Valumi 12
12
Kitawula kwasawuli ya kumutumichila Mulungu
1Ihyo lelo vang'olotsangu kwakuva Mulungu yo munya lusungu lukomi, ntsinguvagongola kuta mwitawule henye vene kwa Mulungu kota nambiko na yoyingumugan'ya Mulungu, lechelelo muvaje wumi, ihyo fyo mun'ganika kudita kwa kumufugamila Mulungu kwa wukweli. 2Mulekaje kuhotsa kota tso van'dita vanu va mu inyi fyo vanhotsa, ila Mulungu avabadilaje henye kwa kuditwa wupya mahotso genyu. Ihyo ho mukuvetsa kutsela nachene chila cho an'gana Mulungu, mukutsitsela ndongwa nofu tso tsingumugan'ya na tsa wukwitso kwa Mulungu.
3Kwa lusungu lo masile kuhuma kwa Mulungu ntsinguvalonjela nyeka kuta, chila munu alekaje kuhotsa kuta ali chinu kulutila muyage, lechelelo mwipimaje muvene kwa litumbilo lyo avapelye Mulungu. 4Kota hila muvili gumwe fyo guna filungo fyolofu, na chila chilungo chiditaga katsi yake. 5Hohihyo na hetwe kota fyo tuwolofu, ila tuli muvili gumwe kwa kula kihantsa na Chilisito, lechelelo chila munu ali chilungo kwa muyage. 6Chila munu anacho chifunje cho apelitwe kwa lusungu lwa Mulungu. Ihyo lelo yo apelitwe chifunje cha wuloli wa Mulungu alongaje wuloli kota litumbilo lyake fyolili. 7Munu munya kuvetsa kukola katsi ya Mulungu akolaje katsi iyo, na yo apelitwe katsi ya kudahitsa adahitsaje, 8munu yo apelitwe katsi ya kuvahongetsa vanu avahongetsaje, yo apelitwe katsi ya kuvatanga vanu vanya wugayu avatangaje kwa wuwuya, na munu yo apelitwe katsi ya kwimilila imililaje bila kuleka, nayo munya kudita ndongwa tsa lusungu aditaje hihyo kwa wusangalo.
9Kigana kwenyu kulekaje kuva kwa kideteletsa, mutsivipilaje ndongwa ntsibi na kutsidita ndongwa nofu. 10Mwiganaje henye kwa henye, kwa hesima chila munu ahotsaje kwajili ya muyage na kumuwona kuta nayo munu. 11Mulekaje kudita katsi ya Mulungu kwa wudejefu, ila muyikolaje kwa wukangatso na kwa numbula tsenyu tseka kwa kumutumichila Mutwa. 12Lihuvilo lyenyu livaditaje musangalale, na homukuva mu ng'odeko mumutsindilaje na kuno mungumusuka Mulungu siku tseka. 13Muvatangaje vanya litumbilo vayenyu mu wugayu wawo, muvalibulitsaje vajentsi kwa kusangalala.
14Muvasuchilaje wuwuya vanu veka wo vanguvakoda henye, Eee! Muvasuchilaje wuwuya, mulekaje kuvakotola. 15Muhechelelaje hamwe na vala wo vanhechelela, na kaha muvembaje na vala wo vamvemba. 16Mwikalaje kwa wusichimafu henye kwa henye. Mulekaje kidutsa kuta muntsela chila chinu, ila muvaje hamwe nawo vanu wovam'bedalwa. Mulekaje kiwona kuta henye ng'ani wo muna nyala ndalahela.
17Mulekaje kumupilulila munu yoyuve wubi kwa wubi. Mwikangatsaje kudita ndongwa tsila tso vanu vangutsitsela kuta nofu. 18Muditaje chila chomukuvetsa ili mwikale kwa wusichimafu na vanu veka. 19Nye vayangu, mulekaje kuvapilulila vanu wubi, lechelelo mumulechele Mulungu lulongwa ulo, mu Mandiko ga Mulungu ganlonga, Mutwa anlonga, “Kupilula wubi yo katsi ya heni, heni ngupilula.” 20Kulutila ihyo mandiko ganlonga, “Manyi mutelani vako ana ntsala, umupele chilyo, manyi ana ng'alu, umupele malenga ang'we. Kwa kudita ihyo ukumudita awone nyoni ndalahela.” 21Wubi wulekaje kukusuma, ila uwusumaje wubi kwa kudita wuwuya.
Currently Selected:
Valumi 12: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
