1 Jon 1
1
God bogl si dakagl moramga
1No ene ka di tomga i, yoba ta okna kaima ibo moglsre, okuo ede maginagle ugo, no gumoglno mina ye kandre, ka dugwa prisre, ye ogo nagie ama ake prumga i, nono kor aimadi moramga di poglkwa yagle Jisas Krais moglme dumga.
2Ye kor aimadi moramga di noruko, no pre kan erumga. Pre kan ersre, ene di te, Ye Nem bogl miurko, udre, kor aimadi moramga norume dumga. 3Didre, ye pre kan erumga i, nono akie si dakagl moramga pre ene di tomga. Nono kaima Neno Kade God ya ye Wam Jisas Krais bogl akie si dakagl munga pre yegl dumga. 4Te, no ka erme ene bogl tomga i, ene pribi, nono akie gun podo yenamga pre bunga.
Abuglage sumara wan moramga paugwa
5Ye ka ta dugo, no erme ene di tomga i, God moglmara ibo, abuglage keme sugo, mim ye moglmara ka kaima ta paikrukwa. 6Yegl pre nono God bogl si dakagl muniwe didre, mim erumara mogl, tadaglme ere mun, nono ka kibi didre, God kamo kaima pamere mere yegl ta erekunga. 7Ba God ye abuglage mina moglmere yegl, nono ama abuglage sumara wan mun, God yobama bogl akie si dakagl moramga, te, ye Wam Jisas bormaimo i, nono tadaglmeno mudu koko ede norabuka.
8Ana nono tadaglmeno ta paikrume dumun, no nono bakaunga mere yegl panabuka, te, ka kaima mabuno i, nono munara paikrukwa mere yegl panabuka. 9Ba nono tadaglmeno God di pogl tomun, God ye ere noragle dumere yegl ere, tadaglmeno koko ede norsre, mabuno kide siragl mere erumga i, kide kodo norabuka. I siragl pre God ege ege ka dumara adigl moglsre, mabuno du keme ere norukwa. 10Ba nono tadaglme ta erekrumniwe dumun, nono God ka kibi dumiwe dumga mere yegl panabuka, te, ye kamo nono munara paikrukwa mere yegl panabuka.
Currently Selected:
1 Jon 1: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission