1 Korin 15
15
Jisas adigl u kor ogwa pre dugwa
1Na agrama abarama wagle, okna na Jisas kamo wakai yu ene di teigo, prikwa i, ene kor di tebo, poglo di praiglmedi prika. Na ka i yu ene di teigo, ene na kaima dumedi pre, ka i pre mediglkwa. Te, ene erme ama Jisas kamo swara i pre medigl pai meglkwa. 2Ka i ene ake gi di pai meglbi, ka i ene ake ple di tenabuka. Ba ka i kaima ta paikran, i ama ene ake ple di tekrabuka.
3I siragl pre ka ta ede okna kaima ogwa God di naruko, ene beke teiga i yegl mere paugwa. God kamo beglkwa pamere mere Krais nono tadaglmeno pre goglko, 4ye ogo nagie maugl yeigo, ege suota ede ogo, ye adigl u kor ogwa. I God kamo beglkwa pamere mudu plau dugwa. 5Krais adigl u kor pidre, Pita moglmara plau didre, te okuo ye dedugwa yagl 12-pela mudu meglmara ama plau dugo, ye kanigwa. 6Ye kanigo, te okuo Jisas ye duglo beglkwa yoba 500 mogl ede mitna eigwa i, ege swara ta meglmara plau dugo, kanigwa. Yoba i, swarade erme geglkwa ba tau mere kide yoko mogl pai meglkwa. 7Te, okuo Jisas ama ye agigle ta Jems moglmara plau didre, ye dedugwa yoba mudu meglmara ama plau dugo, ye mudu kanigwa.
8Ana Jisas ye yoba mudu i meglmara plau didre, na yoba kide moglka i, moglmara okuo kaima plau dugo, na kaniga. Gak ta mam dane mina gogl, ede meda umere yegl, na yegl mere kide kaima moglka ba Jisas na moglmara ama plau dugwa. 9Na kide kaima mole diga i, yegl pre diga, na okna God yobama yubun kane kane tedre, ere siga pre na Jisas dedugwa yoba ta moraglka i, kuno kaima ta erekrika. Ye dedugwa yoba tau kagno paugwa ba na moglka i, yoba kide kaima ta mogl, yoba yoko ta moglka. 10Na yegl moglka ba God na yoko kaima ere wakai ere narsre, na Jisas dedugwa yoba ta moratnedi kogon narukwa. Ye kogon yegl naruko, erika i, u yoko pikrukwa. Jisas dedugwa yoba tau meglkwa i, kogon podo erikwa ba God na kogon naruko, na kogon podo kide kaima erika pre diga. Na diga i, na nana yobuglna mina kogon podo erika pre dikrika ba God yene na moglmara yoko kaima ere wakai ere nare moglko, na kogon podo ere moglka i pre diga. 11Ba na kogon erika mo ye kogon erikwa i, Jisas kamo swara i keme di wan munga. Te, no ka swara i keme okna di wan mungo, ene prisre, ka swara i pre mediglkwa.
12Ana no okna Krais kamo yu ene di tomga i, no ene di te, Krais goglsre, adigl u kor omiwe dumga. Yegl di tomgo, prikrawa. Yegl pre siragl eruko, ene tau, Yoba goglsre, adigl u kor ta pikraiglmiwe dime? 13Yoba ta adigl u kor pikraiglkwa panan, Krais ama adigl u kor ta pikrume dinamga paugwa. 14Te, Krais adigl u kor ta pikruma, no ye kamo ene di tomga i, ka kaima ta dikungo. Te, ene pre mediglkwa i, u yoko kaima ogwa. 15No God kamo ene di tomga i, no ene di te, Krais goglko, God ye ere i kor edugo, adigl u kor ome dumga. Ba yoba ta goglsre, adigl u kor pikraiglkwa pama, Krais ama adigl u kor pikrukwa mere yegl paugwa pre no ene ka di tomga i, ene ka kibi di tomga mere yegl panabuka. 16I siragl pre yoba geglkwa i, adigl u kor pikraiglkwa panan, Krais ama goglkwa pre ye adigl u kor pikrume dinamga.
