1 Korin 16
16
Korin yoba mige makai sidre, Jerusalem yoba tenaiglkwa pre dugwa
1Ana ene Korin yoba ere mogl, God yobama dumo Jerusalem meglkwa i, ake ple di tenamnedi mige moni tau makai sinamne digwa i pre na erme ene ka tau di tenaglka. God yobama tau provins ta Galesia we dimara i, bage bage makai si meglkwa i na di teigo, ye erimere i ene ama eraiglmedi prika. 2Ene swara swarade mige moni kan nenaiglkwa i kandre, ene sinaiglkwa kuno erabere mere yegl, ene Sande ege ege i pi makai sio. Ene yegl ere, mige si, makai si kodibi, na okuo unaglka i wakai panabuka. Na u kan moglbo, ene mige makai sinaiglkwa i wakai ta paikrabuka pre diga. 3Ana na ene meglmara wibo, ene yagl tau mige moni makai sinaiglkwa i, i pi Jerusalam yoba tenaiglkwa pre kere ibi, na ama pas tau bogl ye tedre, dedibo, i ede enaiglkwa. 4Te, ye na bogl akie enamga ta wakai pamedi prumun, na ede Jerusalem enaglmara i, ye bogl akie enamga.
Korin yoba meglmara u kanagledi prie dugwa
5Na erme dumo Efesus moglka i, kuri ta mogl, dumo i kide kodo, provins Masedonia suna i tau wan moglsre, okuo ene Korin yoba meglmara u ene kanagledi prika. 6Na dumo Korin wibo, nono ege sugunagle keme mun, na ede bage ta enaglo mo ege olto dagl akie mun, ir erabuka igne dudinan, ede enaglo mo i, okuo kanamga. Te, na prika, nono akie mun, na ede bage ta enagledi eraglka igne, ene ama ake ple di naraiglmedi prika. 7Na erme tabre u ene meglmara kanibo, na ege sugunagle keme moglsre, aglke ede ikne enaglka mere yegl panabuka pre i wakai ta paikrabedi prika. Yagl Kade pra we dinan, na dimere yegl, okuo ene meglmara wibo, ege tau olto dagl akie moramnedi prika. 8Na erme dumo Efesus mogl pai moglbo, ege Pentikos dudinan, ede Masedonia enagledi prika. 9I siragl pre na dumo Efesus moglmara i, kudana ikne mere meglkwa ba God na dumo magigl i kogon podo eratnedi konbauna yauro nare kodugwa pre na dumo Efesus magigl i kogon ere kodidre, okuo ede meda enagledi prika.
10Ana na Yagl Kade kogonmo erimere yegl, Timoti ama kuno yegl erukwa pre ye ene meglmara ta unan, ene ye di wakai yei, di inaiglmedi prika. Ene yegl eribi, ye dem muduo aragan eran, ye kudugl goglkrabuka i wakai panabuka, 11Ba ene swarano ta ere mogl, Timoti kan yagibi, kide panabuka. Ene ye dem muduo aragan erabedi ersre, ake ple di tebi, ye wan ede ikne unabedi prika. Te, ye ede ikne na moglmara unabuka i, nono agroma tau bogl akie wibi, na kanagledi prika.
12Ana nono agro Apolos ama ene meglmara unabedi na ka tau gigledi di teiga ba ye erme ene meglmara ukragle dugwa. Ye okuo ege wakai ta yenan, u ene kanagle dugwa.
Pol ka tau okuo dugwa
13Ana ene ege ege kan kun ere moglsre, pre mediglkwa ake gi di molo. Te, ene ege ege kudugl goglkre, adigl gigledi molo. 14Te, ene kogon siragl mere ta eraiglkwa mo mabuno siragl mere ta eraiglkwa i, ene ege ege agroma abaroma deno muduno te pai molo.
15Ana Stefanas kipaimara meglkwa i, enene pre kan erikwa. Ene dumo Korin, provins Akaia suna meglmara i, ye komono kana Jisas pre mediglko, ene tau okuo pre mediglkwa. Te, ye yene primere God yobama ake ple di tenamnedi kogon podo ere meglkwa. Yegl pre na ene di prika, 16ene ye meglmara mogl atne ede moraiglmedi prika. Te, na ye swara pre dikrika ba yoba ira ta ama ye kogon podo erimere yegl ta eraiglkwa i, ene ama ye moraiglmara mogl atne ede moraiglmedi prika.
17Ana na ene meglmara u ene kankrika i, tau kide pre moglka ba ene yagl suota Stefanas ya Fortunatus ya Akaikus dedigo, na moglmara wigwa i, na kandre, gun yeiga. 18Yagl suota i ere mogl, ene deno muduno wida dinabedi ere teimere yegl, ye u na moglmara ama dena muduna wida dinabedi ere narikwa pre na gun yeiga. Yoba mabuno yegl ta eraiglkwa i, ye kogon wakai erikwa pre nono ye di wakai yei tenamga paugwa.
19Ana God yobama provins Esia magigl i bage bage makai sigwa i, ye ene Korin yoba wakai we di teigwa. Te, Akwila ya Prisila ye God yobama bogl ye kipabrara makai sigwa i, ene ama wakai we di teigwa. 20Te, agroma abaroma magigl i, mudu ama ene wakai we di teigwa. Ana ene God yobama akie munedi prisre, ikne ikne nuguno kugro, kogl kare di inaiglmedi prika.
21Na ka tau okna di wiga i, na drana mina di meda edigo, agra ta bogl atne ede narukwa ba ka magigl i, na Pol nana ogona mina boglsre, ene Korin yoba wakai we di teiga.
22Yoba ira ta nono Yaglno Kade wakai kankrabuka i, God ye ere kide ere tenabedi prika. Yagl Kade yo, ene ikne unatnedi priwa.
23Na agrama abarama wagle, nono Yaglno Kade Jisas ene yoko kaima ere wakai ere te pai morabedi prika.
24Ene Krais Jisas yugobunomo mina meglkwa yoba dena muduna teiga. Kaima.
Currently Selected:
1 Korin 16: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission