Lukasi 18
18
Muhwano gwa mudala mufwile na muhigaji
1Kahi Yesu akavalonjelaje muhwano guno vadahitswa vake, kuvalajila hila fyo van'ganika kusuka Mulungu siku tseka bila kugotsola. 2Akawilaje kuvalonjela, “Mu muji gumwe kwavaga na muhigaji yosiavaga na muloto na Mulungu, kaha siahotsaga munu yoyuve. 3Mu muji gugo kwavaga na mudala yumwe mufwile yo abitaga lwa hihyo kwa muhigaji na kumugongoletsa kuta, ‘Undamule chila cho tsingumudaya mutelani vangu.’ 4Muhigaji yula alemaga kumutanga mufwile yula kwa siku ntsolofu, lechelelo hambele akihotsaje kuta, Nambaje heni tsilihela muloto na Mulungu na kaha sinambe nyotse munu yoyuve, 5lechelelo kwa hila mufwile yuno fyo an'nifya lwahihyo, ngumulamula kota fyo an'gana, Ili aleche kunifya lwahihyo.”
6Ihyo Mutwa Yesu akalongaje, “Mutsihotse ndongwa tso alontsile uyo muhigaji yo sinambe adite kota fyo an'ganika. 7Mbe, Mulungu siafuluche avaditile kota fyo yin'ganika vanu vake wo avahagwe, wo vangumuvembela hamunyi na hachilo? Mbe, Mulungu akuhava kuvatanga? 8Ntsinguvalonjela akwangufitsa kuvaditila nachene kota fyo mun'gana. Lechelelo heni Mwana va Munu honguva kutsa nguvafika vanu vanalyo litumbilo ku inyi?”
Muhwano wa Mufwalisayo na Mukongotsa kodi
9Yesu akavalonjelaje kwa muhwano, vanu vala wo vangihuvila kuta vene van'dita kota fyo an'gana Mulungu na kuvabedala vanu vanji, akalongaje kuta, 10“Vanu vavili vavaga vahele mu Nyumba ya Mulungu ku suka, yumwe avaga Mufwalisayo na yunji Mukongotsa kodi. 11Yula Mufwalisayo akisuchilaje kwa kidutsa hino, ‘Mulungu ntsingukulumba kwa kwasawuli heni si ntsinakota vanu vanji wo vawumiyani, awu vahatufu, awu vanu wo van'dita waafu, awu kota yuno mukongotsa kodi. 12Heni ntsinleka kulya na kung'wa mala kavili kwa wichi, na kaha nawulaga lifungu limwe ha chila mafungu kumi go ntsimpata.’
13“Lechelelo yula mukongotsa kodi, akimaje kwa kutali siajetsitse nambe kwinula miho gake kilanga kwa Mulungu, lechelelo akitovatovaje mu mambaga yake na kuta, ‘Mulungu, umbonele lusungu heni ntsi munu munya ndongwa ntsibi.’
14“Ntsinguvalonjela hino, yuno mukongotsa kodi awutsile kukaye kuno avalilwe wuwuya kwa Mulungu kulutila yula Mufwalisayo. Kwasawuli munu yoyuve yo angidutsa akwiswa, na yula munya kwika akwinulwa.”
Yesu anguvatambichila vana vadodo
Matayo 19:13-15; Maliko 10:13-16
15Vanu vamusindichilaga Yesu vana vadodo ili avavichile mawoko ili vatambichilwe. Vadahitswa vake vavaga kuwona hila, vakavalemetsaje vanu kwa kuvang'anulila. 16Lechelelo Yesu akavachemaje vana vala vabite kwake na kulonga, “Muvaleche vana vadodo vatse kwa heni, muleche kuvalemetsa, kwasawuli Wuntsajila wa Mulungu wa vanu vanakota vana vano 17Ntsinguvalonjela wukweli kuta, munu yoyuve yosinambe awanuchile Wuntsajila wa Mulungu kota mwana mudodo, siakuhogola kwinjila mu wuntsajila wa Mulungu.”
Muvina yumwe mufuchifu
Matayo 19:16-30; Maliko 10:17-31
18Muvina yumwe va Vayawudi, akamuputsaje Yesu, “Mudahitsi muwuya, nditaje chichi ili ntsinjile ku wumi wowugaya wudugo?” 19Yesu akamulonjelaje, “Ndawuli unyema heni ntsi muwuya? Kuduhu muwuya ila Mulungu ng'ani. 20Ugatsele malajitso ga Mulungu, ‘Walahogola kudita waafu, walahogola kukopola, walahogola kuhitsa, walahogola kulonga wudesi, na walahogola kuvabedala yuwo na dado.’ ”
21Yula muvina mufuchifu akalongaje, “Malajitso igo geka ntsibite kuhuma hontsavaga mwana.”
22Yesu hoavaga kuhulika ihyo, akamulonjelaje, “Upunguchilwe chinu chimwe, un'ganika udite hino, ‘Ubite ukagutse chila chinu cho unacho uvapele vagayu, naheve ukuva na finu fya kutumila kilanga kwa Mulungu, kaha utse ufwate.’ ” 23Lechelelo munu uyo hoavaga kuhulika ihyo, akang'ung'utaje ndalahela kwasawuli avaga wufuchifu. 24Yesu hoavaga kuwona hila munu yula fyo ang'ung'uta, akalongaje, “Lave fyo kukuva kutalamu kwa munu mufuchifu kwinjila ku Wuntsajila wa Mulungu. 25Lechelelo kukuva kupefu ndalahela kwa linyama lyo linchemwa lingamiya kupuluta mu nang'ana ya sindano, kulutila mufuchifu kwinjila ku Wuntsajila wa Mulungu.”
26Vanu vala yo vakahuliche ihyo, vakalonganaje kuta, “Manyi yive ihyo nani yoafuluche kukuluka?”
27Yesu akavalonjelaje, “Fila fyo fivasumaga vanu, Mulungu sifimusumaga.”
28Nayo Petulo akamuputsaje, “Lave! Tulesile finu fyeka fyo tukanafyo tukufwatite heve.”
29Yesu akavalonjelaje, “Ntsinguvalonjela wukweli kuta, munu yoyuve yo alesile nyumba, awu mudala vake, awu mung'olotse, awu yuve, awu dade, awu vanage kwasawuli ya Wuntsajila wa Mulungu, 30kuduhu munu yo siafuluche aleche kupata finu fyolofu ndalahela chipindi cha sambi, na ku chipindi cho chinkutsa, na kaha ku wumi wo wugaya wudugo.”
Yesu anlonga lwa kadatu kuta hambele akufwa na kutsilipuka
Matayo 20:17-19; Maliko 10:32-34
31Yesu akavatolaje vadahitswa vake kumi na vavili mbaka hono hawiyeka akavalonjelaje, “Muhulikitse! Tum'bita ku Yelusalemu uko ko chikuhumila chila chinu chovalontsile valoli va Mulungu, kwasawuli ya Mwana va Munu. 32Vakumubata na kumuleka kwa vanu wosi Vayawudi, vakumuliga na kumufunyila mati. 33Vakumutova na mikotya na kumukopola, lechelelo siku ya kadatu akutsilipuka.”
34Lechelelo vadahitswa vake vakalemwaje kutsela lulongwa ulo, kwasawuli vavaga vafihilwe mana ya ndongwa itso, na sivakeliwe chochilonjiche.
Yesu angumuponetsa chibofu
Matayo 20:29-34; Maliko 10:46-52
35Yesu akavaje kufika habehi na ku Yeliko, kwavaga na munu yumwe chibofu ichite mung'asi ansuka kutangwa. 36Avaga kuhulika lilugu lya vanu linlutila akaputsaje, “Kuna chichi?” 37Vakamulonjelaje kuta, “Yesu va ku Natsaleti anlutila.” 38Ihyo chibofu yula akakolaje fikami, akatyaje, “Yesu, Mwana va Dawudi, umbonele lusungu!”
39Vanu vala wovavaga valongwe vakamulonjelaje kwa kumung'anulila ili akatuche, lechelelo mwene akendelelaje kulonga fikami, “Mwana va Dawudi umbonele lusungu!”
40Yesu akimaje, akavalonjelaje vamulete halutalo hake. Chibofu yula akavaje kufika habehi, Yesu akamuputsaje, 41“Un'gana nguditile chichi?”
Nayo akamulonjelaje kuta, “Mutwa ntsin'gana kulola.”
42Yesu akamulonjelaje, “Duve ulole! Litumbilo lyako likuponitse.”
43Luvala lulo chibofu uyo akalolaje, akamufwataje Yesu kuno angumutsumitsa Mulungu. Vanu veka vavaga kuwona ihyo, vakamutsumitsaje Mulungu.
Currently Selected:
Lukasi 18: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
