Ng’olwa 27
27
Pawulo ansindikwa ku Lumi
1Hoyavaga kulamulwa kuta tukubita ku Italiya kwa kukolela mubahali, Pawulo na vawopwa vanji vakakabitswaje kwa muvina va vimilitsi yo achemwaga Juliyasi, yo avaga yumwe va chikundi cha Kayisali muntsajila muvina va Lumi. 2Tukantsaje lujendo lwetu kwa kukwina meli yo yahumaga ku Adulamitiyamu yo yavaga mulujendo kukolela miji ja mulubali lwa bahali ku Asiya. Twavaga hamwe na Alisitako munu va ku Machedoniya va kuhuma ku Tesaloniche. 3Hamilawu iyage tukafikaje ku Sidoni. Juliyasi akamuditilaje wuwuya Pawulo kwa kumuleka itang'ane na vanu vake va habehi, ili vamupele chochive cho aganaga. 4Tukawukaje kuhuma kuko na kwasawuli ya ng'ala ngomi yawugaga finji, tukakolaje lubali lwa kunena lwa hono hakafu ho hapilimwe na malenga ho hanchemwa Chipulo. 5Hotwavaga kulowoka bahali yo yavaga lubali lwa Chilichiya na Pamufiliya, tukafikaje ku muji gwa Mila go gwavaga mu inyi ya Lisiya. 6Kuko yula muvina akayifikaje meli yimwe yo yahumaga ku Alechitsandeliya kubita ku Italiya, akatukwinitsaje mumo. 7Tukajendaje molemole kwa meli kwa luvala lwa siku ntsolofu, tukabitaje kwa kunana mbaka tukafikaje habehi na muji gwa Nido. Lechelelo ng'ala ngomi yendelelaga kuwuga tukalemwaje kubita kwa kusupanitsa, ihyo tukakolaje lubali lwa lihumilo lwa litsuva lwa muji gwa Chilete hono hakafu ho havaga hapilimwe na malenga na tukakolaje habehi na ku Salumone. 8Tukakolaje mulubalilubali lwa bahali kwa kunana mbaka tukafikaje hono ho hanchemwa Bandali Nofu habehi na muji gwa Laseya.
9Hotwavaga kuyatsa luvala lolofu mubahali, na lujendo lwetu lwavaga na hatali ntsolofu, kwasawuli siku tsa kuleka kulya tsavaga mwanga tsilutye, ihyo Pawulo akavafundaje vanu kwa kuvalonjela kuta, 10“Nyee vayangu, ntsin'wona kuta lujendo luno lukuva lutalamu na lwa kutupela hasala ngomi kwa meli na mitsigo na kwa wumi wetu.” 11Lechelelo yula Juliyasi muvina va chikundi cha vimilitsi akabedalaje chila cho alontsile Pawulo, akavahulikitsaje mulongotsa meli na munya meli. 12Kwasawuli hono hotsimaga meli havaga habi kwa kikala ha luvala lwa chisisima, vanu wolofu vakalongaje kuta chiba twendelele na lujendo mbaka tufiche ku Foyiniche twikale kuko ha luvala luno lwa chisisima. Hono iho hotsimaga meli havaga lubali lwa kolinsotela linsuva lwa muji gwa Chilete.
Ng'ala ngomi mubahali
13Ng'ala yikantsaje kuwuga molemole kuhumila lubali lwa kusika, vakitumbaje kuta vakuvetsa kufika kovahotsije kuta vakufika, ihyo vakahetsaje nanga ya kwimitsila meli na kwantsa lujendo, mbaka habehi na hono hotsimaga meli ha mwani gwa Chilete. 14Lechelelo holwavaga kulutila luvala ludodo hela yikangatsaje kuwuga ng'ala ngomi yo yinchemwa, “Ng'ala ya kunena,” yahumaga ku mwani gwa Chilete. 15Meli yikatowaje na ng'ala yila ngomi mbaka tukalemwaje kusindika meli ku lubali lula lo yinhuma ng'ala yila, lelo tukayilekaje meli yibite kuyim'bita yila ng'ala. 16Hotwavaga kukunujitswa kwa wangufitso na kufika hono hakafu ho hapilimwe na malenga ho hanchemwa Kawuda, iho tukavetsaje kwendesa kwa kunana mutumbwi mudodo gwa kuvakulusila vanu. 17Vala vatantsi va meli vakagukwegaje mutumbwi ugo mbaka mu meli na kuguwopa mulubali lwa meli kwa ndejesi ili guleche kubeneka. Vakogopaga kuta vaka kukwama muluhanga lo luli mulubali lwa bahali lwa mwani gwa Siliti, vakisaje nanga ili meli yileche kukunujitswa na ng'ala yila. 18Ng'ala yikendelelaje kuwuga ndalahela, na siku ya kavili vakantsaje kutegula mitsigo na kujidibula mu bahali. 19Siku ya kadatu vakadibulaje finu fya meli kwa mawoko gawo vene. 20Kwa luvala lwa siku ntsolofu si twaliwene litsuva awu nyenyetsi, nayo ng'ala ngomi yikendelelaje kuwuga. Mbaka tukagotsolaje kukuluka.
21Hotwavaga kikala siku ntsolofu bila kulya, Pawulo akimaje hagati hawo akavalonjelaje, Nyee vayangu, yika kuva chiba mukamuve munyulikitse heni na kuleka kwendelela na lujendo kuhuma hala ha Chilete, ihyo mukakuva mwepite wananjifu wuno wa meli na kuyatsa mitsigo jino.
22Lechelelo sambi ntsinguvasuka mwikangatse! Kuduhu nambe munu yumwe yo akufwa, ila meli ng'ani yo yikwananjika. 23Mulungu yo heni ntsi vake na yo ntsingumutumichila, higolo hachilo akamutumile mutantsi vake va kilanga akanyumilaje, 24nayo akandonjelaje kuta, Pawulo, uleche kuva na muloto! Kwasawuli un'ganika kwima halutalo ha muntsajila muvina va inyi ya Lumi, nayo Mulungu kwa wuwuya wake akukukulusa heve hamwe na vanu veka wo ujendite nawo. 25Ihyo nye vayangu musangalalaje, kwasawuli ntsingumutumba Mulungu kuta yikuva kota fyo andonje. 26Lechelelo nambe yikuva ihyo ila meli yetu yikunanahila hono hanji hakafu ho hapilimwe na malenga. 27Siku ya kumi na katayi hachilo, twavaga tung'acha tunkunugitswa na ng'ala mu bahali ya Adiliya. Hoyavaga kufika habehi na hachilo na gati, valongotsa meli vakatselaje kuta vavaga vali habehi na inyi ng'afu. 28Ihyo vakapimaje wutali wa malenga vakisaje chuma chisito cho chiwopelitswe mu lulejesi vakisaje mumalenga, vakapimaje gakavaje na wutali wa mita alubayini, vakahejelaje kutalo vakapimaje vakapataje wutali wa mita isilini na sita. 29Vakavaje na muloto kuta meli yawo yifuluche yikunugitswe mbaka yikakune mu litalawe lya mu bahali, vakisaje nanga tsitayi tsa kwimitsila meli kwa kumbele, vakatsindaje kwele. 30Ihyo vala vatantsi va mu meli mwanga vavaga visise mutumbwi mubahali, vakavaje kota van'gana kubita kutalo vakise nanga tsa kwimitsila meli, kumbe vaganaga kunyelebuka. 31Lechelelo Pawulo akamulonjelaje yula muvina va vimilitsi na vimilitsi vake kuta, “Manyi vatantsi vano va mu meli valeche kusigala mugati muno, simukuhogola mukuluche.” 32Ihyo vala vimilitsi vakadumulaje tsila ndejehe tso tsigubatilitse gula mutumbwi mudodo, vakagulekaje gwelele mu malenga. 33Hokwavaga kuva habehi na kucha, Pawulo akavagongoletsaje vanu veka valye chilyo akatyaje, “Lelo kwa siku tsino kumi na tsitayi muveye na muloto na simulalya chinu chochive. 34Ino lelo ntsinguvasuka mulye chilyo kwasawuli mun'ganika kuva wumi. Kwasawuli ntsinguvalonjela wukweli kuta veka mukukuluswa, na kuduhu nambe munu yumwe yo akutetseka.” 35Pawulo hoavaga kulonga ihyo, akategulaje mukate akamulumbaje Mulungu halutalo hawo na kugumega na kwantsa kulya. 36Ihyo vanu veka vakasangalalaje na kwantsa kulya. 37Vanu veka wo twavaga mugati mu meli, yo twakulwiche twavaga vanu mya mbili na sabinasita. 38Chila munu hoavaga kulya chilyo na kwiguta, vakapungutsaje wusito wa meli kwa kudibula mu bahali ngano na filyo fitunga.
Ng'ala ngomi yim'bena Meli
39Hokwavaga kucha vanu veka vakalemwaje kuhatsela kuta hala vavaga inyi yachi, ila vakahawonaje hono ho hana luhanga nawo vakalonganaje kuta manyi vakuvetsa vabite vakayegamiche meli hono iho haluhanga. 40Ihyo vakawopolaje nanga tsa kwimitsila meli na kutsileka mubahali, na luvala lulo vakawopolaje ndejehe tso vavaga vawopite sitelinji ya meli. Hambele vakategaje mwenda gwa kutalo gwa kuchijila ng'ala, ili guyichije ng'ala na kukunujitswa kubita kula koluli luhanga lula. 41Lechelelo meli yikafikaje hono ho havaga na nang'ano tsa malenga mafupi go gam'bita fikami, meli iyo yikakwamaje na kutalo kwa meli kukayajililaje muluganga bila kutigasika. Kumbele kwa meli kukabenekaje vipande fivili kwasawuli ya kukunujitswa na mavimbi makomi.
42Vala vimilitsi vakahotsaje kuvakopola vawopwa veka ili valeche kojelela mbaka kuluhanga na kunyelebuka. 43Lechelelo kwasawuli yula muvina va vimilitsi aganaga kumukulusa Pawulo na lulongwa ulo, akavalemetsaje vala vimilitsi valeche kudita ihyo. Akavalajitsaje vala wo vafitsele kojelela vitotse mu bahali wojelele mbaka kula kuluhanga, 44na vamwinga vahume mumbele kuno vibatilitse mu mbawo awu mufipande fya meli fyo fibeniche, ihyo vanu veka tukakulukaje na kufika kuluhanga tuwumi.
Currently Selected:
Ng’olwa 27: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
