Yohana 5

Yesu angumuponetsa chiteve Siku ya Kwesela

1Hotsavaga kulutila ndongwa itso kwavaga na Liwungo lya Vayawudi ku Yelusalemu, nayo Yesu akabitaje. 2Kuko Yelusalemu habehi na lwitsi lwa ng'olo kwavaga na litsimbwi lya malenga lyo lyachemwaga kwa Chiebulaniya Betitsata, lyo lyavaga lipilimwe na fyumba fihanu. 3Iho ha fyumba ifyo havaga na vanu wolofu vatamwa, na fibofu, na fiteve, na wovapotsile filungo fyawo, vatsindilaga malenga gatigulwe. 4Kwasawuli kwavaga na luvala ikaga mutantsi va Kilanga va Mulungu na kutigula malenga, na munu yoyuve yo akulongola kwinjila mu malenga gala hala ho gatiguche, aponaga wutamwa wowuve wo avaga nawo. 5Kuko kwavaga na munu yumwe yo avaga mutamwa kwa luvala lwa myaka salasini na nane. 6Yesu avaga kumuwona mutamwa yula avasise hala na kuno atselaga kuta aveye hala kwa luvala lweka ulo, akamuputsaje, “Mbe, un'gana uve mumi?” 7Yula mutamwa akamupitulaje Yesu kuta, “Muvina, heni ntsilihela munu vakusindika mu malenga hala ho gantigulwa, chila hontsigana kwinjila munu yunji andongola.” 8Yesu akamulonjelaje, “Winuche utole lusaga lwako ujende!” 9Bahobaho munu uyo akaponaje na kutegula lusaga lwake na kwantsa kujenda. Lulongwa ulo lwadisilwe Siku ya Kwesela. 10Kwasawuli iyo Vayawudi vamwinga vakamulonjelaje yula munu yo aponitswe kuta, “Munyi guno Siku ya Kwesela, sinambe yiganiche heve kitwika lusaga lwako.” 11Lechelelo mwene akalongaje, “Yula munu yo amonitse andonje kuta tole lusaga lwako ujende.” 12Nawo vakamuputsaje, “Uyo munu yo akulonje, tole lusaga lwako ujende, yo nani?” 13Lechelelo mwene yula yo aponitswe avaga siamutsele munu yula yo amuponitse, kwasawuli Yesu avaga mwanga awusile hono hala na kihantsa na vanu wolofu. 14Hambele Yesu akamufikaje munu yula yo amuponitse mu Nyumba ya Mulungu, na akamulonjelaje kuta, “Lelo mwanga uponile ulekaje kupiluchila kudita ndongwa ntsibi, na manyi udite ihyo lukukupata lulongwa lukomi kuliko ulo.” 15Munu uyo akabitaje kuvalonjela filongotsi va Vayawudi kuta Yesu yo amuponitse. 16Kwasawuli ya lulongwa ulo Vayawudi vakantsaje kumudesa Yesu kwasawuli aditaga ndongwa kota itso Siku ya Kwesela. 17Yesu akavalonjelaje “Dada vangu ankola katsi mbaka sambi, na heni ntsinkola katsi.” 18Kwasawuli ya ndongwa itso filongotsi va Vayawudi vakavipaje na kugana kumukopola Yesu. Siyo kwasawuli ya kudita finu yo sinambe figaniche Siku ya Kwesela ng'ani, ila anlonga kuta Mulungu yo Dada vake, na kuta mwene alisava na Mulungu.

Mamulaka ga Mwana va Mulungu

19Yesu akavalonjelaje, ntsinguvalonjela wukweli, Mwana si afuluche adite chinu chochive aliyena, mwene aditaga chila cho angumuwona Dade anguchidita. Kwakuva cho anguchidita Dada nayo Mwana achiditaga hihilaga. 20Dada angumugana Mwana na kumulajila chila chinu cho anguchidita mwene, kaha akumulajila ndongwa ngomi kulutila itso ili henye mupomoche. 21Kota hila Dada fyo avatsilipulaga vanu na kuvapela wumi, ho hihyo nayo Mwana anguvapela wumi vala wo anguvagana. 22Dada si amuhigaga munu yoyuve, lechelelo mamulaka geka ga kuhiga amulechye Mwana, 23ili vanu veka vamuhesimile Mwana kota hila fyo vangumuhesimila Dada. Munu yoyuve yo sinambe amuhesimile Mwana uyo sinambe amuhesimile Dada yo amutumile. 24“Ntsinguvalojela wukweli kuta munu yoyuve yo anhulika lulongwa lwangu na kumutumbila yula yo anumile, anawo wumi wo wugaya wudugo. Nayo siakuhigwa, ila akuva alutye ku chifo na kwinjila ku wumi. 25Ntsinguvalonjela wukweli kuta luvala lunkutsa, na kaha mwanga lufisile, ihyo vanu yo vafweye vakuhulika litsi lya Mwana va Mulungu, nawo yo vakulihulika vakuva wumi. 26Kota hila Dada fyo ali mwantso gwa wumi, hihyo nayo Mwana fyo ali mwantso gwa wumi. 27Kaha Dada amupelye mamulaka ga kuhiga kwasawuli mwene yo Munu yo atumilwe na Mulungu. 28Mulekaje kutinuka ho munhulika lulongwa ulu, kwasawuli kuna luvala lunkutsa, vanu vala yovali mu makabuli vakuhulika litsi lyake. 29Nawo veka vakutsilipulwa, na vala yo vaditaga ndongwa kota fyo an'gana Mulungu vakuva na wumi wo wugaya wudugo, na vala yo vaditaga ndongwa ntsibi kwa Mulungu vakuhigwa.

Vanu yo vangutsivikula ndongwa tsa Yesu

30“Heni sifuluche ndite lulongwa loluve kwa wuvetso wangu ntsimwene. Ila heni nyigaga kota fyontsihulika kuhuma kwa Dada, nayo nyigo yangu ya wutsamu. Kwasawuli heni sinambe ndite hila fyo ntsin'gana heni, ila nditaga kota fyo an'gana yula yo anumile. 31Manyi ntsilonjele ntsimwene, ndonga yangu siyikidikitswa kuva ya wukweli. 32Lechelelo koyoli yunji yo alongaga ndongwa tsa heni, na heni ntsin'tsela kuta ndongwa tseka tso anlonga kwa heni itso tsa wukweli. 33Henye mwatumile vanu kwa Yohana, nayo avalonje wukweli. 34Heni sintsihuvilaga vanu valonje ndongwa tsangu, lechelelo ntsinlonga ndongwa itsi ili henye mupate wukuluso. 35Yohana avaga kota tala yo yinkwaka na kwangatsa, na henye mwanga muka chang'ani kuhechelela na mwangatsa gwake kwa luvala ludodo hela. 36Lechelelo heni ntsina wusahidi wukomi ndalahela kulutila wula wa Yohana. Kwa kuva katsi tsila tso ntsin'dita tso anumile Dada ntsitsidite, na ihyo tsinguvalajila kuta Dada yo anumile. 37Nayo Dada yoanumile yo alongaga ndongwa tsangu. Henye simwalihuliche litsi lyake, na kumuwona fyoali, 38na henye sinambe mutsitumbe ndongwa tso anlonga, kwasawuli sinambe mumutumbe yula yo amutumile. 39Henye mugahimaga Mandiko ga Mulungu, mutijilaga kuta gakuvalonjela hila fyo mukuwupata wumi wo wugaya wudugo, lechelelo sinambe mutsele kuta Mandiko gago ganlonga ndongwa tsa heni. 40Nambe ihyo mulema kutsa kwa heni ili mupate wumi wo wugaya wudugo.

41“Heni sintsanuchilaga ntsumitso kuhuma kwa vanu. 42Lechelelo ntsinguvatsela kuta henye mulihela wugano wa Mulungu munumbula tsenyu. 43Heni ntsitsitse kwa mamulaka ga Dada vangu, na henye si mwantsanuche, lechelelo munu yunji manyi atse kwa mamulaka gake uyo mukumwanuchila. 44Mufuluche ndawuli kunumba heni, na kuno mun'gana kitsumila henye kwa henye, kuno munlema kusaka wutsumitso wo wunhuma kwa Mulungu ng'ani? 45Lechelelo mulekaje kuhotsa kuta heni nguvahiga halutalo ha Dada vangu, Musa yo mumudisile ave lihuvilo lyenyu, uyo yo akuvasongeletsa. 46Mukamuve mungumutumba Musa, mukakunumba na heni, kwasawuli Musa andiche ndongwa tsangu. 47Lechelelo manyi simukatsitumbye ndongwa tso andiche Musa, mukutsitumba ndawuli ndongwa tso ntsinlonga?”

Currently Selected:

Yohana 5: SBV

Highlight

Compare

Copy