Lukas 9
9
Yesuse ncula ni muritna rfabinga Abar Mafia
(Mat. 10:5-15; Mrk. 6:7-13)
1Yesuse nololaw ni murit yafasa re silu tasa, taga npo si cicoal fare kawasa bo rfaungo setan fare bo rfamafia smat ta rpanyaketna rupa lalo i. 2Hola tina, Yesuse ncula si rfane bo rfabinga smatna ga mfalaisa Jou Lahatalla bo Nkawasa ndadi Kolano mali ni smatna fare I ncula si rfane rfamafia smat ta dowilna. 3Oras ta si rfan paube, Yesuse nfatnawe si, “Mati ffut fapaisana mali fanfancana. Mati ffut titialna, tasna, anna, tiwina fare pake afianna. 4Laisa en ta dailowe mew mali si riri ebai i, fteteam mana to denabe fdirake mew mali bendar cia. 5Laisa en ta dailowe mew pa, mew fsapang mali si riri bendar cia, fare pepesa ta en mali ficomewna ffatibtibe mana, bo si rlolam, si rcale to mali Jou Lahatalla i.”
6Fola tina, Yesuse ni muritna rfan jele pnuna, rfabinga Abar Mafia mali Jou Lahatalla i fare rfamafia smat ta dowilna mali farumi gagaw.
Kolano Herodese niyawa bo nto Yesus tae ise
(Mat. 14:1-12; Mrk. 6:14-29)
7Oras tina, Herodes ta ndadi kolano mali batang Galilea. I nlonga ndumi ga ahai ta Yesuse npeina. I wlona kangela ningalena, smatna du, Yesus cia Yohanes ta nfasisopca ta popise i nmate ga npaling hawe. 8En bena ta nesana du, Yesus cia nabi Elia ta popiseica ga nlafo hawe. Fare en bena ta du, Yesus cia isa mali nabi tantubana ga npaling hawe.
9Gabe kolano Herodese nu, “Wol cana ya ifasula rkati Yohanese bobokoca, ga ise hawe Smat tae? Ya ilonga to ga mujizat ta Yesuse npeina.” Gabe Herodese niyawa lalinge bo nfadukduk re Yesus.
Yesuse nfatub smat lalan lim
(Mat. 14:13-21; Mrk. 6:30-44; Yoh. 6:1-14)
10Yesuse ni murit ta ncula si tasa, rlolaie to. Si dafetngo Yesuse ndumi ta si rpeina. Hola tina, Yesuse nut si lali gagaw isa ta namliley ndahle bendar ta ngahnyo Betsaidaca bo si rtutuling mana. 11Ga smatna lal ta rto gagaw ta Yesus I re ni muritna rfanyo ica. Gabe si rfane rderera I. Yesuse nailow si famafia fare nafcule si mfalaisa Jou Lahatalla bo Nkawasa ndadi Kolano lali smat ta rdela Ina, fare I ma nfamafia smat ta dowilna.
12Orascana bo dorame to, Yesuse ni murit yafasa re silu tasa rlafo lali Yesus i gabe du, “Guru, gagaw tae namliley fare nalaspa mali pnu i. Ta mafiana msula smat ta lal tane rfane bo diyawa an fare diyawa gagaw ta bo damtulina, mali pnu-pnu ta ndahle mali tanena.”
13Ga Yesuse nua ni muritna, “Mew ta nane fatub si!”
I ni muritna du, “Guru, ta en mali amam i tane roti pilim fare iyan silu be. Gabe laina nane amame kfane kgon an hawe bo kfatub farumi smat tane.” 14Yesuse ni muritna du laina ningalena smat ta manana lalorina japa lalan lim, tina tetang manna be.
Gabe Yesus nua ni muritna, “Fsula si bo rtotolang rfayalo si. Gagaw isa japa smat yafalim.”
15Gabe muritna rpei ahai ta Yesuse nculana. Si rcula farumi smat tina rtotolang. 16Oras ta si rtotolang, Yesuse nyal roti pilim fare iyan silu tasa. I natngal nais langitca, fare nu tarima kase Jou Lahatalla. Taga, I nfawogwogla roti tina taga npo lali ni muritna bo si rlowto smat lalo tina. 17Gabe si farumi rceli denabe rmosi. Rceli hola, Yesuse ni muritna rfayalo an ta gleona. Ni lalona en pupurang yafasa re pilu.
Petruse nfatuwo Yesus cia Mesias
(Mat. 16:13-19; Mrk. 8:27-29)
18Bahnga na, Yesuse ncombayange ntutuling. I ni muritna ma en mana bena rdahle I. Ncombayange hola, Yesuse nfautno ni muritna, “Ta mew flongana, smatna du Ya tane ise?” 19Si rcanglo, “En ta du, Guru cia Yohanes ta nfasisopca npaling hawe. En ta du, Guru cia nabi Elia nlafo nduri mali sorogai. En hawe ta du, Guru cia isa mali nabi tantubana ga npaling hawe.” 20Gabe I nfautno si hawe, “Gabe laisa mew, Ya tane ise?”
Petruse ncanglo, “Guru cia Mesiase to, Kolano ta Jou Lahatalla njaji bo mfasalamate smatca.”
21Fola tina Yesuse nua si, “Mdel pa ta fabinga smatna Ya tane Mesias.”
Yesuse nfabinga I bo nmat fare mfalaisa ni laling ta bo tderera Ina
(Mat. 16:21-28; Mrk. 8:31, 9:1)
22Fola tina Yesuse nu hawe, “Smate ntu ta mali sorogai ca, nane nduk kangelana lal, fare dailowi pa simosimo Yahudina, imamna riri ta rfaboboko si fare guru agama Yahudi ta rto Musa ni kitab silim tasa. I osta nduk punpun denabe nmat, ga wol pitol Jou Lahatalla nfapaling I hawe.” 23Yesuse nua si farumi, “Ise ta bo nderera Ya, i bisa pa bo nderera i wlonana. Ga wol re wol i nane nciap nduk kangela denabe nmat ningalena nderera Ya, tina fatailo laisa i npapa ni salipca bo nderera Ya. 24Ningalena, ise ta ntube ga nem be i ni tubca ntutuling, i cia nmatna osta i re Jou Lahatalla pa denabe lali. Ga smat ta nderera i wlona pa ningalena i nderera Ya, i cia osta nduk tub re Jou Lahatalla denabe lali. 25Ni ngale pusa pa o, gabe laisa smat isa nduke ndumi arata ta mali dunia tae, ga nmatna i re Jou Lahatalla pa denabe lali. 26Ningalena ise ta nmai bo nfatuwo i nderera Ya fare nderera Ya nik fafculena, lomanta oras ta Smate ntu ta mali sorogaca nlafo hawe, Ya ma osta imai bo ifatuwo i nderera Yana. Oras ciana, Ya ilafo re nik Apa ni kawasa ta mamagalna fare malaekat ta mali sorogai. 27Flonga famafia ta Ya ikuwa mew tane. Mali ta mew mantanena, en ta osta rmat pawbe gabe si dem pawbe Jou Lahatalla bo nkawasa ndadi Kolano.”
Yesuse nfadukduk re nabi Musa re nabi Elia puis lolasca
(Mat. 17:1-8; Mrk. 9:2-8)
28Japa wol piwai Yesuse nu tina hola, I nololaw Petrus, Yohanes fare Yakobus, rfane rdawil nais lolas isa bo rcombayang pulina. 29Oras ta Yesuse ncombayangna, I uhngoca temna naiwani ndadi nesa fare I ni pakena ndadi bubulang sasaletam. 30Rgarayanna, en smat silu rmauting re I. Si tina nabi Musa i re nabi Elia ta rtub tantuba malina. 31Smat silu tasa daplangan bena. Si rmauting ga Yesus osta nmat, fare tina osta ndadi i mali Yerusalem.
32Oras ta smat sitol tasa matingna, Petrus i re ni del silu tasa damtoal. Oras ta si rpaling, si dem Yesuse naplanganna gaole, fare nabi silu ta dosal rdahle I tasa.
33Oras ta nabi Musa i re nabi Elia bo rfateam Yesus, Petruse nua Yesus, “Guru, amame ksangnangna gaole am mantanena. Ta mafiana, smat am col tane kfaosal falogi nenena fasitol: isa bo Guru, isa nabi Musa, fare isaca bo nabi Elia.” Ga Petruse nmauting be to, i nto pa. 34Petruse nmauting sube, metna nduri ga nopi si, fare si ndadi damcait. 35Si rlonga mauting mali met tina lolo nu laitane, “Tae Ya Ntuk ta Ya ifisang Ica. Flonga I to!”
36Laina rlonga mauting tina panto, Petruse nemna motle be Yesuse ntutuling. Ga mulain oras tina, murit si tol tasa dafetngo isa pa ahai ta si dem nanaina.
Yesuse nfaungo setan mali wai man isa
(Mat. 17:14-18; Mrk. 9:14-27)
37Ni semaca, oras ta Yesus I re ni murit sitol tasa rduri to mali lolasca, smatna lal rlafo Yesus. 38Garayanna en smat isa mana nmautingna nfacicoali nu laitane, “Guru, mgali ya meme ntukca lae! Seni, ya ntukca isa tae be. 39I setane ncung i, i n'gigamna nfacicoali fare setan cia npei denabe nkaci i gabe bukbukna ncapang mali hmona. Setan cia npeina nfakangela i fare nailow pa bo nfateam ina. 40Ya idor fagali to lali Apa Guru nim muritna bo rfaungo setan cia mali ya ntuk tae, ga si dafena pa.”
41Gabe Yesuse nu, “Susana gaole mew, smat ta oras taena fdela pa Ya nik kawasa fare fdele fsal! Mnuwo laisa hawe Ya nane iteteam farerer re mewna? Fare denabe mnuwo laisa Ya nane ifolfolo re mewna? Futi mali to wai cia!”
42Oras ta wai cia nfan lali Yesus i, setanca npesa i nap rakrakca gabe nkaci i. Ga Yesuse nmautingna nfacicoali lali setan cia bo ncapang mali wai cia, fare wai cia nmafia. Fola tina, Yesuse npo wai cia lali hma i. 43aFarumi smat ta si manana rdadi rherang dem Jou Lahatalla ni kawasa ta mamagal tina.
Yesuse nfabinga ta failuna, I osta nmat
(Mat. 17:22-23; Mrk. 9:30-32)
43bOras ta smatna rherang sube ningalena deme ndumi mujizat ta Yesus npei tina, Yesuse nua ni muritna, 44“Flonga fare ftarokira famafia ta Ya iku tane. Lomanta Smat ta mali sorogaica bo rpo i lali smatna.” 45Ga Yesuse ni muritna rtaif pa ahai ta I nuna. Jou Lahatalla npei paube bo si rtaif tinana, bo si rto paube ni ngalena. Sile ma damcait bo rfautno Yesusna, ahai ta I nu tina ni ngalena.
Yesuse ni muritna rfautan ise ta nmamagal mali farumi silina
(Mat. 18:1-5; Mrk. 9:33-37)
46Bahnga na, Yesuse ni muritna rfakotale ga ise ta osta ndadi smat ta nmamagal mali si farumina. 47Ga Yesuse nto wlorina, gabe I nyal wai nena isa taga nisingi mali lapona. 48Gabe, I nua si, “Ise ta nailow smat ta biasa be laisa wai nena tae ningalena smat cia ndela Ya, tina fatailo laisa re i nailow Ya. Fare ise ta nailow Ya, I ma nailow Jou Lahatalla ta ncula Ya. Ningalena ise nbasame ni dirica biasa be mali mewi tane, I cia to ta Jou Lahatalla nu i nmamagal.”
Smat ta rfakotale re it pana, tina ite rir del si
(Mrk. 9:38-40)
49Fola tina, Yohanese nua Yesus, “Guru, amame keme smat isa nfaungo setan npake Guru ngahnyomna. Ga amame ktolea i, ningalena i cia animam del i pa.”
50Ga Yesuse nua si, “Mati ftolea i na! Ningalena smat ta rfakotale re it pana, i cia ite rir del i.”
Yesuse smat Samariana dailow i pa
51Yesuse ni oras bo ndawil nais sorogaina nlafo i to, gabe I nu, nane nfan Yerusalem. 52I ncula smat diranca rfane rtuba. Si rfane rtuba lali pnu isa mali batang Samaria, bo rfasiap farumi ahai ta Yesuse nparluna. 53Ga smat ta mali pnu ciana dailow Yesus pa, ningalena si rto I bo nfan Yerusalem. 54Oras ta Yesuse ni murit silu Yakobus re Yohanes rlonga mauting ta smatna du tina, si duwa Yesus, “Jou, ta mafina ame kdor yap mali sorogai bo ktaping fayei smat tane!”
55Ga Yesuse nfulasi ga, natngalo smat silu tasa taga ntolea si ningalena si rmauting laina. 56Fola tina, si rfan lali pnu nesana.
Gabe bo tderera Yesus nane fatutua
(Mat. 8:19-22)
57Oras ta Yesus I re ni muritna si mali fan-fanca, en smat isa ta nua Yesus laitane, “Guru, ya bo iderera farerer re Guru manca be Guru bo mfanna.”
58Yesuse nua i npake andeande laitane, “Fun ailolona en gagaori bo damtuli. Laina bena re manina, en riri fafual. Ga Smate Ntu ta mali sorogai malica, ni gagaw pa bo nfafolfola Ina.”
59Fola tina Yesuse nua smat ta nesana hawe, “Mali bo mderera Ya.”
Ga smat cia ncanglo I, “Apa, mpo oras bo ya igaile hmakca su. Hola tina, taga ya ilafo iderera Apa.”
60Ga Yesuse nua i, “Smat ta rdela Ya pana, laisa re smat ta rmate tona. Gabe inanai to smat ta rdela pa tina duruse si riri pilingna tutuling. Ga aw, aw mfane bo mfabinga abar ta Jou Lahatalla kawasa ndadi Kolano mali smat ta rdelana riri tubca.”
61En smat isa hawe ta nu, “Apa, ya bo iderera Apa, ga mpo ya oras bo ikuwe ifabinga mali hmak re tenokna su. Hola tina taga ya ilafo iderera Apa.”
62Yesuse nua i, “Smat ta rbapacole ga jaga nningo be namul tao, i ni karajanna molang pa. Laina bena re smat ta dailow rdadi Jou Lahatalla ni smat ta I nkawasa ndadi Kolano, smat cia bisa panto nlolam okosesi ta nesana hawena.”
Currently Selected:
Lukas 9: BZQ
Highlight
Copy
Compare
Share
Want to have your highlights saved across all your devices? Sign up or sign in
2026 Indonesian Bible Society
