1 Korin 3
3
Pol ya Apolos ye nigl kogon yoba keme miurka
1Agrama abarama wagle, nono okna akie munga igne, na ene gak kebra mere yegl meglmedi kandre, ka nogugl ta praiglkwa paugwa i keme ene beke teiga. Ene Krais pre medigl, ede u ye yugobunomo mina suna wigwa ba ene deno muduno goglo paugwa i duglo bogl pai meglkwa. Mudu Murubuglo ene yobuglo tomara i mina ene adigl gi di meglma, na ka mem tau atne paugwa i ene beke teigo, ba na ene ta beke tekrika. 2Gak kuglabu meglkwa i, manoma kaya mokna tekre, am keme teimere yegl, na ene gak kebra mere yegl meglmedi kan, ka nogugl ene ta pre pogl sinaiglkwa i keme beke teiga. Te, ene erme meglkwa i, ama gak kebra mere yegl mogl pai meglkwa.
3Na ene gak kebra mere yegl mogl pai meglme diga i, ene deno muduno goglo paugwa i duglo bogl pai meglkwa pre diga. Enene ikne ikne wakai kankre, kigl nonga digwa pre ene deno muduno goglo paugwa duglo beglkwa i nogugl edigwa. Ene yoba meda meglkwa i mabuno erimere mere kuno yegl ere wan meglkwa. 4Ene tau ere mogl, No Pol duglo buniwe digo, te ene tau No Apolos duglo buniwe digwa i, ene yoba meda mabuno erimere mere kuno yegl erikwa pre na diga.
5Apolos moglkwa i, ye ene tau Yaglno Kade moglmkana? Mo, na Pol moglka i, ene tau Yaglno Kade moglkana? Ta manugwa. Na Apolos bogl nigl kogon yoba keme muglka. Yagl Kade no suo akie kogon i noruko, no u kogon i erubuglko, ene Jisas kamo prisre, pre mediglkwa. 6Na ede okna udre, kogon ene meglmara erika i, kaya mokna yubo yu suduglka mere yegl paugwa. Te, Apolos okuo udre, kogon ene meglmara erukwa i, na kaya mokna yubo suduglka i, nigl togwa mere yegl paugwa. No suo akie yegl erubuglka ba God swara kogon podo ene meglmara ersre, kaya mokna yubo i pare, wi si mogo ede mitna enabedi erukwa. 7Na kaya mokna yubo suduglka i ya Apolos nigl togwa i, no suo akie kagno kade ta inabuglka i, kuno erekrukwa. God swara kaya mokna yubo pare, wi si ede mitna enabedi erukwa pre ye swara kagie kade inabuka paugwa. 8Yoba ta kaya mokna ere yaiglkwa i, ya kaya mokna nigl teigwa i, kaya mokna borabedi kogon akie erikwa. Te, ye swara swarade kogon erimere i, topono inaiglkwa. 9Ene meglkwa i, God kaya mokna ere yaglkwa mere yegl meglkwa. Te, na Apolos bogl akie ye kaya mokna ere yaglmara suna i kogonmo erubuglka mere yegl paugwa.
Ana na ka ebrie swara ta ama dinaglka. Ene pre mediglkwa yoba ta dumo Korin meglkwa i, God yugumo mere yegl meglkwa. 10God na yoko kaima ake ple di naruko, ye kogonmo eragledi nomane podo idre, ene meglmara u kogon mabuno bogl erika. Na erika i, yugu kei kanigwa yoba ere mogl, yugu kei ede mitna enamnedi kobuglo tau mabunomugl mabuno bogl padiglmere mere yegl erika. Na yegl eriko, yoba tau na moknamugl udre, na kobuglo bogl padigl kodimara tebe i, yugu kei ede mitna eigwa. Yegl erikwa i wakai paugwa ba ye kan kun ersre, kei ede mitna enaiglkwa paugwa. 11Te, ene prio. Na Jisas Krais kamo yu ene di teiga i, kobuglo makandigle bogl padigl kodiga mere yegl paugwa pre yoba ta konbauna pere ta yomedi ka kor ta yu ene di tebi, kuno erekrabuka.
12Ana na di kodiga. Kogon yoba ta na kobuglo tau makandigle bogl padiglmara yugu kei ede mitna enabuka i, wakai paugwa ba ye kan kun ersre, kei ede mitna enabuka paugwa. Ye God kogonmo wakai eran, ye taragl wakai, gol ya silva ya kobuglo tau mige podo boglkwa i idre, yugu wakai kaima kegwa mere yegl panabuka. Ba ye kogon gua gua eran, ye taragl wida dugwa, ede ya ken ya indaun idre, yugu gua gua kegwa mere yegl panabuka. 13Okuo ege ta yenan, God ye kogonmo yoba mudu kogon wakai erimo mo kide erimo mo i, ere kanabuka. Ye yugu siragl mere keigwa i God ere kanagledi eran, doga mere yegl u yugu i denabuka. 14Doga u yugu i ta dekran, God ye kogon yoba i kogon wakai erumedi, topo tenabuka. 15Ba doga u yugu ta de tege eran, kogon yoba i topo ta ikrabuka. Yoba ta yuguno gaiglko, taragl ta ikre, teke ede meda eimere mere yegl, ye yene doga aimadi domara i dekrabuka ba topo swara ta ikre, ede heven ibo enabuka.
16-17Na ka ebrie ta yugu pre diga i, ene pre pogl sinaiglmedi prika. God ene i pere edidre, ene ere i ye yobama edugo, ene Mudu Murubuglo bogl akie meglkwa pre ene akie God yugumo mere yegl meglkwa. Yoba ta ene meglmara si pere pere edidre, ere kide ere tenan, ye God yugumo ere kide ere togwa mere yegl panabuka pre God yoba i ama ere kide ere tenabuka.
18Ene mem ta paikrumara, bitno podo pamedi pre, mogl pere pere edigwa i, kide kodio. Enene bitno podo pamedi prikwa i, yoba meda ere mogl, yoba bitno podo pamedi primere mere yegl, ene prikwa ba i ta kuno erekrukwa. Yoba meda meglkwa i, ye yoba God nomanemo pamere yegl igwa i bitno ta paikrumedi kanigwa ba ene God nomanemo pamere yegl nomane ibi, swara i wakai panabuka. 19I siragl pre yoba meda ere mogl, yoba bitno podo pamedi prikwa i, God gumuglo mina i, ye du erikwa. Ye kamo mina yoba ta okna ibo mem i pre yegl boglkwa,
Yoba tau bitno podo pamedi prisre, yoba bakagl te, ere kide ere tenamnedi prikwa
ba ye siragl mere ere, yoba ta tenamnedi primere yegl, God kuno yegl mere ere ikne ede tedre, ye ere sumiwe#3.19 Jop 5.13
di, yegl boglkwa. 20Te, ye kamo mina ama yegl beglkwa,
Yoba tau yene bitno podo pamedi prikwa
ba God kanugwa i, ye nomano i taragl yoko yomedi kanumiwe#3.20 Giglage 94.11
di, yegl beglkwa.
21-22Ana ene bitno podo pamedi pre, yoba pere pere duglo buniwe didre, yoba i kagno kade teigwa i, kide kodio! Na Pol ya Apolos ya Pita, no God niglmo kogonmo yoba keme munga. God no kagno kade inaiglmedi dedekrukwa ba ene ake ple di tenamga pre dedugwa. Yegl pre God ye no dedugwa swara i, ene di wakai yei tedre, kagie kade teo. God no ene ake ple di tenaiglmedi dedidre, te taragl mudu ama ene wakai moraiglmedi te kodugwa. Ene makandigle taragl idre, wakai moraiglkwa i God ene tedre, ene aimadi kamin kor moraiglkwa i ama ye ene te kodugwa. Okuo, ene geglbi, ye ama ene ogono nagino ere i kor edenagledi di padigl kodugwa. Yegl di padiglsre, God ye taragl kane kane erme ene meglmara plau dinabuka i ya okuo plau dinabuka i mina ene ere wakai keme ere tenagle dugwa. 23Ene Krais yobama mogl kodigo, Krais ye God Nem moglmara atne moglkwa pre ene God yobama ama meglko, ye taragl mudu ene te kodugwa pre ene ye swara kagie kade teo.
Currently Selected:
1 Korin 3: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission