Yohana 12

Maliyamu angumubaka Yesu Mafuta go ganun'nyilila

Matayo 26:6-13; Maliko 14:3-9

1Hotsavaga tsing'acha siku sita kufika Liwungo lya Pasaka, Yesu akabitaje ku Betsaniya hono ho ikalaga Latsalo yo avaga amutsilipwe. 2Vakamuvichilaje chang'ani chilyo cha mumihe, na luvala ulo Malita avaga mutelesi va chilyo. Nayo Latsalo avaga yumwe va vanu wo vavaga vichite hamwe na Yesu kulya. 3Ihyo Maliyamu akategulaje supa yinya mafuta ga beyi ngomi go ganchemwa nalido go gan'nunyilila ndalahela, akamubakaje Yesu mumagulu na kubakatsa kwa fwili tsake. Nyumba yeka yikanunyililaje mafuta igo. 4Ihyo Yuda Isikaliyoti, yumwe va vala vadahitsi vake kumi na vavili, yo akutsa kumupituka Yesu, akalongaje, 5“Kwasawuli ya chichi mafuta gano gakagagutswe sava na mahombo ga siku mya tsa mutantsi va kutsenga, na magobole igo vapelwe vagayu?” 6Yuda alontsile ihyo siyo kwasawuli ya kuvawonela lusungu vatsunwa, ila kwakuva avaga muhitsi. Mwene yo avaga muvisi va bogolo ya kuvichila magobole, nayo avaga anhitsa fyo fivisilwe umo. 7Lechelelo Yesu akalongaje, “Muleche kumutifya mudala uyo! Mwene agutsile mafuta igo ili ambache muvili kwasawuli ya siku yangu ya kutsikwa. 8Kwasawuli vatsunwa muli hamwe nawo siku tseka, lechelelo simukuva hamwe na heni siku tseka.”

Vayawudi van'gana kumukopola Latsalo

9Lilugu lya Vayawudi holyavaga kuhulika kuta Yesu avaga ku Betsaniya, vakatsaje siyo kwajili ya Yesu ng'ani, ila vatsitse kwajili ya kumuwona Latsalo yo atsilipulwe na Yesu. 10Nawo vavina va vatawula nambiko vakalaganaje kaha na hila fyo vakumukopola Latsalo. 11Kwasawuli Vayawudi wolofu vakibagulaje na vavina vawo, na kumutumba Yesu.

Yesu ankwinjila Yelusalemu kwa ngulugulu

Matayo 21:1-11; Maliko 11:1-11; Lukasi 19:28-40

12Siku ya kavili vanu wolofu wovavaga vatsitse ku Liwungo lya Pasaka vahuliche kuta Yesu alimung'asi ankutsa ku Yelusalemu. 13Vakatolaje miputi ja mibichi ja mitende, na kuhuma kivala kubita kumwanuchila kuno vimbaga hino, “Tumutsumitse Mutwa! Atambichilwe uyo yo ankutsa kwasawuli ya Mulungu. Atambichilwe Muntsajila va Isilaheli.” 14Yesu akayifikaje ntsana ya ntsove akakwinaje na kikala ku mugongo gwake, kota fyo yandikwe mu Mandiko ga Mulungu kuta, 15henye vanu va Yelusalemu, muleche kuwona muloto. Mumulave! Muntsajila venyu ankutsa, akwinile ntsana ya ntsove. 16Hamutalo iho vadahitswa vake Yesu sivakatselaga ndongwa itso, lechelelo Mulungu hoavaga kulajila hila Yesu fyo muvina, iho ho vakiwukaje kuta ndongwa itso tsavaga tsandikwe kwasawuli yake Yesu na vamuditye mwene. 17Lila lilugu lya vanu lyo lyavaga hamwe na Yesu luvala ulo ho amuchemaga Latsalo kuhuma mukabuli na kumutsilipula, vendelye kuhadisila ndongwa tsila tso tsavaga tsihumye. 18Kwasawuli ilyo lilugu lya vanu lyamwanuche Yesu, kwakuva veka vavaga vahuliche kuta avaga adisile ndajilo iyo. 19Ihyo Mafwalisayo vakilonjelaje kuta, “Mun'wona? Hetwe si tulichinu ndaya! Mulole lelo, vanu veka vangumufwata mwene.”

Yesu anlonga hila fyo akufwa na kutsilipuka

20Kwavaga na Vajilichi vamwe hagati ha vanu wovali vahele ku Yelusalemu kumuhonamila Mulungu luvala lwa Liwungo ilyo. 21Vanu iwo vakabitaje kwa Fwilipo munyakaye va ku Betitsayida ya ku Galilaya vakamusukaje kwa kulonga, “Muvina, tun'gana kumuwona Yesu.” 22Fwilipo akabitaje na kumulonjela Andeleya, nawo veka vavili vakabitaje kumulonjela Yesu. 23Nayo Yesu akavalonjelaje, “Mwanga lufisile luvala lwa kulajilwa wuvina wa Mwana va Munu.” 24Ntsinguvalonjelani wukweli kuta, meche ya ngano manyi yileche kumitswa mu lilongo, yifwe na kota, yisigalaga kuva meche yimwe hihyo. Lechelelo manyi yifwe yilelaga meche ntsolofu. 25Vanu vala yo vanguwugana wumi wawo, iwo vakuwuyatsa, na vala yo vanguwuvipila wumi wawo mu inyi yino, vakuwukulusa mbaka ku wumi wo wugaya wudugo. 26Munu yoyuve yo an'numichila an'ganika afwate heni, na hono hohave hontsili heni iho hoakuva na mutantsi vangu. Kaha na munu yoyuve yo akunumichila heni, Dada vangu akumuhesimila.

Yesu angumusuka Mulungu kwasawuli ya chifo chake

27Yesu akawilaje kulonga, “Lelo sambi numbula yangu yinkodeka ndalahela. Ino ndonje chinu chachi? Mbe, ndonje kuta Dada, ung'uluse nyume mu ng'odeko tsino? Ndaya! Ntsatsitse ili ntsifwe kwasawuli ya vanu vanji. 28Dada, ulitsumitse litawa lyako.” Ihyo litsi likalongaje kuhuma Kilanga kuta, “Ntsilitsumitse, na ngulitsumitsa kaha.” 29Lila lilugu lya vanu yovali vimile iho vakalihulikaje litsi ilyo, na vamwe vawo vakalongaje, “Ilyo likuva lijilimo lya liladu.” Lechelelo vamwe vakalongaje, “Mutantsi va Kilanga va Mulungu anlongana nayo.” 30Nayo Yesu akalongaje, “Litsi ilyo lihumye siyo kwasawuli ya heni, ila kwasawuli ya henye. 31Lelo ulu lo luvala lwa vanu va mu inyi tseka kuhigwa, na ihyo mutavala va inyi tseka tsino akusukulwa mamulaka gake. 32Heni honguva kutumbikwa mu mubichi kuhuma mu inyi, ngumukwega chila munu atse kwa heni.” 33Yesu alontsile ndongwa itso kuvalajila kuta akufwa chifo chachi.

34Lilugu lila lya vanu likatovaje chiyove kuta, “Hetwe tuhuliche mu malajitso ga Musa kuta, Chilisito Muhagulwa va Mulungu akikala siku tseka bila wudugo. Kwasawuli yachi heve unlonga kuta Mwana va Munu akuganika kutumbikwa mu mubichi? Uyo Mwana va Munu yo nani?”

35Ihyo Yesu akavalonjelaje, “Mwanga mung'ali mung'acha hamwe na mwangatsa kwa luvala ludodo hela. Ihyo mun'ganika kujenda mu mwangatsa ugo ili jitsa lileche kuvafika, kwasawuli vanu wo vajendaga mu jitsa sivakutselaga kula ko vam'bita. 36Ino lelo mun'ganika mugutumbe mwangatsa, na ihyo homukuva vana va mwangatsa.”

Vayawudi vanlema kumutumba Yesu

Yesu hoavaga kulonga ndongwa itso akawukaje na kubita kifiha. 37Lechelelo nayivaje Yesu adisile ndajilo itso tseka halutalo hawo, vene valemile kumutumba, 38na ihyo tsikakwilaje ndongwa tso avaga alontsile Yisaya muloli va Mulungu kuta,

Mutwa, nani yoatsitumbye ndongwa tsetu?

Nayo nani yo avagubulwe wuwetso wa kukulusa wa Mulungu?

39Ihyo sivitumbye kwasawuli Yisaya avaga alontsile kaha hono hanji kuta,

40Mulungu avabofwitse miho gawo,

na numbula ntsawo tsive nalamu,

ili valeche kulola kwa miho gawo

nambe kudaha kwa numbula tsawo,

hambi valapituka vanumbile na heni ntsivaponetse.

41Yisaya alontsile ndongwa itso kwasawuli avaga mwanga awuwene wumelemo wa Yesu nayo akalongaje ndongwa tsake. 42Nayivaje ihyo, kwavaga na vavina wolofu va Vayawudi wovamutumbye Yesu. Lechelelo kwasawuli ya Mafwalisayo vakalemwaje kumuhala Yesu halutalo ha vanu. 43Kwasawuli vene vaganaga kutsumilwa na vanu kuliko kutsumilwa na Mulungu.

Yesu atsitse kuvakulusa vanu va inyi tseka

44Yesu akalongaje fikami kuta, “Manyi munu anumbile heni, siakuva anumbye heni ng'ani, ila akuva amutumbye na yula yo anumile heni. 45Nayo munu yula yo ambwene heni, akuva amuwene yula yo anumile heni. 46Heni ntsatsitse kwa vanu va inyi tseka ili vave na mwangatsa gwa wukweli wa Mulungu, ili chila munu yo akunumbila heni aleche kusigala mujitsa kwa kuleka kutsela wukweli wa Mulungu.

47“Manyi munu atsihuliche ndongwa tsangu lechelelo sinambe atsidite kota hila fyo tsin'gana singumuhiga, kwakuva heni ntsatsitse kuvahiga vanu va mu inyi ila ntsatsitse kuvakulusa. 48Munu yoyuve yo akuleka kuhulikitsa ndongwa tsangu na kuleka kwanuchila. Ndongwa tso ntsingumulonjela, itso tso tsikumuhiga ha siku ya wudugo. 49Kwasawuli heni sintsalontsile kwa mamulaka gangu, ila Dada yo anumile ndonje chichi, na ndongwa tsachi tso ntsin'ganika kulonga. 50Heni ntsin'tsela kuta malajitso gake go wumi wo wugaya wudugo. Ihyo lulongwa loluve lontsinlonga, ulo lo anumile Dada ntsilulonje.”

Currently Selected:

Yohana 12: SBV

Highlight

Compare

Copy