Lukas 17
17
Yesuse nfafcule bo tampunge smat ta rpei salna
(Mat. 18:6-7, 21-22; Mrk. 9:42)
1Yesuse nua ni murit-muritna laitane, “Osta en be okosesi ta npei smatna ndadi rcal denabe ndadi rdela pa hawe. Ga smat ta npei smate nesana rdadi lainana, smat cia ta osta nkangelana mamagal. 2Ta mafiana tpitan smat cia waoca re tcakto i pat mamagal pusa, taga ttopa i lalaw olatca, bo i nmat laina, mati i npei isa mali smat ta ndelana cicoal pawbe tane rdadi rbaradosana. 3Gabe tina, mew nane fpei famafia!
Laisa nimew del isa ta ndela Ya, ga npei sal mali mew i, mew nane fuwa i famafia, fare laisa i nana salna, mew nane fampung i. 4Fare laisa i npei sal lali mewina wol pusa lao faifit, gabe i nlololai nuna salna, mew nane fampung i.”
Yesuse nfafcule si bo rdela
5Gabe, Jou Yesuse ni susulana dua I laitane, “Guru, mbang cicoal mali wlomam tane, bo amam kdela be Aw!”
6Gabe Jou Yesuse nua si, “Laisa nimew ta fdela tina en, makse laisa re sesawi peo ta nenena leo, mew bisa fuwa ai ara tae, ‘Mdirak awe to lalaw olatca taga mtolma aw polaw tina!’ Osta ai cia ndirak i nderera aw nim parentana.”
Smat ta rderera Yesusna laisa re smat karajan ta nane nleleyane ni tuanca
7Yesuse nu hawe, “Ifatailo, laisa en smat karajan isa ta nkarajan mali beti, ma njaga ni tuanca ni domba, ga oras ta i nuwe lali ebai i, ni tuanca osta nua i, ‘Mali to, mtotolang mseli re ya mantane.’ 8Osta laina pa! I ni tuanca osta nua i laitane, ‘Mpei nak anna to. Hola tina aw mafian nim pakena, taga aw mleleyane ya denabe ya iseli re idome hola, taga aw mseli re mdom.’ 9Tuan cia enpa bo nu tarima kase lali i ni smat karajan ciana, ningalena tina i ni karajane to ta nane i npei. 10Laina bena re mew. Laisa mew fpei ndumi to karajan ta Jou Lahatalla npo mewna, mew nane fu laitane, ‘Amam tane smat karajan am ta nimam ngale pa. Amame kpei ahai ta amam nane kpeina.’ ”
Yesuse nfamafia smat yafasa ta rpado
11Oras ta Yesuse nfan lali bendar Yerusalemna, I ndelo sipat rakrak batang Samaria fare Galilea. 12Gabe oras ta Yesuse ncung mali pnu isana, en smat yafasa mana rpado rlafo rfaduduk re I. Si dosalna laspa okoce mali Yesus i. 13Fare si du re liorina mamagal, “Yesus, Guru, mmasie amam!”
14Nem si laitane, Yesuse nu, “Ffan lali imamna faeme nimew badanna lali sili.” Gabe si rfan, fare mali lalingca hapaluanna, si rdadi rmafia.
15Gabe smat isa mali sili tina, nem ina nmafia to, i nlolai gabe nfamamagal Jou Lahatalla re liona nfacicoali. 16Fare naftiba pupuo tasa nap Yesuse ficona re nu tarima kase lali Yesus i. Smat cia smat Samaria i.
17Gabe Yesuse nu, “En smat yafasa ta Ya ifamafia si nanaina. Taga isiwe tasa si manca? 18Pesa si rlolai bo rfamamagal Jou Lahatalla pana, gabe smat isa tae be ta nlolai mali nfamamagal Jou Lahatallaca? Taga, smat tae ma smate nesa i, agama Yahudi i pa!” 19Gabe Yesuse nua smat cia, “Mosal, fare mfane to. Aw mmafia to, ningalena aw mdela Ya.”
Yesuse nlafo paubena smat ta rdelana nane si rciape to
(Mat. 24:23-28, 37-41)
20Bahnga na, en smat Yahudi sifis ta rderera fatfato Farisina, si rfautno Yesus, “Oras ahai Jou Lahatalla bo nkawasa ndadi kolano mali dunia taena?”
Gabe Yesuse nua si, “Oras ta Jou Lahatalla nkawasa ndadi kolano mali ni smatnana, ni fafayale ntuba pa denabe smatna rdadi rtona. 21Gabe tina, smatna mati duna, ‘Co fem, I mantane,’ pare ‘I puli tina!’ Ningalena tane Jou Lahatalla nkawasa ndadi Kolano to mali hapaluwno mewna.”
22Fola tina, Yesuse nua ni murit-muritna, “Osta en ni orasna mew flokolo bo fem Smat ta mali sorogaica, makse wol pusa be, ga mew osta fduke femi pa. 23Fare smatna osta duwa mew, ‘Co fem, I puli tina,’ pare ‘I mantane!’ Ga mdel pa mew ffan lali tina, mdel pa fderera si. 24Ningalena oras Smat ta mali sorogaica bo nlafo hawena, farumi smat ta mali dunia taena bisa dem. Tina laisa re lemlemca namce i mali langitca cicapo ta pusa denabe lali cicapo ta nesana. 25Ga Smat ta mali sorogaica nane nduk kangelana lal su, fare smat ta rtub mali oras taena dailow I pa, taga I nlafo hawe.
26Gabe lomanta, oras I bo nlafo hawe, smatna riri tubna osta laisa re oras nabi Nuh ta ntuba. 27Oras cia, si rdela pa ipis mamagalca bo nlafona, gabe si riri tubca laisa biasa, si rceli fare rdom, re si rfafasawo. Si riri tubca laina be denabe oras nabi Nuh ncung namul kapal mamagalca. Gabe ipis mamagal cia nlafo fare nfamat si ndumi.
28Laina bena ta ndadi i re smat ta rtub mali oras Lotna: si rciap pa, rtubna laisa biasa: si rceli fare rdom, si rfagon fare rfawage, si rfatiwa re rpei ebai. 29Ga oras ta Lote ncapang mali pnu Sodomna, yap re luluwana nduri mali langitca laisa re ulanna gabe ntaping nfamat si ndumi.
30Makse laina ma, smatna osta rciap pa oras Smat ta mali sorogaica nlafona. 31Gabe mali wol ciana, smat ta en puis ebai popona, mati rduri bo jal okosesi ta pumul ebai lolonana. Laina bena re smat ta en mali betina, mati rlolai hawe lali ebai ina. Fatoal ffarera to! 32Flolam ahai tantuba ndadi i mali Lote ni ngolota ina. I nmat ningalena i nlolam sube ni arata mali dunia ina oras ta rfarera mali Sodomna!
33Ise ta ntub bo i ni dirica be, i cia osta nmat nfarerer re Jou Lahatalla pa. Ga ise ta npo i ni tubca ningalena nderera Jou Yesus, i cia osta ntub re Jou Lahatalla denabe lali. 34Ya ikuwa mew: Oras Smat ta mali sorogaica nlafo hawena, osta en doram cia smat silu damtuli puis bale isa, ta isaca Jou Lahatalla bo nut i, fare ta isaca bo nfateam i. 35Gabe oras cia bena, laisa en maping silu rtok gandum, ta isaca Jou Lahatalla bo nut i, fare ta isaca bo nfateam i. 36Gabe laisa oras cia en smat silu rkarajan mali beti, ta isaica Jou Lahatalla bo nuti, ta isaca bo nfateam i.”
37Rlonga tina, Yesuse ni murit-muritna rfautan, “Guru, manca tina bo ndadi ina?”
Yesuse ncanglo si, “Andeande laisa aiwani isa nmat mali gagaw isa, farumi smatna osta rto ningalena, osta manina rfayalo si dan aiwani ta nmat cia mana.”
Currently Selected:
Lukas 17: BZQ
Highlight
Copy
Compare
Share
Want to have your highlights saved across all your devices? Sign up or sign in
2026 Indonesian Bible Society
