Yohana 18
18
Yesu angibatika
Matayo 26:47-56; Maliko 14:43-50; Lukasi 22:47-53
1Yesu aveye kusinda kulonga ndongwa itso, ho akawukaje na vadahitswa vake na kulowoka kubita kumwambu kwa kalenga ka Cheduloni. Kuko kwavaga na chinyungu cha mibichi ja mitseyituni, ihyo mwene na vadahitswa vake vakinjilaje umo. 2Yuda, yo amupituche Yesu ahakagulaga hono iho kwakuva mala ntsongofu Yesu abitaga hono iho na vadahitswa vake. 3Ihyo Yuda akatsaje kuchinyungu kuno anguchilongotsa chipinga cha vimilitsi va chi Lumi na vatantsi vamwe va Vatawula nambiko vavina hamwe na Mafwalisayo, nawo vavaga vategwe tala, na solola na fifwimilo. 4Nayo Yesu kuno antsela fyeka fyo fikumupata, akahumilaje na kuvaputsa, “Mungumusaka nani?” 5Nawo vakamupitulaje kuta, “Yesu va ku Natsaleti!” Yesu akatyaje, “Yo heni!” Yuda yula munyakumupituka nayo avaga imile hamwe nawo. 6Yesu aveye kuvalonjela, “Yo heni!” Vakapilukaje chimbelembele na kugwa hanyi! 7Yesu akavaputsaje kaha, “Mungumusaka nani?” Nawo vakamupitulaje kuta, “Yesu va ku Natsaleti.” 8Yesu akavalonjelaje kuta, “Mwanga ntsivalonje yo heni. Manyi muve munsaka heni muvaleche iva vawuche.” 9Alontsile ndongwa itso ili lukwile lulongwa lula loavaga alontsile kuta, “Sintsamuyatsitse nambe yumwe va vala wo wamelye.” 10Ihyo Simoni yo Yesu amuchemye litawa lya Petulo avaga na waladi, akawusomolaje mu yala na kumudumula mutantsi va Muvina va Vatawula nambiko lipilichilo lya lubali lwa liwoko lililo. Mutantsi uyo achemwaga Maliko. 11Yesu akamulonjelaje Petulo, “Pilule waladi wako mu yala yake. Mbe, heve un'gana ndeche kukolela ng'odeko tso n'gana Dada vangu ng'olele?”
Yesu ansindikwa kwa Muvina va Vatawula nambiko
12Ihyo lila lilugu lya vimilitsi va chi Lumi hamwe na muvina vawo, na vala vimilitsi va Nyumba ya Mulungu vakamubataje Yesu na kumuwopa ndejesi, 13nawo vakamusindikaje kwa Anasi, nayo Anasi yo mwanage avaga atoliche kwa Kayafwa, nayo Kayafwa avaga Muvina va Vatawula nambiko mwaka ugo. 14Uyo Kayafwa yo yula yo avaga avalonje Vayawudi kuta chiba munu yumwe afwe kwasawuli ya vanu.
Petulo angumukana Yesu
Matayo 26:69,70; Maliko 14:66-68; Lukasi 22:55-57
15Simoni Petulo hamwe na mudahitswa yunji vakamufwataje Yesu. Nayo yula mudahitswa yunji atselanikaga na Muvina va Vatawula nambiko, ihyo akinjilaje hamwe na Yesu mu lidama lya nyumba yila ya Muvina va Vatawula nambiko. 16Lechelelo Petulo avaga imile hivala habehi na lwitsi lukomi lwa kwinjilila hono iho. Duve uyo mudahitswa yunji yo avaga antselanika na Muvina va Vatawula nambiko akahumaje hivala akalongaje na mudala yo imililaga ha lwitsi ulo lukomi lwa kwinjilila, uyo mwimilitsi akamulekaje Petulo injile mugati. 17Yula mudala akamuwutsaje Petulo, “Mbe, heve nave si uli yumwe va vadahitswa vake munu yuno?” Petulo akakanaje kuta, “Ndaya! Siyo heni!” 18Vatantsi na vimilitsi vavaga vakotsitse moto gwa mukala kwasawuli kwavaga na ng'ala, nawo vavaga vakota moto. Nayo Petulo avaga imile hamwe nawo kuno ankota moto.
Muvina va Vatawula nambiko angumuputsa Yesu.
