Lukasi 7
7
Litumbilo lya muvina va lijesi lya Loma.
Matayo 8:5-13
1Hala Yesu hoavaga kusinda kulonga ndongwa itso tseka kwa vanu wovamuhulikitsaga, akabitaje ku Kapelinawumu. 2Mutantsi va muvina yumwe va chikundi cha vatova ligalu va ku Valoma yo aganagwa ndalahela. Mutantsi uyu avaga antamika habehi na kufwa. 3Muvina yula hoavaga kuhulika ndongwa tso aditaga Yesu, akavatumaje vagogolo va Chiyawudi, vakamufwate Yesu atse amuponetse mutantsi vake. 4Hovaveye kubita kwa Yesu, vakamugongoletsaje ndalahela kwa kumulonjela kuta, “Munu yuno an'ganika atangwe. 5Kwasawuli anguvagana vanu vetu, na kaha atutsenje Nyumba ya Kitang'anila.” 6Yesu akabitaje hamwe nawo, lechelelo hoavaga kuva habehi na kufika ha nyumba ya muvina yula, muvina uyo akavatumaje vayage vakamulonjele Yesu, “Mutwa, uleche kigatsa, kwasawuli heni sifuluche ngwingitse mu nyumba yangu. 7Kwasawuli ntsiwene sifuluche ntsitse kwa heve. Lechelelo ulonje lulongwa hela, nayo mutantsi vangu akuva mumi. 8Kwasawuli na heni ntsili hasi ha muvina vangu na heni ntsinawo vatova ligalu wo vali hasi hangu wo vanguhulikitsa malajitso go ntsinguvalonjela, manyi ntsimulonjele yuno, ‘Bite,’ abitaga, na yunji manyi ntsimulonjele, ‘Utse,’ atsaga. Kaha manyi ntsimulonjele mupogotsi vangu kuta, ‘Dite hino,’ aditaga.” 9Yesu avaga kuhulika ndongwa itso, akapomokaje ndalahela. Akavapituchilaje vanu vala wovamufwataga, akavalonjelaje, “Ntsing'acha kuwona litumbilo likomi kota lino nambe kwa vanu va Isilaheli.” 10Vanu vala wo vavaga vatumilwe kukaye kwa muvina yula, vakamufikaje mupogotsi yula aponile.
Yesu angumutsilipula mukwamitsi va mudala mufwile
11Hala hoavaga kusinda ndongwa itso, Yesu akabitaje ku muji gumwe go gwachemwaga Nayini. Mwene na vadahitswa vake na vanu wolofu wo vamufwataga vakabitasaje hamwe. 12Hoavaga kufika habehi na lwitsi lukomi lwa kwinjilila ku muji vakahumilaje vanu wo vamutegwe mukwamitsi yoatajiche. Mukwamitsi uyo avaga mwana va wiyeka va mudala mufwile. Vanu wolofu va muji gula vavaga hamwe na yula mudala. 13Mutwa Yesu avaga kumuwona mudala yula mufwile, akamuhulumilaje akamulonjelaje, “Uleche kuvemba.” 14Kahi Yesu akahejelelaje halutalo na akibataje na lusaga lula, na vanu vala wovavaga valutegwe vakimaje. Na akalongaje, “Heve Mukwamitsi, winuche!” 15Mukwamitsi yula yoali atajiche akinukaje, na akikalisaje, akantsaje kulonga, Yesu akamupelaje yuve. 16Vanu veka vakapomokaje ndala hela, nawo vakamutsumitsaje Mulungu kwa kulonga, “Muloli muvina atuhumye hagati hetu, na Mulungu atsitse kuvagombola vanu vake.” 17Lulongwa ulo lo adisile Yesu lukatagalilaje ku inyi yeka ya Yudeya na chila hono ha habehi.
Yohana Mubatitsaji anguvatuma vadahitswa vake kwa Yesu
Matayo 11:2-19
18Vadahitswa va Yohana mubatitsaji vakamulonjelaje Yohana ndongwa itso tseka. Ihyo Yohana akavachemaje vadahitswa vake vavili, 19akavatumaje kwa Muntsajila vamuputse, “Mbe, heve yo yula yo akutsa, awu tumutsinde yunji?” 20Vadahitswa vala vaveye kubita kwa Yesu vakamulonjelaje, “Yohana mubatitsaji atutumile tukuwutse kuta, Mbe, Heve yo yula yo akutsa awu tumutsinde yunji?”
21Luvala lulo, Yesu avaponetsaga vanu wolofu yovavaga vatamwa, na akavahetsaje vanu misoka na fibofu wolofu vakantsaje vakalolaje. 22Duve Yesu akavalonjelaje vadahitswa va Yohana, “Mubite mukamulonjele Yohana fila fyo mungufiwona na kufihulika, fibofu vanlola, fiteve van'jenda, vanya wububa vampona na kudikitswa kumufugamila Mulungu, na yovadibe vanhulika, na yovatajiche van'tsilipulwa na vagayu vanvikulilwa Ndongwa Nofu. 23Aditilwe wuwuya na Mulungu, munu yula yo alihela muhwehwe na heni!” 24Vala vanu yo vatumilwe na Yohana hovavaga kuwuka,Yesu akantsaje kulonga na vanu ndongwa tsa Yohana. Akavaputsaje, “Homwabitaga kula ku mbuga, mwabitaga kulava chichi? Kulava lidenje lyolin'tigaswa na ng'ala? 25Lelo mwahele kulava chichi? Mwali muhele kumulava munu yoali ndawuli? Awu kumulola munu yoafwite myenda ja galama?” Kwasawuli vanu wovanfwala myenda ja galama na kwikala mu nyumba tsa vantsajila, sivikalaga kwijeje! 26Lelo mundonjele, mwahele kulava chichi? Mwahele kumulava muloli va Mulungu? Lechelelo nachene ntsinguvalonjela kuta Yohana avalutye valoli va Mulungu. 27Uyo Yohana yo munu yanlongwa mu mandiko ga Mulungu kuta, “Lave Ntsingumutuma jumbe akulongole, yoakukuvichila chang'ani ng'asi ya kukola heve.” 28Yesu akawilaje kuvalonjela vanu vala, “Ntsinguvalonjela, hagati ha vanu wovaleliche na vadala, kuduhu munu muvina kulutila Yohana. Lechelelo munu yo mudodo ndalahela mu wuntsajila wa Mulungu yo muvina kulutila Yohana.” 29Ihyo vanu veka hamwe na vakongotsa kodi wovali vabatitswe na Yohana, vaveye kuhulika Yesu fyoalontsile, vakidichilaje kuta Mulungu muwuya. 30Lechelelo Mafwalisayo na vadahitsi va malajitso ga Musa vakalemaje gala go vali valajitswe na Mulungu, ihyo valemile kubatitswa na Yohana. 31Yesu akawilaje kulonga, “Mbe, vanu va chilelo chino nguviganitsa na chinu chachi, mbe vihwana na chichi?” 32Vanu va chilelo chino vanakota vana wovichite hono hakugutsila finu yovangichema vene kwa vene kutwa, Tuvapembye fwilimbi, lechelelo simulawunga! Tuvimbye ntsimbo tsa chivembo, lechelelo simuvembite! 33Kwasawuli Yohana mubatitsaji ho atsitse ikalaga bila kulya na kung'wa difwayi, nanye mukalongaje kuta, Ana lisoka. 34Mwana va munu atsitse, ankulya na kung'wa, nanye munlonga kuta, Mulave yuno muhatufu na mugatsi. Uyu yo muyage na vakongotsa kodi na vadita ndongwa ntsibi. 35Nayivaje ihyo ntselo ya Mulungu yilajilaga kuta wo wukweli kwa veka wo vanguyidichila.
Yesu am'bakatswa mafuta na mudala munya ndongwa ntsibi
36Siku yimwe Mufwalisayo yumwe yo achemwaga Simoni akamulibulitsaje Yesu mu nyumba yake valye hamwe chilyo cha hachilo, nayo Yesu akabitaje na kikalisa mulutefu ili alye. 37Mu muji ugo kwavaga na mudala yo an'dita ndongwa ntsibi. Avaga kuhulika kuta Yesu ali mu nyumba ya Fwalisayo ankulya, akatsaje na supa yinya mafuta gogan'nunyilila finofu. 38Akimaje kumbele kumagulu ga Yesu kuno anvemba, akantsaje kugadodetsa magulu ga Yesu kwa manyotsi, uyo mudala akavaje angumupata Yesu magulu kwa fwili tsake. Kahi akavaje angunonela magulu ga Yesu na kumubakatsa mafuta igo. 39Mufwalisayo yula yoamulibulitse Yesu avaga kuwona hila, akilonjelaje mu numbula yake, “Manyi munu yuno aka ave muloli va Mulungu akakutsela kuta mudala yoangumubata mumagulu munya ndawuli, kuta mudita ndongwa ntsibi.”
40Yesu akamulonjelaje Mufwalisayo yula, “Simoni ntsina chinu cha kukulonjela.” Simoni akamulonjelaje,
“Ee Mudahitsi, Ndonjele.” Yesu akalongaje hino, 41“Kwavaga na vanu vavili wo vakopite magobole kwa munu yoankopetsa. Yumwe adayilwaga dinali miya tsihanu, yihwana na mahombo ga kukola katsi siku miya na tsihanu na va kavili adayilwaga dinali hamusini, yihwana na mahombo ga kukola katsi siku hamusini. 42Vavaga kulemwa kuhomba madeni gawo, yula yoanguvadaya akavahulumilaje madeni gawo veka vavili. Lelo nani ha iwo vavili yo akumugana ndalahela yula yoavakopitse?” 43Simoni akamulonjelaje Yesu, Yula yahulumilwe ideni likomi. Yesu nayo akamulonjelaje Simoni kuta, “Ulontsile finofu,” 44Hambele akamupituchilaje mudala yula na kumulonjela Simoni kuta, “Ndawuli! Ungumuwona mudala yuno? Hontsinje munyumba yako siumelye malenga ga kukalava magulu gangu, lechelelo mudala yuno ang'alifye magulu gangu kwa manyotsi gake na kumata magulu kwa fwili tsake. 45Heve siusamwise kwa kunonela, lechelelo mudala yuno salesile kunonela magulu gangu luhuma ntsinjile. 46Heve siumbasile mafuta mumutwi gwangu, lechelelo mudala yuno ambasile mafuta ganya wununyililo magulu gangu. 47Hoihyo ntsinguvalonjela, ahulumilwe ndongwa tsake ntsibi tsotsikantsolofu, kwasawuli andaje wugano wolofu. Lechelelo yula yoahulumilwe chidogo aganaga chidogo.” 48Yesu akamulonjelaje mudala yula, “Uhulumilwe ndongwa tsako ntsibi.” 49Lechelelo vanu vanji wovavaga hamwe na Yesu, vakantsaje kwiputsa vene kwa vene kuta, “Mbe, uyu munu munya ndawuli mbaka avahulumile vanu vanya ndongwa ntsibi?”
50Yesu akamulonjelaje mudala yula, “Litumbilo lyako likukulwise! Ubite kwa wusichimafu.”
Currently Selected:
Lukasi 7: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
