Yohana 13

Yesu anguvakalafya magulu vadahitswa vake

1Holwavaga luvala lwa Liwungo lya Pasaka luli habehi. Kuno Yesu antsela kuta luvala lwake lwa kuwuka muinyi na kubita kwa Dada mwanga lwavaga lufisile. Nayo avaga avaganile ndalahela vanu vake va muinyi, ena avaga avaganile mbaka kuwutawula wumi wake 2Yesu hamwe na vadahitswa vake hovavaga vankulya chilyo cha mumihe. Lihoka lyavaga mwanga lingitse lihotso mu numbula ya Yuda Isikaliyote mwana va Simoni ili amupituche Yesu. 3Yesu kuno atselaga kuta Dada mwanga avisile chila chinu mu mamulaka gake, na kuta mwene ahumye kwa Mulungu na atselaga kuta ampiluka kwa Mulungu, 4Ihyo akalekaje kulya chilyo akawukaje kuhuma hono hala, akawopolaje mugolole gwake, akategulaje chitambala chikomi cha kipatila malenga mu muvili, akipinyaje muchigudi. 5Kaha akahumitsaje malenga mulibakuli likomi na kwantsa kuvakalafya vadahitswa vake mu magulu na kuvapata malenga kwa chitambala chila cho avaga ipinyile muchigudi. 6Yesu akafikaje hoavaga Simoni Petulo, nayo Simoni Petulo akamuputsaje, “Mutwa! Mbe, ukung'alafya na heni magulu?” 7Yesu akamujibulaje, “Sambihano sukuchitsela chila chontsin'dita, lechelelo ukutsela kulutalo.” 8Petulo akamulonjelaje kuta, ndaya, heve siukung'alafya magulu gangu nachene Yesu akamulonjelaje, manyi ulema ngukalafye magulu siukuva na wuhantso na heni. 9Ihyo Simoni Petulo akamupitulaje, “Mutwa, uleche kung'alafya magulu ng'ani, lechelelo ung'alafye mawoko gangu na mutwi nago!” 10Yesu akamulonjelaje, “Munu yoyuve yo mwanga otsile siaganikaga koga kanji lechelelo kukalava magulu ng'ani, kwasawuli muvili gwake mwanga gwetsile. Henye mwanga mwetsile, ila siyo nyeka.” 11Yesu alontsile hila kuta siyo nyeka yo mwetsile, kwasawuli mwanga amutselaga yula yo akumupituka. 12Hoavaga kusinda kuvakalafya magulu, akafwalaje kaha mugolole gwake, akikalisaje hono hahala ha chilyo na kuvaputsa, ndawuli, mweliwe chontsivaditye? 13Henye munyema heni mudahitsi na Mutwa ihyo munlonga wukweli, kwasawuli ho hihyo heni fyontsili. 14Ihyo manyi heni ntsi Mutwa venyu na Mudahitsi venu ntsivakalifye henye magulu, mun'ganika na henye mwikalafyaje magulu. 15Heni ntsivalaje muhwano kuta mun'ganika kudita kota hila fyo ntsivaditye henye. 16Ntsinguvalonjela wukweli kuta, mupogotsi si avaga muvina kulutila mutwa vake, na kahi yo antumwa si avaga muvina kulutila yula yo amutumile. 17Lelo kwakuva mutsitselye ndongwa itso, mukutambichilwa na Mulungu manyi mukutsidita.

18Sintsinlonga kwasawuli ya henye nyeka, ila ntsinguvatsela vala wo ntsivahagwe. Lechelelo yin'ganika Mandiko ga Mulungu gakwile kuta,

Munu yula yo alyeye chilyo hamwe na heni, uyo aveye tebe na heni.

19Heni ntsinguvalonjela ndongwa tsino tsing'acha tsing'ali kuhumila, ili hotsikuhumila mutumbe kuta, heni yo mwene. 20Ntsinguvalonjela wukweli kuta, munu yo yuve yo angumwanuchila yula yo ntsimutumile, akuva antsanuchila heni, na yula yo antsanuchila heni akuva angumwanuchila yula yo anumile.

Yesu anlonga hila fyo akupitukwa

Matayo 26:20-25; Maliko 14:17-21; Lukasi 22:21-23

21Yesu hoavaga kulonga ndongwa itso, akasusutalaje ndalahela mu numbula yake, akalongaje bila kufiha kuta, “Ntsinguvalonjela wukweli kuta yumwe venyu akumituka” 22Vadahitswa vake vakilolaje, kwasawuli sivakatselaga kuta angumulonga nani. 23Mudahitswa yumwe yo avaga aganitwe ndalahela, avaga ichite habehi na Yesu. 24Simoni Petulo akamuditilaje ndajilo yula mudahitswa kuta umuputse Mutwa, “Mbe, angumulonga nani?” 25Yula mudahitswa kuno amwegamilye Yesu mumambaga akamuputsaje kuta, “Mutwa utulonjele uyo nani yo akukupituka?” 26Yesu akamupitulaje kuta, “Yula yo ngumupela chipande chino cha libumunda ho nguva ntsichitsangitse mubakuli.” Ihyo hoavaga kuchitsangitsa chipande chila cha libumunda mubakuli, akamupelaje Yuda mwana va Simoni Isikaliyote. 27Luvala lulo Yuda hoavaga kwanuchila chipande chila cha libumunda, Lihoka likamwinjilaje. Yesu akamulonjelaje Yuda, “Lulongwa lo un'gana kudita wangufitse kuludita.” 28Vala veka wovavaga vikalise hala hachilyo kuduhu nambe yumwe yo atselaga kuta Yesu amulonje hila Yuda kwasawuli ya chichi. 29Kwasawuli Yuda avikaga magobole, vanji vahotsaga kuta Yesu avaga amulonje akagule finu fyo fin'ganika kwasawuli ya Liwungo, awu kuvapela vagayu finu. 30Luvala lula Yuda hoavaga kwanuchila libumunda lila, akangufitsaje kuhuma kivala. Nako kwavaga hachilo.

Amuli ntsipya

31Hala Yuda hoavaga kubita kivala, Yesu akalongaje, lelo atsumitswe Mwana va Munu, nayo Mulungu atsumitswe mugati mwake. 32Manyi Mulungu ave atsumitswe mugati mwa Mwana, nayo Mulungu akuwulajila wutsumitso wa Mwana mugati mwake mwene, nayo akumutsumitsa simusika. 33“Henye vanangu, heni ntsing'acha ntsili hamwe na henye kwa luvala ludodo hela. Mukusaka na kota hila fyo ntsavalonje Vayawudi, na hihyo sambi ntsinlonga na henye kuta kula kontsim'bita heni henye simukuvetsa kutsa! 34Ntsinguvapelani amuli ntsipya mwigane henye kwa henye. Kota heni fyo ntsivaganite henye, henye nanye mwiganaje henye kwa henye. 35Manyi mwigane, vanu veka vakutsela kuta henye muli vadahitswa vangu.”

Yesu anlonga ndongwa tsa kulutalo hila Petulo fyo akumukana

Matayo 26:31-35; Maliko 14:27-31; Lukasi 22:31-34

36Simoni Petulo akamuputsaje Yesu, “Mutwa um'bita kwiya?” Yesu akamupitulaje kuta, “Kontsim'bita heni siufuluche ufwate sambi, lechelelo ukufwata hambele.” 37Petulo akawilaje kumuputsa, “Mutwa, kwasawuli yachi ngulemwa kukufwata sambi? Heni ntsili chang'ani kufwa kwasawuli ya heve!” 38Yesu akamujibulaje, “Nachene uli chang'ani kufwa kwasawuli ya heni? Ntsingukulonjela wukweli kuta, hala ntsogolo huyikuva siyilavika kadatu ukuva ung'anile!”

Currently Selected:

Yohana 13: SBV

Highlight

Compare

Copy