Yohana 7

Yesu sinambe atumbilwe na vang'olotse

1Hotsavaga kulutila ndongwa intso, Yesu ajendelaga hono hanji hanji na kukola katsi ku Galilaya. Siaganaga kubita ku Yudeya kwasawuli vavina va Vayahudi vaganaga kumukopola. 2Nalyo Liwungo lya Fyuwo fya Vayawudi, lya kwiwuka hila fyo vahamaga hamaga kubalali lyavaga habehi, 3ihyo vang'olotse va Yesu vakamulonjelaje, “Uwuche iha ubite ku Yudeya ili vadahitswa vako vatsele na kutsiwona ndajilo tso un'dita. 4Munu yoaganaga kuva mutambulwa, siaditaga ndongwa tsake kwa lufiho. Manyi un'dita ndongwa itsi wilajile umwene halutalo ha vanu.” 5Kwakuva nambe vang'olotse va Yesu siva mutumbye. 6Yesu akavalonjelaje, luvala lwangu silulafika, lechelelo luvala lwenyu hololi siku ntseka. 7Vanu va muinyi sivafuluche vavavipile henye, lechelelo vam'mbipila heni kwasawuli ntsinguvalonjela kuta ndongwa tsovan'dita ntsibi. 8Henye mubite ku Liwungo ilyo, lechelelo heni singubita kwasawuli luvala lwangu lung'ali kufika. 9Yesu aveye kulonga ndongwa itso, akasigalaje ku Galilaya.

Yesu ku Liwungo lya Fyuwo

10Vang'olotse hovavaga kuwuka kubita ku Liwungo ilyo, Yesu nayo akabitaje kuko, lechelelo ahele kwa kifiha. 11Kwakuva vavina va Vayawudi vavaga vangumusaka ku Liwungo ilyo, nawo vakiputsaje kuta, “Alikwiya munu yula?” 12Kwavaga na mwepelemwepele tsitagalye hala ha lilugu lya vanu yo valonganaga ndongwa tsa Yesu. Vamwe valongaga kuta, “Munu uyu muwuya.” Vamwe valongaga kuta “Ndaya be! Anguvayatsa vanu.” 13Lechelelo kuduhu munu yo ajetsitse kulonga fikami ndongwa itso kwasawuli vanu vawogopaga vavina va Vayawudi.

14Ihyo hoyavaga kufika hagatinanagati ya Liwungo, Yesu akakwinaje na kwinjila ha Nyumba ya Mulungu na kwantsa kudahitsa. 15Vayawudi vakatinukaje ndalahela na kulonga kuta, munu yuno apatite kwiya ntselo tsa kudahitsa vanu bila mwene kudahitswa? 16Ihyo Yesu akavapitulaje, “Madahitso go ntsinguvadahitsa sigaheni ndaya, lechelelo gayula yo anumile. 17Manyi munu yoyuve an'dita madahitso gala goan'gana Mulungu, akutsela kuta madahitso iga si gangu ila gahumye kwa Mulungu. 18Munu yo alongaga kwasawuli yake mwene, ansaka wumelemo wake mwene, lechelelo yo asakaga wumelemo wa yula yoamutumile, uyo munu muwuya na mugati mwake muduhu wubi wowuve. 19Mbe, Musa siavapelye malajitso ndaa? Lechelelo kuduhu nambe munu yumwe hagati henyu yo angugafwata malajitso igo. Kwasawuli ya chichi mun'gana kung'opola?” 20Lilugu lyeka lya vanu likamulonjelaje Yesu kuta, “Heve una lisoka! Mbe, nani yo an'gana akukopole?” 21Yesu akavalonjelaje, ngadisile ndajilo yimwe hela na henye nyeka mukatinukaje. 22Musa avalajitse muvingitse vana venyu likumbi. Lechelelo si gahumye kwa Musa ila kwa vakukwenyu, na henye munkwingitsa vana likumbi nambe yivaje Siku ya Kwesela. 23Manyi yive munu ingitswaga likumbi nambe Siku ya Kwesela ili malajitso ga Musa galeche kubedalwa, mbona lelo mum'mbipila heni kwasawuli ntsimuponitse munu Siku ya Kwesela? 24Mulekaje kuhiga ndongwa kwa kulola hela, lechelelo muhigaje ndongwa kwa wuwuya.

Mbe, uyu yo Chilisto?

25Vanu vamwe va ku Yelusalemu vakalongaje “Mbe, yuno siyo munu yo vangumusaka vavina van'gana vamukopola ndaa? 26Mulole lelo! Alihano na angilajila helu hela, kuduhu munu yo angumulonjela lulongwa loluve! Mbe, yikuva iva vavina vanguwutsela wukweli kuta uyu yo Chilisto? 27Chilisto hoakutsa kuduhu munu yoyuve yo akutsela koahumye, lechelelo yuno tun'tsela koahumye.” 28Yesu akendelelaje kudahitsa ha Nyumba ya Mulungu, akalongaje fikami kuta, “Heni muntsele na konyumye mukutsele, ila sintsitsitse ntsimwene, na mwene yo anumile heni yo va wukweli na henye simumutsele. 29Lechelelo heni ntsimutsele kwasawuli ntsahumye kwa mwene, nayo mwene yo anumile heni.” 30Ihyo vanu vakaganaje kumubata, lechelelo kuduhu munu yoyuve yavetsitse kumubata kwasawuli luvala lwake lwa kibatika lwavaga lung'ali kufika. 31Vanu wolofu wovali vakong'ine vakamutumbaje Yesu, nawo valongaga kuta, Mbe, hoakuva kutsa Chilisito akudita ndajilo ntsolofu kulutila itsi tso an'dita munu yuno?

Vamilitsi Vantumwa vakamubate Yesu

32Mafwalisayo vahuliche vanu vampwepapwepa ndongwa tsa Yesu, ihyo vavina va vatawula nambiko hamwe na Mafwalisayo vakavatumaje vamilintsi vabite vakamubate Yesu. 33Yesu akalongaje, “Ngikala na henye kwa luvala ludodo, na kaha ngupiluka kwa yula yo anumile. 34Mukusaka, lechelelo simukumbona, na hono hala hontsili henye simufuluche mufiche.” 35Vavina va Vayawudi vakalonganaje kuta, “Mwene munu yuno akubita kwiya ko situfuluche hetwe kubita? Mbe, an'gana kubita kwa Vayawudi yovangikala kwa Vajilichi na kuvadahitsa Vajilichi? 36Mbe, lulongwa lwachi lwene luno lo atulonje kuta, mukusaka na lechelelo simukumbona, na hono hala hontsili henye simufuluche mufiche?”

Ntsasa tsa Malenga ga Wumi

37Siku ya wudugo ya Liwungo ilyo likomi, Yesu akimaje na kulonga kwa litsi likomi kuta, manyi kuna munu yoyuve yo munya ng'alu atse kwangu ang'wee! 38Kota fyo ganlonga Mandiko ga Mulungu, “Munu yoyuve yo anumbila heni ntsasa tsa malenga ga wumi tsikutsililika munumbula yake!” 39Yesu alontsile ndongwa itso kwasawuli ya Muhe va Mulungu yo vakumwanuchila hambele vanu veka wo vakumutumbila, Muhe va Mulungu avaga ang'ali kutsa kwasawuli Yesu avaga ang'acha kutsumitswa.

Vanu vantelana kwasawuli ya Yesu

40Vanu vamwe hagati ha lilugu lila hovavaga kuhulika ndongwa itso vakalongaje, “Wukweli munu yuno yo yula Muloli va Mulungu.” 41Vamwe vakalongaje, “Uyu yo Chilisito!” Lechelelo vamwe vakalongaje, “Mbe, Chilisito afuluche ahume ku Galilaya? 42Mbe, Mandiko ga Mulungu sigalongaga kuta Chilisito akuhuma ku lukolo lwa Dawudi, na akuleleka ku Betelehemu, muji gwa Dawudi ndaa?” 43Ihyo vanu vala vakatelanaje kwasawuli ya Yesu. 44Vanu vamwe vaganaga kumubata lechelelo kuduhu nambe munu yumwe yo ajetsitse kumubata.

Vavina va Vayawudi vanlema kumutumba Yesu

45Ihyo vala vimilitsi vakapilukaje kwa vavina va vatawula nambiko na Mafwalisayo. Nawo vakavaputsaje kwasawuli yachi simumubatite Yesu. 46Vala vimilitsi vakavapitulaje, “Kuduhu munu yo afuluche alonje kota fyo anlonga munu yula!” 47Mafwalisayo vakavaputsaje kuta, “Mbe, na henye mwanga mudetelitswe? 48Mbe, mwanga mwamuwene nambe muvina yumwe, awu yumwe va Mafwalisayo yo amutumbye? 49Lechelelo lilugu lya vanu wo sinambe vagatsele malajitso ga Musa, iwo wo vakotulwe na Mulungu kuno sivagatsele malajitso ga Musa!” 50Ihyo Nikodemu, yula yo avaga ahele siku yimwe hachilo kwa Yesu nayo avaga yumwe va vavina iwo akavalonjelaje, 51“Mbe, malajitso ga Musa gamuhigaga munu bila kumuhulikitsa na kutsela chinu cho an'dita?” 52Nawo vakamupitulaje, “Mbe, heve nave uhumye ku Galilaya? Ubite ukagahime finofu Mandiko ga Mulungu nave ukutsela kuta ku Galilaya siakuhuma Muloli!” 53Ihyo chila munu akawukaje na kubita kukaye kwake.

Currently Selected:

Yohana 7: SBV

Highlight

Compare

Copy