Matayo 26:59-66; Maliko 14:55-64; Lukasi 22:66-71
19Luvala lula hotsahumilaga ndongwa itso, yula Muvina va Vatawula nambiko avaga angumuputsa Yesu kwasawuli ya vadahitswa vake na madahitso gake. 20Yesu akamupitulaje kuta, ntsavaga ntsilonga halutalo ha vanu. Siku tseka bila kifiha ntsavaga ntsinguvadahitsa vanu mu nyumba tsa kitang'anila Vayawudi na ku Nyumba ya Mulungu mo vitang'anilaga Vayawudi. Sintsalontsile lulongwa loluve kwa kifiha. 21Kwasawuli yachi um'mbutsa heni? Uvaputse vanu yo vahulikaga ndongwa tsila tso ntsavalonjelaga. Vene van'tsela tso ntsavalonjelaga. 22Yesu hoavaga kusinda kulonga ndongwa itso, mwimilitsi yumwe va Nyumba ya Mulungu yo avaga imile habehi nayo, akamutovaje Yesu kofi kumiho na kumulonjela kuta, “Mbe, ihyo fyo yin'ganika kumupitula Muvina va Vatawula nambiko? 23Yesu akamupitulaje kuta, manyi ntsive ndontsile chinu chibi duve ulonje wubi wondontsile. Lelo manyi ntsive ndontsile wukweli un'novela chinu chachi?” 24Ihyo Yesu kuno awopitwe ndejesi, Anasi akamusindikaje kwa Kayafwa, yo avaga Muvina va Vatawula nambiko.
Petulo angumukana kaha Yesu
Matayo 26:71-75; Maliko 14:69-72; Lukasi 22:58-62
25Luvala ulo Petulo avaga imile hono iho an'kota moto. Duve vanu vakamuputsaje, “Mbe, heve siyo yumwe va vala vadahitswa vake ndaa?” Petulo akakanaje kuta, “Siyo heni!” 26Yumwe va vapogotsi va Muvina va Vatawula nambiko, yo avaga mung'olotse na yula munu yo amuhutwe lipilichilo na Petulo, akamupitulaje kuta, “Mbe, heni sintsakuwene kula ku chinyungu ulihamwe nayo munu yuno?” 27Petulo akakanaje kaha kuta, luvala lulo ntsogolo yikavikaje.
Yesu ansindikwa kwa Pilato
Matayo 27:1,2; 11-14; Maliko 15:1-5; Lukasi 23:1-5
28Hoyavaga kufika hamilawu milawu vavina va Vayawudi vakamutegulaje Yesu kuhuma kwa Kayafwa na kumusindika ku nyumba ya chintsajila ya Chilumi#18:28 Nyumba iyi ya chintsajila yachemwaga Pulayitoliyo. Lechelelo vene sivinje mugati umo, kwasawuli vaganaga kivika chang'ani halutalo ha Mulungu kwasawuli ya Liwungo lya Pasaka. 29Hoihyo Pilato akahumaje kivala na kuvaputsa, “Mbe, mungumuhijila chichi munu yuno?” 30Vene vakatyaje, “Manyi munu yuno aka ave siadisile lulongwa lubi, situkakumuleta kwa heve.” 31Pilato akavalonjelaje, “Duve mumutegule henye mukamuhije kwa malajitso genyu.” Vayawudi vakamupitulaje kuta, “Hetwe tulihela mamulaka ga kumukopola munu yoyuve.” 32Valontsile ndongwa itso ili lukwile lulongwa lula loavaga alontsile Yesu kulajila chifo chake cho akufwa.
33Ihyo Pilato akinjilaje munyumba yake ya chintsajila na akalajitsaje vamulete Yesu mugati, akamuputsaje kuta, “Heve yo Muntsajila va Vayawudi?”
34Yesu akamupitulaje kuta, “Mbe, un'wutsa kwa mahotso gako, awu kuna munu yo akulonje ndongwa tsa heni?”
35Pilato akamupitulaje kuta, mbe, unhotsa kuta heni tsili Muyawudi? Vanu va inyi yako, na Vavina va Vatawula nambiko, iwo wo vakuletite kwa heni. Mbe, wanantsile chinu chachi?
36Yesu akamupitulaje kuta, “Wuntsajila wangu siyo wa inyi yino, manyi yikayive wuntsajila wangu wa inyi yino, vatantsi vangu vakakumamanila ili ndeche kibatika na vavina va Vayawudi. Lechelelo wuntsajila wangu siyo wa hano.”
37Pilato akamuputsaje kuta, “Ino heve uli muntsajila?” Yesu akamupitulaje kuta, “Heve ulontsile, kuta heni ntsili muntsanjila. Heni ntsaleliche kwasawuli iyi, na kwasawuli iyi ntsatsitse muinyi kuvalonjela vanu wukweli. Chila munu yo anguwufwata wukweli anyulikaga heni.”
38Pilato akamuputsaje Yesu kuta, “Wukweli cho chinu chachi?”
Yesu anhigwa kufwa
Matayo 27:15-31; Maliko 15:6-20; Lukasi 23:13-25
Pilato hoavaga kulonga ndongwa itso akabitaje kaha kula kivala kovali Vayawudi na kuvalonjela, “Heni sintsiluwene lubi loluve lo adisile munu yuno. 39Lechelelo henye muna ntsovelo yenyu kuta luvala lwa Pasaka ntsin'ganika ntsimulechele muwopwa yumwe yo mungumugana. Mbe, mun'gana ntsimudindulile uyu Muntsajila va Vayawudi?” 40Ihyo vene vakayovaje, “Ndaya, siyo yuno, ila mulechele Balaba!” Nayo uyo Balaba avaga muwumiyani.
Currently Selected:
Yohana 18: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
