Ng’olwa 28
28
Ndongwa tso adisile Pawulo ku Melita
1Hotwavaga kukuluka na kufika hono hala tuwumi, tukatselaje kuta hono hala hakafu ho hapilimwe na malenga hachemwaga Melita. 2Vanyakaye va hono iho vavaga vana numbula nofu ndalahela. Vakatukotselaje moto gwa kotela kwasawuli ndonya yavaga yin'tonya na kwavaga na ng'ala. 3Pawulo hoavaga anholangitsa ngodi na kuhegeletsa mu moto, na kwasawuli ya wupyo wupyo wula wa moto, yikahumaje ntsoka yinya sumu ng'ali yikamupilingitsaje mu liwoko. 4Vala vanu va hono hala hovavaga kuyiwona tsoka yin'ninyila mu liwoko lya Pawulo vakalonganaje kuta, “Munu yuno akuva muwumiyani, na avaje akuluche kuhuma mu bahali, kwasawuli ya uwumiyani wake mihoka sijikumuleka endelele kuva mumi.” 5Lechelelo Pawulo akayipamanilaje mumoto ntsoka yila nayo si yamulumile. 6Vanu vala vahotsaga kuta akakutuna awu kugwa hasi na kufwa bahobaho. Lechelelo hovavaga kutsinda kwa luvala lutali na kuwona kuta kuduhu chinu chochive cho chimuhumye, vakalongaje kuta, “Mwene yuno akuva yumwe va mihoka!”
7Habehi na hono hala havaga na migunda ja muvina va hono hala hakafu ho hapiliwe na malenga ho hachemwaga Pubuliyo, munu yuno akatulibulitsaje kwa numbula ya wuwuya kwa siku tsidatu. 8Dade va Pubuliyo avaga avasise mulusaga atamikaga kuhalisa danda. Pawulo akinjilaje munyumba na kumusuchila kwa kumuvichila mawoko, nayo akaponaje. 9Vanu vala hovavaga kuhulika ndongwa tso tsihumye, vatamwa veka va hono hala vakatsaje na vakaponetswaje. 10Vanu vala vakatuhesimilaje ndalahela na vakatulumbaje kwa kutupela finu fyolofu, na hotwavaga tun'gana kwantsa lujendo, vakatusindikitsaje mbaka mu meli.
Pawulo anhuma ku Malita na kubita ku Lumi
11Hojavaga kulutila myetsi jidatu tukantsaje kaha lujendo lwetu kwa meli yimwe ya ku Alechitsandeliya yo yavaga yandikwe “Mihoka jinya mbili,” jo jinchemwa Kasita na Polisichi. Meli iyo yavaga yimile hono hala kwa luvala lwa chisisima hono hala ho hapilimwe na malenga. 12Tukafikaje ku muji gwa Silakusa, tukikalaje baho kwa siku tsidatu. 13Tukawukaje kuhuma uko, tukapilimaje na kufika ku muji gwa Lejiyo. Hoyavaga kulutila siku yimwe ng'ala ya kuhuma lubali lwa kusika yikantsaje kuwuga na kutukunujitsa na siku ya kavili tukafikaje ku muji gwa Puteyoli. 14Kuko tukavafikaje kwa vayetu vatunga wo vamutumbye Chilisito wo vakatugongolaje twikale nawo kwa wichi yimwe. Ihyo ho twafisile inyi ya Lumi. 15Vayetu wo vamutumbye Chilisito va uko ku Lumi ho vavaga kuhulika ndongwa tsetu, vakatsaje kututang'anitsa mbaka hono ha kugutsila finu hanchemwa Apiyo ha Mikahava Jidatu. Pawulo ho avaga kuvawona, akamulumbaje Mulungu akakangatswaje ndalahela.
Pawulo ku muji gwa Lumi
16Hotwavaga kufika ku Lumi, Pawulo akalekwaje aliyeka na mwimilitsi yumwe hela va kumwimilila.
17Hotsavaga kulutila siku tsidatu, Pawulo akavachemaje hono hamwe vavina va Vayawudi. Hovavaga kukong'ana akavalonjelaje, “Nyee, vang'olotsangu, nambaje sindisile lulongwa lubi loluve kwa vanu vetu awu kwa ntsovelo tsa va dada vetu. Lechelelo vambite uko ku Yelusalemu na vakambikaje mu wimilitsi wa Valumi kuno mbopitwe. 18Hovavaga kusinda kumbutsa vaganaga kundechela, kwasawuli sivaluwene lulongwa lo lukundita ng'opolwe. 19Lechelelo vavina vamwe va Vayawudi vakalulemaje lulongwa ulo, ngasukaje kuta vasindiche lulongwa lwangu kwa Kayisali muntajila muvina va inyi ya Lumi, nambaje sintsavaga na nongwa yoyive ya kuvahiga vanu va inyi yangu. 20Ihyo susile twiwone na kulongana na henye, kwasawuli heni mbopitwe nyololo tsino kwasawuli ya lihuvilo lila lya vanu va Isilaheli.”
21Vene vala vakamulonjelaje, “Hetwe sitwanuche baluva yoyive kuhuma ku Wuyawudi yo yandikwe ndongwa tsako, na kahi kuduhu Muyawudi yoyuve yo atsitse hano na kulonga lulongwa lubi loluve kwasawuli yako. 22Lechelelo tun'wona kuta chiba tuhuliche kuhuma kwa heve, kwasawuli tun'tsela kuta chila hono vanu vanguchilonga fibi chikundi chino.”
23Vakapangaje siku ya kitang'ana, vanu wolofu vakafikaje kono uko ko avaga angikala Pawulo na luhuma hamilawu mbaka hamihe, nayo Pawulo avavikulilaga ndongwa tsa Wuntsajila wa Mulungu kuhuma mu malajitso ga Musa na valoli va Mulungu na kuvagongoletsa kuta vamutumbe Yesu. 24Vanu vamwe vakatsidichilaje ndongwa tsake, lechelelo vamwe vakalemaje kumutumba. 25Ihyo vanu vakagavikaje kwasawuli ya ndongwa itso na kwantsa kuwuka, Pawulo akavalonjelaje, Muhe va Mulungu alontsile wukweli na vadada venyu kukolela kwa Yisaya muloli va Mulungu hoavaga kulonga ndongwa tsila kuta,
26Ubite ukavalonjele vanu vano,
mukuva munhulika, lechelelo simukuva munkwelewa,
mukuva munlola, lechelelo simukuva munguchitsela chila cho munguchiwona,
27kwasawuli vanu vano numbula tsawo tsiveye nalamu, na mapulichilo gawo gadibe, na miho gawe gabofwe.
Yikayive siyo ihyo vakakulola kwa miho gawo, na kuhulika kwa mapulichilo gawo, na kwa numbula tsawo vakakutsela na kumituchila heni Mulungu vawo, na heni ntsika kuvaponetsa.
28Kaha Pawulo akalongaje, “Duve ntsin'gana henye mutsele kuta ndongwa tsa Mulungu tsa wukuluso tsisindikwe kwa vanu wosi Vayawudi. Vene iwo vakutsihulikitsa!” 29Nayo Pawulo hoavaga kusinda kulonga ndongwa tsino, Vayawudi vakawukaje kuno vangiputsa vene kwa vene ndongwa ntsolofu.
30Kwa luvala lwa myaka jivili Pawulo akikalaje kuko ku nyumba yo avaga apantsile, kuno anguvalibulitsa vanu veka wo vabitaga kumulola. 31Nayo avikulaga ndongwa tsa Wuntsajila wa Mulungu bila kuva na muloto, na kudahitsa ndongwa tsa Mutwa Yesu Chilisito, bila kulemetswa na munu yoyuve.
Currently Selected:
Ng’olwa 28: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
