2 Pita 1
1
1Na Saimon Pita, Jisas Krais niglmo kogonmo yoba moglsre, ye dedugwa yoba ta moglka i, pepa magigl i boglka. Na pepa boglka i, ene yoba ta no ka wakai kaim]a pre medunere mere kuno yegl pre mediglkwa i, bogl teiga. Jisas Krais, ye nono Godno moglsre, nono Ere Yugwa yagl moglkwa i, ye yagl du kaima moglsre, nono pre medraiglmedi erukwa pre nono ye pre medunga. 2God ya nono Yaglno Kade Jisas ene ere wakai ere tedre, deno muduno wida di padigl tebrika i, ene ye siragl mere ta miurere beke pai meglbi, mabuno i u podo enabedi prika.
God yobama mogo wakai koramga paugwa
3Nono Jisas pre kan erumga igne, konbauna kane kane mina nono wakai mogl, God mabunomo sika sinamga i, ye ake ple di norukwa. Norume diga i, Jisas yene God moglsre, yobuglomo mina ake ple di norukwa pre diga. Te, Jisas ye wakai kaima moglko, abuglagemo wakai sumara nono agle di suna edugwa. 4Edidre, ye ka wakai yene, bubuno erukwa promis di padigl norukwa. Ye promis di padigl norukwa i, ene pre gi dibi, God dem muduo pamere ama ene deno muduno yegl panabuka. Panan, yoba mudu tadaglme mina u kide pi meglkwa i, ama mokono tenamga pre promis i norukwa. Yoba tadaglme gun yei teigwa pre u kide pi kodigwa pre diga.
5Ana Jisas taragl kane kane noro kodugwa i pre ene Jisas pre mediglmara i mabuno du eramnedi kogon podo erio. Te, ene mabuno du eraiglmara i, ama nomane wakai io. 6Te, ene nomane wakai inaiglmara i, ama mabuno kide ta deno muduno mina pogglau borabuka i, mane di teo. Te, ene mabuno kide mane di tenaiglmara i, yubun unabuka igne adigl gigledi molo. Te, ene adigl gigledi moraiglmara i, ene God mabunomo ta panabere i erio. 7Te, ene God mabunomo pamere eraiglmara i, ene agroma abaroma wakai kanio. Te, ene agroma abaroma wakai kan moraiglmara i, yoba ama deno muduno teo.
8Ene mabuno wakai yegl, yegl erio diga i, siragl pre mabuno i, ene meglmara pai ede u podo enan, yoko moglkre, mogo wakai kogl moraiglkwa. Ene mogo wakai koraiglme diga i, Yaglno Kade Jisas Krais pre kan erimara i mina mogo koraiglkwa pre diga. 9Ba mabuno wakai i, agro swara ta moglmara paikran, ye gumuglo kin yogwa mere yegl paugwa. Te, God ye tadaglmemo koko ede te kodogwa i, kina yogwa paugwa.
10Ana agrama abarama wagle, God ene ye yobama moraiglmedi kere i pere edidre, agle dugwa. Yegl pre ene yoba pere ido kanaiglmedi i nogugl edidre, na mabuno wakai pre dimere yegl erio. Ene yegl ere meglbi, ene ege swara ta yage sikraiglkwa. 11Te, nono Yaglno Kade Jisas Krais, nono ere yugwa yagl moglkwa i, yoba bitno moglsre, suglno aimadi kamun morabara ene i suna edenabuka igne i ye ene di wakai yei tedre, ene i suna edenabuka.
12Ana na ka erme boglka i, ene pre kan ere kodo, God kamo kaima ene meglmara yogwa i mina adigl gigledi meglkwa. Meglkwa ba ene ege ege poglo di praiglkwa pre di pai moraglka. 13Na ene nomane tedre, ka i poglo di praiglmedi ere mogl pi goraglka i, i aglau eriedi ta prikrika. 14I siragl pre na prika i, na ogona nagna kide kodinaglka ege i, ede magigl u kodugwa. Nono Yaglno Kade Jisas Krais okna di narumere yegl, na goraglka magigl erumedi prika. 15Yegl pre na ka i ene kaima di tenagledi prisre, bogl atne ediga. Siragl pre na goraglka ba ene okuo ka i ama ege ege pre meglbi, kuno erabedi prisre, boglka.
Jisas abuglagemo ye dedugwa yoba kandre, kamo di wai digwa
16Ana no Jisas aposelma munga i, nono Yaglno Kade Jisas Krais yobuglomo podo pamiwe didre, ama ede ikne unabiwe di, ene yegl di tomga i, yoba tau kubu kaman mere yegl ta di noriko, dikrumga. No nono gugmuglno mina ye siragl mere wakai yene moglsre, abuglage podo sugwa i, kamga pre dumga. 17I siragl pre Neno Kade God, ege swara igne Jisas abuglagemo nogugl panabedi ersre, Jisas kagie kade togwa. Neno Kade wakai yene moglsre, abuglagemo podo sugwa i kagie kade tedre, ka yegl dugwa,
I na Wana moglmiwa. Ye na dena muduna suna moglko, na ye wakai kaima kaniwe#1.17 Matyu 17.5, Mak 9.7, Luk 9.35
dugwa. 18God heven ibo mogl, ka yegl dugwa i, no Jisas bogl akie muglo ibo munga igne, prumga. Kamun muglo i, God yene u ka dugwa pre yene dumomo yogwa mere yegl paugwa.
19Ana taragl yegl mere plau dugo, no kandre, Ka kep yoba God kamo okna ta beglkwa i, erme mogo koglmedi kandre, ye kamo pre medunga. Ye ka beglkwa i, ken ta min erumara de, abuglage wakai ta sugwa mere yegl paugwa pre ye kano wakai ere kinano gudu pramga paugwa. Kugl kuri ta tagna mogl ege ege abuglage sugwa i, ene deno muduno mina abuglage podo si tenan, kamin kor ta tagenabuka.
20Ana ene taragl swara ta praiglkwa podo paugwa i, yegl paugwa, God kamo kep yoba meglkwa i, ye God kamo siragl mere beglkwa i, ye yene primere ta boglkrikwa. 21Te, ye yene ka boramnedi prisre, ege swara ta ka kep ere boglkrikwa ba Mudu Murubuglo ye nomane togo, God ye boraiglmedi prumere keme beglkwa.
Currently Selected:
2 Pita 1: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission