1 Jon 4
4
Yoba ta u, Mudu Murubuglo ka ta di naruko, die dinabuka i, nono doko kanamga paugwa
1Ene na dena muduna teiga meglkwa i, ka kep yoba kibi mere kide ede u koglo koglo eigwa pre yoba kano tabre pre mediglkrio! God ye kaima ka ta di togo, dimo mo i, ene doko kanaiglkwa paugwa. 2Ene ka ta prisre, yoba ta God Murubuglomo mina ka kaima dumedi praiglkwa i, yegl paugwa, ye ere mogl, Jisas Krais u yoba pidre, ede makandigle umiwe dinan, yoba i God kamo kaima kep ere dumedi praiglkwa. 3Ba yoba ta Jisas u yoba pidre, ede makandigle umiwe ta dikran, ye God kamo kaima ta kep ere dikre, Antikrais okuo unabuka i, nomanemo panabere mere yegl paugwa. Antikrais ikra, okuo unabe digwa prikwa ba yoba tau erme ye nomanemo idre, di wan meglkwa.
4Na gagrama wagle, ene God yobama moglsre, yoba ka kibi digwa i, yobuglo ere te kodigwa. I siragl pre God Murubuglomo ene meglmara suna moglkwa i, ye yobuglo ere, yagl kide makandigle wan moglkwa i, egre togwa. 5Egre togwa ba Ka kep yoba kibi meglkwa i, ye makandigle yoba meglkwa pre yoba nomano pamere ka yegl digo, makandigle yoba ye kano prikwa. 6Ba no munga i, God no dedugo, kogon erumga pre yoba no kano sedigwa i, God ye dede kogon tekrukwa. Te, yoba no kano prikwa i, God pre kan erikwa meglkwa. Ye ka dimara i mina ye God Murubuglomo ka kaima dugwa i, dra idre, dimo mo murubuglo ta ka kibi digwa i, drano idre, dimo mo i, no kaima pre yubu sumga.
Yoba ta dena muduna teie dinan, agiglema abaugloma ama dem muduo tenabuka paugwa
7Ene dena muduna teiga meglkwa i, nono deno muduno ikne ikne tenamga paugwa. I siragl pre deno muduno tenamga mabuno i, God norukwa. Yoba ta dem muduo yoba pere togwa i, ye God gagigle ta moglsre, God pre kan erukwa yoba ta moglkwa. 8Ba yoba ta dem muduo yoba pere ta tekrukwa i, ye God pre kan erekrukwa paugwa. I siragl pre deno muduno tomga mabuno i, God mabunomo paugwa.
9Te, God dem muduo norukwa ede nogugl ugwa kamga i, yegl paugwa, nono u kor enaiglmedi God ye Wam swara moglkwa i, di makadigle edumara i mina i nogugl edugwa. 10Deno muduno tenamga mabuno i, yegl paugwa, nono komono kana God wakai kankrumga ba ye komono kana nono wakai kaima kandre, ye Wam nono tadaglmeno kumapmo tenabedi dedugwa i paugwa.
11Na dena muduna teiga meglkwa i, God dem muduo yegl mere norukwa pre nono ama ikne ikne deno muduno tenamga paugwa. 12Yoba ta God moglkwa ege swara kaima ta kankrikwa ba nono deno muduno ikne ikne tomun, ege i God nono munara suna morabuka. Te, ye dem muduo podo norukwa i, nono munara kau sinabuka.
13God ye Murubuglomo norukwa pre God bogl si dakagl mungo, ye munara mogl norumedi pre kan erumga. 14Pre kan ersre, God Nem ere mogl, ye Wam yoba mudu uglo koglo koglo ere inabedi dedugwa i, no gumuglno mina kandre, yoba di nogugl ede te wan munga.
15Yoba ta ere mogl, Jisas ye God Wam moglmiwe dinabuka yobamo i, God ye moglmara mogl togo, ye God bogl si dakagl miurka. 16Te, God siragl mere dem muduo norukwa i, nono pre pogl sidre, pre medigl kodumga. Deno muduno teigwa mabuno God mina paugwa. Yegl pre yoba ta ege ege deno muduno yoba pere teigwa i, ye God bogl ikne ikne si dakagl meglkwa.
17Nono deno muduno ikne ikne tomun, God dem muduo podo norukwa i, nono munara kau sinabuka. Kau sinan, God nono kan yubu sinabuka igne i, nono kudugl goglkre, moramga. I siragl pre Krais makadigle wan moglmere mere nono ere wan munga. 18Ana deno muduno tomga mabuno i nono munara kau sugwa igne, kudugl gunga mabuno i si meda edugwa. Yegl pre nono deno muduno yoba ta tomin, kudugl goglkramga. I siragl pre kudugl gunga i, God no sinabedi prisre, kudugl gunga. Te, nono kudugl ta gun, God dem muduo podo norukwa i, nono munara kau sikrukwa.
19Ana God komono kana dem muduo norukwa pre nono yoba pere deno muduno tenamga kuno erukwa. 20Ba yoba ere mogl, deno muduno God tomniwe didre, ye agroma deno muduno tekribi, ka kibi digwa. I siragl pre ye agroma abaroma nogugl akie meglkwa tekrikwa panan, God ye ta kankrikwa pre deno muduno tomniwe dibi, kuno erekrabuka. 21Te, God yene lo ta padigl norukwa i, yegl paugwa, yoba ta dem muduo God tenan, ye agiglema ama dem muduo tenabuka keme pame dugwa.
Currently Selected:
1 Jon 4: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission