Yohana 15

Yesu yo mutsabibu gwa kweli

1Ihyo Yesu akavalonjelaje vadahitswa vake kuta, heni yo mutsabibu gwa kweli, na Dada vangu yo mulimi. 2Chila litambi mugati mwangu lyo sinambe lilele mibawo, Dada vangu alidumulaga, na lila litambi lyolilelaga mibawo alihenjelaga, ili lilutitse kulela mibawo. 3Henye mwanga mwetsile munumbula tsenyu, kwasawuli ya tsila ndongwa tso ntsivadahitse. 4Mwikalaje mugati mwangu, kota hila na heni fyo ntsingikala mugati mwenyu. Kota hila litambi lya mutsabibu manyi sililihamwe na lisina fyo silifuluche lilele mibawo, ho hihyo na henye simufuluche mudite kota fyo an'gana Mulungu manyi simukikala mugati mwangu.

5Heni yo ntsili ugo mutsabibu, na henye yo muli mitambi. Vala wo vangikala mugati mwangu iwo vakudita ndongwa nofu ntsolofu, na heni mugati mwawo, iwo vakulela mibawo myolofu, kwasawuli bila heni henye simukuvetsa kudita ndongwa ntsolofu tso an'gana Mulungu. 6Munu yoyuve yo siakikala mugati mwangu, atagwaga kivala na kukala kota litambi. Vanu vakungasaga mitambi ijo na kujitotsa mumoto ili jipye. 7Manyi mwikale mugati mwangu na ndongwa tsangu tsikale mugati mwenyu, musuche chochive cho mun'gana na henye mukuditilwa. 8Ihyo Dada vangu apataga wutsumitso hila henye homukuva mun'dita ndongwa tsangu ntsolofu, kwasawuli ya ihyo henye mukuva vadahitswa vangu. 9Kota hila Dada fyo anganile heni, ho hihyo na heni fyo ntsinguvagana henye, nanye mwikalaje muwugano wangu. 10Manyi mugadite malajitso gangu, mukikala muwugano wangu, kota hila heni fyo ntsin'dita malajitso ga Dada vangu na kikala muwugano wake. 11Ntsivalonje ndongwa itsi ili muve na wuhechelelo kota wontsinawo heni, na wuhechelelo wenyu wukwile. 12Iyino yo amuli yangu kuta, mwiganaje kota heni fyo ntsivaganile henye. 13Kuduhu munu munya wugano wukomi kota wuno, wa munu kuwutawula wumi wake kwasawuli ya vayage. 14Henye mukuva vayangu manyi mudite hila fyo ntsivalonje. 15Henye singuvachema kaha vatantsi, kwasawuli mutantsi si achitsele cho an'dita muvina vake. Lechelelo heni ntsivachemile henye mu vayangu, kwasawuli ntsivagubulye ndongwa tseka tso nyuliche kuhuma kwa Dada. 16Siyo henye yo mwanyagwe heni, ila heni yo ntsavahagwe henye, ngavalajitsaje mubite mukadite katsi kota hila fyo an'gana Mulungu, na katsi tso mun'dita tsikale siku tseka, ili chochive cho mukumusuka Dada vangu avapele kota fyo ntsin'gana heni. 17Amuli yangu yo iyi, mwigane henye kwa henye.

Vanu va Inyi vakuvavipila

18Manyi vanu va inyi vavavipile henye, mutselaje kuta mwanga valongwe kumbipila heni. 19Mukamuve vanu va mu inyi, inyi yika kuvagana kota hila fyo yivaganaga vanu vake. Lechelelo kwasawuli henye simuli vanu va mu inyi, ila heni ntsavahagwe henye kuhuma mu inyi, icho cho chambutso cha vanu va inyi kuvavipila. 20Mwiwukaje ndongwa tso ntsavalonje hamutalo kuta, mutantsi siafuluche amulutile muvina vake. Manyi yive vang'odite heni, vakuvakoda na henye, manyi vibite lulogwa lwangu, vakudita na lulongwa lwenyu. 21Vakuvaditila ndongwa itso tseka kwasawuli henye muli vatantsi vangu, na kwakuva sivamutsele mwene yo anumile. 22Manyi ntsikantsive sintsatsitse na kuvalonjela ndongwa tsa Mulungu, vakakuva valihela ndongwa ntsibi, lelo sivakuva na cha kipamanila kwasawuli ya itso ndongwa tsawo ntsibi. 23Munu yo am'mbipila heni, angumuvipila na Dada vangu. 24Manyi ntsikantsive sintsadisile katsi hagati hawo tso sadisile munu yoyuve vakakuva valihela nongwa, ino lelo vambwene heni hontsin'dita ndongwa itso, vambipye heni na Dada vangu. 25Lechelelo ndongwa itso tsihumye ili lukwile lulongwa lo lwandikwe mu malajitso ga Musa kuta, vambipye bule hela!

26Lechelelo iho hoakuva kutsa uyo Mutantsi yo ngumutuma kwenyu kuhuma kwa Dada vangu, uyo yo Muhe va Mulungu, akuwugubula wukweli kuhuma kwa Dada, mwene nayo akuvalonjela ndongwa tseka tsa heni. 27Henye nanye mukuvalonjela vanu ndongwa tsangu, kwasawuli mwavaga na heni kuhuma halutalo.

Currently Selected:

Yohana 15: SBV

Highlight

Compare

Copy