2 Jon 1
1
Ka bre
1Ene pre mediglkwa yoba meglmara na suglno yagl ta moglka i, ene abu ta God kere yugwa motnga i, gagiglnma bogl akie pepa magigl ya ene bogl teiga.#1.1 Jon ye pepa i abu ta bogl teie dugwa i, yoba mere prikwa ye ka ebrie mere yegl didre, pre mediglkwa yoba bage swara ta meglkwa i pre dumedi prikwa. Na ka kaima ene mudu dena muduna teiga. Na swara i keme ta ene dena muduna tekrika ba yoba mudu ta God kamo kaima paugwa pre pogl sigwa i, ye ama ene deno muduno teigwa. 2No ene deno muduno tomga i, siragl pre God kamo kaima paugwa i, no munara ya ene meglmara paugo, aimadi kamin nono munara ama panabuka. 3Neno Kade God ye Wam Jisas Krais bogl nono mitno goglsre, ere wakai ere noro, deno muduno wida di padigl noro pai morabrika. I siragl pre nono God kamo kaima paugwa i ake mungo, ye deno muduno nono noribrika.
Deno muduno ikne ikne tenamga paugwa
4Ana Neno Kade nono ta erio di norumere i, ene gagiglnma tau ersre, mabuno kaima duglo beglkwa i, na kandre, gun podo kaima yeiga.
5Ana abara yo, na ene erme di tenagledi prika i, nono deno muduno ikne ikne tenamga paugwa. Na ka yegl boglka i, na lo kor ta ene ere tekrika ba nono ka okna pre kodumga ikra boglka. 6Nono deno muduno tenamga mabuno kaima paugwa i, yegl mere paugwa, God siragl mere erio dugwa i, duglo bogl moramga. Te, ye siragl mere erio dugwa i, ene okna ibo pre kodigwa. Ene deno muduno ikne ikne teo dugo, prikwa.
Ka mabuno kibi digwa i, bakagl noro dinaiglmedi kan kun eramga
7Ana ene prio. Yoba ka mabuno kibi digwa i, tau mere ede uglo koglo koglo pidre, yoba bakagl teigwa. Jisas Krais u yoba pidre, yoba ogo gagie idre, ugwa i, ye makadigle yoba ogono gagno pamere kuno yegl paikrume di, yoba bakagl teigwa. Ye yoba bakagl tedre, Krais kudamo ikne meglkwa. 8Yegl pre ene yoba i no bakagl noro dinaiglmedi kan kun erio. Aglau eran, nono taragl wakai ta inamnedi kogon erumga i, ene ikribi, kide panabuka. Ba ene ye ka kibino prikribi, God ene topo ta inaiglkwa yogwa i mudu inaiglkwa, wakai panabuka.
9Ana yoba ta Krais kamo kuno ere ake moglkre, ede eglke enan, ye God bogl si dakagl moglkribrika. Ba yoba ta Krais kamo ake morabuka i, ye God Nem ya God Wam bogl akie si dakagl moraiglkwa. 10Ana yoba ta ene meglmara udre, ka yegl mere ta dikre, ka mabuno pere ta dinan, ene ye wakai we di tekre, ene kipaimara i yugugl edekrio. 11I siragl pre yoba ta ye wakai we di togwa i, yagl kogon kide erukwa i ake ple di togwa.
Ka dudumara
12Na ka tau mere ene di tenaglka paugwa ba na erme pepa ya ink mina borakiurka. Na prika i, na ene meglmara wibo, nono ka di ikne ikne edidre, akie gun yenamnedi prika.
13Ana ene abatn ta God kere yugwa ikra, gagiglma meglkwa i, ene wakai we di teigwa.
Currently Selected:
2 Jon 1: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission