1 Korin 4
4
Nigl kogon yoba siragl mere eraiglkwa i, Jisas pre yubu sinabuka
1No God kamo ene beke tomga yoba ta munga i, ene Krais niglmo kogonmo yoba meglmedi no kanio. Te, ene ama yegl praiglkwa, God kamo tau okna teke paugwa i, God kogonmo yoba meglkwa i no di pogl noraiglmedi ye dedugo, ye udre, ka okna teke paugwa i, di norimiwe di, ene yegl praiglkwa. 2Yoba ta ere mogl, ye niglmo kogonmo yoba kogon ta erabedi dedenan, nigl kogon yoba i, ye nem yagl i kogon dedumere yegl, ere kodinabuka paugwa. Kuno yegl mere God no dedugwa pre ye no dede, kogon norumere kuno ere, ere kodinamga paugwa.
3Te, ene ta pribi, Pol ye God kogonmo kuno ta erekrumiwe di pribi, na ta pre yubun dekraglka. Ene yoba tau bogl Pol kogon kuno erumedi praiglkwa mo kuno erekrumedi praiglkwa i, taragl kebra yogwa. Te, na nana ere mogl, kogon siragl mere erika i pre yubu sidre, Wakai erie dinaglka mo, Kide erie dinaglka i ta ama kuno erekrukwa. 4Na nana prika i, God na kogon narumere kuno ere, eriedi prika ba i ama taragl kebra yogwa. Yagl Kade swara na kogon siragl mere erika i, pre yubu sinabuka. 5Yegl pre ene ere mogl, Yaglno Kade Jisas niglmo kogonmo yoba kan yubu sidre, Yoba ta i kogon wakai eruko, tau i kogon wakai ta erekrimiwe digwa i, kide kodio! Yagl Kade yene udre, ye yoba nomano kide wakai siragl mere atne paugwa ya te, kogon siragl mere erikwa i, yene yubu sinabuka. Yubu sinan, yoba kogon wakai ta eraiglkwa i, God yene di wakai yei tenabuka.
6Agrama abarama wagle, na ka tau Apolos pre ya te, nana pre di kodiga i, ene nomane inaiglkwa pre diga. Ene God kamo mabuno siragl mere erio dumere yegl keme eribi, ene Jisas niglmo kogonmo yoba kan yubu sidre, ta kagie ake mitna ede, ta kagie ake atne ede, erikwa mabuno i, kide kodinaiglkwa. 7Ene tau prikwa, mogl mitna edumnedi pre, no Jisas niglmo kogonmo yoba munga i, kan atne ede, no jasno mere yegl mogl, no kan yubu sigwa i, ira ene mogl mitna edio dume? Ene yobuglno ya nomane erme paugo, meglkwa i, ene enene primere idre, meglmo mo God ene togo, meglme? God swara nomane ya yobuglo ene togwa pre ene enene mogl mitna ede, no kogon yoba kan, yubu sinaiglkwa i, kuno ta erekrukwa. Mogl atne ede molo.
8Ene mogl mitna edumnedi pre, no kogon yoba kan atne edigwa i, taragl wakai mudu ene meglmara kau sugwa pre ene taragl tau ama inakiurikwa mere yegl paugwa. Ene king mere yegl munedi pre, no pia si meda edigwa mere yegl kaniga. Ene kaima king moraiglkwa i, wakai paugwa. Nono okuo akie king mogl, ame wakai didre, wakai moramga kuno erukwa ba erme yegl ta paikrabuka.
9No Jisas dedugwa yoba munga i, no erme king mere yegl mogl, ame wakai dikrumga. God no dedugwa i, no mogl atne kaima edidre, yubun inaiglmedi no dedugwa pamedi prika. Rom soldia meglkwa i, ege tau kuda ikne si kane si yudre, nogugl si geglko, kamga. Kane yoba si kane si yuigwa i, yubun podo idre, ame wakai dikrimere mere yegl, no Jisas dedugwa yoba kuno yegl munedi prika. Yoba uglo kogl koglo meglkwa i mo, angelo pra, no toro kan meglko, yoba no ere kide keme ere norikwa. 10No Krais kogonmo erumnara i, yoba no du erimedi no kanigwa ba ene tau mogl mitna edidre, prikwa i, enene Krais bogl u swara pi munga pre nomane podo i kodumniwe di, ene yegl prikwa. Yoba no kanigwa, yobuglno ya kagno ta paikrumedi no kanigwa ba ene prikwa, yobuglno ya kagno kade pai kodumedi prikwa. Ene yegl prisre, mogl mitna edigwa i, kuno ta erekrukwa. Nono akie mogl atne edinamga kuno erukwa.
11No Jisas dedugwa yoba munga i, okna munga mo erme munga i pra, ege tau mere kidan goglsre, nigl goglsre, erumga. No yuguno toglno ta yeikruko, kugugl gagl wakai ta edekrumga. No yegl mere mungo, yoba ama no ere sigwa. 12No nono ogono mina kogon podo kide erumga. Te, yoba no ka kide di norikwa igne, no di ikne ede tekre, no ka wakai keme di tomga. Te, no ere kide ere norikwa igne, no adigl mogl pai munga. 13Yoba no kagno ere kide erikwa igne, no ka wakai di ikne ede tomga. Yegl erumga ba yoba okna no kanigwa mo erme no kanigwa i pra, taragl ta kubuno kide erukwa mere yegl no kandre, no kan arpi sigwa.
14No Jisas dedugwa yoba yubun podo yumgo, ene ame wakai di mogl, wakai munedi prikwa pre diga i, ene agai goraiglkwa pre dikrika ba ene nomane inaiglkwa pre diga. Ene na gagrama mere yegl meglko, na dena muduna ene teiga pre ene ka beke teiga i, ene nomane inaiglkwa pre na ka i diga. 15Na komono kana Krais Jisas kamo wakai yu ene di teigo, ene pre mediglkwa pre na ene neno mere yegl moglka. Okuo yoba mere kide kaima udre, Krais kamo ene beke tebi, wakai panabuka ba ye ene neno mere yegl ta moglkraiglkwa. Na swara ene neno mere yegl moglka. 16Na ene neno mere yegl moglko, ene na gagrama mere yegl meglkwa pre na mogl atne edidre, mabuno siragl mere boglmere yegl, ene ama yegl boraiglmedi prika. 17Yegl pre na Timoti dede, ene meglmara enabedi dediga. Timoti moglkwa i, na wana kaima mere yegl mogl, nono Yaglno Kade kogonmo ege ege ere pai moglko, na ye dena muduna teiga. Ye ene meglmara pidre, na Krais duglo boglsre, mabuno siragl mere boglka i, boglo kugl tenan, ene poglo di prisre, duglo boraiglmedi prika. Na Jisas yugobunomo bage bage makai simara i wan pidre, ka siragl mere beke teimere yegl, mabuno ama yegl boglka pre ene ama mabuno yegl beglbi, wakai panabedi prika.
18Ene meglmara suna i, yoba tau prikwa, na Pol kor ta ikne ukrabuka pamedi prikwa pre ye na kana prakiure, mogl mitna edigwa. 19Yoba tau yegl prikwa ba Yagl Kade na ene meglmara unatnedi pran, na tabre udre, yoba tau ene meglmara mogl mitna edigwa i kanaglka. God yobuglo bogl togo, kogon wakai erimo mo ka drano mina keme dimo mo i, na doko kanaglka. 20I siragl pre God yoba kingno mogl, ye suglno moglkwa i, ye ka drano mina keme dinaiglmedi erekrukwa ba ye kogonmo eraiglmedi yobuglo bogl togwa. 21Ana enene prio. Ene mogl mitna edidre, mabuno tau erikwa i kide kodo, nomane kor ta ibi, na ene meglmara udre, ka wida di didre, dena muduna tenaglka. Ba ene na kana sedibi, na ene meglmara u ka giglede didre, kuba mere yegl ene sinaglka paugwa. Ene siragl eramnedi prime? Ene meglmara paugwa.
Currently Selected:
1 Korin 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission