1 Korin 1
1
1 Na agrama abarama wagle ene Korin yoba meglkwa i, na Pol pepa magigl i ene bogl teiga. God yene prumere na Krais Jisas dedugwa yoba ta moratnedi na agle dugo, na kogon i ere wan moglka. Te, agro Sostenes no akie muglko, pepa i boglka pre ye ama ene wakai we di togwa. 2Ana na pepa magigl bogl teiga i, ene yoba dumo Korin kipadre, God yugobunomo mina ede suna u meglkwa i, bogl teiga. God okna ere mogl, ene ye yobama moraiglmedi agle didre, Krais Jisas kogon erumara i mina ene ye yobama meglmedi kan kodugwa. Na pepa magigl boglka i, ene pre boglsre, te ama God yobama uglo kogl koglo ta mogl, Krais Jisas no ake ple di norabedi agle di meglkwa i ama pre pepa magigl i boglka. Jisas ye nono Yaglno Kade moglsre, te yoba uglo kogl koglo i ama Yaglno Kade moglkwa.
3Ana na prika i, Neno Kade God ya nono Yaglno Kade Jisas Krais, ye ene yoko kaima ere wakai ere tedre, deno muduno wida di, ene meglmara padigl tenabrika.
Pol ye God di wakai yei togwa
4Na ene Korin yoba ege ege poglo di pre, God di wakai yei teiga. I siragl pre God ere mogl, ye Krais Jisas kogon erumara i mina ene ere wakai kaima ere togwa. 5Ye ene ere wakai kaima ere tome diga i, ene ye kogonmo kane kane eraiglmedi nomane ya yobuglo togwa i pre diga. Ye yegl mere ere, ene ere wakai ere togwa pre ene ye kamo mudu pre pogl sidre, yoba di tenaiglkwa i, kuno erukwa.
6No okna Krais kamo yu ene di tomgo, ene prisre, pre mediglkwa. Pre mediglko, Krais kamo i ede mere yegl bogl, duglane idre, ene meglmara si gigle dugwa. 7Yegl erukwa pre God ere mogl, ene ye kogonmo pere pere eraiglmedi nomane ya yobuglo te kodugwa. Yegl pre ene erme nono Yaglno Kade Jisas Krais unabedi kie ere mogl, sugl meglkwa ege i, ene ye kogonmo eraiglkwa kuno erukwa. Taragl swara ta okuo idre, kogonmo eramnedi sugl moraiglkwa i ta kuno erekrukwa.
8Ana nono Yaglno Kade Jisas Krais, ye ene adigl giglede moraiglmedi aimadi kamin yobuglo bogl te pai moglsre, okuo ye ikne unabuka. Ye ikne unabuka igne i God ye ene yoba du meglmedi kandre, ka tage tekrabuka. 9God ene yoba du meglmedi kanabuka i, ye ege ege ka dumara adigl moglkwa pre ye dumere kaima yegl erabuka. Te, God ama yene ere mogl, ene ye Wam Jisas bogl swara kaima moraiglmedi agle dugo, ene Krais Jisas, nono Yaglno Kade i bogl u swara pi, swara kaima mogl kodigwa.
Pol Korin yoba deno muduno swara yeikrikwa pre dugwa
10Agrama abarama wagle, na erme Jisas Krais, nono Yaglno Kade moglkwa i dra idre, ene ka giglede di tenaglka. Ene kigl nonga didre, mogl pere pere edigwa i kide kodo, nomano ya deno muduno swara kaima yeio. 11Na yegl diga i, siragl pre abu Kloe yobama meglkwa i tau u na moglmara udre, ene kigl nonga dimiwe di, na di nariko, prika. 12Ene tau ere mogl, No Pol duglo buniwe digo, te tau ere mogl, No Apolos duglo buniwe digwa. Yegl digo, te ene tau digwa i, No Pita duglo buniwe digo, tau ere mogl, No Krais swara keme duglo buniwe digwa. Ene yegl mere didre, kigl nonga dimiwe digo, prika.
13Ene prio! Krais Jisas swara moglkwa pre ye yobama munga i ama u swara kaima moramga kuno erukwa. Ene tau Pol duglo buniwe digwa i, na Pol ene pre ede prak mina golo? Mo, na Pol moglka i, ene na pre mediglkwa i nogugl edinamnedi nigl biglmo? Ta manugwa. Ene Jisas swara pre mediglkwa i nogugl edinamnedi nigl biglkwa. 14-15Na ene meglmara moglka igne, na nana yoba tau mere nigl bugl tekrika i, wakai prika. I siragl pre yoba ere mogl, Pol no nigl bugl norukwa pre ye no Neno Yagle moglmiwe di, yegl dinaiglkwa i ta kuno erekrukwa. Na yagl suo keme, Krispus ya Gaius nigl bugl teiedi prika pre wakai prika. 16Na ene meglmara yagl suo keme nigl bugl teie diga ba erme na prika, yoba tau ama akie bugl teidi prika. Na Stefanas nem agiglema ta meglkwa i ama nigl bugl teiga. Te, na yoba tau ama nigl bugl teo mo tekrio mo i, na kinana yogwa. 17Ba Krais kogon narsre, na dedugwa i, na Yoba nigl bugl to! dikrukwa. Ye dugwa i, Na kana wakai i, i pi yoba di to! didre, na dedugwa. Ye na yegl eratnedi dedugwa pre na Krais ede prak mina goglkwa kamo yoba di te wan moglka i, yoba pre pogl sinaiglmedi ka nogugl keme di wan moglka. Makandigle yoba bitno podo paugwa, yoba wakai praiglmedi ka dogon erukwa kane kane dimere yegl na ta dikrika. I siragl pre na ka dogon erukwa yegl ta dibo, yoba tau wakai praiglkwa ba Krais ede prak mina goglkwa ka i na ere i taragl yoko ediga mere yegl panabuka pre kide panabuka. Yegl pre na Krais kamo nogugl keme di wan moglka.
Jisas kogon erumara i, God nomanemo ya yobuglomo i nogugl edugwa
18Ana Jisas nono ere inagledi ede prak mina goglkwa ka i, no yoba di te wan munga ba yoba tau, ye doga kade domara enamnedi ere meglkwa i ye prisre, no bitno ta paikrukwa, du ere, ka i di norimedi prikwa. Yoba tau i, yegl prikwa ba God nono ta ere yugwa, ede heven ibo enamga munga i, nono pre pogl sumga. God yobuglo ersre, yoba ere yugwa i, ye Jisas ede prak mina goglkwa kamo swara i mina, yoba ere yugwa pre ka swara i podo pamiwe di, yegl pre pogl sumga. 19Te, yoba tau ye bitno podo pamedi prisre, no bitno ta paikrumedi prikwa i pre God kamo mina bage swara ta okna yegl beglkwa,
God yegl dugwa, Yoba ta ye nomano ya bitno podo pamedi prikwa yobamo i,
ye nomano ya bitno i ta paikrumedi i nogugl edinaluwe#1.19 Aisaia 29.14
di, yegl beglkwa.
20Ana nono pre pogl sinamga. Makandigle yoba nono ye bitno podo pamedi kamga mo sule podo dimedi kamga mo ka kaugo wakai kaima simedi kamga i, i taragl yoko kaima yogwa. God ye yoba togl meda meglkwa i bitno ta paikrumedi i nogugl ede kodugwa. 21God nomanemo podo paugwa pre ye okna ibo pre kan erukwa i, ye yoba kanige eran, ye yene nomano duglo boglsre, God moglkwa i ta pre kan eraiglkwa, i kuno ta erekrumedi God komono kana pre kan ere kodugwa. Te, yoba munga i, no nono nomano duglo boglsre, ede God moglmara enamga kuno ta erekrumedi ye ama pre kan ere kodugwa. Yegl pre God ye yene wakai prumere konbauna pere ta i nogugl ede, yoba Jisas kamo i pi yoba tau di tebi, yoba ta prisre, pre medraiglkwa i, ye ere inagle dugwa. No Jisas kamo di wan munga i, yoba tau mere prisre, no du erimedi prikwa ba du erekunga. God ye Jisas kamo swara i mina yoba ere yugwa pre ka i podo paugwa.
22Ana Juda yoba meglkwa i, ye kimagl ta eribi, kandre keme, pre medramnedi prikwa. Te, Grik yoba meglkwa i, ye bitno podo panabuka i swara konbauna doko wan meglkwa. 23Yegl erikwa ba no Juda yoba ya Grik yoba suo akie ka swara keme di tomga. Krais ede prak mina goglkwa ka swara i di te wan munga ba Juda yoba tau mere ka i prisre, kide pre, pre medrakiurikwa. Te, Grik yoba tau mere no ka dumga i prisre, no du erimedi prikwa. 24Juda yoba ya Grik yoba tau mere yegl prikwa ba God nono agle dugo, no Juda yoba mo Grik yoba ta ede suna umga i, nono God nomanemo ya yobuglomo siragl mere i nogugl edugwa i, pre pogl sumga. Ye Jisas kogon erumara swara i mina nomanemo podo paugwa ya yobuglomo podo paugwa i nogugl edumedi pre pogl sumga. Yegl pre Krais kamo swara i, wakai kaima pamedi prumga. 25Jisas ede prak mina goglkwa kamo i, yoba tau yene nomano podo pamedi prikwa i prisre, ka i mem wakai ta paikrumedi prikwa, ba i ta manugwa. God ye Jisas kamo swara i mina yoba i egre atne edidre, God swara nomanemo podo paugwa i, i nogugl edugwa. Te, yoba tau yene yobuglno podo pamedi prikwa i, Jisas kamo i, yobuglomo ta paikrumedi prikwa. Ba ka swara i mina God swara yobuglomo podo pamedi i nogugl edidre, yoba yobuglno ta paikrumedi i nogugl edugwa.
26Agrama abarama wagle, ene siragl mere meglko, God ene agle dugo, ede suna wigwa i, enene prio! Yoba ene kanigwa i, ene tau mere bitno podo ta paikruko, kagno kade ta paikrumedi ene kanigwa. Te, ene tau mere nenoma agroma bogl kagno ta paikruko, yoba kade ta moglkrimedi ene kanigwa. 27Ene tau mere yoba yoko meglko, yoba ene bitno ta paikrumedi kanigwa ba God yene ene agle dugo, ene ede suna wigwa i kandre, yoba ye yene bitno podo pamedi prikwa yobamo i God ye agai goglsre, bitno ta paikrumedi kanaiglmedi erukwa. Te, ene tau mere yoba ene yobuglno ta paikrumedi kanigwa ba God yene ene agle di i suna edumara i mina yoba ye yene yobuglno pamedi prikwa yobamo i agai goglsre, yobuglno ta paikrumedi kanaiglmedi erukwa. 28Te, yoba togl meda meglkwa i kanigwa, ene yoba tom tai, yoba yoko, kagno paikrukwa meglmedi kanigwa. Yegl kanigwa ba God ene agle dugo, ene ede suna wimara i mina ye i nogugl ede, yoba ta kagno pamedi prikwa yobamo i kagno ta paikrumedi i nogugl edugwa. 29God gumuglo mina yoba ye yene kagno ake mitna ede dinaiglmedi prukwa pre mabuno yegl erukwa.
30God yene swara eruko, ene erme Krais Jisas yugobunomo mina suna meglkwa. God ye Jisas swara mina nono ye mabunomo pre pogl sinaiglmedi nomane norukwa. Te, Jisas swara nono kumapno tedre, no topo si ikne edugo, nono erme God yobama moglsre, God gumuglo mina ama yoba du mogl kodumga. 31Yegl pre God kamo bage ta okna beglkwa dumere yegl, ye swara kagie kade inabuka paugwa. God kamo bage ta okna ibo beglkwa i, yegl beglkwa,
Yoba ta ye yene kagie ake mitna edenabuka i, kuno erekrukwa.
Ye yoba ta kagie ake mitna edenagledi pran, Yagl Kade kagie swara ake mitna edenabiwe#1.31 Jeremaia 9.24
di, God kamo yegl dugwa.
Currently Selected:
1 Korin 1: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission