1 Korin 14
14
Yoba God kamo kep ere dinaiglkwa wakai kaima paugwa
1Ene deno muduno ikne ikne tenaiglkwa mabuno sika sio. Te God Murubuglomo kogon ake ple di norabuka mabuno tau noro do. Ba mabuno mudu i, ene God kamo kep ere yoba di tenaiglkwa mabuno komono noro do. 2Yoba ka pere mina digwa i, ye God swara kamage ere teigwa. Yoba ta pre di tekrikwa. God Murubuglo ye yobuglo togo, ye God mabunomo tau okna teke paugwa i drano mina di meda edigwa ba ye yoba pere kano mina digwa pre yoba pre moraiglkwa i ta pre pogl sikraiglkwa. 3Yegl paugwa ba yoba ta yene kano mina God kamo kep ere yoba di teigwa i, ye yoba kiano mina yakidre, yobuglo idre, deno muduno wida di inaiglmedi ka di teigwa pre wakai kaima paugwa. 4Yoba ta ka pere digwa i, yene yakinaiglkwa kuno erukwa ba yoba ta God kamo kep ere digwa i, ye God yobama mudu yakenaiglmedi erikwa pre wakai paugwa.
5Ene mudu ere mogl, yoba kano pere pere pamere i dibi, na tau wakai dagl praglka ba ene mudu God kamo kep ere yoba di tebi, i wakai kaima praglka. Yoba ta God kamo kep ere dugwa kogon i, podo pai, yoba ka pere ta mina dugwa kogon i egre togwa pre diga. Ba yoba ka pere ta mina dinan, yoba pere ta ere mogl, ye ka dugwa i yake tenan, God yobama mudu prisre, yakinaiglkwa pre i tau wakai panabuka.
6Agrama abarama wagle, na ene meglmara udre, yoba pere ta kano mina dibo, ene ta ake ple di tekraglka. Ba ka tau God obuno di narukwa i ene di tenaglka i mo ene nomane inaiglmedi ka ta di tebo, mabuno i mina na ene ake ple di tenaglka. Te, na God kamo kep ere ene di tedre, ene pre pogl sinaiglmedi beke tebo, mabuno i mina na ene ake ple di tenaglka. 7Taragl tau kor moglkrikwa ba yoba ogono mina bekigo, be digwa i, nono ama poglo di prisre, nomane inamga paugwa. Gita mo pu mige i, yoba wakai ta sikribi, be dinan, pramga ba nugu ebrie i ta pre pogl sikramga. 8Mo, biugel sugwa yoba ere mogl, soldia ede kuda wagle enaiglmedi biugel wakai ta sikran, soldia pre pogl sikre, ede kuda wagle pikraiglkwa. 9Kuno yegl mere, enene kano mina God kamo nogugl dibi, yoba pre pogl sinaiglkwa ba ka pere ta mina dibi, ye ta pre pogl sikraiglkwa pre ene di yar edigwa mere yegl panabuka.
10Yoba uglo kogl koglo meglkwa i, ye kano mere kide, pere pere paigwa ba yene kano pamere i, yene pre pogl sigwa. 11Yene pre pogl sigwa ba na yoba ka pere ta dinaiglkwa i prisre, pre pogl sikribo, yoba i dumo bage ta nem meglmedi kanaglka. Te, na ka dibo, yoba ta pre pogl sikribi, ye na ama yegl na kanaiglkwa. Kuno yegl mere ene ka pere ta dibi, yoba praiglkwa ba nomane ta ikraiglkwa. 12Yegl pre ene ere mogl, God ye yobuglo ya nomane noran, kogonmo kane kane eramnedi prikwa i, wakai paugwa ba ene ye kogonmo siragl mere eribi, God yobama mudu yakinaiglkwa i keme eramnedi prio!
13Ana mabuno yegl paugwa pre God ene yoba pere kano mina dinatnedi tenan, ene ama God nomane naran, ka i yake tenagledi kamage ero. 14I siragl pre na ka pere mina kamage eribo, na kiana mina kamage eraglka ba nomana mina ka siragl mere diga i pre pogl sikraglka. 15Yegl pre na prika, nana kana mina kamage eribo, na kiana mina ya nomana mina akie pre pogl sidre, kamage eraglka pre wakai panabuka. Te, giglage dinaglka ama yegl, na kiana mina ya nomana mina akie pre pogl sidre, giglage dinaglka.
16Ene ka pere ta mina God kagie kade ten, yoba ta pre morabuka i ta pre pogl sikrabuka. Yegl pre ye kamage eratnga i prisre, Kaima we dinabuka i ta kuno erekrabuka. Pre pogl sikrukwa pre yegl ta dikrabuka. 17Ene ka pere mina God di wakai yei tenga i, wakai etnga ba yoba ta pre moglsre, pre pogl sikrukwa i, ye nomane wakai idre, ta yakekrabuka.
18Ene tau meglkwa i, ege tau yoba pere kano mina di kanigwa ba na ege mere diga pre na God di wakai yei teiga. God Murubuglo na yegl dinatnedi narukwa i, wakai paugwa 19ba na prika, God yobama makai sinamnara i, na yoba God kamo beke tenaglka i yene kano mina ka nogugl dinaglka i swara wakai kaima panabuka. Na tok ples pere ta mina, ka olto kaima di pai moraglka i, yoba ta ake ple di tekrabuka ba na yoba yene kano mina ka sugunagle kaima dinaglka mo olto dinaglka i, ye ake ple di tenaglka pre wakai prika.
20Agrama abarama wagle, ene gak kebra nomano pamere paugwa i kide kodio! Ene yoba nomane pamere yegl panan, wakai panabuka. Ba mabuno swara ta pre ene gak kebra mere meglbi, wakai panabuka i, gak kebra mabuno kide pre pogl sikrimere mere yegl ene ama mabuno kide pre pogl sikribi, nomano mina paikran, wakai panabuka ba mabuno tau mina ene gak kebra mere moglkre, yoba mere mogl, nomane inaiglkwa paugwa pre diga.
21Ana God kamo mina okna ibo yegl beglkwa,
Yagl Kade yegl dugwa, yoba dumo pere nem meglkwa i,
ye u na yobanama Israel yoba meglmara kuda bogl tedre, yene kano i mina ka dibi,
Israel yoba prisre, nono aglau erumga pre God no ake ple di norokre, no ka tomedi nomane yegl inaiglkwa paugwa
Ba ye yoba i ka dibi prisre, nomane yegl ta ikraiglmiwe#14.21 Aisaia 28.11-12
di, Yagl Kade yegl dumiwe di, yegl beglkwa.
22Yegl pre nono kogon suo pre dumga i, yoba tok ples pere pere mina digwa ya God kamo kep ere digwa i pre pogl sinamga. God nono yoba tau ka pere pere dinaiglmedi yobuglo norukwa i, nono pre medunga yoba munga i kandre, nomane wakai inamga i pre ta norokrukwa ba yoba pre mediglkrikwa i kimagl mere yegl kandre, nono God kamo dinamga i, kaima dimedi praiglkwa pre norukwa. Ba kogon ta i, God nono tau kogon norsre, ka kep yoba moglsre, no nono kano mina ye kamo kep ere dinaiglmedi norukwa i, yoba ta pre mediglkrikwa i praiglkwa pre kogon i norokrukwa ba nono ye kamo kep ere dumun, pre mediglkwa yoba prisre, nomane inaiglkwa pre kogon i norukwa.
23Ana mem yegl paugwa ba ene God yobama mudu makai sinaiglmara i, ene mudu ka pere pere keme dibi, yoba pre mediglkrikwa ta moraiglkwa i mo pre pogl sikrikwa ta ede suna u kanibi, ene du erimedi kanaiglkwa. 24Yegl kanaiglkwa ba ene mudu enene kano mina God kamo kep ere dibi, yoba ta pre mediglkrikwa mo pre pogl sikrikwa ta ede suna wibi, ye God kamo pre, nomane kor idre, Kaima tadaglme erumga pre God ka tage norabuka pamiwe di praiglkwa. 25Yegl prisre, te ye tadaglme nomano mina atne erikwa i, God ye ka praiglmara i mina i nogugl edenan, ye yage goglkono boduglsre, God kagie kade te, God ene meglmara kaima moglmiwe di, yegl dinaiglkwa.
Korin yoba siragl mere makai sibi, wakai panabuka pre dugwa
26Agrama abarama wagle, na ene ka di te moglka i, yegl pre diga, ene makai sinaiglkwa igne, ene mabuno siragl mere eribi, God yobama yobuglno idre, yakinaiglkwa i keme eraiglkwa pre diga. Ene makai sinaiglkwa igne, yoba ta ere mogl, giglage ta dinan, ta God kamo yoba beke tenan, ta ama God ka yegl ta di narumedi, kep ere dinabuka. Te, yoba ta ere mogl, ka pere ta mina dinan, yoba ta prisre, yake tenan, yoba mudu yobuglo idre, yakinaiglkwa pre diga. 27Yoba tau mere ka pere pere mina ta dibi, i wakai ta paikrabuka. Yoba suo mo suota keme dibi, kuno erabuka. Na diga i, swara ta di kodinan, ta ama okuo dinabuka i pre diga. Te, yoba ta ama mogl, ka i pre, yake tenabuka paugwa. 28Yoba ta prisre, yake tenabuka i ta moglkran, yoba ta ene makai sinaiglmara i ka pere ta mina dikrabuka paugwa. Ye yene swara mogl, ka pere ta mina God kamage ere tenagledi pran, erabuka ba ene makai sinaiglmara i dikrabuka pre diga.
29Ana yoba God kamo yene kano mina kep ere dinaiglkwa i ama kuno yegl, suo mo suota keme dibi, wakai panabuka. Ye God kamo kep ere dibi, yoba tau pre moraiglkwa i wakai ere kinano gudu pre, pre yubu sinaiglkwa. 30Yegl eraiglkwa ba yoba ta ame di mogl, ka pre morabara i, God ye kamo ta kep ere dinabedi di tenan, yoba ta adigl mogl, ka dugwa i, di kodidre, yoba i agai tenan, dinabuka paugwa. 31Ka kep yoba yegl ere, swara swarade dibi, wakai panabuka. Ye ene mudu deno muduno si gigle di tebi, ene mudu ka beke inaiglkwa pre wakai panabuka. 32Ka kep yoba meglkwa i, ta di kodidre, ta agai tenan, ta dinabuka i, kuno erukwa. I siragl pre God Murubuglo ye ka dinaiglmedi di tenabuka ba ye yene drano sugl moglsre, ege ta dinaiglkwa panabara i keme dinaiglkwa paugwa. 33I siragl pre God moglkwa i, ye nono ye kogonmo gua gua eraiglmedi prikrukwa ba kiede mogl, ake wakai ere eraiglmedi prukwa.
Ana God yobama bage bage makai sidre, erimere yegl, ene ama yegl eraiglkwa paugwa. 34Ene makai sidre, God kamo praiglmara i, abu ka dikre, kiede moraiglkwa. God lomo okna dumere yegl, ye ka dikre, mogl atne edenaiglkwa paugwa. 35Abu ta kira pogl prisre, ka beke inagledi pran, ye ene makai sidre, ka pre moraiglmara suna i ta ka dinan, kuno erekrabuka. Ye yene wie bogl yugugl miur, di prabuka kuno erukwa.
36God kamo ene meglmara mabuno boglsre, pare ede meda pikrukwa. Nana God kamo yu ene di teiga pre ene siragl mere makai sinaiglkwa pre na ka di teiga i, ene praiglkwa paugwa. Te, ene Korin yoba keme God kamo i prikrikwa ba yoba bage bage meglkwa i ama prikwa pre ene mogl pere edumnedi prikrio. 37Ene tau ka kep yoba munedi praiglkwa mo Mudu Murubuglo yobuglo noruko, no ye kogonmo eunedi pribi, ene na ka bogl atne ede teiga i kandre, Pol ye no Yaglno Kade di norumere kuno ere dumedi praiglkwa. 38Na ka diga i, yoba ta mane dinan, ene yoba i God kamo kep yoba ta moglkrumedi kanio. Ye God kamo kep yoba moglkre, yoba yoko moglkwa.
39Ana agrama abarama wagle, na di kodiga, ene God kamo kep ere dinaiglkwa i wakai kaima panabuka pre ene kogon i eramnedi prio. Ba yoba ta ka pere ta mina dinabuka i ama mane dikre, kanige erio. 40Ene kanige eraiglkwa ba na dimere yegl, ene yoba gua gua adigl mogl, ka dinaiglmedi kanige erekraiglkwa. Ene di tebi, ye kiede mogl, wakai ere dinaiglkwa.
Currently Selected:
1 Korin 14: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission