1 Jon 3
3
1Neno Kade dem muduo podo kaima norumedi prio! Na gagrama meglmiwe dugo, nono ka kaima ye gagiglma munga. Ba makandigle yoba Neno Kade pre kan erekrikwa pre nono ye gagiglma munga i ama pre kan erekrikwa.
2Na dena muduna teiga meglkwa i, nono erme God gagiglma mogl kodumga ba okuo siragl mere moramga i, teke paugwa. Teke paugwa ba Jisas u plau dinabuka igne i, ye siragl mere moglkwa i, nono gumuglno mina kanamga pre nono ama ye moglmere moramgrawa we di prumga. 3Te yoba nomane yegl pre gi digwa i, ye Jisas du moglmere yegl ye du moramnedi erikwa.
4Ana yoba tadaglme erikwa igne, Lo kane kane si biglke digwa. Te, tadaglme i, Lo si biglki dugwa taragl yogwa. 5Te, enene prikwa i, Krais tadaglmemo ta paikruko, nono tadaglmeno koko ede noragledi ugwa. 6Yegl pre Krais bogl si dakagl meglkwa i, tadaglme ta erekrikwa. Ba tadaglme erikwa i, ye Krais siragl mere moglkwa i, kankre, pre pogl sikre, erikwa.
7Na gagrama wagle, yoba tau ene bakagl te dinaiglmiwa. Yoba ta mabuno du eraiglkwa i, ye Krais yagl du moglmere mere yegl, yoba du meglkwa. 8Ba yoba tadaglme erikwa i, yagl kide moglmere kaima meglkwa. I siragl pre okna ibo ede u erme pra, yagl kide tadaglme keme erukwa. Ba God Wam ugwa i, yagl kide kogonmo ere kide ere tenagledi ugwa. 9God yoba ere i kor edugo, kiano kor igwa i, ye tadaglme eraiglkwa kuno paikrukwa. God yoba ere i kor edugwa i, yene moglmere i, i pi yoba i mina suna edugwa pre ye tadaglme ta erekraiglkwa. 10God gagiglma meglkwa mo yagl kide gagiglma ta moraiglkwa i, ye mabuno eraiglmara i kanamga. Yoba mabuno du ta erekrikwa i, ye God mina moglkrikwa. Te, deno muduno tekrikwa yoba i, ama kuno yegl meglkwa.
Nono deno muduno ikne ikne tenamga paugwa
11Ana okna God ka ta dugo, ene prikwa i, yegl dugwa, Ene deno muduno ikne ikne teo dugwa. 12Tedre, Kein okna erumere erekrio. Kein yagl kide mina moglsre, ye agigle si goglkwa. Te, Kein agigle si goglkwa i, ene ta primo? Kein ebrie mabunomo kide paugo, ye agigle ebrie mabunomo wakai paugwa pre ye kide prisre, agigle si goglkwa. 13Mabuno yegl paugwa pre agrama abarama wagle, makandigle yoba ene ta kide kanibi, ene nagino koglkrio.
14Nono agroma abaroma deno muduno tomga pre geglkwa yugobuno kide kodo, u kor omnedi prumga. Ba agroma abaroma deno muduno tekrumun, nono geglkwa mabuno bogl si dakagl munedi pramga. 15Te, agroma abaroma kide kan meglkwa i, ye yoba si geglkwa yoba bogl kuno meglkwa. Te, yoba si geglkwa yoba meglkwa i, aimadi kamin kor moraiglkwa i bogl si dakagl moglkrikwa.
16Jisas ye nono pre goglmara i mina deno muduno ikne ikne tenamga mabuno i nogugl edugo, kanumga. Te, nono agroma abaroma ake ple di tenamnedi goramga ta panan, ama pra we dinamga paugwa. 17Yoba ta makandigle taragl mere kan nenabuka ba agigle ta ibun inan, ye kandre, ake ple di tekran, God dem muduo norukwa mabuno i, agro i moglmara kogon erekrukwa mere yegl paugwa.
18Na gagrama wagle, nono drano mina yoba deno muduno tomne dikramga ba mabuno eramnara i mina ka kaima i nogugl edinamga. 19-20Nono yegl erumun, God kamo kaima paugwa i mina munedi pramga. Ba God gumuglo mina yage sumnedi prumun, nono deno muduno si gigle di norabuka. I siragl pre ye mabunomo duglo buno mo boglkrumno mo i, deno muduno yene pre kan ersre, si gigle di norabuka.
21Na dena muduna teiga meglkwa i, nono ka i mina yage sikrumnedi prumun, nono kudugl goglkre, kamage eramga. 22Te, God kamo duglo boglsre, mabuno wakai kanumere ta erumun, God siragl mere agle di tenamnere i, ere norabedi pramga.
23Ana God okna lo ta norsre, Na Wana Jisas Krais i, ene pre medigl moglsre, deno muduno ikne ikne teo dugwa ikra, pai moglkwa. 24Nono ye lomo duglo bunga igne, God nono munara mogl noruko, ye bogl si dakagl munga. Te, ye Murubuglomo norukwa i, nono God bogl si dakagl meglmedi di pogl norukwa.
Currently Selected:
1 Jon 3: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission