Lukasi 8

Vadala yovilongotsaga Yesu

Matayo 13:1-9; Maliko 4:1-9

1Hotsavaga kulutila ndongwa itso, Yesu akabitaje mu miji na fijiji kuvikula Ndongwa Nofu tsa wuntsajila wa Mulungu. Avaga hamwe na vala vadahitswa vake kumi na vavili, 2kaha avaga na vadala vala wovavaga vahetsitswe misoka na kuponetswa namwa tsawo na Yesu. Vadala iwo yumwe avaga Maliya yoahumye ku Majidala yoahumitswe misoka saba. 3Na Yoana muchina Kutsa mwimilitsi va nyumba ya Helode, na Sutsana na vadala vanji wolofu, vadala iwo veka vavatangaga kwa finu fyawo Yesu na vadahitswa vake.

Muhwano gwa muyali

Matayo 13:19; Maliko 4:1-9

4Lila lilugu lya vanu wolofu wovatsitse kuhuma chila muji kwasawuli ya kumuhulikitsa, Yesu akantsaje kulongana nawo kwa muhwano.

5Yesu akalongaje kuta “Muyali yumwe akali ahele kumitsa nyadikwa. Hoavaga ammitsa nyadikwa itso, tsimwe tsikagwaje mung'asi tsikakanyagwaje na magulu ga vanu na kuliwa na fideje. 6Nyadikwa tsinji tsikagwaje mu lilongo lya mwitalawe, hotsavaga kota, tsikafundaje kwasawuli kukavaga kuduhu wudodi. 7Na nyadikwa tsinji tsikagwaje muchisati cha hamifwa, Mifwa jikakalagalaje hamwe natso, mifwa jikatsitovaje. 8Nyadikwa tsinji tsikagwaje mulilongo linofu, tsikotaje na kukalagala na kulela ndalahela tsikavaje ntsolofu mala myaa, kulutila tsila ntsinji.”

Hoavaga kusinda kulonga ihyo, akalongaje fikami akatyaje, “Munya mapulichilo ahulikaje.”

Chambutso cha kudahitsa kwa mihwano

Matayo 13:10-17; Maliko 4:10-12

9Vadahitswa vake Yesu vakamuputsaje muhwano guno guna mana yachi? 10Nayo akavalonjelaje, “Henye muna nyala tsa kutsela fiho tsa wuntsajila wa Mulungu, lechelelo vanu vanji sivana kota henye iwo valonjelwaga kwa muhwano, kwasawuli navavaje vanlava valekaje kuwona, na vavaje vanhulika valekaje kwelewa.”

Yesu an'dadambula muhwano gwa muyali

Matayo 13:18-23; Maliko 4:13-20

11Yesu akalongaje, “Lelo muhwano guno guna mana yino, nyadikwa tso Ndongwa tsa Mulungu. 12Nyadikwa tsila tsotsigweye mung'asi tsinakota vanu vala wovanhulika Ndongwa tsila, hambele lisoka linkutsa na kutegula ndongwa itso munumbula tsawo, valekaje kuva na litumbilo, valakuluswa. 13Nyadikwa tsila tsotsamitsitswe mu lilongo lya mwitalawe, tsihwana na vanu vala wovanhulika ndongwa tsa Mulungu na kwanuchila kwa wusangalafu. Lechelelo ndongwa tsa Mulungu sitsingikala mu numbula tsawo, vitumbilaga kwa chipindi chidodo, manyi vajelwe valekaga litumbilo. 14Nyadikwa tsila tsotsamitsitswe mumisati ja mifwa tsihwana na vanu vala wovanhulika ndongwa tsa Mulungu, lechelelo ndongwa tsa Mulungu tsanangwaga na kugatsichila mbwiniwo tsa mali, na finu fya mu inyi. Fitifitsaga lulongwa ulo lulemwe kulela mibawo. 15Lechelelo nyadikwa tsila tsotsamitsitswe mulilongo linofu tsihwana na vanu wovahulikaga Ndongwa tsa Mulungu na kudita kota fyo aganaga Mulungu, kwa wugolofu wa numbula tsawo na vanya kwika, iwo kwa wukangatso wukomi vaditaga kota fyo an'gana Mulungu.”

Muhwano gwa lusolola lo luli mwifungu

Maliko 4:21-25

16“Vanu sivasaga lusolola na kulugubikitsa mu chiya awu kuluvika mwifungu. Lechelelo luvikwaga ha kabong'onyela ili luvang'alichile yovankwinjila mu nyumba iyo vaguwone mwangatsa. 17Kwasawuli kuduhu chinu chochive chochifihilwe cho sichikuwoneka, awu chinu chochive chochifihilwe cho sichifuluche chitselaniche na kuva mwatsi. 18Ho ihyo mwiyangalilaje hila fyomunhulika. Kwasawuli yula munya chinu akuwilwa, na yula yoalihela chinu akusukulwa mbaka chila cho anacho.”

Yesu anguvatambula yuve na vang'olotse

Matayo 12:46-50; Maliko 3:31-35

19Siku yimwe yuve na vang'olotse va Yesu vavaga vahele kumuwona, lechelelo vakalemwaje kufika habehi nayo, kwasawuli vanu wolofu vavaga vamupilime. 20Munu yumwe akamulonjelaje Yesu hino, “Yuwo na vang'olotso vali kivala van'gana mwiwone.” 21Lechelelo Yesu akamulonjelaje, “Yuvangu na vang'olotsangu wo vala veka wovanhulikitsa Ndongwa tsa Mulungu na kudita kota fyoyin'ganika.”

Yesu anguying'anulila ng'ala ngomi mu bahali

Matayo 8:23-27; Maliko 4:35-41

22Siku yimwe Yesu akavalonjelaje vadahitswa vake kuta tulowoche lubali lunji lwa lilamba, “Ihyo vakakwinaje mu mutumbwi na kwantsa kulowoka ku mwambu.” 23Hovavaga mu mutumbwi Yesu akavasaje tulo, luvala lulo kukahumilaje ng'ala ngomi na kukunuga mavimbi ga malenga mbaka mutumbwi gukantsaje kumema malenga, vakavaje mu ng'oko ya kuyaga mu malenga. 24Vadahitswa vake vakabitaje hono hala hoavasise Yesu, vakamulamusaje na kumulonjela, “Mutwa, Mutwa, tun'yaga.” Yesu akalamukaje, akaying'anulilaje ng'ala yila ngomi na mavimbi, na yila ng'ala ngomi yikakatukaje. 25Kahi akavalonjelaje, “Litumbilo lyenyu lilikwiya?” Lechelelo vene vakavaje vapomwiche na kuva na muloto kuno vangilonjela kuta, “Mbe mwene yuno yo nani mbaka anguying'anulila ng'ala ngomi na mavimbi nafyo fingumuhulikitsa?”

Yesu angumuponetsa munu munya lisoka

Matayo 8:28-34; Maliko 5:1-20

26Ihyo Yesu na vadahitswa vake vakalowokaje lilamba lya Galilaya, vakafikaje kumwambu ku inyi ya Vajelasi. 27Yesu avaga kwika mu mutumbwi, akamufikaje munu yumwe munya lisoka. Kwa siku ntsolofu munu uyo siafwalaga myenda, na saikalaga mu nyumba lechelelo ikalaga kogali makabuli. 28Munu uyo avaga kumuwona Yesu, akitotsaje halutalo ha Yesu na kukola fikami, “Un'gana undite chichi heve Yesu mwana va Mulungu yoali kilanga ndalahela? Ntsingusuka uleche kunetsa!” 29Kwasawuli Yesu avaga aling'anulye lisoka lila lihume mugati mwa munu yula. Lisoka ilyo lyamutovaga lwahihyo, na hala ho vamuwopaga kwa pingu mu mawoko na nyololo mu magulu na kumwamila. Lechelelo mwene adumulaga pingu tsila na nyololo na kubilimila ku mbuga. 30Yesu akamuputsaje, “Heve litawa lyako nani?” Likamujibulaje, “Litawa lyangu, Hetwe tulililugu,” alontsile ihyo kwasawuli avaga na misoka myolofu. 31Misoka jila jikamugongoletsaje Yesu aleche kujisindika kulyowo likomi. 32Hono iho havaga na chipinga chikomi cha migubi cho chadimwaga mulubali lwa chidunda. Duve, misoka ijo jikamugongoletsaje ajileche jinjile mu migubi jila. Nayo Yesu akajidikitsaje. 33Ho ihyo misoka jila jikamuhumaje munu yula, jikinjilaje mu migubi jila, chipinga cheka chikikaje luvilo mulwisa na kwinjila mu bahali jikafwaje. 34Vala vadimi vavaga kuwona chila chochihumye vakabilimaje, vakabitaje kuvalonjela vanu wovali ku mujini na ku fijiji. 35Vanu vakatsaje kulola chila chochihumye. Hovaveye kufika hoali Yesu, vakamuwonaje munu yula yo ahumitswe misoka ikalise habehi na Yesu, afwite myenda na aponile, vanu vala vakavaje na muloto ndalahela. 36Vanu veka wo valuwene lulongwa ulo vakavalonjelaje vanu iwo hila munu yula fyo aponitswe na Yesu. 37Kahi vanu veka va inyi ya Vajelasi vakamugongolaje Yesu awuche, kwasawuli vavaga na muloto. Duve Yesu akinjilaje mu mutumbwi akawukaje. 38Chipindi Yesu an'wuka, munu yula yo ahumitswe misoka akamugongoletsaje Yesu vabitase hamwe nayo, lechelelo Yesu akamulonjelaje, 39“Piluche kukaye kwako ukavalonjele vanu ndongwa ngomi tso akuditye Mulungu.” Ihyo munu yula akabitaje chila hono ku muji gula na kuvalonjela vanu ng'ani tsila tso amuditye Yesu.

Muhintsa va Jayilosi antsilipulwa na mudala amponetswa

Matayo 9:18-26; Maliko 5:21-43

40Yesu hoavaga kuwuya kuhuma ku mwambu kwa Vajelasi, vanu wolofu vakamulibulitsaje kwa wusangalo kwasawuli vavaga vangumutsindila. 41Iho akatsaje munu yumwe litawa lyake Jayilosi, yo avaga chilongotsi va nyumba ya kitang'anila Vayawudi, akafugamaje ha magulu ga Yesu na kumugongoletsa abite kukaye kwake, 42kwasawuli avaga na muhintsa va wiyeka yo avaga na myaka kumi na jivili, avaga antamika ndalahela na avaga habehi na kutajika. Yesu hoavaga am'bita, lilugu lya vanu lya mutifyaga mbali tseka. 43Baho havaga na mudala yoakodekaga na kuhuma danda kwa chipindi cha myaka kumi na jivili. Yo asintsile finu fyake fyeka kwa vaganga, lechelelo siaponitswe. 44Akaifyatanitsaje kuhumila kuchigosi kwa Yesu, akadometsaje mwenda gwa Yesu, luvala lulo danda yila yikadugaje. 45Yesu akaputsaje, “Nani yo andomitse?” Vanu veka vakamukanilaje, lechelelo Petulo akalongaje, “Mutwa ihano hana vanu wolofu yo vangukutifya chila lubali.” 46Lechelelo Yesu akalongaje, “Hana munu andomitse, kwasawuli mbwene wuvetso wangu lunyumile.” 47Mudala yula avaga kutsela kuta siafuluche afihame, akahumilaje kuno ankakama, akagwaje kwa kipuna ha magulu ga Yesu. Akihalaje ha vanu kuta, kwasawuli yachi mbaka alamwe kumudometsa, na hila fyoaponile wutamwa wake. 48Yesu akamulonjelaje, “Muhintsa vangu litumbilo lyako likuponitse. Ubite kwa wusichimafu.” 49Yesu hoavaga ang'acha kulonga, akatsaje mutantsi kuhuma kukaye ya Jayilosi yula chilongotsi va nyumba ya kwitang'anila Vayawudi, akamulonjelaje Jayilosi, “Uleche kumukoda Mudahitsi, muhintsa vako mwanga atajiche.” 50Lechelelo Yesu hoavaga kuhulika lulongwa ulo akamulonjelaje Jayilosi, “Witumbile hela, uleche kuwona muloto, muhitsa vako akuvamumi.” 51Yesu ho avaga kufika ha nyumba ya Jayilosi, akavalemetsaje vanu vanji kwinjila hamwe na mwene, lechelelo inje na Petulo, na Yakobo, na Yohana, hamwe na dade na yuve va muhintsa yula. 52Muda ugo vanu veka vavembaga na kumulomboketsela muhintsa yula. Yesu akavalonjelaje, “Muleche kuvemba! Muhintsa yuno siafweye ndaya ila avasise.” 53Vanu vakamuhekaje Yesu kwasawuli vatselaga kuta yula muhintsa afweye. 54Lechelelo Yesu akamwibataje liwoko, na akamulonjelaje fikami kuta, “Muhintsa vangu lamuche.” 55Wumi wake yula muhintsa wukamupiluchilaje, nayo akinukaje luvala lulo. Yesu akavalonjelaje valeli vake vamupele chinu cha kulya. 56Valeli vake vakatinukaje ndalahela, lechelelo Yesu akavalemetsaje valahogola vamulonjele munu yoyuve ndongwa tsila tsiltsotsihumye.

Currently Selected:

Lukasi 8: SBV

Highlight

Compare

Copy