Lukas 10
10
Yesuse ncula smat yafafit
1Fola tina, Jou Yesuse nfisang smat yafafit mali smat ta jaga rderera Ina. I ncula si na sililu bo rfane ntuba lali bendarna fare gagaw ta hola I bo nlafona. 2I nua si, “Smat ta rciap rlonga fare dailow Abar Mafia mali Jou Lahatalla i tina lalna gaole, fatailo laisa gandum ta lal mali beti motle be tkati, ga smat ta bo rfakatina lal pa. Gabe tina, mew fdore to lali Jou Lahatalla i ta na bet cia, bo I nbange smat ta bo rfakati mali Ina betcana.
3Tane mew ffane to, ga flolam famafia, Ya isula mew ffan lali smat ta rmayaina fapaluan, tina fatailo laisa re domba ntu isa nfan lali fun ailolona fapaluan. 4Oras ta mew ffanna, mati ffut tiwi gagaona, mati ffut tasna fare mati ffut nalna. Mati fmauting fauatuna re smat mali lalingcana, ga ffan falaw.
5Gabe laisa mew fsung mali smatna riri ebaina, mew nane fu, ‘Tabea ntuba, kdore bo Jouca ni mafiana en mali mewi ta mali ebai taena’. 6Gabe laisa smat ta mali ebai ciana dailowe mew, barakat ta mew fdor tina osta en mali sili. Ga laisa smat ta mali ebai ciana dailowe mew pa, barakat ta mew fdorna ndadi i mali sili pa. 7Gabe en smat ta dailowe mew, mew fteteame to mali ebai cia. Mati fdir-dirka gagawo mewna. Fseli fare fdom ahai be ta si rpo mewna, ningalena ise ta nkarajan, i osta nduke mulona mali i ni karajan tina. 8Laisa mew fsung mali bendar isa lae, pnu i lae, ga smat ta manana dailowe mew, mewe fan be to ahai ta si rpona. 9Fare mew nane, famafia smat ta dowil mali gagaw ciana, fare fabinga smat ta manana, ‘Mnu panto Jou Lahatalla bo nkawasa ndadi Kolano mali smat ta rdela Ina’. 10Ga laisa mew fsung mali bendar isa, pnu lae, gabe smat ta manana dailowe mew pa, ffan lali laling mamagalna taga fu facicoale mew laitane, 11‘Mew failow pa flonga Jou ni Abar Mafia tane, gabe amame bo kfane to. Pepesa mali nimew pnuca ta en mali ficomam tane, ame ktibe mantane bo flolam, mew fsale to mali Jou Lahatalla i. Tane mew ftanggo nimew salna to. Ga mew nane fto re flolam tane e: tane to Jou Lahatalla bo nkawasa ndadi Kolano mali smat ta rdela Ina, ga mew failow pa.’ ” 12Gabe Yesuse nu hawe lali I ni muritna, “Flolam famafia e, lomane mali wol kiamat cia, smat ta mali pnu ta dailowe mew pa tina bo rduk salna tebteb. Salsal ta si osta rduk tina, tebtebna foloi mali salsal ta bendar Sodome nduke tona.”
Yesuse ntolea smat ta dailow pa rderera Jouna
(Mat. 11:20-24)
13Yesuse nu hawe, “Ee mew smat Khorazim fare Betsaida! Mew fkapalange to! Jouca bo nfasale mewna tebteb, ningalena Ya ipei mujizate to, ga mew fiwane wlomewna pa bo fderera Jouna. Gabe Ya ipei mujizat tina lali smat ta mali pnu Tirus fare Sidon, makse si wlorina mayai, osta diwane wlorina rderera Jou gabe dising gigiyap puis bobokorina fare rpake kabaya karung, tina fafayal si diwane wlorina rderera Jou. 14Gabe, loman ta mali wol kiamatca, oras ta Jouca bo nadili farumi smat, smat Tirus fare Sidonna rfasal sina osta mayana mali mewi.
15Fare mew smat ta fteteam mali bendar Kapernaum, mew ftona Jouca bo nlange mew nais soroga i? Enpa! I osta ntopa mew lali narakaca.”
16Fola tina, Yesuse nfulasi ga nu hawe lali smat ta rderera Ina, “Smat ta rlonga mewna, tina fatailo laisa re i nlonga Ya. Smat ta dailowe mew pana, i cia ma nailow Ya pa. Ise nailow Ya pa, i cia ma nailow Jou Lahatalla pa ta ncula Ya.”
Smat yafafit ta Yesuse ncula si tasa rlolai
17Smat yafafit ta Yesuse ncula si tasa, si rlolai lali Yesus i fare wlorina sangnang, gabe duwa I, “Jou, setanna ma rderera ta amame kparenta oras ta ame kfaungo si kpake Jou ngahnyomna.”
18Yesuse nua si, “Ime, fatutua. Ya ikeme to setanna riri kolanoca nmarapawil mali langitcana, i nmarapawilna fatoal laisa re lemlemna. 19Flolam famafia ta Ya ikuwa mewna. Kawasa ta Ya ipo mew tina mamagal, denabe mewe ma bisa ffilo gu ta nbisa re mamyatif, fare bisa fakala nimew musuna, cia setanna riri kolanoca. Fare kawasa tina, isa bisa nfakapalange mew pa. 20Makse mfalaina ma, mati wlomewna sangnang fauatuna su ningalena setan tina rderera ta mew fparentana. Ga mew, nane fsangnang ningalena ngahnyo mewna rlefo mali soroga i.”
Yesuse nu tarima kase lali Jou Lahatalla i
(Mat. 11:25-27, 13:16-17)
21Oras tina to, Jou ni Rohca nkawasa Yesus gabe npei I wlona sangnang. Gabe I nu, “Ya iku tarima kase lali Apa i, Jou ta nkawasa mali soroga i fare mali dunia i. Ya iku tarima kase ningalena Apa mfabinga pa tina lali smat ta rpande fare smat ta rto okosesina lal, ga mali smat biasana, Apa mpei denabe si rtaif. Apa, tina to ta npei Apa wlomna sangnang.
22Farumi ta en mali Ya nik Apa ina, Apa npo Ya to. Smatna isa pa ta ntona ise molang Ya Lahatalla ntu Ya, langisa Apa be ta ntona. Gabe smatna isa pa ta nto ise cia Apa, langisa Ya be Lahatalla ntuca ta ito, fare smat ta Ya ifisangna bo rfayala Apa.”
23Fola tina, Yesuse nbo ni muritna, I nmauting re sili be, I nu, “Mew fsangnange to, ningalena mew feme to ahai ta Ya ipeina. 24Ningalena, tantubana lal nabi fare kolanona rlokolo bo dem ahai ta mew fem oras taena, ga si deme rcuna pa. Si ma rlokolo bo rlonga ahai ta mew flonga oras taena, ga si rlonga rcuna pa.”
Andeande Smat Samaria ta wlona mafia
25Bahnga na, en guru agama isa ta nto Musa ni kitab silim tasa bo niyawa Yesuse na sal. Gabe i nosal taga nfautan laitane, “Guru, ya nane ipei ahai bo Ya bisa iduk tub re Jou Lahatalla denabe lalina?”
26Yesuse nu, “Ahai ta rlefo ga tina mali fatfato pumul Musa ni kitab silim tasana? Ahai ta aw mbaca manana?”
27Smat cia ncanglo, “En rlefo laitane, ‘Mew nane fatutua fmasie Jou Lahatalla, mewe nimew Jou i. Mew nane fmasie Ina foloi mali farumi ta mewe fmasiena, fare ni lalingna fpo nimew cicoalna bo fpei ta I nailowna, fare mew bena nane flolam I. Fare mewe ma nane fmasie smate nesana, laisa re mew fmasie nimew dirica tutuling.’ ”
28Yesuse nua guru agama Yahudi cia, “Fatutua ta aw mu tina! Gabe laisa aw mpei laina, aw osta mtub re Jou Lahatalla denabe lali.”
29Ga guru agama Yahudi cia nailow bo smatna rto i ni dirica namolang, gabe i nfautno Yesus hawe, “Gabe smate nesa ta ya nane imasie i cia ise?”
30Yesuse ncanglo npake andeande tae, “En man isa smat Yahudi i ta nduri mali bendar Yerusalem bo nfan lali bendar Yerikho. Mali lalingca fapaluan, i nfadukduk re smat ta wlorina rmayaina. Si rpun i taga rcefto ndumi ta en mali i tina. Ni morco napna, si rfateam i denabe bo nmat mana.
31Mnu pa na, imam agama Yahudi isa ndelo laling cia. Oras ta i nem smat ta rpun i cia, i nfan turus ndel mali lalingca lapona. 32Laina bena re smat isa agama Yahudi i mali suku Lewi. I ma ndelo laling cia. I tae ta jaga n'gali imamna rleleane Jou Lahatalla mali Ebai Sombayang Mamagalcana. I ma neme smat ta nduk punpun cia, ga i ma nfan turus delmali laling cia lapona.
33Mnu pa na, en smat isa mali batang Samaria i bo nfanna laspa, ndelo laling cia bena. Oras ta i nem smat ta rpuni cia, nbasamna nmasie i. 34I ndahle smat cia taga nfaberesi ni yabatna npake anggur taga nlalaw npake egat, fare npitane smat cia ni yabatna. Hola tina, i ncaple smat cia nais i ni keledaica, fare nuti lali ebai ta tcewana. Mana i nurus i famafia. 35Ni semaca, smat Samaria cia npo tiwi perak silu lali smat ta ni ebaica. I nu ‘Apa, mgali ya muruse smat tae famafia. Tane ni mulona, gabe laisa tiwi tane nlafo pa, lomanta ya ilolai, taga ibang.’ ”
36Fola tina, Yesuse nfautno guru agama Yahudi cia, “Gabe laisa bo mew, mali smat sitol tasa, ise ta nfaeme ni masiena lali smat ta rpuni cia?”
37Guru agama Yahudi cia ncanglo, “Smat ta nfafcule ni masiena lali smat ciaca.”
Gabe Yesuse nua i, “Fatutua tina! Gabe tane, mfane to bo mpei laisa tina.”
Yesus i mali Marta re Maria riri ebai i
38Oras ta Yesuse I re ni muritna rfaturusa riri fanfanca bo rfan lali bendar Yerusalem, si rtuli mali pnu isa. Mana, en maping isa ngahnyo Marta. I nololaw Yesuse bo nfan lali i ni ebaica. 39Marta en teno maping isa, ngahnyo Maria. Oras ta Yesuse i mali si riri ebai ina, Maria ntotolang ndahle re Jouca fare nlonga turus I ni mautingna. 40Ga Marta, i lali re mali nfasiap an. Marta ndahle Yesus fare nu, “Jou, Jou mpusinge tenokca pa, nfabiar ya ikarajanna itutuling? Msula i n'gali ya.”
41Ga Jou Yesuse ncanglo Marta laitane, “Marta! Marta! Aw wlomna ncusa fare mfapusing be nim dirica lali re mali mututa be tane re tina! 42Ga ta ni ngale foloina pusa be, ga Maria nfisang ta mafiana to ta i npei oras taena. Gabe smatna bisa jal pa tina mali i ina.”
Currently Selected:
Lukas 10: BZQ
Highlight
Copy
Compare
Share
Want to have your highlights saved across all your devices? Sign up or sign in
2026 Indonesian Bible Society
