1 Korin 9
9
Pol dumo Korin kogon erumara topo ta ikrukwa
1-2Ana erme nana erimere kuri ta dinaglka. Na Jisas dedugwa yoba ta moglsre, ene meglmara kogon podo erika pre ene mige moni mina na ake ple di nario dia kuno eruko, ba na yegl ta dikrika. Na Jisas dedugwa yoba kaima ta moglka i pre ene di tebo, praiglmedi prika. Nana gumuglna mina nono Yaglno Kade Jisas kanigo, ye na dedugwa yoba ta moratnedi kogon i naruko, ere wan moglka. Yoba tau na kagna ere kide erse, Pol ye Jisas dedugwa yoba kaima ta moglkrumedi, yegl praiglkwa ba ene yegl ta prikraiglmedi prika. Na Jisas dedugwa yoba kaima ta moglmedi, ene yegl kanaiglkwa i, nogugl paugwa. I siragl pre na Yagl Kade kogonmo ere wan moglmara swara i pre ene Jisas kamo pre medigl, ede suna wigwa. Yegl pre Jisas na kaima dedugo, na ye kogonmo erumedi, ene yegl praiglkwa i, nogugl paugwa.
3Ana yoba tau na kan atne ede, kogon siragl mere erika kan yubu sigwa i, erme tau dibo, pre pogl sinaiglkwa, 4Na God kogonmo erimara kaya mokna yoko naribi, nenaglka i, kuno erukwa, ba na yoko yegl ta i nekrika. 5Te, Yaglno Kade Jisas agiglema okuo meglkwa i ya Pita ya te, Jisas dedugwa yoba tau ama meglkwa i, ye pre mediglkwa abu idre, ebino bogl akie wan mogl, kogon erimere yegl, na ama yegl eraglka i, kuno erukwa ba na yegl ta erekrika. 6Te, Jisas dedugwa yoba tau kogon erimara topo igwa ba no Barnabas bogl muglka i, topo ta ikrubuglka. No mige moni ta inabuglka paugwa i, nono ogono mina kogon ersre, mige moni yubuglka. Ba ene pribi, no Barnabas bogl suo i topo ta inabrika kuno erekrukwa pre yene ogono mina kogon eribredi primo? Ta manugwa, no God kogonmo erubuglara i, mige moni inabuglka kuno erukwa ba no mige moni yegl inakrubuglka pre ene ake ple di noraiglmedi ene meglmara ta di prikrubuglka.
7Ana na God kogonmo yoba topo inaiglkwa kuno erukwa pre ka ebrie tau ene di tenaglka. Soldia meglkwa i, ye yene mige moni doko i neimo mo kogon erimara i topo ime? Ye topo igwa. Te, yoba tau ede wain ere yaiglkwa i, wain ere yaiglkwa i, mogo tau yene uro neimo mo nekrime? Tau yene uro neigwa. Te, yoba ta sipsip ere kuglsre, sipsip ame nuglo dukigwa igne, yene tau neimo mo nekrime? Tau yene duko neigwa. Kuno yegl mere, God kogonmo yoba kogon erimara i, mige moni inaiglkwa i, kuno kaima erukwa. 8Na diga i, yoba nomano pamere i ta dikrika. God lomo ka swara i pre ama dugwa. 9 Moses ye God lomo boglmara suna i ka ta yegl boglkwa,
Kau ta wit mogo egran, ugla porabedi kane koraiglkwa i, ye dra si kegl dikrio!
Kau i ugla porabara i, wit mogo tau ama i nenabiwe#9.9 Lo 25.4
di, yegl boglkwa. Ene prikwa, God lomo yegl dugwa i, kau swara i wit mogo nedre, wakai morabuka pre dumedi primo? 10Mo, ye ama no ye kogonmo yoba munga i pre dumedi prime? Kaima ye no ama kogonmo ersre, mige moni tau idre, wakai moramga pre dugwa. I siragl pre, yoba ta makan wakugwa mo wit mogo ugla poglkwa i, ye wit mogo tau ama i nenagledi prisre, kogon erukwa i kuno erumere yegl, no God kogonmo yoba ama topo inamga i, kuno erukwa.
11Na diga i, yegl pre diga. No Barnabas bogl ene kiano mina wakai moraiglmedi kogon podo erubuglka pre ene kan ikne ede, no ogono nagino mina ake ple di noribi, kuno erabuka. 12Ene yoba tau yegl ere, ake ple di tenamga i kuno erumedi prisre, ake ple di teigwa pre ene no Barnabas bogl muglka i, tau podo ake ple di noraiglkwa i, kuno erukwa. Kuno erukwa ba no ta ere mogl, Ene yegl ake ple di norio ta dikrubuglka. No yegl dikre, nono ogono mina kogon ere, mige moni yubuglka i, yubun mere yegl yubuglka ba no Krais kamo wakai i, ene praiglkwa i si kegl di dinabugledi prisre, yegl erubuglka.
13God kogonmo yoba mige moni tau inaiglkwa kuno erukwa i, nogugl kaima paugwa. I siragl pre yoba ta tawa teigwa yugu yomara kogon erikwa i, ye yoba kaya mokna i pi God yugumo yomara edigwa i, neigwa. Te, tawa teigwa yoba ye sipsip i pi tawa bogl mina gaiglkwa i, ye ama sipsip i miemo tau bogl neigwa. 14Kuno yegl mere nono Yaglno Kade ka di paduglkwa i, yoba ta ye kamo wakai i pi yoba di tenaiglkwa i, ye kogon erimara i mina mige moni i nenaiglmedi di paduglkwa.
15Ana na diga, na ene meglmara kogon erika i pre mige moni mo kaya mokna ta inaglka i, kuno erume diga. Ba okna ene ege swara ta na ake ple di nario dikrika. Te, na ka erme boglka i ama ene taragl tau naraiglkwa pre dikrika. Na topo ta ikre, ene God kamo yoko beke teiga i, gun podo yeiga. Yegl pre yoba ta na kogon erimara i mina topo naran, na wakai prikraglka. Siragl pre na kogon yoko ere, gun podo yeiga mabuno i, ere kide ere narabuka. Te, na ama prika, na kogon erimara i mige moni nario di, yegl ta dibo, God kogonmo ere kide eraglka mere paugwa pre na yegl ta dikraglka. Na goraglka i ta pre yubun dekrika ba na God kogonmo ere kide eraglka i, kide prika pre diga.
16Na Jisas kamo wakai i pi yoba di teiga i, nana taragl wakai ta eriedi prisre, kagna ake mitna edenaglka i, kuno erekrukwa. I siragl pre kogon i, nana primere ta erekrika. Jisas yene ere mogl, na Kogon yegl ero! di narukwa pre na kogon yegl eraglka paugwa. Na kogon yegl ta erekribo, na moraglmara kide kaima panabuka. 17Te, na topo pre ka tau diga i, na ama prika, nana primere God kogonmo i ta eria, na kogon erimara i, mige moni inaglka kuno eruko. Yegl paugwa ba na nana primere God kogonmo erekrika. Jisas yene kogon yegl narukwa. Yegl pre yoba ta ere mogl, ye niglmo kogonmo yoba kogon dedugo, nigl kogon yoba i kogon dedumere erukwa ba mige moni ta ikrumere mere yegl, na ama mige moni ta ikraglka i, kuno erumedi prika. 18Yegl paugwa ba na kogon erimara i taragl swara ta topo mere yegl iga i, na gun podo yeiga mabuno i, topo mere yegl iga. Na Jisas kamo wakai i pi yoba di teiga igne, mige moni ya taragl tau ake ple di nario dikrika i mina na God kogonmo si kegl dikriedi prisre, gun podo yeiga pre diga.
19Ana na moglka i, kane yoba ta moglkre, yoba swara ta niglmo kogonmo yoba moglkrika ba yoba mere kide Jisas kamo pre medraiglmedi na ede u yoba mudu niglno kogono yoba mere yegl eiga. 20Na Juda yoba kide kankre, Jisas kamo pre medraiglmedi prisre, Juda yoba bogl akie munga igne, ye ebrie mabunono pamere yegl na duglo boglka. Na lo mina atne moglkrika ba yoba ta lo mina atne meglkwa i bogl akie munga igne, kaima ye pre medraiglmedi prisre, ye lo duglo boglsre, mabuno beglmere mere yegl, na ama mabuno kuno yegl boglka. 21Te, na yoba yugobuno pere ta God lomo, Moses bogl atne edugwa i mina atne moglkrikwa i bogl akie munga igne, na ye Jisas kamo pre medraiglmedi prisre, ye ebrie mabuno erimere yegl erika. Na diga i, ebrie mabuno tau erimere erika pre diga ba na God lomo kide kodidre, yoba mabuno kide beglmara akie bunga pre dikrika. Na Krais lomo duglo bogl pai moglka. 22Te, yoba tau pre mediglkwa ba ye mabuno siragl mere eraiglkwa wakai panabuka i kinano suo yogo, mie ta nekrimo mo mabuno siragl mere ta erikwa i, na ye bogl akie munga igne, ye erimere yegl sika si, erika. I siragl pre na ye ake ple di tebo, ye pre pogl sidre, kinano suo yekrabedi erika. Na yoba kane kane, mabunono siragl mere paugwa i bogl akie munga igne, ye agre i ede suna unagledi prisre, ye ebrie mabuno siragl mere erimere kuno yegl na erika. 23Na mabuno yegl erika i, Jisas kamo wakai i pare wai dinan, na yoba kor ede suna unaiglkwa i bogl akie taragl wakai wakai inamnedi erika.
Pol yoba muku digwa pre ka ebrie dugwa
24Ana yoba mere muku didre, ira ede okna enabedi erikwa i, nono kamga. Yoba tau mere kide muku digwa ba yoba swara keme ede okna pidre, topo ta padiglkwa i, yugwa. Kuno yegl mere ene God nono topo wakai okuo norabedi prisre, ene ye kogonmo eraiglkwa i, ake giglede ere pai molo. 25Yoba ta muku digwa mo kigle kane kane baiglkwa i, ye yoko wan moglsre, u kigle baglkrikwa. Ye ogono nagino sugl mogl, ere wakai ere, kogon podo yegl ersre, okuo kigle baiglkwa. Ye erikwa i, makandigle topo ibi, bugl kide erabuka pre erikwa ba nono God kogonmo ersre, topo okuo ta inamga i, aimadi kamin yenabuka. 26Yegl pre na yoko ta wan moglkrika. Na God kogonmo erika i, ake giglede ere, yoba muku di ede okna enamnedi erimere yegl, na ama muku di ede okna enagledi erika. Te, yoba ogono tu pagl beglkwa, kamga i, ye ogono noko, si yar edekrikwa. Ye yoba ta bogl beglkwa i, kaima borabedi noko mogl, simere yegl, na God kogonmo erika i, giglede yegl erika. 27Te, yoba muku di, ira ede okna enabedi erikwa i, ye ogono nagino sugl wakai meglmere mere yegl, na ama ogona nagna sugl wakai moglsre, mabuno kide kane kane ta pogglau boglkwa i, mane di teiga. I siragl pre na God kamo yoba di tenaglka ba okuo God topo ta inaiglme dugwa i, ta ikribo, kide panabedi prika. God kogonmo ake giglede ere pai moglsre, okuo topo inagledi prika.
Currently Selected:
1 Korin 9: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission