Ng’olwa 25
25
Pawulo ansuka nongwa yake yisindikwe kwa muvina va inyi ya Lumi
1Hotsavaga kulutila siku tsidatu luhuma Fesito afiche ku Kayisaliya kuva mutavala, akawukaje kubita ku Yelusalemu, 2kuko vatawula nambiko vavina hamwe na vavina va Vayawudi vakatsaje na kumuhiga Pawulo. 3Vakamugongoletsaje ndalahela Fesito avaditile wuwuya, alajitse Pawulo asindikwe ku Yelusalemu ili vene vamunyitile mung'asi na kumukopola. 4Lechelelo Fesito akavajibulaje, “Pawulo awopitwe mu nyumba ya vawopwa kula ku Kayisaliya, heni mwene ngubita kuko siku tsitsinago tsa habehi. 5Muvahagule vavina venyu vatunga tubitase hamwe na heni, na uko vakalonje ndogwa tso vangumuhiga na manyi kuna lulongwa loluve lubi lo adisile, heni nguhulikitsa na kulamula.”
6Fesito hoavaga kikala hamwe nawo kwa siku kota nane awu kumi hino, akabitaje ku Kayisaliya na hamilawu iyage akikalaje chigoda chakuhijila mu libalatsa ya kuhijila na kulajitsa vamulete Pawulo halutalo hake. 7Pawulo hoavaga kutsa ha libalatsa lya kuhijila, vala Vayawudi wovavaga vatsitse kuhuma ku Yelusalemu vakimaje kuno vamupilime Pawulo, nawo vakantsaje kumuhiga kwa kulonga ndongwa ntsolofu ntsibi tso sivafuluche valonje hila fyotsili. 8Lechelelo Pawulo akantsaje kulonga, “Heni singadisile lulongwa lubi loluve lo luli tebe na malajitso ga Musa, awu Nyumba ya Mulungu, awu kuva tebe na mutavala va inyi ya Lumi.”
9Lechelelo Fesito aganaga kihegeletsa kwa Vayawudi, ihyo akamuputsaje Pawulo, “Mbe, un'gana kubita ku Yelusalemu na ukahijilwe kuko halutalo hangu kwasawuli ya ndongwa tsino ntsibi tso vangukuhiga?” 10Pawulo akajibulaje, “Heni ntsimile halutalo ha balatsa ya kuhijila lya Kayisali, na iha ho ntsin'ganika kuhijilwa. Kota hila heve mwene fyo un'tsela finofu kuta sintsavaditye Vayawudi lulongwa lubi loluve. 11Duve manyi ndisile lulongwa loluve lo nguganika kufwa, singusuka kuhulumilwa. Lechelelo manyi ntsanantsile lulongwa loluve na ntsin'ganika kufwa, singulema kufwa. Manyi vave van'nyiga kwa wudesi kuduhu munu yoyuve yo afuluche ang'abikitse kwa Vayawudi vano. Heni ntsinsuka muyisindiche nongwa yangu kwa muvina va inyi ya Lumi.” 12Hala Fesito hoavaga kulongana na vanu va libalatsa lyake, akamujibulaje Pawulo, “Kwasawuli heve ususile kubita kwa muvina va inyi ya Lumi, duve vakukusindika.”
Pawulo ali halutalo ha Ajilipa na Beniche
13Hotsavaga kulutila siku nunga hambele, muntsajila Ajilipa na muhatsave yo achemwaga Beniche vakafikaje ku Kayisaliya kumulibulitsa Fesito mu wutavala. 14Hovavaga kikala kuko siku ntsolofu, Fesito vakalonganaje na muntsajila nongwa ya Pawulo, “Hano hana munu yumwe yo akalesilwe na Felichi mu nyumba ya vawopwa. 15Ihyo hontsavaga kubita Yelusalemu, vatawula nambiko vavina na vavina va Vayawudi vakandonjelaje ndongwa tsake na kusuka ntsimuhije kuta akosise. 16Lechelelo heni ntsavapitwe kuta si ntsovelo ya Valumi kumuhiga munu yoyuve kuta akosise, manyi muhigwaji ang'acha ang'ali kitang'ana na vala wo vamuhitsile, mbaka avaje apelilwe nyafwasi ya kipamanila kwa nongwa yila yo vamuhije. 17Hovavaga kufika hano hamwe na heni sintsahafile, hamilawu yiyage ngavikaje chikalo cha libalatsa lya wuhigo, ngalajitsaje kuta vamulete munu uyo. 18Vanu vala wo vavaga vamuhijite Pawulo vakimaje, lechelelo vakalemwaje kulonga lulongwa lubi loluve kota fyo ntsahotsaga. 19Lechelelo vavaga na sumwano nunga na munu uyo kwasawuli ya ndongwa tsawo tsa dini, na vagwadilaga ndongwa tsa munu yumwe yo afweye yo anchemwa Yesu, lechelelo mwene Pawulo ahahanitsaga kuta munu uyo ang'acha mumi. 20Heni ngalemwaje kutsela cho ngudita kwasawuli ya lulongwa ulo, ihyo ngamuputsaje Pawulo manyi akugana kubita ku Yelusalemu ili akajibule cho vangumuhijila. 21Lechelelo Pawulo akasukaje lulongwa lwake lukahulikitswe na muntsajila muvina va inyi ya Lumi, ihyo ngalajitsaje avikwe mu nyumba ya vawopwa mbaka hala ho ngumusindika uko.” 22Ihyo Ajilipa akamulonjelaje Fesito, “Ntsin'gana ntsimuhulikitse tsimwene.”
Fesito akamupitulaje, “Ukumuhulikitsa munu uyo mitondo.”
Ajilipa anlonjelwa nongwa ya Pawulo
23Hamilawu iyage, Ajilipa na Beniche vakinjilaje ha libalatsa lya kuhijila kwa wusangalo, kuno vilongwitse hamwe na vavina va vimilitsi na vanu vatambulwa va muji gula. Ihyo kwa malajitso ga Fesito vakamuletaje Pawulo. 24Ino lelo Felisito akalongaje, “Muntsajila Ajilipa na henye nyeka yo muli hono hano, mungumuwona munu yuno yo alihalutalo henyu! Aveye tebe na Vayawudi veka wo vangikala hono hano na va uko Yelusalemu, ihyo vakandetelaje nongwa kuta an'ganika kukopolwa. 25Lechelelo heni singawene kuta adisile lulongwa lubi loluve mbaka aganiche kukopolwa, lelo kwasawuli mwene mwanga avaga aganite lulongwa lwake lusindikwe kwa muntsajila muvina va inyi ya Lumi, na heni ngalamulaje asindikwe kuko. 26Lechelelo heni ntsilihela chinu cha kumwandichila munu va kuhesimilwa Kayisali yo muntsajila muvina va inyi ya Lumi, kwasawuli ya munu yuno. Ihyo ntsimuletite halutalo henyu henye nyeka, hasa heve muntsajila Ajilipa, kota fyo uhulikitse ulamule, ili ntsive na chinu cha kwandika. 27Ihyo ntsin'wona kuta lukuva lulongwa lwa mbedatsi kumusindika muwopwa kwa munu va kuhesimilwa Kayisali yo muntsajila muvina va inyi ya Lumi, bila kulajila ndongwa tso vamuhije.”
Currently Selected:
Ng’olwa 25: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
