1 Pita 5
5
Pre mediglkwa suglno yoba ye God yobama sugl wakai moraiglkwa paugwa
1Ana ene tau pre mediglkwa yoba suglno yoba meglkwa i, na ka tau ene di tenagledi prika. Na moglka i, na ama pre mediglkwa yoba suglno yoba ta moglsre, Krais giugl prukwa i, gumuglna mina kaniga. Te, Krais ye abuglagemo mina ede nogugl unabuka igne, God taragl wakai wakai noragle dugwa i, nono akie inamga. Yegl pre na ene ka yegl di tenagledi prika, 2Sipsip sugl meglkwa yoba erimere yegl, ene God yobama sugl wakai moraiglkwa paugwa. God yoba tau ene suglno moraiglmedi togwa i, ene ye suglno wakai moglsre, ake ple di te pai molo. Ene kogon yegl eraiglkwa i, God ene ta erio dinabere yegl, kogon i eraiglkwa paugwa. Yoba ene ake nu sidre, kogon i erio dinaiglkwa i, kuno erekrabuka ba ene deno muduno bogl prawe didre, kogon eraiglkwa. Te, ene kogon yegl ersre, yoba migeno inamnedi prikre, yoba kaima ake ple di tenamnedi prisre, kogon yegl eraiglkwa paugwa. 3God yoba tau ene suglno moraiglmedi togwa i, ene mogl mitna edidre, bitno moramnedi erekraiglkwa ba God yobama, ye sipsip mere yegl meglkwa i, mabuno siragl mere eribi, wakai panabuka i, ene ede okna pidre, obuno di tenaiglkwa paugwa. 4Ene yegl eribi, sipsip sugl meglkwa yoba bitno ta moglkwa i unabuka igne, ye ene topo wakai kaima ta tenabuka. Topo i, king bitno gagl mere yegl yedre, okuo kide ta erekrabuka ba wakai kaima yei, aimadi pogl di yenabuka.
Nono mogl atne edidre, God no suglno morabedi pramga paugwa
5Ene yagl gakamugl ta meglkwa i, ene suglno yoba ta moraiglmara mogl atne ede molo. Te, ene mudu ikne ikne mogl atne edenaiglkwa paugwa. I siragl pre God kamo bage ta yegl dugwa,
Yoba ta mogl mitna edenabuka i, God ye ake atne edenabuka ba yoba ta mogl atne edenabuka i, God ere wakai ere tenabiwe#5.5 Ame Wakai Dinaiglkwa 3.34
dugwa. 6Yegl pre ene mudu God yobuglomo podo pamedi prisre, ye moglmara mogl atne ede molo. Ene yegl eribi, ege swara ta God wakai prumere ene ake mitna edenabuka. 7Te, ene yubuno i, pra pra pia si God ogo mina yenaiglkwa paugwa. I siragl pre God ene mitno goglkwa yagle moglkwa.
8 Ene nomano mina pre pogl sidre, kan kun ere molo. I siragl pre Satan, ene kudano ikne moglkwa i, laion taragl ta si nenagledi be di wan moglmere yegl, ye ene sinagledi ere moglkwa. 9Ba ene pre mediglmara adigl gigledi moglsre, ye si kegl dinaiglkwa paugwa. Te, ene ama praiglkwa i, No yubun yumnere mere yegl, agroma abaroma uglo koglo koglo meglkwa i, ama yubun kuno yegl igo, no imniwe di prio.
10Ana God moglkwa i, nono ege ege ere wakai ere norukwa yagle moglkwa. Te, God yene Krais Jisas kagie mina ene agle di suna edidre, ye abuglagemo mina aimadi kamin wakai moraiglmedi agle dugwa. Yegl pre ene ege sugunagle giugl pre moraiglkwa paugwa ba okuo God ene ere wakai ere tedre, deno muduno si gigle di te, ene adigl gigledi moraiglmedi ere tenabuka. 11Ye swara yobuglomo aimadi kamin podo kide pai, pai kawa tenabuka. Kaima.
Ka dudumara
12Ana ka sugunagle magigl i, ene praiglmedi na di moglko, Sailas pepa mina bogl atne edugwa. Na Sailas kaniga i, ye nono agro moglsre, God kamo duglo bogl moglmedi kaniga. Ana na ka tau ene di te wiga i, ene deno muduno si gigle di tenagledi pre diga. Te, na ene di nogugl ede tenagledi prika i, God nono yoko kaima ere wakai ere norukwa ka i, i swara God kamo kaima paugwa pre ene ka i mina adigl gigledi molo.
13God yobama tau God ye ene bogl akie kere yugo, ye dumo Babilon meglkwa i, ene wakai we di teigwa. Te, Mak na wana mere yegl moglkwa i, ama ene wakai we di togwa. 14Ene enene deno muduno ikne ikne tedre, nuguno kugro, kogl kare di io.
Ana ene Krais yugobunomo suna meglkwa i, deno muduno wida di inaiglmedi prika.
Currently Selected:
1 Pita 5: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission