na numbula ngolofu halutalo ha Mulungu na halutalo ha vanu.
17Hontsavaga kikala kutali kwa myaka myolofu, hambele ngatsaje ku Yelusalemu ili ntsivaletele finu vanu vagayu va inyi yangu na kutawula sadaka kwa Mulungu. 18Luvala lula hontsavaga mwanga ntsivisile chang'ani kwasawuli ya kumufugamila Mulungu, vakafikaje vanu vano, na sikwavaga na lilugu lya vanu lyo lyavaga hamwe na heni, na kaha sintsavakosile vanu vadite chitika chochive. 19Lechelelo kwavaga na Vayawudi vanji wo vavaga vahumye ku Asiya wo twavaga hamwe nawo uko, iwo wo vaganikije vave hano valonje manyi vana lulongwa lubi loluve londisile heni, 20manyi si ihyo uvaleche vanu vano wo valihano valonje lulongwa lubi lo valuwene kwaheni ho ntsavaga ntsimile halutalo ha libalatsa lyawo likomi, 21ila ntsalontsile fikami lulongwa lumwe hela hontsavaga halutalo hawo kuta, Heni munyiguno ntsinhigwa kwasawuli ya wutsilipuko.
22Ihyo muvina Felichi yo avaga atsitsele finofu ndongwa tsa Ng'asi iyo, akalongaje, “Hala muvina Lisiya hoakuva kutsa nguvalonjela na kuyilamula nongwa yako.” Ihyo Felichi akayilisaje chesi yila. 23Kaha akamulajitsaje yula muvina va chikundi cha vimilitsi amuviche Pawulo mu wimilitsi, ila vamuleche adite cho an'gana mwene na muvaleche vanu vake va habehi vamuditile cho an'gana.
Felichi anhulikitsa nongwa ya Pawulo
24Hotsavaga kulutila siku nunga, Felichi akatsaje hamwe na Dulusila mudala vake yo avaga Muyawudi. Felichi akalajitsaje vamulete Pawulo, hoavaga kutsa akamuhuliktsaje hala ho avaga anlonga ndongwa tsa kumutumba Yesu Chilisito. 25Lechelelo hala Pawulo hoavaga anlonga ndongwa tsa wuwuya kwa Mulungu na ndongwa tsa siku ya wuhigo na ndongwa tsa kiyangalila u mwene. Felichisi akavaje na muloto na kulonga hino lelo duve yikwilye ufuluche uwuche, na heni manyi mate luvala ngukuchema. 26Hamwe na ihyo yula muvina Felichisi amuchemaga chila luvala na kulongana kwa kuhotsa kuta Pawulo afuluche amupele magobole ili amulechele.
27Hojavaga kulutila myaka jivili, Polichiyo Fesito akabadilaje hono ha wutavala wa Felichisi. Lechelelo kwasawuli Felichisi aganaga kuvagan'ya Vayawudi, ihyo akamulekaje Pawulo mu nyumba ya vawopwa.
Currently Selected:
Ng’olwa 24: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
