1 Korin 13
13
Nono deno muduno te ikne ikne edinamga paugwa
1Ana nono mabuno ta eramga podo kaima paugwa i, nono deno muduno ikne ikne tenamga paugwa. Yoba ta ere mogl, yoba kano pere pere pamere i didre, angelo ka dimere ta dinan, dinabuka ba ye yoba ta dem muduo tekran, ye ka siragl mere dugwa i, kogonmo wakai ta paikrukwa. Yoba belo si yar edigo, kogonmo wakai ta paikrumere yegl, ye ka dugwa i, di yar edugwa mere yegl paugwa. 2Mo, Mudu Murubuglo yoba ta God kamo kep ere dinabedi tenan, ye nomane podo idre, mem tau atne kaima paigwa i pre pogl sidre, kuno ere di meda edenabuka ba ye yoba ta dem muduo tekran, ye u yoko pidre, yoba yoko kaima morabuka. Kuno yegl mere yoba ta God yobuglomo gigledi pre medigl, God ye muglo meglbi ta i pi bage ta edenabedi kamage eran, God ye dumere ere tenabuka ba ye yoba pere ta dem muduo tekran, ye ama u yoko pidre, yoba yoko kaima morabuka. 3Te, yoba ta ere mogl, yoba goduglme meglkwa i ake ple di tenagledi mige moni ya bonaganamo mudu tenabo mo ye God kogonmo erukwa i pre yoba ye si gagl tege eramnedi eribi, ye kudugl goglkre, God kogonmo ere pai morabuka ba ye dem muduo yoba ta tekran, ye kogon podo erumara i, taragl wakai swara to ikrabuka.
4Nono deno muduno ikne ikne tenamga pame diga i, ene prio! Nono yoba ta deno muduno tomun, nono tabre deno kubro tekre, ye ere wakai ere tenamga. Ama taragl wakai ta yoba i morabara plau dinan, nono ama kide pre tekre, wakai pramga. Te, nono yoba deno muduno tomun, no nono keme wakai muniwedi prikre, kagno ake mitna edekramga. 5Yegl ersre, te nono ama yoba i mabuno kide ere tekramga. Te, no nono keme wakai moramnedi prikre, yoba i ama wakai moraiglmedi pramga. Te, yoba deno muduno tomun, ye nono ere kide ere noraiglkwa ba nono deno kubro tekre, ere kide ere noraiglkwa i ta pre moglkramga. 6Te, nono yoba deno muduno tomun, ye mabuno kide eribi, nono gun yeikre, mabuno kaima pamere eraiglkwa i keme gun yenamga. 7Nono yoba deno muduno tomga yoba i ta yubun noribi, nono yage sikre, deno muduno te pai moramga. Yegl ersre, te, God ye nono agroma abaroma i nomano mina kogon erabedi pre pai moglsre, nomane wakai inaiglmedi sugl mogl, agroma abaroma i ta kide kodokramga.
8Nono yoba deno muduno tenamga mabuno i swara ta dudukrabuka. Aimadi kamin pai morabuka pre podo paugwa. Mudu Murubuglo erme nono nomane ya yobuglo noruko, nono kogon siragl mere erumga i, ege sugunagle keme erumun, dudunabuka pre nono kogon siragl mere erumga i, pre mitna edekramga. Mudu Murubuglo yoba tau God kamo mudu pre pogl sinaiglmedi nomane togwa mo yoba God kamo kep ere dinaiglmedi togwa mo yoba kano pere pere dinaiglmedi togwa i mudu ege sugunagle keme eribi, dudunabuka ba yoba deno muduno tenamga mabuno i aimadi kamin pai morabuka pre deno muduno tenamga i podo paugwa.
9Nono erme taragl tau pre pogl sumga ba tau mudu pre pogl sikrumga. Te, God kamo ikne kep ere dumga ba mudu ta kep ere dikrumga. 10Yegl paugwa ba okuo, taragl mudu u wakai kaima enabuka igne i ka ikne keme pre pogl sumga i, dudunabuka. 11Na gak kebra moglka igne, na nomana gak kebra nomano pamere paugo, ka diga ama gak kebra dimere i diga. Ba na yake ede pi yagl moglka igne, na gak kebra mabunono i kide kodiga. Kuno yegl mere, nono erme gak kebra mere yegl munga i, okuo kide kodidre, God mabunomo mudu pre pogl sinamga. 12Nono erme God mabunomo mudu pre pogl sinamnedi eramga ba kuno erekrabuka. Yoba ta ere mogl, glas ta mim dagl erukwa ake moglsre, yene guma dra kanagledi erukwa kuno erekrumere mere yegl, nono erme God mabunomo mudu ta pre pogl sinamnedi eramga kuno erekrabuka. Yegl paugwa ba okuo yoba gumano drano ikne ikne kan pogl simere yegl, God mabunomo mudu nogugl panan, pre pogl sinamga. Erme ikne keme pre pogl sinamga ba God erme nono kan pogl sumere yegl, nono okuo ama ye mabunomo pre pogl kaima sinamga.
13Na ka tau diga i, nono okuo siragl mere moramga pre diga ba nono erme makandigle munga i, mabuno suota eramga podo paugwa. Nono God kamo pre medigl moglsre, okuo ye bogl akie wakai kaima moramga i ama pre gi di moglsre, te agroma abaroma deno muduno tenamga. Mabuno suota i mudu podo paugwa ba swara ta podo kaima paugwa i, agroma abaroma deno muduno tenamga paugwa.
Currently Selected:
1 Korin 13: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission