1 Pita 4
4
Mabuno kide okna erumnere i ta erekramga
1Ana Krais ye ogo nagie mina nono giuglno prukwa i pre ene ama ye nomanemo pamere yegl idre, giugl praiglkwa i, ama pra we dio. I siragl pre yoba ta ogo nagie mina Krais pre giugl pran, okuo tadaglme mabuno ta duglo boglkrabuka. 2Yoba i makadigle kor wan morabuka igne i yoba mabuno kide pogglau boglko, duglo bogl wan meglmere yegl, ye duglo boglkre, God ye erabedi prumere ere pai morabuka. 3Ana yoba meda God kamo prikrikwa meglkwa i, ye mabuno kide erimere yegl, ene ama ere kodimedi prika. Okna ene mabuno kide kane kane bubuno goglsre, yagl abu ta bogl kunogl ne wan mogl, spak ere, erikwa. Te, ene okna pati kide ersre, nigl ne, mabuno kide ere, ama God mane dumara i, god kibi kamage ere teigwa. 4Okna ene mabuno yegl erikwa ba erme yoba mabuno kide yegl ere ede podo enamnedi erimara i, ene ye bogl akie erekrikwa pre ye nagino koglsre, ene ka kide di teigwa. 5Ba yoba i, ye okuo kot mina adiglsre, ye mabunono kide i, God gumuglo mina di poraiglkwa paugwa. God ye yoba kor meglkwa ya gogl kodigwa i kot ere tenagledi ere moglkwa.
6Ana God yoba kot ere tenabuka paugwa pre Jisas kamo wakai i yoba di te wan meglko, mere kaima prikwa. Tau mere prisre, geglkwa. Yoba tau prisre, geglkwa i, ye nagino mina tadaglme bi dumara i atne meglkwa pre geglkwa ba ye kiano mina aimadi kor moraiglkwa i, igwa. God yegl keme panabedi di padugl kodugwa.
God kogon kane kane norabuka i, eramga paugwa
7Ana taragl mudu dudunabuka ege i, ede magigl u kodugwa pre ene nomane wakai idre, mabuno kide ta deno muduno mina pogglau borabuka i mane di tenaiglkwa paugwa. Ene yegl ersre, kamage eribi, kuno erabuka. 8Te, ene mabuno podo ta eraiglkwa paugwa i, ene deno muduno ikne ikne tenaiglkwa paugwa. I siragl pre ene mabuno yegl eribi, ene tadaglmeno tau mere si bi di tedre, ake gi di moglkraiglkwa mere yegl paugwa. 9Te, ene mabuno ta ama eraiglkwa paugwa i, agroma abaroma yogugl ta unaiglkwa i, ene i yugugl edidre, ere wakai ere tenaiglkwa paugwa. Te, ye wimara i, yubun norimiwedi ene ka kane kane dikrio. Ene gun yedre, ye ake ple di tenaiglkwa paugwa.
10Ana God ene swara swarade ere wakai ere tedre, ene ye kogonmo pere pere eraiglmedi nomane ya yobuglo togwa pre ene ye kogonmo yoba wakai moramnedi ersre, ye ene kogon ta tenabere mere ere, enene ikne ikne ake ple dio. 11Yoba ka ta dinabuka i, ye God kamo pamere kuno ere dinabuka paugwa. Te, yoba ta yoba pere niglno kogono ere tenabuka i, God ye yobuglo tenabere mere kogon podo erabuka paugwa. Ene yegl eribi, ene mabunono kane kane i, yoba kandre, Jisas Krais kagie mina God di wakai yei tei, kagie kade tenaiglkwa. Jisas Krais moglkwa i, nono bitno mogl pai moglsre, ye aimadi kamin kagie kade i pai morabuka. Kaima.
Krais yubun yumere mere yegl ta imun, gun yenamga paugwa
12Agrama abarama wagle, na dena muduna suna meglkwa i, yubun podo ta ene meglmara plau dugwa i, ene taragl yegl ta plau dikrabuka ba dumedi prisre, nagino koglkrio. Yubun plau dugwa i, ene pre mediglkwa i gigle dumo mo i, nogugl panabedi pre plau dugwa. 13Ana yubun plau dugwa i pre ene kide prikraiglkwa ba okna Krais yubun yumere mere i, no imniwedi prisre, gun yeio. Okuo, Krais ye abuglagemo mina nogugl plau dinabuka igne i ene ama gun podo kaima yenaiglkwa paugwa. 14Te, erme ene Krais kamo di meglkwa i pre yoba ene ka kide ta di tebi, ene ama gun yenaiglkwa paugwa. I siragl pre God Murubuglomo kagie podo kide paugwa i, ene meglmara mogl togwa.
15Ana ene mabuno wakai pre yubun ta ibi, wakai panabuka ba ene yoba ta si goglsre, kunogl nedre, yoba pere kogono ere kide ere tedre, mabuno kide ta ersre, yubun ta ibi, i kide panabuka pre ene mabuno yegl ta erekrio. 16Ba ene Kristen meglkwa i pre yoba ene yubun ta tebi, ene agai goglkrio. Ene agai goglkre, Krais kagie mina yubun yumniwedi pre, God kagie kade teo.
17Nono yubun yegl mere imga i, God yobama munara okna kana plau di kodugwa mere yegl paugwa. Nono okna kana ka tage imga pre yoba God kamo wakai sedigwa meglkwa i, siragl mere ka tage inaiglme? Ye yubun podo kide inaiglkwa. 18God kamo bage ta yegl dugwa,
Yoba ta du meglkwa i, yubun idre keme ede dumo wakaile eigwa pre yoba God mokono tedre, tadaglme ere meglkwa i, siragl eraiglme? Ye yubun podo kaima inaiglmiwe#4.18 Ame Wakai Dinaiglkwa 11.31 Grik mina yake te beglkwa i, yegl mere dugwa.
dugwa.
19Yegl pre God ene yubun ta inaiglmedi pran, ene enene puk si God ogo mina yedre, mabuno wakai ere pai molo. I siragl pre God ye nono beke yedre, ka dumara adigl mogl, suglno wakai moglkwa yagle moglkwa.
Currently Selected:
1 Pita 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission