Lukas 18
18
Andeande Hakim isa re maping balo isa
1Fola tina, Yesuse nu andeande isa lali ni murit-muritna bo si rcombayang turus lali Jou Lahatalla i re mati damgaina bo rdor I n'gali si. 2Yesuse nu laitane, “Mali pnu isa, en hakim isa, ta namcait Jou Lahatalla pa, fare i naraga smat pa. 3Mali pnu ciana, en bena balo isa ta jaga nlafo lali hakim cia gabe nu, ‘Apa hakim, mgali ya lae! Mpei ikamolang mali smat ta rlokolo ya pana uhngori.’ 4Ga hakim cia nailow pa ta balo cia nuna, mnu laitane hakim cia nu pumul wlona laitane, ‘Makse ya ikamcait Jou Lahatalla pa fare ikaraga ise pa,’ 5ga ningalena balo tae nfabiba ya be, mafiana ya ifapepeya to i ni hal tina re ifaolang i, bo mati nlafo mali fare npei ya ikangelana to.”
6Gabe Jou Yesuse nu, “Ftarokira famafia ahai ta hakim ta namolang pa cia npeina! Tina ndadi sogaro mali mewi. 7Laisa smat ta namolang paca bo n'gali balo cia, foloi-foloi hawe Jou Lahatalla osta n'gali I ni smat ta I nfisang sina, ta dorame re wol rdor lali I ina. Osta bisa pa I ncuwa orasna bo n'gali sina. 8Ya ikuwa mew, fatutua re fatowal be I bo npei nfaolang sina. Ga lomane oras Smat ta mali sorogaica nlafo hawe, osta nduk sube pare enpanto smat ta rdela mali dunia taena?”
Andeande smat ta ntingkai re smat ta nbasam ni dirica ni ngale pa
9Yesuse nafetang andeande isa lali smat ta du si riri dirica damolang re ta daraga pa smate nesana. Yesuse nu, 10“En smat silu rfan lali Ebai Sombayang Mamagalca bo rcombayang. Smat ta isa i cia smat ta rderera fatfato Farisina, fare ta isa cia smat ta nfafayalo pajak. 11Smat ta nderera fatfato Farisina cia nosal ntutuling gabe i ncombayang laitane, ‘Jou Lahatalla, ya iku tarima kase, ningalena ya smat ta isal pa laisa re smate nesana pa. Ya tane laisa smat ta rlokolo rlalim smat nesa rari okosesina pa, ya laisa smat ta damolang pana pa, ya laisa smat ta jaga rlokolo smate ni ngolona pa, re ya laisa re smat ta nfayalo pajak tae pa. 12Ya minggu bahnga i puasa wol pilu, re ya jaga ipo persen yafasa mali farumi ta ya i duk mali nik karajannana.’
13Ga smat ta nfayalo pajak cia, i nosalna laspa. I namcait nbo nais langitcana, gabe i nsafsaf be ulaca ningalena nmanyasal, gabe nu, ‘Jou Lahatalla, mmasie ya lae, ya tane smat ta ibaradosa.’
14Gabe tane Ya bo ikuwa mew: smat ta nfayalo pajak cia nuwe lali ni ebai i, ga Jou Lahatalla npe i ndadi smat ta ncal pa mali Jou Lahatalla uhngona, ga smat ta nderera fatfato Farisina cia, enpa. Ningalena, ise be ta nu i namolang, Jou Lahatalla bo npei i ndadi smat ta ni ngale paisa pa. Ga ise ta npei ni tubca ni ngale paisa pa mali Jou Lahatalla uhngo, Jou Lahatalla bo npei i ndadi smat ta ni ngale.”
Yesuse nbarakati wai nenenana
(Mat. 19:13-15; Mrk. 10:13-16)
15Bahnga na, en smatna rlafo dute nturi ta nenena lali Yesus i. Si dut wai tina lali Yesus i bo I ncombayang fare nbarakati si. Dem tina Yesuse ni murit-muritna rtolea smat tina. 16Ga Yesuse nololaw wawai tina taga nua I ni murit-muritna, “Fabiar si to wawai nena tina rlafo mali Ya i, ningalena smat ta rtingkai pa re ta fatoal be rdela laisa wawai nenena tane, si tina ta rpo riri tubca lali Jou Lahatalla i, bo I nkawasa ndadi Kolano mali si riri tubca. 17Flolam famafia ta Ya ikuwa mew tane: ise ta nyal Jou Lahatalla pa laisa re wai ta rtingkai pa tane, i osta ndadi Jou Lahatalla ni smati pa ta I nkawasa ndadi Kolano mali i ni tubca.”
Smat kayangna ncusa i bo rdadi Jou Lahatalla ni smatna
(Mat. 19:16-30; Mrk. 10:17-31)
18En smat isa nfaboboko Agama Yahudina, i nfautno Yesus, “Guru ta mafiana, ya nane ipei ahai bo ya iduk tub re Jou Lahatalla denabe lali-lalina?”
19Yesuse nua i, “Smat isa pa ta nmafiana, langisa Jou Lahatalla be. Pesa ga aw mu Ya imafiana? 20Aw fatutua mto to, Jou Lahatalla ni parentana: Mati mlokolo smate ni uat re smate ni ngolona, mati mpun smatna, mati mlois smatna rari okosesina, mati mu okosesi ta molang panana, fare aw nane maraga hma re hnyemna.”
21Ga smat cia nu: “Farumi parenta tina ya ipei ndumi to mulain mali ta po ya subena.”
22Nlonga tina, Yesuse nu, “Ga motle pusa sube ta aw mpei pawbena. Mwage farumi aw nim aratana, taga mlowto tiwi tina lali smat ta rcusana. Laisa aw mpei laina, aw osta mduk arata mali sorogai. Hola tina, mali to bo mderera Ya.” 23Smatca nlonga Yesuse nu laina, i wlona ncusa, ningalena i nkayangna gawle.
24Yesuse natngalo i gabe nto i wlona ncusana. Fare Yesuse nu laitane, “Ncusaina gawle smat kayangca npo ni tubca bo Jou Lahatalla nkawasa ndadi Kolano mali ni tubcana. 25Gampang sube unta isa ncung ndelo paplakica mtana, ga bo smat kayangca npo ni dirica bo Jou Lahatalla nkawasa ndadi Kolano mali i ni tubcana.”
26Fare smat ta rlonga Yesuse nu lainana, si rfautno Yesus, “Gabe laina, ise ta nduk salamatca?”
27Yesuse ncanglo, “Ahai ta smatna bisa rpei pana, Jou Lahatalla bisa npei. Gabe Jou Lahatalla be ta bisa nfasalamat smatca.”
28Gabe Petruse nu, “Amam tane kfateame ndumi to ta animamna gabe kderera Aw to Guru.”
29Yesuse ncanglo, “Flolam famafia ta Ya ikuwa mew tane, smat isa ta npo ni tubca bo Jou Lahatalla nkawasa ndadi Kolano mali i ni tubca, denabe i nfateam i ni ebai, ni ngolota, teno re ramana, hma re hyena re ntuna, 30smat cia osta nduk mali dunia tae foloi hawe mali ahai ta i nfateam tina. Fare i osta nduk tub re Jou Lahatalla denabe lali-lali.”
Yesuse nfabinga ta faicolna I osta nmat
(Mat. 20:17-19; Mrk. 10:32-34)
31Yesuse nfayalo ni murit yafasa re silu tasa, fare nua si, “Flonga e! Tane ite bo tfan lali bendar Yerusalem. Puli tina, farumi nabi-nabi ta rlefoe ntuba to bo Smat ta mali sorogai cia bo ndadi i. 32Smate Ntu ta mali sorogai malica osta rpo i lali smat Romana. Smat tina rfamaimai I, re bo ditfo I. 33Si bo rpun I re wala ta tubona mdalim, taga si rpun famat I. Ga mali wol pitol, I osta npaling hawe.”
34Makse Yesuse nu laina, I ni murit-muritna rwafo pa ni ngalena, ningalena ni ngale ta Yesuse nu ta nanai tina n'gogan sube, gabe si rto pa ahai ta I nuna.
Yesuse nfamafia smat ta nbiafca
(Mat. 20:29-34; Mrk. 10:46-52)
35Oras ta Yesuse bo nlaho mali pnu Yerikho, en smat isa ta nbiaf ntotolang ndor-dor mali lalingca lapo. 36Smat ta nbiaf cia nlonga smat ta lalna rdel mana, gabe i nfautan: “En ahai tina?”
37Gabe si rfabinga i, “Yesus, smat Nasaret cia en del mantane.”
38Gabe smat ta nbiaf cia n'gigam, “Yesus Kolano Daut ntu re hbu, mmasie ya lae!”
39Smat ta rtuba potao mali Yesuse uhngona, si rtolea smat ta nbiaf cia bo nfatengtengan i. Ga smat ta nbiaf cia n'gigam facicoal i hawe “Apa, kolano Daud ntu re hbu, mmasie ya lae!”
40Gabe Yesuse nfola, fare ncula dut smat ta nbiaf cia mali. Laina smat ta nbiaf cia dut i mali, Yesuse nfautno i, 41“Aw malouna Ya ipei ahai mali aw ina?”
Smat ta nbiaf cia ncanglo, “Apa, ya idor bo bisa ikem!”
42Gabe Yesuse nua i, “Mmafia to aw ya! Aw bisa meme to ningalena aw mdela Ya.” 43Fare tina to, smat ta nbiaf cia bisa nem, gabe i nderera Yesus re nfamamagal Jou Lahatalla. Smat lalo ta dem tina, farumi si rfa-famamagal Jou Lahatalla.
Currently Selected:
Lukas 18: BZQ
Highlight
Copy
Compare
Share
Want to have your highlights saved across all your devices? Sign up or sign in
2026 Indonesian Bible Society
