Valumi 11
11
Lusungu lwa Mulungu kwa Vaisilaheli
1Lelo ntsimputsa mbe, Mulungu avakanile vanu vake? Ndaya! Heni mwene ntsi Muisilaheli va lulelo lwa Ibulahimu, ntsili munu va likabila lya Benjamini. 2Mulungu siavalemile vanu vake yo avatselite luhuma hamutalo. Mbe, sinambe mugasele Mandiko go ganlonga kwa ndongwa tsa Eliya hila fyo amukalalye Mulungu kwasawuli ya vana va Isilaheli? 3Eliya alontsile kuta, “Mutwa, vavakopwe valoli vako na kuhabomola hono hako ha kutawulila nambiko, sije ntsiliyeka hela nawo van'gana kung'opola.” 4Mbe, Mulungu amupitwe chinyandawuli? Amulonje, “Ntsisigatsilye vanu vangu elufu saba yo sinambe valifugamile lilungu Baali.” 5Duve, nambe sambi yili hihyo, kuna vanu vatunga wo vasije wo avahagwe Mulungu kwa wuwuya wake. 6Mulungu avahagulwe kwa wuwuya wake, siyo kwasawuli ya ndongwa tsawo tso van'dita. Manyi yika yive kwasawuli ya ndongwa tsawo tso van'dita, wuwuya siwukakuva wuwuya ndaya!
7Ino lelo tulonje chinu chachi, vanu Vaisilaheli #11:7 Vaisilaheli kaha vachemwaga Vayawudisivachipasile chila chinu cho vavaga vanguchisaka? Vahagulwa veka vapasile, ila vanu vanji wo vasije numbula tsawo tsadisilwe kuva ng'angafu. 8Kota hila fyo yandikwe, “Mulungu avadisile vave kota vanu yo vavasise na mbaka munyi guno vaveye kota vanu wo vavasise na kuhulika kwa mapulichililo gawo.”
9Nayo Dawudi anlonga
“Mawungo gawo ga kulya gavaje mitego ja kuvagwilisa,
ili vagwe na kutowa.
10Miho gawo gavaje na jitsa ili galeche kulava,
na migongo jawo jibibindale kwa ng'odeko siku tseka.”
11Ihyo ntsimputsa kaha, mbe, Vaisilaheli vikuve na kugwa sivakuvetsa kwinuka kanji? Ndaya! Lechelelo kwasawuli ya kukosela kwawo, wukuluso wufisile na kwa vanu wosi Vaisilaheli ili kuvadita Vaisilaheli vavawonele wifu. 12Kukosela kwawo Vayawudi kuvadisile vanu wosi Vayawudi vave na wusangalo na Mulungu, na kuyaga kwawo kwa chi muhe kudisile Mulungu ave na wusangalo na vanu wosi Vayawudi. Lelo munhotsa ndawuli, Vayawudi wolofu ho vakuva vamupituchilye Mulungu na kudita kota fyo an'gana mwene. Mbe, sinambemuhotse kuta Mulungu akulutila kuva na wusangalo na vanu wosi Vayawudi?
Kukuluswa kwa vanu wosi Vayawudi
13Lelo ntsinloga na henye vanu wosi Vayawudi. Kwa hila fyo ntsili mutumi va vanu wosi Vayawudi, ntsinguyitsumila katsi yangu ya wuvikutsi, 14ili ntsivadite vanu va inyi yangu vawone wifu, na ihyo ntsivadite vanu vatunga vakuluswe. 15Manyi kukanwa kwawo kudisile vanu va inyi tseka vapataniswe na Mulungu. Mbe, yikuva ndawuli hala hovakuva vidichilwe na Mulungu? Vanu wo vafweye vakutsilipuka!
16Manyi chipande chilongola cha mukate chitawulwe kwa Mulungu mukate gweka gukuva gwa Mulungu. Manyi ndela tsa mubichi tsive tsitawulwe kwa Mulungu, na mitambi najo jikuva jitawulwe kwa Mulungu. 17Eee, mitambi jinji ja mibichi ja mitsayituni mu chinyungu jatemilwe, na litambi linji lya litsayituni lya mwijejele livisilwe hono hawo. Henye vanu wosi Vayawudi wo litambi lya mutsayituni lya mwijejele, wo sambi mwihantsitse mu wumi wa mutsayituni gwa muchinyungu. 18Ihyo lelo, mulekaje kuvabedala vanu vala wo vatemilwe kota mitambi. Lelo mungidutsila chinu chachi? Nambe kuve na lulongwa lwa kidutsila, mwiwukaje kuta siyo henye yo mungutsitanga ndela tsa mubichi, ila ndela tso tsinguvatanga henye.
19Lechelelo mufuluche mulonje, “Mitambi jila jatemilwe ili hetwe tuvikwe mu libichi ilyo.” 20Eee, mitambi jila jatemilwe kwasawuli ya kuleka kitumba kwawo, lechelelo heve wimile kwasawuli ya kitumba kwako. Lelo ulekaje kidutsa, ila un'ganika wime kwa kiyangalila. 21Manyi Mulungu si avawonye lusungu Vayawudi wo mitambi jakuhuma katali. Mbe, afuluche avaleche henye? 22Lave lelo! Hila Mulungu fyo muwuya na mukali. Mwene avaga mukali kwa vanu vala wo van'dita tebe na mwene, nayo kaha avaga muwuya kwa heve yo unkwendelela kudita kota fyo an'gana, na manyi uve tebe nayo ukutsogolwa. 23Manyi Vayawudi nawo valeche kuva tebe na Mulungu, mwene akuvavika kaha hala hovavaga. Kwasawuli Mulungu anawo wuvetso wa kuvavika kaha hala hovavaga. 24Henye vanu wosi Vayawudi munakota litambi lya mutseyituni lya mwijejele, ila muhetsitswe uko na kuvikwa hono iho luhuma katali siyo henyu. Lechelelo Vayawudi luhuma katali vene vanakota mutseyituni gwa mu chinyungu, kwa vene kuna wupefu wa kupilulwa kaha mu mubichi go gwawo.
Vaisilaheli veka vakukuluswa
25Vang'olotsangu ntsin'gana muwutsele wukweli wo wufihime, ili muleche kidutsa kuta muna nyala ntsongofu. Chidada cha Vayawudi chavaga cha luvala ludodo hela, mbaka hala vanu vanji wosi Vayawudi ho vakuva vamutumbye Mulungu. 26Ihyo Vaisilaheli vakukuluswa kota fyo yandikwe mu Mandiko ga Mulungu,
“Mukulusi akutsa kuhuma ku muji gwa Sayuni,
akuvahetsela valelwa va Yakobo ndongwa tsawo ntsibi.
27Ili lyo lilagano lyangu lyo ngulagana nawo,
hala honguvahetsela ndongwa tsawo ntsibi.”
28Sambi Vayawudi valemile Ndongwa Nofu, kwa kudita ihyo vaveye vatelani va Mulungu kwafwayida ya henye wosi mu Vayawudi. Ihyo mutselaje kuta vang'acha vahagulwa va Mulungu na wo van'ganwa kwasawuli ya lilagano lyo avaga avisile Mulungu na vakuku vawo. 29Mulungu si agalulaga mahotso gake kwa vanu vala wo avahagwe na kuvapela fifunje. 30Kota hila hala katali henye vanu wosi Vayawudi fyo mwavaga vatelani va Mulungu, lechelelo sambi mupasile lusungu lwa Mulungu kwasawuli Vayawudi vateline na Mulungu. 31Hohihyo kwasawuli ya lusungu lo mwapasile henye, Vayawudi vantelana na Mulungu ili na vene vanuchile sambi lusungu lwa Mulungu. 32Vanu veka vakosise kwa kuleka kumuhulichitsa Mulungu, ili mwene alajile lusungu lwake kwa veka.
Mulungu atsumitswe
33Eee, Mulungu anafyo finu fyolofu finofu ndalahela! Ntselo tsake hamwe na nyala tsake tsilihela wudugo. Kaha kuduhuli munu yo afuluche kuwuhadisa wulamulo wake na ng'asi tsake sinambe tsitselaniche. 34Kota Mandiko fyo ganlonga
“Mbe, nani yo an'tsela mahontso ga Mutwa?
Awu nani yo afuluche amulonjele Mulungu cha kulamula?
35Mbe, nani yo alongwe kumupela Mulungu chinu chochive,
ili ahombwe?”
36Kwasawuli finu fyeka finhuma kwa mwene na hofili kwasawuli ya wuvetso wake na hofili kwasawuli yake. Wuvina wuvaje kwake mwene siku tseka tsotsigaya wudugo! Eena.
Currently Selected:
Valumi 11: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
