1 Korin 8
8
Mie tau god kibi tawa teigwa i pre dugwa
1Ana ene na ka kira ta pogl narikwa i pre ama dinaglka. Ene yegl digwa, Yoba ta agl bugla si gogl, god kibi kagie dagl, tomne didre, okuo mie tau maket erikwa i, topo si nenamno mo nekramne? digwa. Ene tau digwa i, No pre pogl sumga, god kibi i kaima ta moglkrikwa pre mie yegl i nenamga, aglau ta paikrumiwe di, ene tau yegl digwa. Ene tau pre pogl sumga pre mie yegl erikwa, i nomne digwa i, kaima digwa ba ene taragl tau pre pogl sumne dimara i mina agroma abaroma tau ene ake ple di tekrikwa. Enene kagno keme ake mitna edigwa. Ba ene agroma abaroma deno muduno tebi, ye yakenaiglmedi ake ple di tenaiglkwa. 2Na diga i, ene prio! Ene ta pitn, Na taragl mudu pre pogl si kodiwe di, yegl ta pitn, ene nomane wakai ta inatnga i, ikitnga pai moglkwa. 3Ba ene den mudn God ten, God ene kandre, nomane wakai iniwe di, yegl dinabuka.
4Ana mie tau yoba god kibi kagno dagl, tomne didre, okuo mie i yu maket erikwa i, ene i nenaiglkwa mo i nekraiglkwa i pre dinaglka. Nono prumga, God swara keme moglkwa pre yoba uglo kogl koglo moglsre, god kane kane yegl yegl meglme digwa i, kaima ta moglkrikwa. Ka kibi digwa. 5-6Yoba ere mogl, god kane kane dumo makan mina ya heven ibo meglme didre, yaglno kade kane kane meglme dinaiglkwa ba nono prumga i, Neno Kade i swara God kaima moglkwa. God swara i taragl mudu ere yogo, te nono mudu ye swara kagie kade tenamga pre munga. Te, nono ama prumga i, Jisas Krais swara nono Yaglno Kade moglko, God ye taragl mudu ere yogwa i, ye Jisas swara i mina ere yogwa. Te, nono aimadi kamin kor moramga i ama Jisas swara kogon erumara i mina nono ere noro kodugwa.
7Ana na diga i, nono Godno swara keme moglmedi, yegl prumne diga. Yegl diga ba pre mediglkwa yoba tau i pre pogl sikrikwa. Ye okna god kibi kamage ere te kanigwa pre ye prikwa, god kibi i kaima meglmedi prikwa. Yegl pre yoba ta god kibi kagie dagl, mie ta god i tomniwe didre, topo bogl neigo, pre mediglkwa yoba tau pre pogl sikrikwa i, mie i nedre, aglau erumiwedi prikwa. Ye mabuno siragl mere eribi, wakai panabuka i, pre pogl sikrikwa pre kinano suo yogwa.
8Ka kaima nono mie ta nomun, God moglmara mogl magigl edinamnedi pramga i, kuno ta erekrukwa. Mo, mie ta nekun, God moglmara mogl magigl edinamnedi pramga ama kuno ta erekrukwa. Nono mie nenamga i mina, God no wakai ta kankrabuka. Mo, mie ta nekramnara i mina God ama no kide ta kankrabuka. 9Ene lo mina atne kane paikrikwa pre ene kaya mokna mo mie siragl mere i nenamnedi praiglkwa i, i nenaiglkwa. Ene i nenaiglkwa i, aglau ta paikrukwa ba ene agroma abaroma tau kinano suo yenabuka i, ene nebi kandre, yage sibi, kide panabuka pre ene kan kun erio.
10Na diga i, yegl pre diga, ene tau god kibi i kaima ta moglkrimedi prisre, god kibi tawa teimara ede yugugl pidre, mie i nebi, agro ta kina suo yogwa i ene kandre, ye ama i nenagledi nomane idre, i nenan, aglau panabuka pre diga. I siragl pre ye mie i taragl kide yomedi prukwa ba ye ene neimiwedi kandre, taragl ta kide yomedi prukwa i nogwa pre aglau paugwa. 11Krais ene agro ta kina suo yogwa i pre goglkwa pre ene God swara keme moglmedi pre pogl simara i mina ene agro ere kide ere tenaiglkwa i, kide paugwa. 12Ene agro mie i taragl kide yomedi prabuka ba ene ye nenabedi ake nu sibi, ene agro i ere kide ere tedre, Krais ama ere kide ere teigwa pre tadaglme erikwa. 13Yegl pre na prika i, na mie nenaglmara i mina na agra ta yage sinabuka mere panan, na mie i ta nekraglka. Ka kaima na agra i yage si dinabedi na mie sede, okuo ta nekraglka ama pra we di prika.
Currently Selected:
1 Korin 8: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission