1 Korin 2
2
Pol okna siragl mere dumo Korin umere
1Agrama abarama wagle, okna na siragl mere ene meglmara udre, God kamo ene beke teiga i, ene prio! Na yoba bitno podo paugwa, udre, ka dogon erukwa dimere yegl ta dikrika. 2I siragl pre komono kana na nomana mina yegl mere kinana gudu prika, na ene meglmara ebo, ene bogl akie mun, na ka ene beke tenaglka i, ka kane kane ta beke tenagledi prikrika. Na ene ka beke tenagledi prika i, Jisas Krais ede prak mina kogon erukwa ka i swara keme beke tenagledi prika pre ene meglmara wiga. 3Te, na ene meglmara eiga igne, na yobuglna podo pamedi prisre, kogon erekrika. Na yobuglna ta pai kuno erekrumedi pre, kudugl gogl, ege mere na ogona kaglna sugwa. 4-5Na God kamo yu ene beke teiga i, na ka nogugl keme diga. I siragl pre yoba bitno podo paugwa, u yoba wakai praiglmedi ka dogon erukwa dimere yegl, na ta dibo, kide panabedi prika. Na ka dogon erukwa dibo, na ka dinaglka i, ene dogon goglsre, God kamo pre mediglbi, i ta kuno erekrabuka. Na prika, God yobuglomo mina ene kamo pre mediglbi, kuno erabedi prisre, God kamo nogugl keme ene beke teiga. Na yegl ere, ene beke teigo, Mudu Murubuglo kaima na primere yobuglo podo kaima ere, ene pre medraiglmedi eruko, ene God kamo pre mediglkwa.
6Ana na ene di te kodiga. No koragle u yoba God kamo di tomga igne, ka nogugl keme dumga. Yegl dumga ba yoba ta God kamo pre ede suna udre, gak kebra mere moglkre, yake ede pi yoba mere meglkwa i, no ye nomane mere inaiglmedi ka mem tau atne paugwa i, ama di tomga. No yoba nomane inaiglmedi ka mem tau atne paugwa di tomne diga i, makandigle yoba bitno podo pamedi prisre, ka dimere yegl ta dumga pre dikrika. Yoba erme makandigle mogl, bitno podo paugo, yoba kade munedi prikwa i, ye ege sugunagle keme yoba kade meglkwa ba okuo u taragl yoko kaima enaiglkwa pre ye nomano paugo, dimere yegl no ta dikrumga. 7No God nomanemo siragl mere pamere i keme yoba nomane inaiglmedi ka beke tomga pre diga. God nomanemo podo kide paugo, ye okna dumo makan ere yeikrukwa igne, nono ere inagle di padiglsre, ye abuglagemo podo sumara ye bogl akie wakai kaima moramniwe di, yegl di padigl kodugwa. God yene nomanemo podo pamara i mina ka yegl di paduglkwa i, okna teke paugwa ba erme ede nogugl ugo, no yoba di te wan munga.
8Yoba kade makandigle meglkwa i, ye God nomanemo siragl mere paugwa i ta pre pogl sikrikwa. Ye ta pre pogl sima, ye nono Yaglno Kade Jisas, kagie podo kide paugwa i ta ede prak mina si goglkriko. Ba ye pre pogl sikrikwa pre Jisas si geglkwa. 9Ana yoba kade makandigle meglkwa i, ye God nomanemo siragl mere paugwa i ta pre pogl sikrikwa i pre God kamo mina okna ibo yegl beglkwa,
God yoba okuo siragl mere ere wakai ere norabuka i,
yoba yene nomano mina pre kan erekrikwa.
Nono yoba ta God deno muduno tomga i, God ere wakai kaima ere noragledi ka di paduglkwa
ba ye siragl mere erabuka i, yoba yene nomano mina ta pre pogl sikrimiwe#2.9 Aisaia 64.4
di, yegl beglkwa 10God ye siragl mere ere wakai ere noragledi ka di paduglkwa i, yoba ka kaima yene nomano mina ta pre pogl sinaiglkwa kuno erekrukwa ba God Murubuglomo yene no di noruko, prumga.
Ana God Murubuglomo no ka yegl di norukwa i, kuno erukwa. I siragl pre God Murubuglo ye taragl mudu pre pogl sidre, God nomanemo tau pai atne kaima edugwa i ama akie pre pogl sugwa. 11Nono yoba munga i, nomano siragl mere paugwa i, yoba pere ta kankrikwa ba no nono pre kan erumga. Kuno yegl mere God nomanemo siragl mere paugwa i, yoba munga i ta pre kan erekunga ba God Murubuglo swara pre pogl sidre, di norukwa.
12God nono siragl mere yoko kaima ere wakai ere norukwa i, ye nono pre pogl sinaiglmedi prisre, ye Murubuglomo norukwa. God Murubuglo nono munara udre, nomane kor norukwa pre yoba meda meglkwa i nomano pamere yegl, nono nomano yegl ta paikrukwa. 13Te, God siragl mere yoko kaima ere wakai ere norukwa i, God Murubuglo no Jisas dedugwa yoba munga i di noruko, no yoba di te wan munga. Makandigle yoba nomano pamere i no ta di noriko, no prisre, yoba di te wan moglkrumga ba God Murubuglo yene nomane norsre, ka di norumere i, no yoba di te wan munga.
14God Murubuglo ka di norukwa i, nono Mudu Murubuglo ta yumga i keme pre pogl sinamga. I siragl pre God Murubuglo swara no pre pogl sinaiglmedi erukwa. Yoba ta God Murubuglo ikrikwa i, ye pre pogl sinaiglkwa kuno erekrukwa. God Murubuglo ye meglmara ta moglkrukwa pre ye kamo prisre, ka kaima pamedi pre, mem wakai pamedi praiglkwa i ta kuno erekrukwa. 15Nono God Murubuglo ta yumga i, ye ka kane kane di norabuka i pre yubu sidre, pre pogl sinamga i, kuno erukwa. Kuno erukwa ba yoba meda meglkwa i nomano pai pere ta edugwa pre ye nono nomano ya mabunono pre yubu sinaiglkwa i ta kuno erekrukwa. 16Krais nomanemo pamere yegl, God nono nomane yegl norukwa. Ba yoba meda meglkwa i, ye God nomanemo i pre pogl sinaiglkwa kuno erekrukwa. Mabuno yegl pre God kamo mina bage ta okna yegl beglkwa,
Yoba swara ta yene Yagl Kade nomanemo mudu pre pogl sidre,
Yagl Kade ka ta beke tomo? Ta manugwa.
Yoba yene ta God nomanemo pre pogl sikrimiwe#2.16 Aisaia 40.13
di, yegl beglkwa.
Currently Selected:
1 Korin 2: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission