1 Korin 7
7
Pol yagl abu bogl igwa pre dugwa
1Ana ene meglmara ka kira tau paugo, pepa mina bogl narikwa i, na erme ene di ikne ede tebo, praiglkwa. Komno kana ene na yegl di prikwa, Yagl ere mogl, abu ta ikre, yoko moran, wakai panabo mo paikrabe? di, ene yegl na di prikwa. I kaima, yagl ta ere mogl, abu ta ikre, yoko morabuka i, wakai paugwa. 2Wakai paugwa ba ene prio. Ene mabuno kide mina yage sidre, yagl abu ta bogl kunogl nenaiglkwa mabuno i, kide paugwa pre ene yagl swara swarade abu ibi, te abu swara swarade yagl ebi, wakai panabuka.
3Ana yagl abu ta bogl i kodibrika i, ye bogl swara panabrika kuno erukwa pre wie mo ebie mo swarano ta panabugledi pran, ta mane dinabuka i ta kuno erekrukwa. 4Yagl ta ebie moglkwa i, ebie ogo nagie i, abu i yene pre manga. Ye ogo nagie i wie pre paugwa. Te, abu wie ta morabuka i ama wie ogo nagie i, yagl i yene pre manga ba ye ogo nagie i ebie pre paugwa. 5Yegl pre ene tau bogl idre, yagl abu meglkwa ba akie bogl swara paikrikwa mabuno i, kide kodio. Ene moraiglmara yubun ta panan, ene yagl abu suo kamage keme erabugledi prisre, ege i bogl swara paikrabugledi prabrika i, pra ba ene ege olto yegl ta ere moglkrabrika. Ege sugunagle yegl ersre, okuo ene aglke kor bogl swara panabrika paugwa. Yegl ta erekribr, Satan ene ake nu sinan, ene yobuglno ta paikrukwa pre mabuno kide ene deno muduno mina pogglau boran, ene yage si dinabrika pre diga.
6Ana na yagl mudu abu ibi, abu mudu yagl ebi, erabe diga i, na lo mere yegl ere, ene duglo boraiglkwa pre ta dikrika ba ene na di teimere yegl eribi, wakai panabuka pre diga. 7Na abu ikre, yoko mogl, God kogonmo ere wan moglmere yegl, ene yagl mudu yegl eribi, i tau wakai panabedi prika ba ene yagl mudu yegl eraiglkwa i ta kuno erekrabuka. God nono tau abu ikre, yoko moraiglmedi nomane noruko, abu ikre yoko munga ba tau abu inaiglmedi nomane togo, igwa. Ye nono nomane siragl mere norukwa i, nono prisre, eramga paugwa.
8Ana na ama yagl abu werai tau ene meglmara suna meglkwa i pre dinaglka. Na yoko mogl, God kogonmo ere wan moglmere yegl, yagl werai ere mogl, abu kor ikribi, te abu werai ere mogl, yagl kor pikre, yoko moraiglkwa i tau wakai panabuka. 9Wakai panabuka ba mabuno kide deno muduno mina pogglau boran, ye yobuglno ta paikran, yage sinaiglkwa i wakai paikrukwa. Ye meglmara i, yegl ta plau dinagledi eran, yagl werai ere mogl, abu kor ibi, te abu werai ere mogl, ede yagl kor ebi, i wakai panabuka.
10Ana yagl abu ta bogl igwa meglkwa i, na ye siragl mere eraiglkwa paugwa i, nana primere ta dikraglka. Nono Yaglno Kade Jisas dra mina yegl dugwa, Abu ta ere mogl, wie kide kodokrabiwe dugwa. 11Yegl dugwa ba aglau ta eran, abu ta ye wie moglmara kide kodinan, ye ede yagl kor ta pikrabuka paugwa. Ye ede ikne wie moglmara unabo mo ta ukran, ye yagl kor pikre, yoko morabuka paugwa. Te, yagl ere mogl, ebino sedekraiglkwa paugwa.
12Ana ene tau mabuno siragl mere eraiglkwa paugwa i, nono Yaglno Kade dra mina ta di norokrukwa ba nana primere dinaglka. Yagl ta pre medrabuka ba ye ebie ta pre mediglkrabuka i, abu i ye wie bogl akie mogl pai morabugledi pra we dinan, yagl i ye ebie sedekrabuka. 13Te, abu ta pre medrabuka ba ye wie ta pre mediglkrabuka ama kuno yegl, yagl i ye ebie bogl akie mogl pai morabugledi pra we dinan, abu i ye wie kide kodokrabuka. 14I siragl pre ye yagl abu miurka i, God kide kankrukwa. Yagl ta pre mediglkrukwa ba ye ebie pre meduglmara i mina God ye suo akie suglno morabuka. Te, abu ta pre mediglkrabuka ba ye wie pre medrabuka i ama kuno yegl, God ye yagl pre meduglmara i abu ama suglmo morabuka. God mabuno yegl ta erekre, suglno moglkran, ye gak kurabrika i, meda mere yegl moraiglkwa ba yagl mo abu swara ta pre meduglmara i mina God ye gagroma ama suglno morabuka.
15Ana ene wino mo ebino ta pre mediglkraiglkwa i, ye ene kide kodo, ede enamnedi eribi, ene ake gi di moglkre, kanige eraiglkwa. Kanige eraiglkwa ba ene akie mogl pai moraiglkwa i kuno eran, akie mogl pai molo. I siragl pre God nono agle dugo, ede suna umga i, ye nono yoba mudu bogl deno muduno swara yedre, kiede moraiglmedi prukwa pre ene wino mo ebino bogl akie mogl pai moraiglkwa i swara wakai paugwa. 16Ene abu pre mediglkwa meglkwa i, ene winoma ta pre mediglkraiglkwa ba ye ene siragl mere mogl pai ere, ebrie mabuno boraiglkwa i kandre, okuo ye pre mediglbi, ene ye ere i, God yugobunomo suna edigwa mere yegl panabuka. Te, yagl pre mediglkwa ta meglkwa i, ama kuno yegl mere ene ebinoma ta pre mediglkraiglkwa ba ye ene siragl mere mogl pai ere, ebrie mabuno boraiglkwa i kandre, okuo pre medigl ede suna wibi, ene ye ere i God yugobunomo suna edigwa mere yegl panabuka.
17Na wan mogl, Jisas yugobunomo bage bage meglkwa ka di teiga i, na ege ege yoba ka yegl di teiga, Ene yugobuno aglo mere meglkwa mo kogon siragl mere erikwa mo abu ta igwa mo ikrikwa i, nono Yaglno Kade God ene yegl moraiglmedi eruko, meglme diga. Yegl pre ene yoba siragl mere meglko, God ene agle dugo, ene ede suna wigwa i, ene siragl mere meglmere i, mogl pai moraiglmiwe di teiga. 18Na diga i, yegl pre diga, God ye Juda yoba ta agle dinan, pre medigl ede suna unabuka i, ye Juda yoba moglkwa i ta kide kodokrabuka. Juda yoba mogl pai morabuka paugwa. Mo, God ye yoba ta Juda yoba moglkre, yugobuno pere ta agle dinan, pre medigl ede suna unabuka i, ye ama ere mogl, yugobunomo kide kodo, Juda yoba mere yegl moragledi erabuka i, ta kuno erekrabuka. 19Yoba ta Juda yoba morabuka mo yugobuno pere morabuka i, taragl kebra yogwa. Yugobuno siragl mere moraiglkwa ba God kamo di norukwa i, duglo boraiglkwa swara taragl podo paugwa.
20Ana na di kodiga, ene siragl mere meglko, God ene agle dugo, ede suna wigwa i, ene yoba siragl mere meglmere i, mogl pai moraiglmiwe diga. 21Ene tau kane pai, yoba niglno kogono ere pai meglko, God ene agle di, i suna edugwa. Ene ede meda enaiglkwa konbauna ta yenan, pra ene kane paimara kide kodo, ede meda enaiglkwa ba konbauna ta yekran, ene moraiglmara pre yubun dekrio. 22I siragl pre ene ogono nagino mina kane paigwa ba kiano mina nono Yaglno Kade ene i meda ede kodugwa pre ene kiano mina kane pai moglkrikwa. Te, no tau kane paikre, yoba pere niglno kogono yoba moglkrumga i, ama kuno yegl munga. No yoko munedi pramga ba i ta kuno erekrukwa. No ama Krais niglmo kogonmo yoba munga pre no nono ta prumnere ere wan moglkramga. Ye no eraiglmedi prumere i, ere wan moramga paugwa. Yegl pre Yagl Kade nono agle dugo, nono pre medigl ede suna umga i, nono mudu kuno keme munga.
23Nono ogono nagino mina no tau yoko mungo, ene tau kane paigwa. Yegl erumga ba nono kiano mina kuno munga. Kiano mina nono okna kane pamga ba Jisas nono topo si ikne edidre, erme bitno moglkwa. Yegl pre yoba ene kiano mina aglke kor kane panaiglmedi ka di tenaiglkwa mo mabuno ta eraiglkwa i, ene prisre, duglo boglkrio! 24Ba ene ogono nagino mina siragl mere meglkwa i, na di kodiga. Ene God bogl akie meglkwa pre ene siragl mere mogl pai erikwa i pre yubun dekrio! Ene yoba siragl mere meglko, God ene agle dugo, ede suna wigwa i, ene meglmere yegl mogl pai moraiglkwa.
25Ana na erme ene tau kumugl abai mo yagl abu bogl ikrikwa meglkwa i pre ama dinaglka. Ene bogl ikre, yoko moraiglkwa wakai panabo mo bogl inaiglkwa wakai panabo mo i, nono Yaglno Kade makandigle moglkwa igne, di norokrukwa. Di norokrukwa ba ye na ere wakai ere narsre, na ye kogonmo eratnedi nomane wakai narukwa pre na ka tau ene eraiglkwa wakai paugwa i, ene di tenaglka kuno erukwa. 26Na prika i, nono pre medunga yoba munara ege kide ta plau dinan, yubun tau mere inamga magigl erukwa pre ene bogl ikre, yoko moraiglkwa i, wakai panabedi prika. 27Ene abu ta i kodinga panan, ene ye sedekratnga ba ene abu ta ikitnga panan,ene abu inagledi erekratnga. 28Na diga i, kumugl mo yagl ta ere mogl, abu inabuka i, tadaglme paugwa pre dikrika. Te, abai ere mogl, ede yagl enabuka i, ama tadaglme paugwa pre dikrika. Ba na diga i, ene yubun i dinaiglkwa pre diga. I siragl pre na di kodiga, erme makandigle munga i ege kide ta plau dinabuka magigl erukwa pre yagl abu bogl igwa meglkwa i, yubun tau mere inaiglkwa mere yegl paugwa.
29Agrama abarama wagle, ene prio. Nono erme makandigle munga i, ege sugunagle keme munga. Yegl pre yagl abu bogl inamga mo bogl ikramga i, taragl kebra yogwa. God kogonmo eramga i swara podo paugwa. 30Taragl kide nono munara plau dinan, kai eramga i pra. Ba i nono pre yubun dekre, God kogonmo ere pai moramga. Te, taragl wakai nono munara ta plau dinan, gun yenamga i ama pra. Ba i ama pre mitna edekre, God kogonmo ere pai moramga. Ama bona gana mere topo si, bona sinamga i, taragl kebra yogwa. Taragl kane kane i kide kodidre, God kogonmo ere pai moramga. 31Dumo makan siragl mere erme yogwa i, dudunabuka magigl erukwa pre nono makandigle taragl idre, nedre, eramga ba makandigle taragl nono nomano mina kau sikrabuka paugwa.
32Ana na kumugl abai bogl ikre, yoko moraiglkwa wakai panabiwe diga i, yegl pre diga. Ene yoko meglbi, ene erme makandigle siragl mere moraiglkwa i nomane kane kane ikre, God kogonmo swara eraiglkwa i pre diga. Yagl ta abu ikre, yoko moran, ye God kogonmo ere wan moglsre, God ye siragl mere erabedi prukwa i keme kina gudu prisre, wan morabuka i, kuno erukwa. 33Kuno erukwa ba yagl ta abu inabuka i, ye ebie moglkwa pre makandigle taragl ama kina gudu prisre, ebie wakai morabuka i eragledi prabuka 34pre ye God kogonmo i ege tau kina gudu prikrabuka. Te, abai mo abu ta yagl ta pikrabuka i, ye ama nono Yaglno Kade kogonmo ere wan moglsre, ogo nagie ya nomane, ye mudu moglmere God swara tenabuka i kuno erukwa. Kuno erukwa ba abu ta ede yagl enabuka i, ye wie moglkwa pre makandigle taragl ama kina gudu prisre, wie wakai prabedi erabuka. 35Na diga i, ene yagl abu bogl inaiglkwa i ta mane dikrika ba ene ake ple dinagledi pre diga. Ene yagl abu yoko meglkwa mo bogl igwa i, ene suo akie na ka diga i pre yubun dekre, Yaglno Kade swara sika sidre, mabuno du eraiglkwa i pre diga.
36Ana yagl ta abu inabedi di padiglkwa ba ye abu ikre, yoko moglkwa i, okuo ye abu i na pre kanana sugl moglkwa pre ere kide ere teiedi prisre, inagledi pran, pra, ye inabuka i aglau ta paikrukwa. 37Ba yagl ta ere mogl, ye yene nomane mina konbauna sidre, abu i ta ikragledi prabuka, i ama wakai paugwa. Yoba pere ta ye abu ikrabedi mane dinabuka i pre dikrika ba ye yene nomane wagle ikragledi prabuka i pre diga. 38Yegl pre yagl ta ere mogl, abu ta ye inabedi di padiglkwa i inan, wakai. Ba na di kodiga, erme ege kide plau dinabuka magigl erukwa pre yagl ye yubun i dinagledi prisre, abu ta ikrabuka i, ama wakai kaima paugwa.
39Ana abu ta ede yagl enan, ye wie kor morabuka igne, ye wie kide kodokre, wie moglmara aimadi morabuka paugwa. Yegl paugwa ba ye wie ta goran, abu i yoko morabuka pre ede yagl kor enagledi pran, enabuka aglau ta paikrukwa. Ba abu ta Yaglno Kade pre medrabuka i, ye yagl ta Yaglno Kade pre medrabuka i morabara enabuka paugwa. 40Yegl pre abu ta ye wie ta gorabuka i ede yagl kor enabuka i, wakai paugwa ba God Murubuglo nomane ta naruko, prika i, abu i ye erme yubun tau i dinagledi ede yagl kor ta pikran, tau wakai kaima panabedi prika.
Currently Selected:
1 Korin 7: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission