1 Korin 6
6
Pre mediglkwa yoba ikne ikne kot erekraiglkwa paugwa
1Agrama abarama wagle, ene pre mediglkwa yoba meglmara suna i, yubun ta panan, ene i kot mina edibi, wakai panabo? Ta manugwa. Yoba meda God gumuglo mina du ta moglkrikwa i, ene kotno pre yubu sinaiglkwa i kuno erekrukwa. Ye ene kotno pribi, ene agai goraiglkwa paugwa. Yegl pre enene God yobama meglmara suna i, ere wakai erio! 2-3Nono God yobama munga i, okuo Jisas ede ikne unan, nono kogon podo ta eramga. Kogon podo i, nono jas mere yegl moglsre, makandigle yoba kano pre yubu sidre, angelo ama kano pre yubu sinamga. Ene ka i primo mo prikrime? Kogon podo yegl okuo eramga pre erme makandigle munga igne i ka kebra ta ene meglmara panan, enene ere wakai eraiglkwa i, kuno erabedi prika. 4Na ka kaima diga, yubun ta erme ene pre mediglkwa yoba meglmara suna i ta panan, yoba ta Jisas yugobunomo mina atne morabuka i ene yubuno ere wakai ere tenabuka. Ene meglmara suna i, kagie panabuka mo kagie paikrabuka i ama pra, ene jasno mere yegl morabedi dedibi, ene yubuno ere wakai erabuka i, kuno erumedi prika.
5Na kot pre ka diga i, ene prisre, agai goraiglkwa pre diga. Ene pre mediglkwa yoba meglmara suna i, yoba ta nomane wakai panabuka moglsre, ene kano prisre, yubuno ere wakai ere tenabuka i ta moglkrumo? 6Na yegl diga i siragl pre ene pre mediglkwa i agigle agigle meglkwa ba ene meglmara yubun paugwa igne, enene ere wakai erekre, yoba meda, pre mediglkrikwa gumuglno mina ere wakai eramnedi ere, kot ere agroma teigwa i pre diga.
7Ene pre mediglkwa yoba meglmara suna i, kot ere agroma teigwa i, kide paugwa. Ene yage si kodigwa mere yegl i nogugl edigwa. Yegl paugwa pre, pre meduglkwa yoba ta ene ere kide ere tenabuka mo ene taraglno inagledi bakagl tenabuka i, enene meglmara i ere wakai eraiglkwa i, wakai paugwa. Ba enene ere wakai eraiglkwa mere yegl ta paikran, ene kot ere tekre, kide kodinaiglkwa i, ama wakai panabuka. 8Ba ene tau pre mediglkwa yoba ere kide ere tedre, taraglno inamnedi bakagl teigwa. Na diga i, ene yoba meda meglkwa i ere teigwa pre dikrika ba ene enene agroma abaroma ere teigwa i pre diga. Ene mabuno i kide kaima erikwa pre kide kodio!
9Yoba ta mabuno kide beglkwa i, God yoba kingno mogl, suglno morabara taragl swara ta ikraiglkwa. Ene ka i primo mo prikrime? Yoba ene bakagl tenamnedi ersre, yoba mabuno kide erikwa i ame inaiglmiwe ta dibi, ene prikrio. Kumugl abai mo yagl abu ta kunogl ne wan moraiglkwa mo yoba ta god kibi kamage ere tenaiglkwa mo yagl ere mogl, yene yagl bogl mabuno kide eraiglkwa ya 10te, kunogl nenaiglkwa mo bubuno goraiglkwa mo ye taraglno inamnedi bakagl tenaiglkwa i, ama taragl wakai wakai ikraiglkwa. Te, yoba ta spak eraiglkwa mo yoba kenaglno sinaiglkwa mo mabuno kide yegl ta ere meglbi, ama God yoba kingno mogl suglno morabara taragl swara ta ikraiglkwa. 11Ene tau okna mabuno yegl ere wan meglkwa. Meglkwa ba nono Yaglno Kade Jisas Krais kagie mina God Murubuglomo ene tadaglmeno nigl pai te, koko edidre, ene ere i God yobama edugo, ene erme God gumuglo mina yoba du meglkwa pre ene mabuno yegl ere moglkrio!
Nono ogno nagno mina mabuno tau eun, God kagie kade inabuka i keme eramga paugwa
12Ana ene tau digwa i, No God yobama mogl kodumga pre mabuno kane kane ta eramnedi pramga i, eramga aglau ta paikrumiwe digwa. Ene yegl digwa ba i ta kuno erekrukwa. Ene mabuno kide eribi, mabuno i ene ta ake ple di tekrabuka ba ene si kane sinabuka pre ene erekrio. 13Te, ene tau digwa i, God nono kaya mokna ere yei noro, deno biglko ama ere padigl norukwa pre kidan gunga igne kaya mokna i nomga. I nomnere kuno yegl mere, yagl abu pere bogl kunogl nenamnedi pramga i, eramga pamiwe di, ene tau yegl digwa ba i ta ama kuno erekrukwa. Nono Yaglno Kade God ere mogl, ogono nagino beke yei norukwa i, nono yagl abu ta bogl kunogl nenamga pre beke yeikrukwa. Ye nono bitno moglsre, ogono nagino sugl moran, mabuno wakai boramga pre beke yei norukwa. Ene kaya mokna ya deno biglko pre digwa i, ene prio! Nono ogono nagino i ya te, kaya mokna makandigle paugwa i, God suo akie si dudunabuka. 14Ka kaima si dudunabuka ba nono Yaglno Kade Jisas goglko, God ye yobuglomo mina ere i kor edumere mere yegl, nono ogono nagino ama ere i kor ede norabuka.
15Ana ene prio. God ye nono Krais bogl ere i swara ede kodugwa pre nono ogono nagino i, Krais ogo nagie mere yegl paugwa. Yegl pre nono Krais ogo nagie i pi, konbauna abu bogl i swara edinamno? Ka kaima nono yegl eramga i kuno erekrukwa. 16Yoba ta konbauna abu bogl, mabuno kide ta eribrika i, ye ogo nagie abu i bogl i swara edugwa. Ene yegl ta prikrimo? God kamo beglkwa yegl paugwa, Yagl abu u swara ebrika igne, ye ogono nagino, swara kaima mere yegl pamiwe#6.16 Oknayene Ibo 2.24 dugwa. 17Ba nono munga i, yagl abu u swara eimere mere yegl, nono kiano mina Yaglno Kade bogl u swara kaima pi munga pre mabuno kide yegl ta erekramga paugwa.
18Ana ene yagl abu ta bogl kunogl neigwa mabuno i, kide kodo, teke ede eglke pio! I siragl pre yoba tadaglme tau kane kane erikwa ba ogono nagino ere kide erekrikwa. Ba yoba ye yagl abu pere bogl kunogl neigwa i, ye yene ogono nagino ere kide erikwa. 19-20God ene Mudu Murubuglo togo, ene meglmara atne moglkwa pre ene ogono nagino i, Mudu Murubuglo yugumo mere yegl yogwa. Te, God yene ere mogl, ene topo si ikne edidre, bitno moglkwa pre ene erme meglkwa i, enene pre ta moglkrikwa. God ene bitno moglko, ene God taraglmo mere yegl meglkwa pre ene ogono nagino mina mabuno siragl mere ta eribi, God kagie kade inabuka i keme erio!
Currently Selected:
1 Korin 6: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission