1 Korin 5
5
Yoba ta mabuno kide bogl morabuka i, si meda edio
1Agrama abarama wagle, yoba ka ta di nariko, na prika i, ene meglmara suna yagl ta mabuno kide kaima bogl moglme digwa. Yagl i yene nem ebie ta moglkwa yugo, kunogl ne wan miuriwe digwa. Yoba meda mogl, God kamo prikrikwa i ye mabuno yegl kide kaima yomedi prisre, erekrikwa ba ene pre mediglkwa yoba meglmara suna i yagl ta yegl ere wan moglme digwa pre diga. 2Yagl i yegl ere moglkwa pre ene kide prisre, ye si meda edima, kuno eruko. Ba ene yegl ta erekrikwa. Taragl yegl ene meglmara suna plau dugwa ba ene mogl mitna edidre, wakai munedi pre pai meglkwa.
3Na erme eglke moglka pre ene bogl akie moglkrumga ba na nomana ya dena muduna ene meglmara yei pai moglkwa. Nono akie ta muna, yagl ta mabuno kide bogl moglkwa i siragl mere ere tenamga i, na pre kan ere kodiga 4ba ene eglke meglkwa pre na erme ene siragl mere eraiglkwa i, di tebo, eraiglmedi prika. Nono Yaglno Kade Jisas kagie mina ene makai sinaiglmara i, na ugo, akie muniwedi prisre, ene Jisas yobuglomo mina adigl mogl, 5yagl i ene meglmara suna i moglkrabedi si meda edio! Ene yegl ere tenaiglkwa i, mabunomo yegl paugwa, ene si meda edibi, Satan ye yagl i ogo nagie mina ere kide ere tenan, ye yubun idre, nomane kor inabuka. Ye nomane kor inan, nono Yaglno Kade unabuka igne, ye yubun okuo ta ikrabuka pre diga.
6Ene meglmara suna i, yoba ta mabuno kide kaima yegl ere pai moglkwa ba ene mogl mitna edidre, meglmara wakai munedi prikwa i, wakai ta paikrukwa. Tadaglme ene meglmara suna kanige eribi, yis ede plaua mina edigo, plaua ake poia dumere mere yegl, tadaglme ene meglmara suna i ede u podo enabuka. 7Israel yoba kowano awano dumo Isip kane paigo, God ye Isip yoba wano komono si goglsre, Israel ere yugwa egemo i, Israel yoba poglo di pramnedi sipsip ta si goglsre, kipaimara yugugl i yis ta yekrabedi mudu i meda edidre, wakan swara i, yis edekre keme gaiglkwa. Kuno yegl mere, Israel yoba God ye oglo sumedi prisre, sipsip tawa teigwa i, Jisas moglsre, tawano te kodugwa pre nono u yoba kor pi kodumga. Yegl pre nono tadaglme mabuno kide kodidre, mabuno kor eramga paugwa. 8Israel yoba ege kade ikra ugo, bret yis edekre, gagl neimere mere yegl, nono mabuno kide ya mabuno gua gua yis mere yegl i pi kide kodidre, bret yis edekrimere mere yegl mogl, mabuno wakai ya mabuno kaima keme duglo boramga paugwa.
9Na pepa ta okna bogl teiga i mina na ene di te, yoba ta yagl abu ta bogl kunogl ne moraiglkwa i, ene ye bogl akie wan moglkrio diga. 10Na yegl diga i, yoba togl meda mogl, pre mediglkrikwa i ta mabuno yegl eribi, ene akie wan moglkraiglkwa i pre ta dikrika. Yoba meda mogl, yagl abu ta bogl kunogl neigwa mo yoba pere taraglno bubuno geglkwa mo taraglno kunogl neigwa mo god kibi kamage ere teigwa i, ene ye bogl akie moglkramnedi praiglkwa i, kuno erekrukwa. Yegl pribi, ene dumo makan kide kodidre, ede heven ibo enaiglkwa mere yegl paugwa. 11Ba na yegl pre ta dikrika. Na diga i, yoba ta Jisas pre medile didre, ene agro mo abaro ta mole dinabuka yoba i pre diga. Yoba ta ene agro mo abaro ta mole didre, yagl abu ta bogl kunogl ne morabuka mo yoba taraglno bubuno gogl morabuka i, ene akie wan moglkraiglkwa pre diga. Ama ye god kibi kamage ere tenabuka mo yoba kenaglno si morabuka mo spak ere morabuka mo yoba pere taraglno ta kunogl ne morabuka i, ene ama akie wan moglkrio. Ene meglmara suna yoba yegl ta ere morabuka i, bogl akie wan moglkre, ama kaya mokna akie ame di mogl, nekraiglkwa pre diga.
12-13Yoba meda meglkwa i, nono ye ebrie mabunono nono kan yubu sinamga i, nono kogono ta paikrukwa. God yene kan yubu sidre, ka tage tenabuka. Ba yoba Jisas yugobunomo mina suna meglkwa i, nono ka kaima ye ebrie mabunono kan yubu sidre, di tenamga. Di tomun, nomane ikre, ere pai meglbi, si meda edinamga ama kuno erukwa. I siragl pre God kamo okna beglkwa i mina yegl dugwa,
Yoba ta mabuno kide ere morabuka i,
ye ene moraiglmara suna mogl dinabedi si meda edio!#5.12-13 Lo 13.5, 17.7, 21.21, 22.21-24
di, yegl dugwa.
Currently Selected:
1 Korin 5: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission