1 Jon 2
2
Tadaglme erekre, God mabunomo duglo boramga paugwa
1Na gagrama wagle, ene tadaglme ta ere dinaiglkwa pre ka i boglka. Ba ene tadaglme ta eribi, Jisas Neno Kade moglmara moglsre, no kano di moglmiwedi prio. Jisas Krais ye mabuno du keme erukwa yagle moglkwa. 2Moglsre, ye God dem muduo aragan erabedi nono tadaglmeno kumap tedre, te yoba mudu uglo koglo koglo meglkwa i, ama kumapno te kodugwa moglkwa.
3Ana Krais erio dumere i ta ere mun, nono ye kaima pre kan erumnedi kanamga. 4Yoba ta Krais pre kan eriwe dinabuka ba ye mabuno erio dugwa i duglo boglkran, yoba i ka kibi dugwa. Te, ka kaima i, yoba i moglmara ta paikrukwa. 5Ba yoba ta Krais kamo duglo boran, God ye dem muduo togwa mabuno i, ye moglmara kau sugwa mere yegl panabuka. Te, nono God bogl si dakagl muno mo moglkuno mo i, 6nono Jisas ebrie mabuno erumere yegl erumun, nono ye bogl si dakagl muniwedi kanamga.
7Ene na dena muduna teiga meglkwa i, na ka kor ta duglo boraiglmedi ene di tekrika. Ba ka okna bogl teigo, igwa ikra, kor diga. Ene deno muduno ikne ikne teo dugwa lo i, aimadi pai moglkwa. 8Ba Lo i erme ene meglmara mogo kor koglkwa mere yegl paugwa. I siragl pre Krais Lo i ka kaima duglo boglko, ene ama kaima duglo beglkwa. I siragl pre Krais abuglagemo ene meglmara si moglko, mim erukwa i, dudinagledi erukwa.
9Ana yoba ta abuglage sumara wan mole didre, ye agigle ta kide kanan, ye abuglage sumara wan moglkrukwa ba mim erumara wan mogl pai moglkwa. 10Yoba ta ye agigle dem muduo tenan, abuglage sumara wan moglsre, ye agigle yage si dinabedi erabuka. 11Ba yoba ta ye agigle kide kanan, ye mim erumara wan moglkwa pre ye konbo ta omara i, kan pogl sikrukwa. Te, mim erukwa i, ye gumuglo kin yenabedi erukwa.
12-14Gagrama wagle, Krais kagie mina God ene tadaglmeno gugl ede togwa pre pepa i bogl teiga. Te, Neno Kade moglkwa i, ene kaima pre kan erikwa pre ka i bogl teiga.
Te, ene nenoma mere yegl ta meglkwa i, Yoba ta oknayene ibo moglkwa i, ene pre kan erikwa pre na ka i bogl teiga.
Te, ene kumugl gak meglkwa i, ene yobuglno paugo, God kamo ene meglmara kogon eruko, yagl kide yobuglo ere teigwa pre ka i ene ama bogl teiga.
Tadaglme mabuno wakai ta kankramga paugwa
15Makandigle yoba mabunono i ya bona ganano i, wakai kankrio! Yoba taragl yegl ta wakai kanabuka i, ye dem muduo God ta tekrukwa paugwa. 16I siragl pre yoba mabuno kide deno muduno mina pogglau boglko, eramnedi prisre, taragl kane kane bubuno gogl, yene kagno ake mitna ede, yoba kan atne edidre, erikwa i, makadigle mabunono yegl paugwa ba Neno Kade ta tekrukwa. 17Mabunono i yoba gun yei teigwa ba mabunono i dumo makan bogl akie dudinabrika magigl erukwa. Dudunabuka ba yoba ta God prumere erabuka i, ye aimadi kamin God bogl si dakagl morabrika.
Krais kudamo ikne tau u kodigwa
18Na gagrama wagle, ege dudunabuka magigl erukwa. Te, Antikrais ta unabe dumga i, ye okuo unabuka ba ege erme i, Antikrais tau mere u kodigwa. Yegl pre nono pre pogl sidre, ege dudunabuka magigl erumedi prumga. 19Na Antikrais tau wime diga i, okna no akie mungo, okuo ede meda eigwa yobamo i pre diga. Ye no swara kaima muna, akie mogl pai mungo. Ba ye no kide kodimara i mina nono yoba swara ta moglkrumnedi i nogugl edigwa.
20Ba ene meglkwa i, Mudu Murubuglo ene meglmara mogl togwa pre ka kaima paugwa i, ene mudu pre pogl si kodigwa. 21Pre pogl sikrimedi ka bogl tekrika. Ene pre pogl simedi pepa bogl teiga. Te, ene ama prikwa, ka kibi kane kane ta paugwa i, ka kaima mina plau dikrumedi prikwa.
22Ana ka mabuno kibi dime dumga i, yoba ta ere mogl, Jisas moglkwa i, God Kere Yugwa Yagl ta moglkrume dinbauka i, ye ka kibi dugwa yagle moglkwa. Te, yoba i Krais kudamo ikne ta moglkwa. I siragl pre ye God Nem ya God Wam suo akie moko togwa. 23Te, yoba ta God Wam moko tenabuka i, God Nem ye moglmara mogl tekrukwa. Ba yoba ta ye God Kere Yugwa Yagl moglmedi prabuka i, God Nem ama yoba i moglmara mogl togwa.
Mudu Murubuglo nono God kamo pre pogl sinaiglmedi erabuka
24Ana ene okna ka ta prikwa i, ene ake gi di moraiglkwa. Ene ka okna prikwa i ake gi di meglbi, ene God Wam ya God Nem bogl si dakagl moraiglkwa.
25Te, nono aimadi kamin kor moramga i, Krais ka kaima di padigl noro kodugwa.
26Ana yoba ene bakagl tenamnedi erikwa i pre ka i boglka teiga. 27Ba Krais ene Mudu Murubuglo te kodugo, ene meglmara atne moglkwa pre yoba ta u ka kor ta ene beke tenabuka i ta paikrukwa. I siragl pre Mudu Murubuglo ene taragl kane kane beke te moglkwa. Te, ye ka kibi ta di kankre, ka kaima keme ene beke togwa pre ene ta eraiglmedi ye beke tomere mere yegl, ene ersre, Krais bogl si dakagl molo.
28Na gagrama wagle, Krais u plau dinabuka igne, nono ye gumuglo mina kudugl gogl, agai gogl dinamnedi Krais bogl si dakagl molo!
29Ene Krais yagl du kaima moglmedi prisre, yoba mabuno du kaima ta erikwa i, ama Krais mina u kor eigwa pamedi pitnga.
Currently Selected:
1 Jon 2: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission