1 Jon 5
5
God gagiglma meglkwa i, ye Jisas Krais pre mediglsre, yobuglo erikwa
1Yoba ta Jisas ye God Kere Yugwa Yagl moglmedi pre mediglkwa i, ye God gagiglma meglkwa. Te, yoba ta deno muduno God tebi, God gagiglma ama deno muduno tenaiglkwa. 2Nono ka kaima God gagiglma deno muduno tomno mo tekrumno mo i, nono deno muduno God tedre, ye kamo duglo boramnara i mina i nogugl edinamga. 3Te, deno muduno God tenamga mabuno i, yegl mere paugwa, God ta erio dumere i, erumun, nono deno muduno God tomga mere yegl panabuka.
Te, God siragl mere erio di norukwa i, nono duglo boramga i, yubude ta paikrabuka. 4I siragl pre God gagiglma ta moraiglkwa i, ye makadigle yoba mabunono kide win si tenaiglkwa. Ye pre mediglmara i mina kuda yobuglo ersre, mabuno kide erikwa win si tenaiglkwa. 5Jisas God Wam moglmedi pre mediglsre, makandigle yoba mabunono yobuglo ere teigwa pre diga.
6Ana Jisas Krais udre, ye yene God Wam moledi i nogugl ede norukwa i, ye nigl buglmara ya bormaimo suru edumara i mina i nogugl edugwa. Ye nigl burabuka swara ta manugwa ba bormaimo ama suru edenabuka i mina ye yene i nogugl edugwa. Te, God Murubuglomo ye Jisas ira moglkwa di pogl norukwa i, ka kaima keme dinabuka pre ka i kaima paugwa. 7-8Ka kaima taragl suota u swara pidre, Jisas ira moglkwa i, i nogugl ede norikwa. Mudu Murubuglo ta iwa. Jisas nigl buglkwa ta iwa. Te, bormaimo suru edugwa ta iwa.
9Ege sike tau yoba ka digo, nono kaima dimedi prumga ba God ka di pogl noran, ka i kaima pamedi pre medramga. Yegl pre God yene Wam pre dugwa i, win paugwa. 10Yoba God Wam pre mediglkwa i, God Wam kamo i kaima pamedi prikwa. Ba God Wam kamo pre mediglkrikwa i, God pre mediglkrisre, God kibi dumedi prikwa. 11God ye ka ta di nogugl ede norukwa i, yegl paugwa. God Wam swara i mina ye aimadi kamin kor moramga i norie dugwa. 12Yoba ta God Wam yugwa i, ye aimadi kamin kor morabuka i, i kodugwa ba yoba ta God Wam ikrukwa i, ye aimadi kamin kor morabuka i, ta ikrukwa.
13Ene God Wam pre mediglkwa yoba ta meglkwa i, ene aimadi kamin kor moraiglkwa i, kaima i kodumniwedi praiglkwa pre ka i bogl teiga.
14Te, nono kudugl goglkre, God agle di prumga. I siragl pre God yene taragl tau eragledi prumere mere nono ye erabedi agle di prumun, ye nono kano prabuka. 15Te, siragl taragl agle di pramga i, God pre kodumiwa. Kaima norabukra we di pramga.
Ka dudumara
16Ana ene agitn ta tadaglme ere moran, ene kandre, ye gogl dinabedi kamage eratnga paugwa. Ba na diga i, tadaglme tau yoba eribi, God ye tabre si goglkrabuka mere yegl paugwa i pre diga. Tadaglme tau yoba eribi, God ye tabre si gorabuka paugwa ba na tadaglme yegl pre ene kamage eraiglme dikrika. 17Mabuno kane kane ta du paikrukwa i, i tadaglme paugwa. Ba tadaglme tau yoba eriko, God ye tabre si goglkwa. Tau yoba eriko, ye tabre si goglkrukwa.
18Ba God yoba ta ere i kor edugwa i, ye tadaglme erekrimedi prumga. God Wam yoba i suglmo moglko, yagl kide ye ta akekrukwa. 19Te, nono ama prumga, nono God bogl mungo, dumo makan ya makandigle yoba mudu i, yagl kide ake moglmedi prumga.
20Ana nono ama prumga i, God Wam udre, pre pogl sinaiglmedi eruko, nono erme God kaima moglkwa i, pre pogl sinamga kuno erukwa. Te, God Wam Jisas Krais bogl akie si dakagl munga pre God kaima moglkwa i bogl akie si dakagl munga. munga. Te, Jisas Krais ye God kaima moglsre, aimadi kamin kor moramga i, ye mabuno moglkwa.
21Na gagrama wagle, ene god kibi ta kagno kade te dinaiglmiwa. Kan kun erio.
Currently Selected:
1 Jon 5: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission