Yohana 1

Lulongwa adisilwe kuva muvili

1Iho hawulongolo fing'acha kuwumbwa finu fyeka avaga hoyoli Lulongwa, nayo Lulongwa avaga hamwe na Mulungu, nayo Lulongwa avaga Mulungu. 2Nayo Lulongwa avaga kwa Mulungu, kuhuma fing'acha kuwumbwa finu fyeka. 3Kukolela kwa mwene uyo Lulongwa Mulungu awumbite finu fyeka, bila mwene kuduhu chinu chochive cho chawumbitwe. 4Mugati mwake mwavaga na wumi, nawo uwo wumi wowavaga mwangatsa gwa vanu. 5Nago mwangatsa gung'alikaga mujitsa, nayo jitsa siyigutsimaga mwangatsa. 6Kwavaga na munu yumwe yoatumilwe na Mulungu, litawa lyake achemwaga Yohana, 7nayo atsitse kuvalonjela vanu ndongwa tsa uyo mwangatsa, ili kukolela kwa mwene uyo mwangatsa vanu veka vamudichile Mulungu. 8Nayo Yohana siavaga uyo mwangatsa, lechelelo atsitse kuvalonjela vanu ndongwa tsa uyo mwangatsa. 9Uyo yo mwangatsa va wukweli, mwangatsa yo ankutsa mu inyi na kuvangatsila vanu veka. 10Duve uyo Lulongwa avaga mu inyi, na kwa mwene inyi yawumbitwe, lechelelo vanu sivamutselye. 11Atsitse kwa vanu vake, lechelelo vanu vake sivamwidiche. 12Lechelelo veka wovamwidiche na kumutumbila, avapelye wuwetso wa kuditwa vana va Mulungu. 13Iwo sivadisilwe vana va Mulungu kwasawuli ya kulelwa na valeli vawo, awu kota fyo an'gana munu, ila valeliche kota hila fyo an'gana Mulungu.

14Nayo Lulongwa adisilwe muvili, akikalaje hamwe na hetwe. Hetwe natwe tukawuwonaje wumelemo wake, wumelemo kota wa Mwana va wiyeka yo ahumye kwa Dada, amemile wuwuya wa Mulungu na wukweli. 15Yohana avaga anguvalonjela vanu fikami ndongwa tsa uyo Lulongwa kuta, “Uyu yo yula yo mwanga ntsavalonje kuta mwene uyo ankutsa kumbele kwa heni, na uyo yo muvina kundutila heni, kwasawuli mwanga avaga hata hala heni hontsavaga ntsing'acha kutsa.” 16Kwasawuli ya wukwilo wake, hetwe tweka twanuche wuwuya wa Mulungu kaha na kaha. 17Kwasawuli malajitso ga Musa galetitwe na Mulungu kukolela kwa Musa, lechelelo wuwuya wa Mulungu na wukweli fyatsitse kukolela kwa Yesu Chilisito. 18Kuduhu munu yoyuve yo aliamuwene Mulungu luvala loluve, ila Mwana ng'ani yo alihabehi na Mulungu, nayo uyo amudisile Dada atselaniche.

Ndogwa tso alontsile Yohana Mubatitsi

Matayo 3:1-12; Maliko 1:1-8; Lukasi 3:1-18

19Itsino tso ndogwa tso alotsile Yohana luvala lula Vayawudi hovavatumile vatawula nambiko na Valavi kuhuma Yelusalemu vamuputse kuta, “Heve yo nani?” 20Yohana sialemile kuvapitula lechelelo avalonje kuta, “Heni siyo Chilisito Mugombotsi.” 21Ihyo vala vanu vakamuputsaje kaha kuta, “Ino lelo heve yo nani? Mbe, heve yo Eliya?” Yohana akavapitulaje, “Heni siyo Eliya.” Vakawilaje kumuputsa, “Mbe, heve yo yula Muloli yo valongaga kuta akutsa?” Yohana akavapitulaje, “Ndaya” 22Ihyo vakamulonjelaje, “Duve tulonjele heve yo nani? Heve unlonga chichi kwajili yako u mwene? Utulonjele ili tutsele chila cho tukuvapitula vala wo vatutumile.” 23Yohana akavapitulaje kota hila Yisaya muloli va Mulungu alontsile,

“Heni yo litsi lya munu yo alikumbuga kuva mumuditichile chang'ani ng'asi yo akukolela Mutwa.”

24Iwo vanu vavaga vatumilwe na Mafwalisayo. 25Vakamuputsaje Yohana, “Manyi heve siyo Chilisito, awu siyo Eliya, awu siyo yula Muloli va Mulungu, kwasawuli yachi um'batitsa?” 26Yohana akavapitulaje kuta, “Heni ntsim'batitsa kwa malenga, lechelelo hagati henyu hoyoli munu yo simumutsele. 27Mwene yo an'kutsa hambele hangu, sifuluche nambe kuwopola ndejesi tsa ndatu tsake.” 28Ndogwa itsi tseka tsahumye uko ku Besaniya, mwambu gwa lulenga lwa Yolodani, uko ko abatitsilaga Yohana.

Yesu mwanang'olo va Mulungu

29Hamilawu yiyage, Yohana akamwonaje Yesu ankutsa akavalonjelaje, yuno yo Mwanang'olo va Mulungu yo akuvahulumila vanu ndongwa ntsibi tsa mu inyi. 30Uyuno yo yula yontsavalonje kuta, halutalo hangu ankutsa munu yumwe yo muvina kundutila heni, kwasawuli uyo avaga mwanga hoyoli heni hontsavaga ntsing'ali kuleleka. 31Nambe heni mwene sintsamutselaga, lechelelo ntsitsitse kubatitsa kwa malenga ili vanu va Isilaheli vamutsele. 32Yohana akalongaje hila fyo amutselaga Yesu, “Ntsamuwene Muhe va Mulungu ankwika kuhuma Kilanga kwa Mulungu kota ng'unda na kwima mwilanga mwake. 33Heni sintsamutselaga, lechelelo mwene yo anumile mbatitse vanu kwa malenga avaga andonje kuta, munu yula yo ukumuwona Muhe va Mulungu amwichye kuhuma Kilanga na kikala muchanya mwake, uyo yo akubatitsa vanu kwa Muhe va Mulungu. 34Heni ntsi mwene ntsaluwene lulongwa luno na ntseliwe kuta uyu yo Mwana va Mulungu.”

Vadahitswa valongola va Yesu

35Siku ya kavili Yohana avaga hono hahalaga hamwe na vadahitswa vake vavili. 36Nayo hoavaga kumuwona Yesu anlutila, akalongaje kuta, “Mulave! Uyuno yo Mwanang'olo va Mulungu.” 37Vala vadahitswa vavili hovavaga kumuhulika Yohana anlonga ndongwa itso, vakamufwataje Yesu. 38Yesu hoavaga kupituka na kuvawona vala vadahitswa vavili vangumufwata, akavaputsaje, “Mun'gana chinu chachi?” Vakamulonjelaje, “Labi,” Chinya kutijila, “Mudahitsi,” ungikala kwiya? 39Yesu akavapitulaje, “Mutse na henye mukuhawona.” Nawo vala vadahitswa vakamufwataje, na vakahawonaje hono ho ikalaga, vakikalaje kuko munyi gula. Nawo vitang'ine na Yesu sakumi ya mumihe. 40Andeleya mung'olotse va Simoni Petulo, nayo avaga yumwe va vala vadahitswa vavili yo vamuhuliche Yohana fyo alongaga, na kumufwata Yesu. 41Andeleya akamulonjelaje Simoni mung'olotse kuta, “Tumuwene Muhagulwa va Mulungu.” Uyo yo Chilisito.

42Andeleya akamusindikaje Simoni kwa Yesu. Nayo Yesu hoavaga kumulava Simoni akalongaje kuta, “Heve yo Simoni mwana va Yohana. Sambi ukuchemwa Chefwa.” Chijilichi Petulo, chinya kutijila “Litalawe.”

Yesu anguvachema Fwilipo na Natsanaeli

43Siku ya kavili Yesu alamwe kubita ku Galilaya. Kuko amufisile Fwilipo akamulonjelaje, “Ufwate” 44Fwilipo avaga munyakaye va muji gwa Betitsayida, muji go vavaga vahumye Andeleya na Petulo. 45Nayo Fwilipo akamufikaje Natsanaeli, akamulonjelaje, “Tumufisile Yesu mwana va Yusufu va ku Natsaleti, yula yo ndongwa tsake yo tsandikwe mufitabu fya malajitso ga Musa na fya valoli va Mulungu.” 46Nayo Natsanaeli akamuputsaje Fwilipo, “Mbe, chinu chinofu chochive chifuluche chihume ku Natsaleti?” Fwilipo akamulonjelaje, “Utse ulole.” 47Hala Yesu hoavaga kumuwona Natsanaeli ankutsa kwa mwene, akamulonjelaje ndogwa tsake kuta, “Mulave! Yuno yo Muisilaheli va wukweli, nayo alihela wubi wowuve.” 48Nayo Natsanaeli akamuputsaje, “Untselye chinya ndawuli?” Yesu akamujibulaje, ntsakuwene hala howavaga ung'acha wichite hasi ha mubichi gwa mutini, hala Fwilipo hoavaga ang'ali kukuchema. 49Natsanaeli akamulonjelaje kuta, “Mudahitsi, heve yo Mwana va Mulungu! Heve yo Muntsajila va Isilaheli!” 50Yesu akamulonjelaje kuta, “Unumbye kwasawuli ntsikulonje kuta ntsakuwene wichite hasi ha mubichi gwa mutini? Ukutsiwona ndongwa ngomi kulutila itso!” 51Yesu akaendelea kumwambia Natsanaeli kuta, “Ntsinguvalonjela wukweli kuta kilanga kukudinduka na henye mukuvawona vatantsi va Kilanga va Mulungu vankwika na kukwina kwajili ya heni Mwana va Munu.”

Currently Selected:

Yohana 1: SBV

Highlight

Compare

Copy