17Ene prio! Krais goglsre, adigl u kor omara i mina nono prumga, ye nono tadaglmeno kumapmo i te kodugo, dudumedi prumga. Ba ye goglsre, adigl u kor ta pikruma, ene tadaglmeno kumapmo i, ye ta tekruko. Tadaglme kumapmo i ye ta tekruma, ene pre mediglkwa i, ama mem wakai ta paikruko. 18Te, Krais adigl u kor ta pikruma, yoba ta Krais pre mediglsre, geglkwa i, tadaglme kumapno pai moglkwa pre doga deimiwe di pramga. 19Yoba geglkwa adigl u kor pikraiglkwa mere yegl ta panan, nono Krais bogl akie okuo wakai kaima moramnedi pre gi dumga i ama ta kuno erekrabuka. Nono erme makandigle keme mogl goglsre, okuo adigl u kor pikramga panan, nono okuo wakai moramnedi pre gi dumga i, u taragl yoko enabuka mere paugwa pre yoba ere mogl, nono Jisas pre medunga yoba munga i swara mitno podo gogl noraiglkwa paugwa.
20Ana na diga i, ene tau yoba geglkwa i ta adigl u kor pikraiglmedi prikwa i pre diga ba mabuno yegl ta paikrukwa. Krais ye ka kaima goglsre, koragle adigl u kor ogwa pre nono ama goglsre, okuo adigl u kor enamga paugwa. 21Yagl Adam swara tadaglme ersre, geglkwa mabuno i nogugl edumere mere yegl, Krais swara nono adigl u kor enamga mabuno i, i nogugl edugwa. 22Nono yoba mudu Adam gawama munga pre goramga keme paugwa ba nono ta Krais yugobunomo mina suna umga i, okuo adigl u kor enamga. 23Krais komono kana goglsre, adigl u kor ogwa. Te, God ka ta di paduglkwa i, Krais ede ikne unan, yoba ira ta ye yugobunomo mina mogl, geglkwa i, ye igne i ogono nagino mina adigl u kor enaiglmedi di paduglkwa pre nono ege i adigl u kor enamga.
24Ana yoba mudu Krais yugobunomo mina atne moraiglkwa i adigl u kor ebi, mokomugl i, taragl mudu dudunabuka ege i unabuka. Yoba ta kade mogl, yobuglno podo pamedi pre, yoba suglno meglkwa i, Krais mudu si atne edidre, taragl mudu i pi God Nem swara king morabedi tenabuka. 25-26Komno kana Krais yene king morabuka paugwa. Ye king mogl, kudamo ikne mudu si atne ede kodidre, kuda ikne swara ta okuo kaima si dudunabuka i, geglkwa mem i, si dudu kodinabuka. Yegl ersre, okuo taragl mudu i pi God Nem tenabuka. 27I siragl pre God kamo okna beglkwa i, yegl dugwa,
God ye taragl mudu bitno morabedi tomiwe#15.27 Giglage 8.6
di, yegl dugwa. Ana nono prumga, God kamo mina Jisas taragl mudu bitno morabe dugwa i, ye God Nem ama bre morabuka pre dikrukwa ba God Nem yene ere mogl, taragl mudu Jisas tenan, ye taragl mudu i bitno morabuka pre dugwa. 28Ana God ere mogl, ye Wam taragl mudu bitno morabedi te kodinan, God Wam ama ere mogl, God Nem swara taragl mudu i swara ede, kingno mogl, suglno morabedi ye Nem moglmara mogl atne edenabuka.
29Ene yoba geglkwa ta adigl u kor pikraiglmedi pribi, yoba ta pre mediglkwa ba ye nigl buglkre, tabre geglkwa i, ene siragl pre ye againo idre, kagno mina nigl biglme? Ye ta adigl u kor pikraiglmedi pribi, ene ye geglkwa dudumiwedi prikwa pre ene kagno mina nigl bugl teigwa i, mem wakai ta paikrabuka. 30Te, no Jisas dedugwa yoba munga i, no kogon ere wan munga i pre yoba tau mere no si goramnedi erikwa ba kogon ere pai munga. No okuo gogl dudinamga panan, kogon yegl ere pai moramno? Ta manugwa, ba no okuo adigl u kor enamga pamedi prisre, kogon ere pai munga. 31Na ene ka kaima di teiga, na Jisas kogonmo ere wan moglmara i, yoba ege ege na si goramnedi erikwa. Ka i kibi ta dikrika. Nono Yaglno Kade Krais Jisas ene meglmara kogon podo eruko, na kaima gun yeigo, ene kanimere yegl, yoba na na si goramnedi erime diga i, ama ka kaima diga. 32Na erme dumo Efesus kogon ere moglko, kudana ikne tau na na si goramnedi ere meglkwa pre na agl bugla are bogl kuda bunga mere yegl paugwa. Na erme makandigle keme kor moglsre, okuo adigl u kor ta pikraglka panan, na kogon podo yegl erimara i, taragl wakai ta okuo ikraglka ba i ta manugwa. Na okuo adigl u kor pidre, kogon erimara i topo wakai inagledi pre, ere wan moglka. Nono erme makandigle keme moglsre, gogl dudinamga panan, nono yoba tau dimere eramga i, kuno erabuka. Ye yegl digwa,
Nono tagna i goramno mo i ta prikrumga pre
erme kaya mokna podo nedre, nigl wain mere nedre, eramniwe#15.32 Aisaia 22.13
di, yegl digwa.
33Yoba ene bakagl tedre, Goglsre, adigl u kor ta pikramne dinaiglkwa i, ene prikrio. Yoba ka kide yegl didre, mabuno kide erikwa i bogl, ene si dakagl meglbi, ene nomano ama u kide enan, ene mabuno wakai ta boglkre, mabuno kide ama boraiglkwa. 34Ene du mere yegl ere meglkwa i, kide kodidre, tadaglme erikwa ama kide kodio! Ene meglmara suna i, tau God mabunomo pre kan erekrikwa mere pamedi prika. Na diga i, ene prisre, agai golo.
Ogono nagno kor siragl mere inamga
35Ana nono ka kaima adigl u kor enamga pre diga i, na prika, ene tau ere mogl, ka i kuno ta erekrumedi prisre, yegl dinaiglkwa, Yoba ta geglkwa i siragl mere adigl u kor enaiglme? didre, te, Ogono nagino kor i siragl mere panabe? dinaiglkwa. 36Ene du erimo? Ene kaya mokna yubo ere yaiglkwa i, kanaiglkwa. Kaya mokna yubo i, komono kana goglsre, okuo u kor pidre, wi si, pare ede mitna ogwa. 37Te, ene wit mogo, mo kugl mogo pere ta ere yaiglkwa i, edie ya yaudo i ta i pi yaglkrikwa. Ene mogo keme yaiglkwa 38ba God ye kugl mogo i wi si, pare ede mitna enabedi prumere yegl parenabedi eruko, kaima yegl mere wi si parukwa. God ere paduglkwa i, ene wit mogo ta ere yaiglbi, kugl wit swara i parenabedi ere paduglkwa. Te, ene taragl pere ta ere yaglbi, taraglmo swara i keme pare, wi sinabedi ere paduglkwa. Kaya mokna yubo yomga i, yei pere edugo, te yaungo, pare wi sugwa i pai pere edumere mere yegl, nono ogono nagino erme bugl kide erabuka yogwa i, pai pere edugo, ogono nagino kor okuo inamga i, pai pere edenabuka.
39Ana God kaya mokna pere pere ere yomere mere yegl, ye taragl mudu makandigle meglkwa i, ogono nagino pere pere panabedi ere yogwa. Nono yoba munga i, ogono nagino pai pere edugo, agl bugla ogono nagino pai pere edugwa. Te, kua ogono nagino pai pere edugo, buglo bagle ogono nagino ama pai pere edugwa. 40Kuno yegl mere, God makandigle taragl pai pere ta edinaiglmedi ere yedre, kamun mitna ibo taragl pai pere edinaiglmedi ere yogwa. Nono makandigle taragl siragl mere wakai kamga i pai pere edugo, taragl kamun mitna ibo paigwa i siragl mere wakai kamga i, ama pai pere edugo, erukwa. 41Te, taragl mitna ibo paigwa i ama pai pere pere edigwa. Ade yene abuglagemo pere sugo, ba abuglagemo pere sugo, kugl kuri abuglageno ama si pere edigwa.
42Ana nono adigl u kor enamga i, yegl mere paugwa, nono ogono nagino erme paugwa i, goramga igne burabuka ba nono adigl u kor pidre, ogono nagino kor inamga i, aimadi kamin panabuka. Ogono nagino kor inamga i, aglke kor ta goglsre, buglkrabuka. 43Te, ogono nagino erme bugl kide erabuka yogwa i, yobuglomo ta paikruko, taragl kide yogwa ba adigl u kor pidre, ogono nagino kor inamga i wakai kaima yenan, yobuglomo ama panabuka. 44Nono ogono nagino erme paugwa i, makandigle taragl yogwa ba nono adigl u kor pidre, ogono nagino kor inamga i, heven taragl yenabuka. Ogono nagino erme paugwa i, makandigle taragl yogwa pre pai pere edugwa. Okuo ogono nagino kor inamga i, heven taragl yenabuka pre pai pere edenabuka pre diga.
45God kamo mina okna ibo yegl beglkwa,
God yagl swara ta komono kana bekugwa, Adam i, ye u yoba pidre, kor moglmiwe#15.45 Oknayene Ibo 2.7
di, yegl beglkwa. Ba okuo Krais, ye Adam kor mere yegl ta ugwa i, ye murubuglo moglsre, nono aimadi kamin kor moramga i norukwa. 46Nono komono kana heven ogono nagino i ta ikrumga. Makandigle ogono nagino komono kana yumga ba okuo heven ogono nagino inamga. 47Yagl Adam komono kana moglkwa i, God makan gaba idre, beke yogwa pre ye makandigle yoba moglkwa. Yegl moglkwa ba Jisas okuo ugwa i, ye heven ibo kide kodo, ede atne ugwa pre ye heven yoba moglkwa. 48-49Yegl pre nono makandigle munga i, Adam gagiglma mogl umga pre Adam ogo nagie pamere yegl, nono ogono nagino kuno yegl paugwa. Ba nono Jisas yobama ta munga i, erme heven yoba munga pre Jisas adigl u kor pidre, ogo nagie kor yumere mere yegl, okuo nono heven ogono nagino inamga.
50Agrama abarama wagle, nono ogono nagino kor inamga pre diga i, yegl pre diga, nono ogono nagino mie ya bormai erme pamere mere yegl pai moran, ede suna pi God yoba kingno mogl, suglno morabara enamga i, kuno ta erekrukwa. Ogono nagino erme paugwa i, bugl kide erabuka pre ogono nagino i mina aimadi kamin ta kor moglkramga. 51-52Yegl paugwa ba ene prio! God kamo ta okna teke paugwa ba erme di norukwa i, ene di tebo, praiglkwa. Nono Jisas yobama ta munga i, mudu ta goglkramga. Tau goraiglkwa ba tau yoko meglbi, Jisas ede ikne unabuka. Ye ede ikne unabuka igne i biugel podo ta boran, yoba gumuglno kubugl kai simere yegl, nono ogono nagino tabre kaima u kor enabuka. Jisas yobama ta gogl kodigwa i adigl u kor pidre, ogono nagino kor aimadi kamin panabuka i ibi, te tau goglkre, yoko moraiglkwa i ama ogono nagino kor kuno yegl inaiglkwa. 53I siragl pre nono makandigle ogono nagino erme pai, bugl kide erabuka i, ta pai moglkrabuka paugwa. God nono ogono nagino ere i, heven ogono nagino edenan, ogono nagino kor i, aimadi kamin pai moglsre, kide ta erekrabuka.
54Ana okuo God ere mogl, nono makandigle ogono nagino bugl kide erabuka yogwa i, ere i heven ogono nagino edenan, aimadi kamin panabuka. Ye yegl erabuka igne, God kamo bage ta okna ibo beglkwa i, pai inabuka. Kamo i, yegl dugwa,
God yobuglo ersre, geglkwa mabuno i, egre atne edumiwe#15.54 Aisaia 25.8
dugwa. 55Te, God kamo bage ta ama yegl dugwa,
Geglkwa mem yo, no si atne edinatnga yobugln aglo pame? Doga kade yo, no giugl noratnga aglo pame? #15.55 Hosea 13.14
dugwa. 56Geglkwa mabuno erme yobuglo ersre, nono si atne edugwa i, tadaglme erumga pre geglkwa no si atne edugwa. Te, tadaglme mabuno yobuglo ere norukwa i, God lomo prumga ba duglo boramga kuno erekrukwa pre yobuglo ere norukwa. 57Yegl paugwa ba nono God di wakai yei tenamga paugwa. I siragl pre nono Yaglno Kade Jisas Krais kogon erumara i mina God ye nono aimadi kamin kor moraiglmedi norsre, geglkwa mabuno nono ta si atne edekrabedi ere noro kodugwa.
58Na agrama abarama, ene dena muduna suna meglkwa i, nono kaima ogono nagino kor idre, aimadi kamin kor moramga pre ene adigl gigledi moglsre, kinano suo gudukrio. Te, ene Yagl Kade kogonmo erikwa i, ere yoko edumnedi prikrio! Ene ye kogonmo erikwa i, Yagl Kade kan moglsre, topo wakai okuo norabedi pre mogl, ye kogonmo gigledi ere pai molo!
Currently Selected:
1 Korin 15: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission